ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ք.Ստեփանակերտ

Համաձայն «Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» Լեռնային Ղարաբաղի Հանրապետության օրենքի 8-րդ հոդվածի «ե» ենթակետի և 17-րդ հոդվածի` Լեռնային Ղարաբաղի Հանրապետության կառավարությունը որոշում է.

1. Լեռնային Ղարաբաղի Հանրապետության Հադրութի շրջանի Տյաք գյուղում ստեղծել «Տյաք» պետական պատմամշակութային արգելոց (5,62 հեկտար):

2. Հաստատել`

1) «Տյաք» պետական պատմամշակութային արգելոցի սահմանները` համաձայն N 1 հավելվածի.

2) «Տյաք» պետական պատմամշակութային արգելոցի կանոնադրությունը` համաձայն N 2 հավելվածի:

3. Սահմանել, որ մինչև արգելոցի կառավարման մարմնի կազմավորումը, արգելոցի կանոնադրությամբ նրան վերապահված գործառույթներն իրականացնում է Լեռնային Ղարաբաղի Հանրապետության էկոնոմիկայի նախարարությունը:

4. Լեռնային Ղարաբաղի Հանրապետության էկոնոմիկայի նախարարին` մինչև 2017 թվականի դեկտեմբերի 1-ը Լեռնային Ղարաբաղի Հանրապետության կառավարություն ներկայացնել «Տյաք» պետական պատմամշակութային արգելոցի գործունեության և զարգացման հեռանկարային ծրագիր:

5. Լեռնային Ղարաբաղի Հանրապետության գյուղատնտեսության նախարարությանը, Լեռնային Ղարաբաղի Հանրապետության կառավարության աշխատակազմին` Լեռնային Ղարաբաղի Հանրապետության Հադրութի շրջանի վարչակազմի ղեկավարի հետ համատեղ մինչև 2017 թվականի նոյեմբերի 20-ը Լեռնային Ղարաբաղի Հանրապետության կառավարության հաստատմանը ներկայացնել սույն որոշումից բխող առաջարկություններ`

1) հողամասերի նպատակային նշանակության փոփոխությունների.

2) ըստ անհրաժեշտության ֆիզիկական և իրավաբանական անձանց հողամասերը պետության կարիքների համար օտարելու.

3) հողատարածքներում հողօգտագործման սահմանափակումներ և սերվիտուտներ սահմանելու վերաբերյալ:

6. Սույն որոշումն ուժի մեջ է մտնում պաշտոնական հրապարակմանը հաջորդող տասներորդ օրը:

ԿԱՆՈՆԱԴՐՈՒԹՅՈՒՆ

«ՏՅԱՔ» ՊԵՏԱԿԱՆ ՊԱՏՄԱՄՇԱԿՈՒԹԱՅԻՆ ԱՐԳԵԼՈՑԻ

I. ԸՆԴՀԱՆՈՒՐ ԴՐՈՒՅԹՆԵՐ

1. «Տյաք» պետական պատմամշակութային արգելոցը (այսուհետ՝ արգելոց) ստեղծվել է Լեռնային Ղարաբաղի Հանրապետության կառավարության 2017 թվականի մարտի 14-ի N 155-Ն որոշմամբ, Լեռնային Ղարաբաղի Հանրապետության օրենսդրությամբ սահմանված կարգով, տարածքի պատմամշակութային ու բնապատմական, նյութական և հոգևոր արժեքներն իրենց պատմական, մշակութային ու բնական միջավայրում ամբողջական պահպանման, վերականգնման, ուսումնասիրման և հրապարակային ներկայացման համար՝ գիտահետազոտական, մշակութալուսավորչական և զբոսաշրջային-էքսկուրսիոն նպատակներով: Այն ստեղծվում է «Տյաք» հուշարձանախմբի հատուկ ուսումնասիրման և պահպանական պայմանակարգի (ռեժիմի) սահմանման անհրաժեշտությամբ պայմանավորված, ինչը հնարավորություն կտա նաև ապահովել հուշարձանախմբի հնարավորինս անաղարտ պահպանությունը և դրա նպատակային օգտագործումը: Արգելոցը գտնվում է Լեռնային Ղարաբաղի Հանրապետության Հադրութի շրջանի Տյաք գյուղի վարչական տարածքում:

2. Արգելոցի անվանումն է`

հայերեն լրիվ` «Տյաք» պետական պատմամշակութային արգելոց

հայերեն կրճատ` «Տյաք» պետական արգելոց

ռուսերեն` Историко-культурный государственный заповедник “Тяк„

ռուսերեն կրճատ` Государственный заповедник “Тяк„

անգլերեն լրիվ` State historical and cսltսral reservation “Tyaq„

անգլերեն կրճատ` State reservation “Tyaq„:

3. Արգելոցի ստեղծման նպատակներն են`

1) հուշարձանի պատմամշակութային հողերի և դրանց հարող տեղանքապատկերների (լանդշաֆտների) հնարավորինս անաղարտ պահպանումը.

2) «Տյաք» հնագիտական հուշարձանից հայտնաբերված և այդ հուշարձանին վերաբերող մշակութային արժեքների պահպանումը, ուսումնասիրումը, ինչպես նաև նպատակային օգտագործումը.

3) գիտաճանաչողական զբոսաշրջության զարգացման նախադրյալների ստեղծումը և բնակչության մշակութային ժառանգության նկատմամբ հարգանքի ձևավորումը:

4. Արգելոցի տարածքում իրականացվող գործունեության հիմնական ուղղություններն են.

1) գիտաֆոնդային. թանգարանային, արխիվային և գրադարանային ֆոնդերի գիտական կոմպլեկտավորում, հավաքածուների պահպանության և պետական հաշվառման կազմակերպում, դրանց գույքագրում, թանգարանային համալիրների ուսումնասիրություն և համակարգում.

2) գիտահետազոտական. թանգարանային հավաքածուների, պատմական, ճարտարապետական և բնական հուշարձանների ուսումնասիրություն և համակարգում, ցուցադրանմուշային և ցուցահանդեսային ծրագրերի մշակում, սեմինարների, խորհրդակցությունների, կոնֆերանսների անցկացում.

3) էքսպոզիցիոն-ցուցահանդեսային. էքսպոզիցիաների և ցուցահանդեսների նախագծում, դրանց մոնտաժում և ապամոնտաժում, էքսպոզիցիաների պահպանության ապահովում.

4) վերականգնողական-կոնսերվացիոն. հավաքածուների, մշակութային և ճարտարապետական հուշարձանների վերականգնման և կոնսերվացման ապահովում.

5) լուսավորչական և էքսկուրսա-զբոսաշրջային. էքսկուրսիաների անցկացման, էքսկուրսա-զբոսաշրջային ծրագրերի իրագործման, զանգվածային միջոցառումների կազմակերպման միջոցով պատմության, մշակույթի և բնական հուշարձանների հանրամատչելիացում, ժողովրդական մշակութային ավանդույթների տնտեսավարման և բնօգտագործման ավանդական ձևերի ուսումնասիրություն, աջակցություն և վերածնում.

6) խմբագրահրատարակչական և գովազդային. գիտահետազոտական գործունեության արդյունքների, ժողովածուների, գիտական և ցուցահանդեսային պաստառների, գովազդների հրատարակման նախապատրաստություն, տեսաֆիլմերի ստեղծում, հեռահաղորդակցական համակարգերի կիրառում.

7) տնտեսական. տնտեսական գործունեության վարում, առաջադրված խնդիրների իրականացում.

8) միջազգային. միջազգային մշակութային կապերի իրականացում, թանգարանային զբոսաշրջության կազմակերպում և զարգացում.

9) պահպանական. թանգարան-արգելոցի տարածքի, ֆոնդերի, պատմամշակութային հուշարձանների անվտանգության միասնական համակարգի ստեղծում:

III. ԱՐԳԵԼՈՑԻ ՊԱՅՄԱՆԱԿԱՐԳԸ (ՌԵԺԻՄԸ)

5. Արգելոցի տարածքում արգելվում է`

1) տնտեսական և բնակելի օբյեկտների շինարարությունն ու շահագործումը, ճանապարհների, խողովակաշարերի, էլեկտրահաղորդման գծերի և հաղորդակցության այլ ուղիների շինարարությունը` բացառությամբ արգելոցի գործունեության համար անհրաժեշտ օբյեկտների շինարարության.

2) մեքենայացված տրանսպորտային միջոցների երթևեկությունը և կանգառը` թույլատրված ճանապարհային ցանցի սահմաններից դուրս կամ դրա համար չնախատեսված վայրերում.

3) երկրաբանահետախուզական աշխատանքները, որոնք ուղեկցվում են փորձնական հանույթներով, մակաբացումներով, պայթեցումներով և բնապատմական միջավայրը խախտող այլ տեխնիկական միջոցների կիրառմամբ.

4) օգտակար հանածոների մշակումը, հանքաշերտերի, հանքաելուստների և լեռնատեսակների ելքերի շահագործումը.

5) ցանկացած այլ գործունեություն, որը խախտում, աղճատում, նսեմացնում է արգելոցի պայմանակարգը, հնագիտական հուշարձանները կամ սպառնում գիտական և (կամ) մշակութային արժեքի պահպանությանը:

IV. ԱՐԳԵԼՈՑԻ ՊԱՀՊԱՆՈՒԹՅՈՒՆԸ

6. Արգելոցի պահպանությունը, ուսումնասիրությունը, օգտագործումը և հանրահռչակումն իրականացնում է «Պատմական միջավայրի պահպանության պետական ծառայություն» պետական ոչ առևտրային կազմակերպությունը:

7. Արգելոցի տարածքում գտնվող հուշարձաններին և դրանց բնապատմական միջավայրին առնչվող աշխատանքները համաձայնեցվում են պետական լիազոր մարմնի հետ: