ք.Ստեփանակերտ

Ղեկավարվելով «Աշխարհագրական անվանումների մասին» Լեռնային Ղարաբաղի Հանրապետության օրենքով և ԼՂՀ կառավարության 26.04.05թ. «Լեռնային Ղարաբաղի Հանրապետության աշխարհագրական անվանումների հաշվառման և գրանցման, պետական քարտադարանի ստեղծման և վարման մասին» թիվ 232 որոշմամբ հաստատված կարգին համապատասխան

1. Հաստատել Լեռնային Ղարաբաղի Հանրապետության աշխարհագրական անվանումների հաշվառման և գրանցման, պետական քարտադարանի ստեղծման և վարման հրահանգը (կցվում է):

2. Հրահանգը սահմանված կարգով ներկայացնել Լեռնային Ղարաբաղի Հանրապետության արդարադատության նախարարություն` պետական գրանցման:

3. Սույն հրամանի կատարման վերահսկողությունը դնել պետական կոմիտեի նախագահի տեղակալ Ա.Ծատուրյանի վրա:

1. Սույն հրահանգով կանոնակարգվում են Լեռնային Ղարաբաղի Հանրապետության աշխարհագրական օբյեկտների գրանցման և հաշվառման, պետական քարտադարանի ստեղծման և վարման աշխատանքները:

2. Լեռնային Ղարաբաղի Հանրապետության աշխարհագրական անվանումների հաշվառման աշխատանքներն իրականացվում են առանձին համայնքներով: Շրջանների` համայնքների վարչական սահմաններից դուրս գտնվող տարածքները կարող են ներկայացվել առանձին հատվածներով:

3. Լեռնային Ղարաբաղի Հանրապետության աշխարհագրական անվանումների հաշվառման աշխատանքներն իրականացվում են փուլերով.

- նախապատրաստական

- դաշտային

- գրասենյակային:

4. Նախապատրաստական աշխատանքների ժամանակ հավաքագրվում են տվյալ համայնքի տարածքում գտնվող բոլոր աշխարհագրական անվանումները:

Հաշվառման համար որպես սկզբնաղբյուր են ծառայում`

ա/ Լեռնային Ղարաբաղի Հանրապետության տարածքի 1:10000, 1:25000, 1:50000, 1:100000, 1:200000, 1:500000 և 1:1000000 մասշտաբի տեղագրական քարտեզները և 1:500, 1:1000, 1:2000 և 1:5000 մասշտաբի տեղագրական հատակագծերը,

բ/ կադաստրային քարտեզները և հատակագծերը,

գ/ տեղեկատուներում, բառարաններում, ցանկերում և ցուցակներում տրված աշխարհագրական անվանումները,

դ/ օրենսդրական և ենթաօրենսդրական իրավական ակտերով /վարչա-տարածքային բաժանումների աշխարհագրական անվանումների անվանակոչումներին և անվանափոխումներին վերաբերվող օրենքներ, որոշումներ և այլն/ սահմանված աշխարհագրական անվանումները,

ե/ տեղագիտական, աշխարհագրական, երկրագիտական, ազգագրական, պատմական և այլ ուսումնասիրություններում, գիտական աշխատություններում օգտագործված աշխարհագրական անվանումները:

5. Հավաքագրված բոլոր անվանումները ըստ համայնքների ամփոփվում են առանձին թղթապանակում: Թղթապանակում են դրվում նաև համայնքի տարածքի 1:10000 /1:25000/ մասշտաբի տեղագրական, հողաշինարարական կամ կադաստրային քարտեզների պատճենները, իսկ ներբնակավայրային աշխարհագրական օբյեկտների հաշվառման համար` բնակավայրի 1: 2000 /1:5000/ մասշտաբի տեղագրական կամ կադաստրային քարտեզների պատճենները:

6. Դաշտային աշխատանքների իրականացման ժամանակ տարածքին քաջածանոթ բնակիչներից, մասնագետներից հարցումների միջոցով ճշտվում են նախապատրաստական փուլի ընթացքում հավաքագրված բոլոր աշխարհագրական օբյեկտների անվանումները, որից հետո 1:1000 /1:25000/ մասշտաբի քարտեզի վրա տեղադրվում են աշխարհագրական օբյեկտների սահմանները և անվանումները, բացառությամբ բնակավայրի ներսում տեղադրված օբյեկտների, որոնք տեղադրվում են 1:2000 /1:5000/ մասշտաբի քարտեզի վրա:

7. Գրասենյակային աշխատանքների իրականացման փուլում դասակարգվում են բոլոր աշխարհագրական անվանումները և լրացվում են հաշվառման ձևաթղթերում /աղ. 1/:

8. Յուրաքանչյուր համայնքի համար առանձնացվում են հաշվառման առանձին ձևաթղթեր: Հաշվառման թերթիկի 1-ին սյունակը նախատեսված է աշխարհագրական օբյեկտի հերթական համարակալման համար: Համարակալումը կատարվում է համայնքի սահմաններում արաբական թվերի աճողական հերթականությամբ: Սկզբում համարակալվում են վարչա-տարածքային և տարածքային /հավելված 1/, հետո ֆիզիկա-աշխարհագրական /հավելված 2/, այնուհետև ինժեներա-տեխնիկական /հավելված 3/, իսկ վերջում` ներբնակավայրային աշխարհագրական օբյեկտները /հավելված 4/:

9. Համայնքների սահմաններից դուրս գտնվող, կամ մի քանի համայնքի տարածքով անցնող օբյեկտները ամփոփվում են շրջանային կտրվածքով: Մի քանի շրջանների տարածքում գտնվող աշխարհագրական օբյեկտները` հանրապետության կտրվածքով:

10. Հաշվառման թերթիկի երկրորդ սյունակում գրվում են տվյալ աշխարհագրական օբյեկտի մասին նախապատրաստական և դաշտային աշխատանքների ընթացքում բացահայտված բոլոր անվանումները: Յուրաքանչյուր անվանում գրվում է սյունակի առանձին տողում: Առաջին տողում գրվում է ներկայումս գործածվող անվանումը:

11. Երրորդ սյունակում տրվում է յուրաքանչյուր աշխարհագրական օբյեկտի բոլոր անվանումների կարգավիճակի մասին տվյալներ /հավելված 5/:

12. Չորրորդ սյունակում տրվում է աշխարհագրական օբյեկտի գտնվելու վայրը /շրջան, համայնք/ հինգերորդում` տեղագրական քարտեզի համարը, վեցերորդում` օբյեկտի աշխարհագրական կոորդինատները մինչև մեկ րոպե ճշտությամբ, սկզբում նշելով աշխարհարհագրական երկայնությունը, այնուհետև` լայնությունը:

13. Յոթերորդ սյունակում տրվում է աշխարհագրական օբյեկտի տիպը, ութերորդում` ենթատիպը, իններորդում` տեսակը: Աշխարհագրական օբյեկտներն ըստ տիպերի, ենթատիպերի և տեսակների տրված են հավելված 1-4 համապատասխան շերտերով, օրինակ` տիպ-ֆիզիկա-աշխարհագրական ենթատիպ-ռելիեֆ, տեսակ-լեռնաշղթա:

14. Տասներորդ սյունակում տվյալ աշխարհագրական օբյեկտի յուրաքանչյուր անվանման դիմաց տրվում է տվյալ անվանման աղբյուրը /հավելված 6/:

15. Տասնմեկերորդ սյունակում տրվում է աշխարհագրական օբյեկտի գործի /քարտարանի/ համարը:

16. Լրացված հաշվառման ձևաթղթերը ներկայացվում են համապատասխան համայնքի ղեկավարին` համաձայնեցման համար: Համաձայնեցված հաշվառման ձևաթղթերի պատճենները ներկայացվում են Լեռնային Ղարաբաղի Հանրապետության աշխարհագրական օբյեկտների անվանակոչումների և անվանափոխումների մասնագիտական հանձնաժողովին /այսուհետև` հանձնաժողով/ հաշվառված աշխարհագրական օբյեկտների անվանումների գրանցման վերաբերյալ եզրակացություն ստանալու համար: Հանձնաժողովը մեկ ամսվա ընթացքում մասնագիտական եզրակացություն է ներկայացնում գրանցման ենթակա աշխարհագրական օբյեկտների անվանումների վերաբերյալ: Աշխարհագրական օբյեկտների անվանումների գրանցման վերաբերյալ եզրակացության համարը, ամիսը և ամսաթիվը գրանցվում է տասներկուերորդ սյունակում, իսկ տասներեքերորդում գրանցվում է հանձնաժողովի կողմից ընդունված աշխարհագրական անվանումը /անվանումները/:

17. Տասնչորսերորդ սյունակում տրվում են աշխարհագրական օբյեկտների լատիներեն և ռուսերեն տառադարձությունները, իսկ տասնհինգերորդ սյունակը նախատեսված է տվյալ աշխարհագրական օբյեկտի անվանմանը առնչվող այլ տեղեկությունների լրացման համար:

18. Գրանցման ենթակա աշխարհագրական անվանումները ներկայացվում են ԼՂՀ անշարժ գույքի կադաստրի պետական կոմիտեի /այսուհետև` կադաստրի պետական կոմիտե/ տեղեկատվական կենտրոն աշխարհագրական անվանումների գրանցման մատյանում /աղյուսակ 2/ գրանցելու համար:

ԼՂՀ օրենքով կամ ԼՂՀ կառավարության կողմից սահմանված աշխարհագրական անվանումները ենթակա են անմիջապես գրանցման:

19. Գրանցման մատյանները էջակալվում և համարակալվում են ըստ աշխարհագրական օբյեկտների տիպերի և ենթատիպերի, օրինակ` վարչա-տարածքային և տարածքային աշխարհագրական օբյեկտների գրանցման մատյանները համարակալվում են 1.1, 1.2, ֆիզիկա-աշխարհագրական օբյեկտները` 2.1, 2.2, 2.3, ինժեներա-տեխնիկական` 3.1, 3.2, իսկ ներբնակավայրային օբյեկտները` 4.1, 4.2 թվերով: Մեկ հատորից ավելի ծավալ ունեցող մատյանները համարակալվում են հռոմեական թվերով:

20. Գրանցման մատյանի առաջին սյունակում տրվում է աշխարհագրական օբյեկտի հերթական համարը:

21. Երկրորդ սյունակում տրվում է աշխարհագրական օբյեկտի գրանցման ենթակա անվանումը:

22. Երրորդ սյունակում տրվում է աշխարհագրական օբյեկտի անվանման գրանցման տարեթիվը, ամիսը և ամսաթիվը:

23. Չորրորդ սյունակում տրվում է աշխարհագրական օբյեկտի գտնվելու վայրը /շրջան, համայնք/, հինգերորդում տրվում է աշխարհագրական օբյեկտի աշխարհագրական կոորդինատները մեկ րոպեի ճշտությամբ: Կոորդինատները տրվում են`

- կետային պատկերում ունեցող աշխարհագրական օբյեկտների /աղբյուր, լեռնագագաթ, ջրհոր, կայարան և այլն/ համար` այդ օբյեկտների կենտրոններին,

- գծային պատկերում ունեցող աշխարհագրական օբյեկտների համար` վերջնային կետին /գետերի և գետակների համար/, սկզբնային կետին /ջրանցքների համար/, ամենաբարձր կետին /լեռնաշղթաների համար/: Եթե գծային պատկերում ունեցող աշխարհագրական օբյեկտը հատում է ԼՂՀ տարածքի սահմանագիծը, ապա վերջնային կամ սկզբնային պետք է համարել սահմանը հատող կետը, իսկ ամենաբարձրը` աշխարհագրական օբյեկտի ԼՂՀ տարածքի ներսում գտնվող ամենաբարձր կետը:

24. Վեցերորդ սյունակում տրվում է տեղագրական քարտեզի, թերթի /թերթերի/ համարը /համարները/:

25. Յոթերորդ սյունակում տրվում է աշխարհագրական օբյեկտի ծածկագիրը, որը թվերի համակցություն է` կազմված երեք խումբ թվերից:

Առաջին խումբը բաղկացած է 5 թվից և իրենից ներկայացնում է շրջանի /երկու նիշ/ և համայնքի / երեք նիշ/ ծածկագիրը:

Համայնքների վարչական սահմաններից դուրս գտնվող շրջանի տարածքները համարակալվում են տվյալ շրջանի վերջին համայնքի թվին հաջորդող հարյուրյակ գումարած մեկ թվից հյուսիս-արևմուտքից դեպի հարավ-արևելք:

Երկրորդ խումբը բաղկացած է 4 թվից, որից առաջին միանիշ թիվը աշխարհագրական օբյեկտի տիպի համարն է, երկրորդ միանիշ թիվը աշխարհագրական օբյեկտի ենթատիպի համարն է, որին հաջորդող երկնիշ թիվը աշխարհագրական օբյեկտի տեսակի համարն է:

Երրորդ խումբը բաղկացած է 3 թվից, և իրենից ներկայացնում է համայնքի տարածքում տվյալ օբյեկտի տեսակի հերթական համարը:

Աշխարհագրական օբյեկտների համարակալումը սկսվում է տվյալ համայնքի հյուսիս-արևմտյան մասից և շարունակվում է զիգզագաձև ուղղությամբ դեպի հարավ-արևելք:

26. Ութերորդ սյունակում` աշխարհագրական օբյեկտի գործի համարը և էջը /էջերը/, իններորդ սյունակում աշխարհագրական օբյեկտի անվանման լատիներեն և ռուսերեն տառադարձությունը, տասերորդ սյունակում` այլ տեղեկություններ:

27. Գրանցման մատյաններում թույլ տված անճշտությունները և վրիպակները ուղղվում են կարմիր գրիչով և ստորագրվում գրանցման աշխատանքներ իրականացնող պատասխանատու անձի կողմից /հավելված 4/:

28. Գրանցված աշխարհագրական անվանումները արտահայտվում են 1:25000 կամ 1:50000 մասշտաբի տեղագրական քարտեզների պատճենների վրա: Առանձին տարածքներում, որտեղ քարտեզի մասշտաբը հնարավորություն չի տալիս արտահայտելու տվյալ վայրի բոլոր աշխարհագրական անվանումները, թույլատրվում է օգտագործել սույն հրահանգի 4-րդ կետի «ա» ենթակետում նշված տեղագրական քարտեզները և հատակագծերը:

29. Աշխարհագրական անվանումների հաշվառման և գրանցման աշխատանքները կատարվում են անընդհատ` հաշվառման և գրանցման մատյաններում և քարտեզներում /հատակագծերում/:

30. Աշխարհագրական օբյեկտների անվանումների հաշվառման և գրանցման տվյալները կենտրոնացվում են ԼՂՀ անշարժ գույքի կադաստրի պետական կոմիտեի տեղեկատվական բանկում /պետական քարտադարանում/ /հավելված 6/:

31. ԼՂՀ աշխարհագրական անվանումների պետական քարտադարանը բաղկացած է յուրաքանչյուր աշխարհագրական օբյեկտի վերաբերյալ փաստաթղթերից: Այդ փաստաթղթերն են`

ա/ տեղագրական քարտեզի հատվածի պատճենը` տվյալ աշխարհագրական օբյեկտի սահմաններով,

բ/ աշխարհագրական օբյեկտի անվանումը սահմանող` անվանակոչող և անվանափոխող փաստաթղթերը,

գ/ հանձնաժողովի առաջարկություններն ու եզրակացությունները,

դ/ հաշվառման ձևաթղթերը.

Փաստաթղթերն ամփոփվում են յուրաքանչյուր համայնքի կտրվածքով:

32. Պետական քարտադարանի թարմացումը կատարվում է աշխարհագրական օբյեկտների անվանակոչման և անվանափոխման նյութերի հիման վրա:

33. Աշխարհագրական օբյեկտների անվանումների մասին տեղեկատվության տրամադրումը բաց է և իրականացվում է ներկայացված հայտերի հիման վրա:

34. Հաշվառման ձևաթղթերում, գրանցման մատյաններում և պետական քարտադարանում պարունակվող տվյալների պահպանումը, թարմացումը և տրամադրումը իրականացվում է ավանդա-կան /թղթե/ և էլեկտրոնային եղանակներով:

35. Պետական քարտադարանի տվյալների հիման վրա պարբերաբար հրատարակվում են ԼՂՀ աշխարհագրական անվանումների պաշտոնական տեղեկատու /գազետիր/, ընդհանուր և թեմատիկ բառարաններ, այլ տեղեկատուներ և ցանկեր:

*Ծանոթություն` Առաջին խումբը բաղկացած է 5 թվից և իրենից ներկայացնում է շրջանի /երկու նիշ/ և համայնքի /երեք նիշ/ ծածկագիրը: Երկրորդ խումբը բաղկացած է 4 թվից, որից առաջին միանիշ թիվը` աշխարհագրական օբյեկտի տիպի համարն է, երկրորդ միանիշ թիվը` աշխարհագրական օբյեկտի ենթատիպի համարն է, որին հաջորդող երկնիշ թիվը` աշխարհագրական օբյեկտի տեսակի համարն է: Երրորդ խումբը բաղկացած է 3 թվերից և իրենից ներկայացնում է համայնքի տվյալ օբյեկտի տեսակի հերթական համարը:

1. պաշտոնական

2. ոչ պաշտոնական

Աշխարհագրական օբյեկտի անվանման աղբյուրը

1. պաշտոնական

2. քարտեզագրական

3. գիտական

4. գրական-բանահյուսական

5. վիմագրական

6. բանավոր