ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
|
1 օգոստոսի 2017թ. |
N 564-Ն |
ք. Ստեփանակերտ
«ԳԱՆՁԱՍԱՐ», «ՀՈՒՆՈՏԻ ԿԻՐՃ» ԵՎ «ՏՈՂ» ԶԲՈՍԱՇՐՋԱՅԻՆ ԵՐԹՈՒՂԻՆԵՐՈՎ ՈՒՂԵՎՈՐԱՓՈԽԱԴՐՈՒՄՆԵՐԻ ՄԱՍԻՆ
«Զբոսաշրջության և զբոսաշրջային գործունեության մասին» Լեռնային Ղարաբաղի Հանրապետության օրենքի 5-րդ հոդվածին համապատասխան, ներքին զբոսաշրջության զարգացմանը խթանելու նպատակով` Լեռնային Ղարաբաղի Հանրապետության կառավարությունը ո ր ո շ ու մ է.
1. Հաստատել «Գանձասար», «Հունոտի կիրճ» և «Տող» զբոսաշրջային երթուղիներով ուղևորափոխադրումների կազմակերպման պայմանները` համաձայն հավելվածի:
2. Լեռնային Ղարաբաղի Հանրապետության ֆինանսների նախարարությանը` Լեռնային Ղարաբաղի Հանրապետության 2017 թվականի պետական բյուջեով նախատեսված Լեռնային Ղարաբաղի Հանրապետության կառավարության պահուստային ֆոնդի միջոցներից Լեռնային Ղարաբաղի Հանրապետության էկոնոմիկայի նախարարությանը 2017 թվականի ինն ամսում հատկացնել 3 131 000 (երեք միլիոն հարյուր երեսունմեկ հազար) ՀՀ դրամ (բյուջետային ծախսերի տնտեսագիտական դասակարգման 423400 «Տեղեկատվական ծառայություններ» հոդվածով՝ 266 000 ՀՀ դրամ, 423900 «Ընդհանուր բնույթի այլ ծառայություններ» հոդվածով՝ 2 865 000 ՀՀ դրամ)` սույն որոշման 1-ին կետում նշված զբոսաշրջային երթուղիներով 2017 թվականի հուլիսի 20-ից մինչև սեպտեմբերի 1-ը ուղևորափոխադրումները կազմակերպելու նպատակով:
3. Լեռնային Ղարաբաղի Հանրապետության էկոնոմիկայի նախարարին` սույն որոշման 2-րդ կետում նշված ժամկետի ավարտից հետո Լեռնային Ղարաբաղի Հանրապետության կառավարությանը ներկայացնել հաշվետվություն՝ ծախսված գումարների և արդյունքների մասին:
4. Սույն որոշումն ուժի մեջ է մտնում պաշտոնական հրապարակմանը հաջորդող օրվանից, իսկ դրա գործողությունը տարածվում է 2017 թվականի հուլիսի 20-ից հետո ծագած հարաբերությունների վրա:
|
ԼԵՌՆԱՅԻՆ ՂԱՐԱԲԱՂԻ
ՀԱՆՐԱՊԵՏՈՒԹՅԱՆ ՎԱՐՉԱՊԵՏ |
Ա.ՀԱՐՈՒԹՅՈՒՆՅԱՆ |
|
|
Հավելված
Լեռնային Ղարաբաղի
Հանրապետության կառավարության
2017 թվականի օգոստոսի 1-ի N 564-Ն որոշման |
Պ Ա Յ Մ Ա Ն Ն Ե Ր
«ԳԱՆՁԱՍԱՐ», «ՀՈՒՆՈՏԻ ԿԻՐՃ» ԵՎ «ՏՈՂ» ԶԲՈՍԱՇՐՋԱՅԻՆ ԵՐԹՈՒՂԻՆԵՐՈՎ ՈՒՂԵՎՈՐԱՓՈԽԱԴՐՈՒՄՆԵՐԻ
1. Սույնով հաստատվում են Լեռնային Ղարաբաղի Հանրապետության պատմամշակութային վայրեր ճանաչողական այցերի (ուղևորության)` Ստեփանակերտից դեպի «Գանձասար», «Հունոտի կիրճ» և «Տող» զբոսաշրջային երթուղիներով (այսուհետ` զբոսաշրջային երթուղի) ուղևորափոխադրումների կազմակերպման պայմանները:
2. Զբոսաշրջային երթուղիներով ուղևորափոխադրումները կազմակերպվում են Լեռնային Ղարաբաղի Հանրապետության էկոնոմիկայի նախարարության (այսուհետ՝ նախարարություն) և ուղևորափոխադրումներ իրականացնող կազմակերպության կամ անհատ ձեռնարկատիրոջ (այսուհետ` փոխադրող) միջև կնքված ուղևորափոխադրումների կազմակերպման պայմանագրի (այսուհետ՝ պայմանագիր) հիման վրա:
3. Պայմանագիրը կնքվում է զբոսաշրջային պայմաններին համապատասխանող արտաքին ու ներքին կահավորվածությամբ ավտոբուսներ ունեցող փոխադրողի հետ:
4. Պայմանագրում մանրամասն սահմանվում են ուղևորափոխադրումների կազմակերպման, ուղերթերի գրանցման, փոխադրավարձերի վճարման և այլ պայմանները:
5. Սույն պայմանների 1-ին կետում նշված զբոսաշրջային երթուղիներով իրականացված ուղևորափոխադրումների վճարները (փոխադրավարձերը) վճարում է նախարարությունը` պայմանագրի հիման վրա, տասնհինգօրյա պարբերականությամբ:
6. Ուղևորափոխադրումներն իրականացվում են վաճառվող ուղետոմսերի հիման վրա: Ուղետոմսերն ունեն տպարանային համարակալում և համարվում են խիստ հաշվառման փաստաթուղթ:
7. Ուղետոմսերի վաճառքը կազմակերպվում է «Կենտրոնական ավտոկայան» փակ բաժնետիրական ընկերության կողմից, որոնց վաճառքի գները կազմում են`
1) «Նիկոլ Դումանի տուն-թանգարան»-«Գանձասար» ուղղությամբ` 250 ՀՀ դրամ.
2) «Հունոտի կիրճ» ուղղությամբ` 100 ՀՀ դրամ.
3)«Տնջրե»-«Տող» ուղղությամբ` 250 ՀՀ դրամ:
|
ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ
ԿԱՌԱՎԱՐՈՒԹՅԱՆ ԱՇԽԱՏԱԿԱԶՄԻ
ՂԵԿԱՎԱՐ-ՆԱԽԱՐԱՐ |
Լ. ԳՐԻԳՈՐՅԱՆ |