ք. Ստեփանակերտ

Հիմք ընդունելով Լեռնային Ղարաբաղի Հանրապետության ջրային օրենսգրքի 44-րդ և 79-րդ հոդվածները, Լեռնային Ղարաբաղի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովը ո ր ո շ ու մ է.

1. Հաստատել.

1) խմելու ջուր մատակարարող ընկերությունների կողմից սպառողներին մատուցվող ծառայությունների որակի չափանիշների սահմանման և այդ չափանիշների մոնիթորինգի կարգը համաձայն հավելված թիվ 1-ի.

2) խմելու ջուր մատակարարող ընկերությունների կողմից սպառողներին մատուցվող ծառայությունների որակի չափանիշների ներդրման և մոնիթորինգի ժամանակացույցը համաձայն հավելված թիվ 2-ի:

2. Ընդունել ի գիտություն, որ մինչև 2011 թվականի դեկտեմբերի 30-ը Լեռնային Ղարաբաղի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովը կհաստատի.

1) խմելու ջուր մատակարարող ընկերությունների կողմից սպառողներին մատուցվող ծառայությունների որակի ցուցանիշների գրանցման մատյանների օրինակելի ձևերը և դրանց վարման կարգը.

2) Լեռնային Ղարաբաղի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողով ներկայացվող տեղեկատվության օրինակելի ձևերը և դրանց ներկայացման կարգը:

3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Սույն կարգով սահմանվում են խմելու ջուր մատակարարող ընկերությունների կողմից մատուցվող ծառայությունների որակի չափանիշների սահմանման սկզբունքները և այդ չափանիշների մոնիթորինգի կարգը:

1. Լեռնային Ղարաբաղի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովը (այսուհետև` Հանձնաժողով) խմելու ջուր մատակարարող ընկերությունների (այսուհետև` Ընկերություն) համար սահմանում է մատուցվող ծառայությունների որակի չափանիշների հետևյալ խմբերը.

1) հիմնական չափանիշներ, որոնք ուղղակիորեն բխում են Ընկերություն-սպառող պայմանագրային հարաբերություններից,

2) ընդհանուր չափանիշներ, որոնք անուղղակի են ազդում Ընկերություն-սպառող պայմանագրային հարաբերությունների վրա և բնութագրում են Ընկերության գործունեությունը:

2. Մատուցվող ծառայությունների որակի հիմնական չափանիշներն են`

1) ջրամատակարարման հաստատված գրաֆիկների և տևողության պահպանումը.

2) սահմանազատման կետերում (մուտքագծերի վրա) ջրի ճնշման տեխնիկական կանոնակարգերով սահմանված մեծությունների ապահովումը.

3) ջրամատակարարման համակարգում պլանային աշխատանքները սկսելու վերաբերյալ սահմանված ժամկետներում տեղեկատվության տրամադրումը սպառողներին.

4) ջրամատակարարման համակարգում պլանային աշխատանքների դեպքում ջրամատակարարման ընդհատման առավելագույն տևողությունը.

5)ջրամատակարարման համակարգում վթարների հետևանքով ջրամատակարարման ընդհատումների առավելագույն տևողությունը.

6) ջրամատակարարման համակարգում վթարների դեպքում ջրամատակարարման վերականգնման ժամկետի վերաբերյալ տեղեկատվության տրամադրումը սպառողներին.

7) սպառողների դիմում-բողոքներին արձագանքման տևողությունը.

8) ջրամատակարարման վերաբերյալ սպառողներից տեղեկատվություն ստանալու և հաղորդելու համար շուրջօրյա հեռախոսակապի առկայությունը:

3. Մատուցվող ծառայությունների որակի ընդհանուր չափանիշներն են`

1) սանիտարական նորմերով և կանոններով սահմանված խմելու ջրի որակի ապահովումը.

2) անհատական ջրամատակարարում ունեցող և ջրամատակարարման ընդհանուր ծորակից օգտվող սպառողների թիվը.

3) խմելու ջրի կորուստները ջրամատակարարման համակարգում.

4) սպառողների դիմում-բողոքների քանակը` ըստ դասակարգումների:

4. Խմելու ջուր մատակարարող ընկերությունների համար մատուցվող ծառայությունների որակի ցուցանիշները Հանձնաժողովը սահմանում է յուրաքանչյուր Ընկերության համար:

5. Յուրաքանչյուր Ընկերության համար մատուցվող ծառայությունների որակի ցուցանիշները Հանձնաժողովը սահմանում է սույն կարգի 10-րդ կետում սահմանված` առնվազն մեկ տարվա տեղեկատվական բազայի հիման վրա ձևավորված առաջարկը Ընկերության հետ քննարկման արդյունքի հիման վրա:

6. Ընկերությունը պարտավոր է ապահովել մատուցվող ծառայությունների որակի հիմնական չափանիշների Հանձնաժողովի կողմից հաստատված արժեքները:

7. Ընկերությունը պարտավոր է վարել մատուցվող ծառայությունների որակի հիմնական և ընդհանուր ցուցանիշների գրանցման մատյաններ:

8. Գրանցման մատյանները լրացնող անձինք պետք է հրահանգավորված լինեն գրանցումների հաճախության և բովանդակության վերաբերյալ:

9. Գրանցման մատյաններից քաղված տեղեկատվությունը Ընկերությունը Հանձնաժողով է ներկայացնում Հանձնաժողովի սահմանած ձևերով և պարբերականությամբ:

10. Ընկերության կողմից Հանձնաժողովի սահմանած մատուցվող ծառայությունների որակի չափանիշների ապահովումը Հանձնաժողովը գնահատում է հետևյալ տեղեկատվական բազայի ուսումնասիրության միջոցով`

1) ներկայացված տեղեկատվության (ծառայությունների մատուցման սպասարկման որակի ցուցանիշների գրանցման մատյանների հիման վրա կազմած).

2) անկախ տեխնիկական աուդիտորների ներկայացրած հաշվետվությունների.

3) Լեռնային Ղարաբաղի Հանրապետության արտադրական ենթակառուցվածքների նախարարություն, Լեռնային Ղարաբաղի Հանրապետության առողջապահության նախարարության պետական հիգիենիկ և հակահամաճարակային տեսչության և այլ մարմիններից ստացված տեղեկատվության.

4) Հանձնաժողովին ուղղված սպառողների դիմում-բողոքների.

5) մատուցվող ծառայությունների որակի չափանիշների խախտումների վերաբերյալ զանգվածային լրատվական միջոցներում հրապարակված և սպառողների շահերը պաշտպանող հասարակական կազմակերպություններից ստացված տեղեկատվության, ինչպես նաև Ընկերության մոտ իրականացված մոնիթորինգի` տեղում անցկացված ուսումնասիրությունների միջոցով (ներկայացված տեղեկատվության հավաստիություն, տեղեկատվության ձևի և ներկայացման կարգի պահպանում և այլն):

11. Մատուցվող ծառայությունների որակի ցուցանիշների վերաբերյալ Ընկերության կողմից ներկայացված տեղեկատվության հավաստիությունը Հանձնաժողովը ստուգում է համադրելով.

1) գրանցման մատյանների հիման վրա ներկայացրած տեղեկատվությունը,

2) սպառողների շրջանում անցկացված հարցումների արդյունքները,

3) սպասարկման տարածքներում իրականացված մոնիթորինգի արդյունքները,

4) սպառողներին ներկայացվող հաշիվ-ապրանքագրերը:

12. Անհրաժեշտության դեպքում ներկայացված տեղեկատվության հավաստիության ուսումնասիրման համար Հանձնաժողովը կարող է օգտագործել նաև այլ տեղեկատվություն:

13. Մատուցվող ծառայությունների որակի ցուցանիշների մոնիթորինգի արդյունքների հրապարակայնությունն ապահովվում է.

1) քննարկելով մոնիթորինգի արդյունքները սպառողների շահերը պաշտպանող հասարակական կազմակերպությունների հետ,

2) մոնիթորինգի արդյունքների մասին հաշվետվությունը տեղադրելով Հանձնաժողովի ինտերնետային կայքում: