ք.Ստեփանակերտ

Ղեկավարվելով «Ավիացիայի մասին» Լեռնային Ղարաբաղի Հանրապետության օրենքի 12-րդ հոդվածի 6-րդ մասով.

1. Սահմանել օդանավակայանների կողմից թռիչք-վայրէջքների համար ժամանակահատված տրամադրելու կարգը` համաձայն հավելվածի:

2. Սույն հրամանն ուժի մեջ է մտնում պաշտոնական հրապարակման օրվան հաջորդող տասներորդ օրը:

1. Օդանավակայանների կողմից թռիչք-վայրէջքների համար ժամանակահատված տրամադրելու կարգը (այսուհետ՝ Կարգ) սահմանում է օդանավակայանի կողմից ուղևորային և բեռնային փոխադրումներ իրականացնող օդանավ շահագործողներին թռիչք-վայրէջքների համար ժամանակահատվածներ տրամադրելու գործընթացը:

2. Կարգի նպատակն է կանոնակարգել օդանավակայանում իրականացվող օդանավերի անվտանգ ու կանոնավոր փոխադրահոսքերը, ելնելով օդանավակայանի շահագործողական ցուցանիշներից:

3. Սույն Կարգի իմաստով օդանավակայանի շահագործողական ցուցանիշներ են համարվում՝

1) օդանավակայանի աերոդրոմի տարրերի շահագործողական բնութագրերը.

2) օդանավակայանի ուղևորային և բեռնային համալիրների թողունակությունը.

3) օդանավերի վերգետնյա սպասարկման համար նախատեսված անհրաժեշտ տեխնիկական, ինչպես նաև մարդկային ռեսուրսները:

4. Օդանավակայաններում թռիչք-վայրէջքների համար ժամանակահատվածի (այսուհետ՝ ՍԼՕՏ) տրամադրումը հիմնվում է չեզոք, հստակ և ոչ խտրական հիմքերի վրա:

5. ՍԼՕՏ-ի տրամադրման նպատակով օդանավակայանների գործադիր մարմինների կողմից ստեղծվում է աշխատանքային խումբ (այսուհետ՝ խումբ), որը կազմվում է օդանավակայանի, օդային երթևեկության սպասարկման և օդանավակայանում վերգետնյա սպասարկում իրականացնող ծառայությունների, ինչպես նաև մաքսային, սահմանապահ և միգրացիոն մարմինների ներկայացուցիչներից, իրենց համաձայնությամբ:

Խմբի որոշմամբ նրա նիստերին կարող են հրավիրվել և մասնակցել օդանավ շահագործողների ներկայացուցիչները:

6. Կանոնավոր չվերթերի համար ՍԼՕՏ-երի տրամադրումն իրականացվում է տարին երկու անգամ օդանավ շահագործողների հայտերի հիման վրա՝ ամառային և ձմեռային չվացուցակները հաստատելու ժամանակ:

Ամառային կամ ձմեռային չվացուցակը հաստատվում է Լեռնային Ղարաբաղի Հանրապետության կառավարությանն առընթեր քաղաքացիական ավիացիայի վարչության (այսուհետ՝ Վարչություն) կողմից օդանավ շահագործողի հայտի և խմբի եզրակացության հիման վրա:

7. Ելնելով օդանավակայանի շահագործողական ցուցանիշներից խումբը կարող է մերժել ներկայացված հայտը, օդանավ շահագործողին ներկայացնելով մերժման հիմնավորումը և իր առաջարկությունը` հնարավոր ՍԼՕՏ-ի հատկացման վերաբերյալ:

Հայտի մերժումը, դրա հիմնավորումը և իր առաջարկությունները խումբն օդանավ շահագործողին է ներկայացնում գրավոր ձևով ոչ ուշ, քան 10-օրյա ընթացքում, հակառակ դեպքում հայտը համարվում է ընդունված:

8. Փոխադարձ պայմանավորվածությամբ և Վարչությանը ու խմբի համաձայնությամբ ՍԼՕՏ-երը կարող են փոխանակվել օդանավ շահագործողների միջև:

9. Օդանավակայանում առաջացած արտակարգ իրավիճակների դեպքում (ռազմական դրություն, օդանավակայանի աշխատանքային ռեժիմի սահմանափակում՝ կապված աերոդրոմի վերանորոգման, եղանակային պայմանների հետ, հատուկ չվերթերի իրականացման ժամանակ և այլն), եթե դա բխում է թռիչքների անվտանգության ապահովման պահանջներից խումբը կարող է դիմել Վարչությանը ՍԼՕՏ-երի կասեցման կամ տեղափոխման առաջարկով:

10. Խումբը կարող է դիմել Վարչությանը օդանավ շահագործողին հատկացված ՍԼՕՏ-ի կասեցման առաջարկով, եթե նրա կողմից չի ապահովվում հատկացված ՍԼՕՏ-ի կանոնավոր իրականացումը (չվերթի պարբերաբար չեղյալ հայտարարում, հետաձգում, ուշացում և այլն):

11. Ոչ կանոնավոր (լրացուցիչ և չարտերային (պատվիրված)) չվերթերի ՍԼՕՏ-երը տրվում են օդանավակայանի համապատասխան ծառայության կողմից, «Ավիացիայի մասին» Լեռնային Ղարաբաղի Հանրապետության օրենքի 49-րդ հոդվածով սահմանված թույլտվությունների առկայության դեպքում: