ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆՆ

ԱՌԸՆԹԵՐ ԱՆՇԱՐԺ ԳՈՒՅՔԻ ԿԱԴԱՍՏՐԻ ՊԵՏԱԿԱՆ ԿՈՄԻՏԵԻ ՆԱԽԱԳԱՀ

Հ Ր Ա Մ Ա Ն

 ք. Ստեփանակերտ

ԱՆՇԱՐԺ ԳՈՒՅՔԻ ՆԿԱՏՄԱՄԲ ԻՐԱՎՈՒՆՔՆԵՐԻ ՊԵՏԱԿԱՆ ԳՐԱՆՑՄԱՆ ՄԻԱՍՆԱԿԱՆ ՄԱՏՅԱՆԻ ՁԵՎԸ ԵՎ ԴՐԱՆՈՒՄ ՏԵՂԵԿՈՒԹՅՈՒՆՆԵՐԻ ԼՐԱՑՄԱՆ ԱՌԱՆՁՆԱՀԱՏԿՈՒԹՅՈՒՆՆԵՐԸ ՀԱՍՏԱՏԵԼՈՒ ՄԱՍԻՆ

«Գույքի նկատմամբ իրավունքների պետական գրանցման մասին» Լեռնային Ղարաբաղի Հանրապետության օրենքի 13-րդ հոդվածի 2-րդ մասին համապատասխան`

ՀՐԱՄԱՅՈՒՄ ԵՄ`

1. Սահմանել`

1) անշարժ գույքի նկատմամբ իրավունքների պետական գրանցման միասնական մատյանի ձևը` համաձայն հավելված 1-ի.

2) անշարժ գույքի նկատմամբ իրավունքների պետական գրանցման միասնական մատյանում տեղեկությունների լրացման առանձնահատկությունները` համաձայն հավելված 2-ի:

2. Լեռնային Ղարաբաղի Հանրապետության կառավարությանն առընթեր անշարժ գույքի կադաստրի պետական կոմիտեի աշխատակազմի ղեկավար Դ. Դադայանին՝ սույն հրամանը սահմանված կարգով ներկայացնել Լեռնային Ղարաբաղի Հանրապետության արդարադատության նախարարություն` պետական գրանցման:

3. Սույն հրամանն ուժի մեջ է մտնում 2012 թվականի հուլիսի 1-ից:

ԱՆՇԱՐԺ ԳՈՒՅՔԻ ՆԿԱՏՄԱՄԲ ԻՐԱՎՈՒՆՔՆԵՐԻ

ՊԵՏԱԿԱՆ ԳՐԱՆՑՄԱՆ ՄԻԱՍՆԱԿԱՆ ՄԱՏՅԱՆԻ ՁԵՎ

ԱՆՇԱՐԺ ԳՈՒՅՔԻ ՄԻԱՎՈՐԻ ՆԿԱՏՄԱՄԲ ԻՐԱՎՈՒՆՔՆԵՐԻ ԳՐԱՆՑՄԱՆ ԹԵՐԹԻԿ

Ենթաբաժին 1.2. Շենք

Ենթաբաժին 1.3. Շինություն

ԲԱԺԻՆ 2. ԱՆՇԱՐԺ ԳՈՒՅՔԻ ՄԻԱՎՈՐԻ ՆԿԱՏՄԱՄԲ ԻՐԱՎՈՒՆՔՆԵՐԸ

Ենթաբաժին 2.1. Հողամաս

Ենթաբաժին 2.2. Շենք

Ենթաբաժին 2.3. Շինություն

ԲԱԺԻՆ 3. ԱՆՇԱՐԺ ԳՈՒՅՔԻ ՄԻԱՎՈՐԻ ՆԿԱՏՄԱՄԲ ՍԱՀՄԱՆԱՓԱԿՈՒՄՆԵՐԸ

Ենթաբաժին 3.1.Սահմանափակումներ, իրավունքի ձեռքբերում և դադարում

Ենթաբաժին 3.2.Գրավ, հիփոթեք. իրավունքի ձեռքբերում և դադարում

Ենթաբաժին 3.3. Վարձակալություն. իրավունքի ձեռքբերում և դադարում

Ենթաբաժին 3.4.Սերվիտուտ. իրավունքի ձեռքբերում և դադարում

1. Լեռնային Ղարաբաղի Հանրապետության կառավարությանն առընթեր անշարժ գույքի կադաստրի պետական կոմիտեի աշխատակազմի տարածքային ստորաբաժանումներում կադաստրային տարածքների և ենթատարածքների համար ըստ պետական գրանցման սուբյեկտների առանձնացվում են անշարժ գույքի նկատմամբ իրավունքների պետական գրանցման միասնական մատյաններ՝

1) պետական սեփականություն հանդիսացող անշարժ գույքի նկատմամբ իրավունքների պետական գրանցման միասնական մատյան՝ N 1.

2) համայնքային սեփականություն հանդիսացող անշարժ գույքի նկատմամբ իրավունքների պետական գրանցման միասնական մատյան՝ N 2.

3) իրավաբանական անձանց սեփականություն հանդիսացող անշարժ գույքի նկատմամբ իրավունքների պետական գրանցման միասնական մատյան՝ N 3.

4) Լեռնային Ղարաբաղի Հանրապետության քաղաքացիների սեփականություն հանդիսացող անշարժ գույքի նկատմամբ իրավունքների պետական գրանցման միասնական մատյան՝ N 4.

5) օտարերկրյա պետությունների և կազմակերպությունների, օտարերկրյա քաղաքացիների և քաղաքացիություն չունեցող անձանց սեփականություն հանդիսացող անշարժ գույքի նկատմամբ իրավունքների պետական գրանցման միասնական մատյան՝ N 5:

2. Անշարժ գույքի նկատմամբ իրավունքների պետական գրանցման միասնական մատյանը բաղկացած է անշարժ գույքի գրանցման թերթիկներից: Անշարժ գույքի յուրաքանչյուր միավորի համար լրացվում է գրանցման առանձին թերթիկ, որի վերևի ձախ անկյունում հատկացված մասում նշվում է տվյալ անշարժ գույքի վերաբերյալ կադաստրային գործի համարը, իսկ դրանից վերև՝ աղյուսակից դուրս, մատիտով նշվում է նաև տվյալ անշարժ գույքի համար տրված իրավունքի պետական գրանցման վկայականի համարը:

3. Գրանցման թերթիկը կազմված է հետևյալ բաժիններից`

Բաժին 1. Անշարժ գույքի միավորի նկարագիրը.

Բաժին 2. Անշարժ գույքի միավորի նկատմամբ իրավունքները.

Բաժին 3. Անշարժ գույքի միավորի նկատմամբ սահմանափակումները:

Գրանցման թերթիկի վերը նշված բաժինները կազմված են ենթաբաժիններից, իսկ վերջիններս, ըստ տվյալների լրացման, կազմված են հերթական համարակալումով սյունակներից:

Յուրաքանչյուր ենթաբաժնում լրացումներ կատարելու համար նախատեսվում է հինգ տող:

4. «Անշարժ գույքի միավորի նկարագիրը» և «Անշարժ գույքի միավորի նկատմամբ իրավունքները» բաժիններն ունեն երեք ենթաբաժին`

1) հողամաս.

2) շենք.

3) շինություն:

Ենթաբաժին 1.1. Հողամաս

ըստ սյունակների լրացվում են`

1) Կադաստրային ծածկագիրը (համարը) - նշվում է կադաստրային քարտեզագրման արդյունքների հիման վրա տրված ծածկագիրը (նշված սյունակի տողերում թվերը չտեղավորվելու դեպքում օգտագործվում են հաջորդականությամբ մյուս տողերը).

2) Գտնվելու վայրը (հասցեն) - նշվում է համառոտ հասցեն (շրջան, համայնք) տարածք, փողոց, (հնարավորության դեպքում նաև հողամասի անվանումը).

3) Նպատակային նշանակությունը – նշվում է նպատակային նշանակությունն ըստ հողային ֆոնդի` գյուղատնտեսական, բնակավայրերի, արդյունաբերության, անտառային, ջրային, պահուստային և այլն.

4) Օգտագործման նպատակը – նշվում է անշարժ գույքի օգտագործման նպատակը՝ հողատեսքը կամ գործառնական նշանակությունը (օրինակ՝ վարելահող, բազմամյա տնկարկ, բնակելի կառուցապատման, հասարակական կառուցապատման, արդյունաբերական օբյեկտների հողերի).

5) Ընդհանուր մակերեսը (քառ.մ) - նշվում է քառակուսի մետրերով.

Հողամասի չափը լրացնելիս ենթաբաժնի 5-րդ սյունակում լրացվում է հողամասի ընդհանուր մակերեսը, իսկ 6-15 սյունակներում հողամասերի չափերը լրացվում են ըստ հողատեսքերի (վարելահող, բազմամյա տնկարկներ, խոպան, խոտհարք, արոտ, անօգտագործելի, տնամերձ, այգեգործական, բնակելի տան շինարարության և սպասարկման համար, հասարակական, արտադրական օբյեկտների կառուցման և սպասարկման համար):

6) Կադաստրային արժեքը (հազ. դրամ) - նշվում է կադաստրային գնահատման արդյունքով հաշվարկված արժեքը՝ Հայաստանի Հանրապետության դրամով:

Ենթաբաժին 1.2. Շենք

ըստ սյունակների լրացվում են`

1) Կադաստրային ծածկագիրը (համարը) - նշվում է կադաստրային քարտեզագրման արդյունքների հիման վրա տրված ծածկագիրը (նշված սյունակի տողերում թվերը չտեղավորվելու դեպքում օգտագործվում են հաջորդականությամբ մյուս տողերը).

2) Նպատակային նշանակությունը – նշվում է նպատակային նշանակությունն ըստ Լեռնային Ղարաբաղի Հանրապետության քաղաքաշինության նախարարի և Լեռնային Ղարաբաղի Հանրապետության կառավարությանն առընթեր անշարժ գույքի կադաստրի պետական կոմիտեի նախագահի 2005 թվականի հոկտեմբերի 3-ի թիվ 01/874 և թիվ 72-Կ համատեղ հրամանով հաստատված կարգի`

ա. բնակելի,

բ. հասարակական,

գ. արտադրական:

3) Օգտագործման նպատակը (անվանումը) - նշվում է օգտագործման նպատակն իրավահաստատող փաստաթղթերի հիման վրա (բնակելիի դեպքում՝ բնակարան, բնակելի տուն և այլն, հասարակականի դեպքում՝ առևտրի սրահ, տաղավար և այլն, արտադրականի դեպքում՝ գործարան, արտադրամաս և այլն).

4) Ընդհանուր բնութագիրը – տրվում է ընդհանուր նկարագիրը, նշելով`

անհատական բնակելի տների համար՝ հարկայնությունը, հարկի բարձրությունը, ծածկը (փայտ, երկաթբետոն), պատերի շինանյութը (տուֆ, բետոն, բազալտ, փայտ, աղյուս, բուտաքար), շահագործման տևողությունը, ավարտվածության աստիճանը (մինչև 50%, 50%-80% ու ավելի), տանիքը, կոմունալ հարմարությունների ապահովություն, վնասվածության աստիճանը, արտաքին հարդարումը, տեղադրությունը (գոտիականությունը).

բազմաբնակարան բնակելի շենքերի բնակարանների համար` պատերի շինանյութը (տուֆ, երկաթբետոն), ծածկը (փայտ, երկաթբետոն), բնակարանի հարկը, հարկի ներքին բարձրությունը, շահագործման տևողությունը, վնասվածության աստիճանը, ավարտվածության աստիճանը (մինչև 50%, 50%-80% ու ավելի): Շենքերի ընդհանուր ծավալում գտնվող հասարակական և արտադրական նշանակության տարածքների համար լրացվում են բնակարանի համար նախատեսված տվյալները, իսկ առանձին կանգնած հասարակական և արտադրական շինությունների համար` անհատական բնակելի տների համար նախատեսված տվյալները:

5) Ընդհանուր մակերեսը (քառ.մ.) – նշվում է քառակուսի մետրերով

Այդ թվում` բնակելի, օժանդակ.

6) Կադաստրային արժեքը (հազ. դրամ) - նշվում է կադաստրային գնահատման արդյունքում ստացված արժեքը` Հայաստանի Հանրապետության դրամով:

Ենթաբաժին 1.3. Շինություն

ըստ սյունակների լրացվում են`

1) Կադաստրային ծածկագիրը (համարը) - նշվում է կադաստրային քարտեզագրման արդյունքների հիման վրա տրված ծածկագիրը (նշված սյունակի տողերում թվերը չտեղավորվելու դեպքում օգտագործվում են հաջորդականությամբ մյուս տողերը).

2) Օգտագործման նպատակը (անվանումը) - նշվում է օգտագործման նպատակը իրավահաստատող փաստաթղթերի հիման վրա` ավտոտնակ, անասնաշենք և այլն.

3) Ընդհանուր բնութագիրը – նշվում է հարկայնությունը, հարկի բարձրությունը, ծածկը (փայտ, երկաթբետոն), պատերի շինանյութը (տուֆ, բետոն, բազալտ, փայտ, աղյուս, բուտաքար), շահագործման տևողությունը, ավարտվածության աստիճանը` տոկոսներով, տեղադրությունը և այլն.

4) Ընդհանուր մակերեսը (քառ.մ.) – նշվում է քառակուսի մետրերով.

5) Կադաստրային արժեքը (հազ.դրամ) - նշվում է կադաստրային գնահատման արդյունքում ստացված արժեքը` Հայաստանի Հանրապետության դրամով:

Ենթաբաժին 2.1. Հողամաս

ըստ սյունակների լրացվում են`

1) Սեփականատիրոջ (օգտագործողի)` ազգանունը, անունը (անվանումը), բնակության (գտնվելու) վայրը – լրացվում են բոլոր սեփականատերերի ազգանունները, անունները, (անվանումները) (դրանք համարակալվում են), հասցեները.

2) Իրավունքի տեսակը, գործողության ժամկետը – (տեսակը) սյունակում նշվում է սեփականության կամ օգտագործման, իսկ գործողության ժամկետը` անժամկետ կամ պայմանագրում նշված ժամկետը.

Սեփականության իրավունքը նշելիս, եթե բաժնային սեփականություն է` նշվում է բաժնային, եթե ընդհանուր համատեղ սեփականություն է` ընդհանուր համատեղ:

3) Ընդհանուր սեփականության դեպքում` համասեփականատերերի թիվը, բաժնեմասը (տոկոս) - նշվում է յուրաքանչյուր սեփականատիրոջ բաժնեմասը, եթե բաժնային սեփականություն է, սեփականատիրոջ անուն-ազգանունի դիմաց նշվում է բաժնեմասի չափը` կոտորակով կամ տոկոսով:

4) Իրավունքը հաստատող փաստաթուղթը և ամիս-ամսաթիվը - նշվում են իրավունքի պետական գրանցման համար հիմք հանդիսացող իրավահաստատող փաստաթղթերի անվանումները, փաստաթղթի կազմման (ընդունման, հաստատման) ամսաթիվը, առկայության դեպքում՝ փաստաթղթի համարը, վարչական մարմինների կամ դատարանների կողմից ընդունված փաստաթղթերի դեպքում՝ նաև փաստաթուղթը ընդունած մարմնի անվանումը:

5) Իրավունքի դադարումը հաստատող փաստաթուղթը և ամիս-ամսաթիվը - նշվում է իրավունքի դադարման համար հիմք հանդիսացող իրավահաստատող փաստաթղթերի անվանումները, փաստաթղթի կազմման (ընդունման, հաստատման) ամսաթիվը, առկայության դեպքում՝ փաստաթղթի համարը, վարչական մարմինների կամ դատարանների կողմից ընդունված փաստաթղթերի դեպքում՝ նաև փաստաթուղթը ընդունած մարմնի անվանումը:

Ենթաբաժին 2.2. Շենք

Ենթաբաժին 2.3. Շինություն

«Շենք» և «Շինություն» ենթաբաժիններում նշված սյունակների լրացումները կատարվում են «Հողամաս» ենթաբաժնի լրացման կարգին համապատասխան: Շենքերում գտնվող անշարժ գույքի առանձին միավորներից (բնակարաններ, առևտրի սպասարկման օբյեկտներ և այլն) յուրաքանչյուրն իր առանձին կադաստրային ծածկագրով պետք է ունենա առանձին գրանցման թերթիկ: Շենքերում գտնվող բնակարանների, առևտրի սպասարկման օբյեկտների և այլ շինությունների անհատական համարները պետք է կապված լինեն այն հողամասերի համարներին, որոնց վրա գտնվում են այդ շենքերը:

Ենթաբաժին 3.1. Սահմանափակումներ, իրավունքի ձեռք բերում և դադարում

ըստ սյունակների լրացվում են`

1) Այն սեփականատիրոջ (օգտագործողի) անունը (անվանումը), ում օգտին է ձեռք բերվել սահմանափակումը – սյունակում լրացվում է, օրինակ` գրավի պայմանագրի պետական գրանցման դեպքում սահմանափակման կիրառման ժամանակ` գրավառուի տվյալները, հարկադիր կատարումն իրականացնող մարմնի որոշմամբ սահմանափակում կիրառելու դեպքում` հարկադիր կատարումն իրականացնող մարմնի տվյալները և այլն.

2) Սահմանափակման` առարկան, ժամկետը – նշվում են անշարժ գույքը (մասը), որի նկատմամբ կիրառվում է սահմանափակումը, և այն ժամկետը, որը նախատեսված է սահմանափակման իրավունքը հաստատող փաստաթղթում: Եթե սահմանափակման իրավունքը հաստատող փաստաթղթում նման ժամկետ մատնանշված չէ, ապա գրվում է անժամկետ.

3) Սահմանափակման պայմանները, բնույթը - նշվում է, թե ինչպիսի պայմաններ են նախատեսված սահմանափակման իրավունք հաստատող փաստաթղթում, օրինակ` գրավատուն իրավունք չունի սահմանափակման ընթացքում գույքը տնօրինել, գրավառուն իրավունք չունի գույքը հանձնել երրորդ անձի օգտագործմանը և այլն.

4) Իրավունքի սահմանափակումը հաստատող փաստաթուղթը և ամիս-ամսաթիվը – նշվում է հարկադիր կատարումն իրականացնող մարմնի, դատարանի, դատախազի, քննիչի որոշումը, գրավի պայմանագիրը և այլն, ինչպես նաև տվյալ որոշման կայացման կամ պայմանագրի կնքման ամիս-ամսաթիվը.

5) Իրավունքի սահմանափակման դադարումը հաստատող փաստաթուղթը և ամիս-ամսաթիվը – նշվում է այն փաստաթղթի անվանումը, ամիս-ամսաթիվը, որի ուժով դադարել է տվյալ սահմանափակումը:

Ենթաբաժին 3.2. Գրավ, հիփոթեք, իրավունքի ձեռք բերում և դադարում

ըստ սյունակների լրացվում են`

1) Գրավառուի ազգանունը, անունը (անվանումը), բնակության (գտնվելու) վայրը – նշվում է գրավ ստացող անձի տվյալները, գրավառուի բնակության (գտնվելու) վայրը, եթե քաղաքացի է` մշտական բնակության հասցեն, իրավաբանական անձի դեպքում` իրավաբանական հասցեն.

2) Գրավի առարկան – նշվում է անշարժ գույքը (մասը), որը գրավ է դրվել.

3) Գրավի առարկայի արժեքը (դրամ) - նշվում է գրավի պայմանագրում գրավի առարկայի նշված արժեքը` Հայաստանի Հանրապետության դրամով.

4) Գրավի պայմանագրի կնքման ամիս-ամսաթիվը, համարը – նշվում է գրավի պայմանագրի վավերացման ամիս- ամսաթիվը.

5) Գրավի գործողության ժամկետը – նշվում է պայմանագրում նշված ժամկետը.

6) Գրավի պայմանագրով նախատեսված հիմնական պարտավորությունները և պայմանները – նշվում է հիմնական պարտավորությունը, որը նախատեսված է պայմանագրով.

7) Տեղեկություններ նախորդ գրավի մասին – նշվում է վերջին գրավի պայմանագրի ժամկետը` սկիզբը և վերջը, գրավառուի անունը, ազգանունը (անվանումը).

8) Իրավունքի դադարումը հաստատող փաստաթղթի անվանումը, ամիս-ամսաթիվը – նշվում է այն փաստաթղթի անվանումը, որի ուժով դադարել է գրավի պայմանագիրը` դատարանի վճիռը, հարկադիր կատարողի որոշումը, աճուրդի արձանագրությունը, առուվաճառքի պայմանագիրը, կողմերի համաձայնությունը (վավերացված նոտարական կարգով):

Ենթաբաժին 3.3. Վարձակալություն, իրավունքի ձեռք բերում և դադարում

ըստ սյունակների լրացվում են`

1) Վարձակալի` ազգանունը, անունը (անվանումը), բնակության (գտնվելու) վայրը – նշվում է օգտագործողի անունը, ազգանունը՝ ֆիզիական անձի դեպքում, անվանումը՝ իրավաբանական անձի դեպքում, բնակության (գտնվելու) վայրը (քաղաքացու դեպքում` մշտական բնակության հասցեն, իրավաբանական անձի դեպքում` իրավաբանական հասցեն).

2) Վարձակալության առարկան - նշվում է անշարժ գույքը (մասը), որը հանձնված է վարձակալության.

3) Վարձակալության պայմանագրի կնքման ամիսը-ամսաթիվը և համարը - նշվում է, երբ է կնքվել վարձակալության (անհատույց օգտագործման) պայմանագիրը և համարը.

4) Վարձակալության գործողության ժամկետը – նշվում է պայմանագրում նշված ժամկետը` 1 տարի, 5 տարի և այլն.

5) Վարձակալության պայմանագրով նախատեսված հիմնական պարտավորությունները և պայմանները – նշվում է վարձակալության (անհատույց օգտագործման) պայմանագրում նշված պայմանները.

6) Ենթավարձակալության առկայությունը – նշվում է ենթավարձակալության պայմանագրի ամիս - ամսաթիվը, ենթավարձակալի տվյալները.

7) Իրավունքի դադարումը հաստատող փաստաթղթի անվանումը, ամիս - ամսաթիվը – նշվում է օրինակ` դատարանի վճիռը, որի ուժով դադարել է վարձակալությունը, պայմանագիրը` եթե ավարտվել է վարձակալության ժամկետը և այլն:

Սույն ենթաբաժնում է կատարվում նաև անշարժ գույքի անհատույց օգտագործման, ֆինանսական վարձակալության (լիզինգի) պայմանագրից ծագող իրավունքների պետական գրանցումը:

Ենթաբաժին 3.4. Սերվիտուտ. իրավունքի ձեռք բերում և դադարում

ըստ սյունակների լրացվում են`

1) Սերվիտուտի իրավունքից օգտվողի` ազգանունը, անունը (անվանումը), բնակության (գտնվելու) վայրը – նշվում է այն անձի անունը, ազգանունը (անվանումը), ում տրամադրվել է սերվիտուտի իրավունք (օրինակ` անցուդարձի, ճանապարհից օգտվելու).

2) Սերվիտուտի առարկան – նշվում է թե ինչ իրավունք է տրվել սերվիտուտով (նշվում է` ճանապարհի, անցուդարձի և այլ թույլտվություն ստանալու համար).

3) Սերվիտուտի պայմանագրի կնքման ամիս-ամսաթիվը, համարը – նշվում է պայմանագրի վավերացման կամ դատարանի որոշման, վճռի ամիսը, ամսաթիվը, տարեթիվը և համարը.

4) Սերվիտուտի գործողության ժամկետը – նշվում է պայմանագրով կամ այլ փաստաթղթով նախատեսված ժամկետը.

5) Իրավունքի դադարումը հաստատող փաստաթղթի անվանումը, ամիս-ամսաթիվը – նշվում է իրավունքի դադարման վերաբերյալ պայմանագրի, կողմերի համաձայնության նոտարական վավերացման, դատարանի վճռի, որոշման ամիսը, ամսաթիվը, տարեթիվը, համարը.

Անշարժ գույքի նկատմամբ իրավունքների պետական գրանցման միասնական մատյաններում գրանցման թերթիկների բոլոր բաժինների ենթաբաժիններում «Գրանցումը կատարող անձի ստորագրությունը, ազգանունը և ամիս-ամսաթիվը» սյունակում գրվում է պետական գրանցումն իրականացնող պաշտոնատար անձի անվան սկզբնատառը, ազգանունը, իսկ նրա բացակայության դեպքում կոմիտեի նախագահի հրամանով` պետական գրանցումն իրականացնող պաշտոնատար անձի պարտականությունները կատարող անձի անվան սկզբնատառը և ազգանունը, որից հետո ստորագրվում է նրա կողմից և նշվում ամիս-ամսաթիվը:

Յուրաքանչյուր համայնքի համար նախատեսված անշարժ գույքի նկատմամբ իրավունքների պետական գրանցման միասնական մատյանների վրա նշվում է տվյալ համայնքի ծածկագիրը, մատյանի համարը` ըստ սեփականության ձևի և հերթական համարը:

Օրինակ` 02-020-1-1, 02-020-2-1, 02-020-3-1, 02-020-4-1, 02-020-5-1, որտեղ 02-ը շրջանի ծածկագիրն է, 020-ը` համայնքի, 1,2,3,4,5-ը մատյանի համարն ըստ սեփականության ձևի, 1-ը` տվյալ մատյանի հերթական համարը:

Մատյանները լրանալուց հետո նոր մատյանները համապատասխանաբար համարակալվում են ըստ հերթականության` 02-020-1-2, 02-020-2-2, 02-020-3-2, 02-020-4-2, 02-020-5-2 և այլն:

Պետական և համայնքային սեփականություն հանդիսացող շենքերի, շինությունների (բացառությամբ բնակարանային ֆոնդի անհատույց սեփականաշնորհման դեպքերի) հետ կատարվող գործարքներից ծագող իրավունքներն ենթակա են պետական գրանցման, եթե նշված անշարժ գույքի նկատմամբ գրանցված է սեփականության կամ օգտագործման իրավունքը:

Պետական սեփականություն հանդիսացող հողամասերը, ըստ առանձին հողակտորների, օտարելու, վարձակալության կամ այլ իրավունքով այլ անձանց հատկացնելու դեպքում, տվյալ հողամասի համար, որի նկատմամբ ներկայացվել է վարձակալության պայմանագիրը, բացվում է առանձին գրանցման թերթիկ, որտեղ գրանցվում է նշված վարձակալության իրավունքը:

Վարձակալության պայմանագրերը գրանցվում են վարձակալության առարկայի ըստ սեփականության ձևի անշարժ գույքի պետական գրանցման միասնական մատյանում, օրինակ, եթե վարձակալության է տրվում պետական սեփականություն հանդիսացող անշարժ գույք, ապա վարձակալության պայմանագրից ծագող իրավունքների պետական գրանցումը կատարվում է պետական սեփականություն հանդիսացող անշարժ գույքի պետական գրանցման միասնական մատյանում (N1):

Համայնքների վարչական սահմաններից դուրս, շրջանի վարչական սահմանների մեջ գտնվող անշարժ գույքի նկատմամբ իրավունքների պետական գրանցման համար` յուրաքանչյուր տարածքային ստորաբաժանումում՝ առանձնացվում է տվյալ շրջանի համար առանձին անշարժ գույքի պետական գրանցման միասնական մատյաններ:

Գրանցման թերթիկում, եթե առաջ է գալիս նոր իրավունքների պետական գրանցման անհրաժեշտություն կամ փոխվում է անշարժ գույքի նկարագիրը, ինչպես նաև անշարժ գույքի սեփականատիրոջ փոփոխման դեպքում, փոփոխման ենթակա բառի կամ թվի վրա կարմիր տուշով գիծ է քաշվում, այնպես, որ նախկին գրառումը ընթեռնելի լինի, որից հետո լրացվում է համապատասխան բաժնի, ենթաբաժնի սյունակի հաջորդ տողը՝ գրելով նոր բառը կամ թիվը:

Ընդհանուր համատեղ կամ բաժնային սեփականություն հանդիսացող անշարժ գույքի սեփականատերերի անունները լրացնելիս` սեփականատերերի անուններից առաջ դրվում են համարներ` 1; 2; 3 և այլն, «բաժնեմասը (տոկոս)» սյունակում տվյալ սեփականատիրոջ համարը նշելով՝ գծիկով լրացվում է նրա բաժնեմասի չափը (օրինակ` 1-3/4, 2-1/4 և այլն), իսկ «համասեփականատերերի թիվը» սյունակում՝ համասեփականատերերի թիվը: Ընդհանուր սեփականություն հանդիսացող անշարժ գույքի սեփականատերերի անունները լրացնելիս, եթե դրանք չեն տեղավորվում «Լրացուցիչ տեղեկություններ» տողերում, ապա նույն գույքի համար պետական կոմիտեի նախագահի գրավոր թույտվությամբ բացվում է լրացուցիչ գրանցման թերթիկ՝ նախկին թերթիկում հղում անելով նոր բացված թերթիկին և շարունակվում են լրացվել կիսատ մնացած տվյալները:

Բոլոր սյունակներում լրացումները կատարվում են առաջին տողի վրա: Բացառիկ դեպքերում կարելի է լրացնել երկրորդ տողը:

Անշարժ գույքի ընդհանուր համատեղ կամ բաժնային սեփականության դեպքում «Սեփականատիրոջ, օգտագործողի ազգանունը, անունը (անվանումը)» սյունակում կարելի է թվարկել միևնույն ազգանունը կրող սեփականատերերի, օգտագործողների անունները, իսկ ազգանունը նշել բոլորի համար: «Անշարժ գույքի միավորի նկարագիրը» բաժնի «Հողամաս» ենթաբաժնի «Գտնվելու վայրը (հասցեն)» սյունակի բոլոր տողերը կարելի է օգտագործել:

Գրանցման թերթիկը լրացնելիս թույլատրվում է օգտագործել հապավումներ, սակայն դրանք պետք է հասկանալի լինեն: Քաղաքացիների անունների, ազգանունների համար հապավումներ կիրառել չի թույլատրվում:

Գրանցման թերթիկը լրացնելիս համապատասխան սյունակը չբավարարելու դեպքում, նշված սյունակի վերջին տողում նշվում է` տես լրացուցիչ տեղեկություններ և մնացած նշումները կատարվում են գրանցման թերթիկի «Լրացուցիչ տեղեկություններ» տողերում` հղում անելով համապատասխան բաժնի և սյունակի համարի վրա:

Եթե անշարժ գույքը վերանում է, ապա գրանցման թերթիկի «Լրացուցիչ տեղեկություններ» տողերում կարմիր տուշով գրվում է` «Թերթիկը փակված է », որից հետո ստորագրվում և կնիքվում է պետական գրանցումն իրականացնող պաշտոնատար անձի կողմից, միաժամանակ չլրացված սյունակի բաց մասում դրվում է (Z) նշանը, իսկ ամբողջ թերթիկի վրա` (X) նշանը: Գրանցման թերթիկները փակվում են նաև երկու և ավելի անշարժ գույքի միավորների միավորման դեպքում և բացվում է գրանցման նոր թերթիկ:

Անշարժ գույքի նկատմամբ սեփականության իրավունք ունեցող անձինք կարող են փոփոխել սեփականության իրավունքով իրենց պատկանող անշարժ գույքի սահմանները, միավորել դրանք, ինչպես նաև բաժանել մի քանի մասերի:

Փոփոխությունները կատարվում են պայմանագրի, դատարանի որոշման, վճռի առկայության դեպքում, որոնց հիման վրա կատարվում են փոփոխություններ գրանցման մատյանի` տվյալ անշարժ գույքի միավորի գրանցման թերթիկում (գրանցման նախկին թերթիկը փակելու և նորը բացելու միջոցով) և կադաստրային քարտեզներում:

Անշարժ գույքի միավորի սահմանների միավորման կամ բաժանման դեպքում անշարժ գույքի նախկին ծածկագիրը համարվում է չեղյալ և տրվում է նոր ծածկագիր:

Անշարժ գույքի սահմանների փոփոխման, միավորման կամ բաժանման վերաբերյալ պայմանագրերի պետական գրանցումները կարող են մերժվել, եթե այդ փոփոխությունները հակասում են օրենքին, քաղաքաշինական, հողաշինարարական կամ սանիտարական նորմերին:

Գույքի միավորման դեպքում, երբ երկու և ավելի անշարժ գույքի միավոր միավորվում են, նախկին գրանցման թերթիկները սահմանված կարգով փակվում են, բացվում է նոր գրանցման թերթիկ և դրվում նոր կադաստրային համար:

Հողամասերի սահմանների փոփոխման (միավորման կամ բաժանման) դեպքում նախկին գրանցման թերթիկը պարտադիր փակվում է և բացվում նորը:

Գրանցման թերթիկը փակվում է նաև սեփականության ձևի փոփոխման դեպքում, և անշարժ գույքի գրանցումը կատարվում է պետական գրանցման համապատասխան մատյանում: Օրինակ, եթե համայնքային սեփականություն հանդիսացող անշարժ գույքը օտարվում է քաղաքացու, ապա համայնքային սեփականություն հանդիսացող անշարժ գույքի պետական գրանցման միասնական մատյանի (N2) համապատասխան գրանցման թերթիկը փակվում է, իսկ գույքը գրանցվում է Լեռնային Ղարաբաղի Հանրապետության քաղաքացիների սեփականություն հանդիսացող անշարժ գույքի պետական գրանցման միասնական մատյանում (N4): Գրանցման թերթիկը փակվում է ամբողջական մասի օտարման դեպքում, իսկ գույքի մասի օտարման դեպքում գրանցման թերթիկում, սույն մեթոդական ցուցումի համաձայն, փոփոխություն է կատարվում, իսկ նոր սեփականատիրոջ անունով բացվում է նոր գրանցման թերթիկ:

Եթե անշարժ գույքը վերակառուցվում է, ապա վերակառուցման հետևանքով առաջացած փոփոխությունները լրացվում են համապատասխան սյունակներում: Օրինակ, եթե քաղաքացին իրեն պատկանող մեկ հարկանի տունը դարձրել է երկհարկանի, ապա գրանցման թերթիկի նկարագրման մասում՝ «Շենք» ենթաբաժնի «Ընդհանուր բնութագիրը» սյունակում նշվում է երկրորդ հարկի կառուցման մասին նշումներ, նշումներ են կատարվում նաև «Ընդհանուր մակերեսը (քառ.մ)» (այդ թվում բնակելի, օժանդակ) սյունակում:

Միասնական մատյանը պարտադիր լրացվում է սև տուշով, մատյանում մատիտով կամ այլ գույնի թանաքով նշումներ կատարել չի թույլատրվում:

Գրանցման թերթիկի ցանկացած սյունակում 5 (հինգ) փոփոխություն կատարելուց հետո բացվում է նոր գրանցման թերթիկ: Նոր գրանցման թերթիկ է բացվում նաև ցանկացած սյունակի տողերի լրանալու դեպքերում: Վերը նշված երկու դեպքում էլ չլրացված բաժինների դիմաց դրվում է (Z) նշան, իսկ ամբողջ թերթիկի վրա դրվում է (X) նշան և «Այլ էջ կամ այլ միասնական մատյան տեղափոխման մասին նշում» բաժնում գրվում են տեղափոխված միասնական մատյանի և թերթիկի համարները: Նշված գրառումը ստորագրվում և կնիքվում է պետական գրանցումն իրականացնող պաշտոնատար անձի կողմից: Բոլոր սյունակներում որպես կանոն լրացումները կատարվում են մեկ տողի վրա, բացառիկ դեպքերում կարելի է լրացնել նաև հաջորդ տողը: Իսկ հաջորդ տողն էլ չբավարարելու դեպքում, համապատասխան նշումով մնացած գրառումները տեղափոխվում են «Լրացուցիչ տեղեկություններ» տողեր:

Միասնական մատյանում չի թույլատրվում կատարել ջնջումներ, սխալ գրառում կատարելու դեպքում կարմիր տուշով գծիկ է գծվում սխալ գրված բառի կամ թվի վրա այնպես, որ կարդացվի սխալ արված գրառումը, որը համարակալվում է, նշվում է ճիշտ բառը կամ թիվը և գրվում է «Տես` լրացուցիչ տեղեկություններում», իսկ «Լրացուցիչ տեղեկություններ» տողերում գրվում է «Ուղղումը կատարված է իմ կողմից», կատարված գրառումը ստորագրվում և կնիքվում է պետական գրանցումն իրականացնող պաշտոնատար անձի կողմից` նշելով ամսաթիվը, ամիսը, տարեթիվը:

Սխալները և ուղղումները «Լրացուցիչ տեղեկություններ» տողերում համարակալվում են: Կատարված սխալների համարները և լրացուցիչ տեղեկություններում կատարված ճիշտ գրառումների համարները պետք է համընկնեն: Միասնական մատյաններում թույլատրվում է կատարել ոչ ավելի քան հինգ սխալի ուղղման գրառում, որից հետո գրանցման թերթիկը փակվում է:

Անշարժ գույքի պետական գրանցման միասնական մատյանում գրանցման ժամանակ թույլ տրված սխալները, եթե դրանք էականորեն ազդում են անշարժ գույքի նկատմամբ իրավունքների բնույթի և բովանդակության վրա, կարող են ուղղվել պետական գրանցումն իրականացնող պաշտոնատար անձի կողմից միայն շահագրգիռ կողմերի գրավոր համաձայնության առկայության դեպքում:

Եթե անշարժ գույքի պետական գրանցման միասնական մատյանում անշարժ գույքի պետական գրանցումը կատարվել է որևէ իրավասու պետական մարմնի տված փաստաթղթի հիման վրա, ապա թույլ տրված սխալների ուղղումը կարող է կատարվել միայն այդ մարմնի ներկայացրած փաստաթղթերում տվյալ մարմնի կողմից համապատասխան ուղղում կատարելուց հետո:

Անշարժ գույքի պետական գրանցման մատյանի կազմը պատրաստվում է հաստ ստվարաթղթից: Մատյանների յուրաքանչյուր թերթը համարակալվում է: Մատյանները համարակալվում են, որից հետո վերջին էջը ստորագրվում է Լեռնային Ղարաբաղի Հանրապետության կառավարությանն առընթեր անշարժ գույքի կադաստրի պետական կոմիտեի պատասխանատու անձի կողմից և կնքվում է կոմիտեի կնիքով: