ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆՆ

ԱՌԸՆԹԵՐ ՀԱՐԿԱՅԻՆ ՊԵՏԱԿԱՆ ԾԱՌԱՅՈՒԹՅՈՒՆ

1. «Ավելացված արժեքի հարկի մասին» Լեռնային Ղարաբաղի Հանրապետության օրենքի 16-րդ հոդվածի 1-ին կետի համաձայն, մասնավորապես` ավելացված արժեքի հարկի զրոյական դրույքաչափ սահմանվում է միայն Լեռնային Ղարաբաղի Հանրապետության (Հայաստանի Հանրապետության) մաքսային սահմանից դուրս «արտահանում ազատ շրջանառության համար» մաքսային ռեժիմով արտահանված ապրանքների հարկվող շրջանառության նկատմամբ:

Լեռնային Ղարաբաղի Հանրապետությունից «Վերաարտահանում» մաքսային ռեժիմով արտահանված ապրանքների հարկվող շրջանառության նկատմամբ` օրենքով ավելացված արժեքի հարկի զրոյական դրույքաչափի կիրառում չի սահմանվել, ուստի այդ գործարքների նկատմամբ կիրառելի են օրենքով սահմանված ընդհանուր դրույթները: Որպես ընդհանուր դրույթ, օրենքի 5-րդ հոդվածով սահմանվել է, որ ավելացված արժեքի հարկով հարկվող օբյեկտ է համարվում Լեռնային Ղարաբաղի Հանրապետության տարածքում ավելացված արժեքի հարկ վճարողների կողմից իրականացված` ապրանքների մատակարարման կամ ծառայությունների մատուցման գործարքները: Ընդ որում, օրենքի 12-րդ հոդվածի համաձայն, ապրանքների մատակարարման վայր է համարվում ապրանքների գտնվելու տեղը, որտեղից դրանք փաստացի մատակարարվել են: Նույն հոդվածի համաձայն, ապրանքները, մասնավորապես` համարվում են մատակարարված Լեռնային Ղարաբաղի Հանրապետությունում, եթե դրանք արտահանվել են Լեռնային Ղարաբաղի Հանրապետությունից: Նշված հիմնավորումներով, ստացվում է, որ մի կողմից «Վերաարտահանում» մաքսային ռեժիմով արտահանված ապրանքների նկատմամբ` ավելացված արժեքի հարկ հաշվարկելը բխում է օրենքի պահանջներից, սակայն մյուս կողմից ավելացված արժեքի հարկ հաշվարկելը տրամաբանական չէ, քանի որ այդ մաքսային ռեժիմով Լեռնային Ղարաբաղի Հանրապետությունից արտահանված ապրանքների սպառումը Լեռնային Ղարաբաղի Հանրապետությունում չէ:

2. ԼՂՀ ԿԱ ՀՊՎ պետի 05.04.02թ. «Ավելացված արժեքի հարկի հաշվարկի ձևը և դրա լրացման կարգը հաստատելու մասին N 16/Ղ հրամանով հաստատված` ավելացված արժեքի հարկի հաշվարկի լրացման կարգով չի պարզաբանվում «Վերաարտահանում» մաքսային ռեժիմով արտահանված ապրանքների իրացման շրջանառության և այդ ռեժիմով արտահանված ապրանքների օտարման գործարքներին վերաբերվող ձեռքբերումների մասով հաշվանցվող գումարների ԱԱՀ-ի հաշվարկներում արտացոլման կարգը:

Ղեկավարվելով «Իրավական ակտերի մասին» Լեռնային Ղարաբաղի Հանրապետության օրենքով սահմանված իրավական ակտի մեկնաբանման և դրա վերաբերյալ պաշտոնական պարզաբանումներ տալու համար սահմանված նորմերով` պաշտոնապես պարզաբանում եմ.

1. «Վերաարտահանում» մաքսային ռեժիմով Լեռնային Ղարաբաղի Հանրապետությունից արտահանված ապրանքների շրջանառության նկատմամբ` ավելացված արժեքի հարկ չի հաշվարկվում և չի վճարվում:

2. «Վերաարտահանում» մաքսային ռեժիմով արտահանված ապրանքների իրացման շրջանառությունը արտացոլվում է «ԱԱՀ -ից ազատված (հարկման օբյեկտ չհամարվող) գործարքների շրջանառություն» տողում («8 Ա» տողում): «Վերաարտահանում» մաքսային ռեժիմով արտահանված ապրանքների իրացման շրջանառության ԱԱՀ-ի հաշվարկի «8 Ա» տողում արտացոլելու հանգամանքը (փաստը) հիմք չէ հաշվանցվող ԱԱՀ-ի գումարները «Ավելացված արժեքի հարկի մասին» Լեռնային Ղարաբաղի Հանրապետության օրենքի 26-րդ և (կամ) 27-րդ հոդվածներին համապատասխան պակասեցնելու (նվազեցնելու) համար: Այսինքն` «Վերաարտահանում» մաքսային ռեժիմով արտահանված ապրանքների իրացման շրջանառության մասով ԱԱՀ-ի հաշվարկի «16.2 Բ» տողում հաշվանցման (պակասեցման) ենթակա ԱԱՀ-ի գումարի ճշգրտում (պակասեցում) չի կատարվում.

- «Վերաարտահանում» մաքսային ռեժիմով արտահանված ապրանքների օտարման գործարքների իրականացման համար ներմուծված ապրանքների մասով մաքսային մարմինների կողմից գանձված (գանձման ենթակա) և ԼՂՀ տարածքում ձեռք բերված ապրանքների և ստացված ծառայությունների դիմաց մատակարարների դուրս գրած հարկային հաշիվներում առանձնացված և օրենքի համաձայն հաշվանցման ենթակա ԱԱՀ-ի գումարները պետք է արտացոլվեն ԱԱՀ-ի հաշվարկի համապատասխանաբար` 15 -րդ և 16-րդ տողերում.

- օրենքով սահմանված կարգով իրականացվող հաշվանցումների արդյունքում սույն պարզաբանման 2-րդ կետի առաջին մասում նշված կարգով ԱԱՀ-ի հաշվարկի 15-րդ և 16-րդ կետերում արտացոլված գումարները (կամ դրանց մասը, եթե օրենքին համապատասխան կատարվել են հաշվանցման ենթակա ԱԱՀ-ի գումարների պակասեցումներ կամ առկա է եղել ԱԱՀ-ի կրեդիտային շրջանառություն), ԱԱՀ-ի հաշվարկների արդյունքում, ներառվում են ԱԱՀ-ի դեբետային մնացորդում: