«Շահութահարկի մասին» Լեռնային Ղարաբաղի Հանրապետության օրենքի (այսուհետ` Օրենք) 32-րդ հոդվածի 2-րդ մասի համաձայն վարկային կազմակերպությունների, բանկերի, ապահովագրական ընկերությունների, վերաապահովագրական ընկերությունների, ապահովագրական միջնորդային գործունեություն իրականացնող անձանց, արժեթղթերի շուկայի մասնագիտացված անձանց, գրավատների, արտարժույթի առք ու վաճառքի և արտարժույթի դիլերային - բրոքերային առք ու վաճառքի, մետաղական օգտակար հանածոների արդյունահանման և (կամ) մետաղի խտանյութի արտադրության (վերամշակման), վառելիքաէներգետիկ հումքի արդյունահանման և (կամ) արտադրության (վերամշակման) գործունեություն իրականացնող անձանց, հեռահաղորդակցության (էլեկտրոնային հաղորդակցության) բնագավառում (բացառությամբ տվյալների հաղորդման և ինտերնետ հասանելիության ծառայությունների մատուցման) լիցենզավորված գործունեություն իրականացնող անձանց` գործունեության այդ մասով ստացած եկամուտների, ինչպես նաև ստացվող այլ եկամուտների դիմաց շահութահարկի գումարը հաշվարկվում է հարկվող շահույթի նկատմամբ 20 տոկոս դրույքաչափով:

Ստեղծված իրավիճակում տարաբնույթ են ընկալվում Օրենքի նշված դրույթը` այդ անձանց կողմից գործունեության այլ տեսակների մասով ստացած եկամուտների դիմաց շահութահարկի դրույքաչափի կիրառման առումով:

Ղեկավարվելով «Իրավական ակտերի մասին» Լեռնային Ղարաբաղի Հանրապետության օրենքի 88-րդ հոդվածով, պաշտոնապես պարզաբանում եմ.

1. «Շահութահարկի մասին» Լեռնային Ղարաբաղի Հանրապետության օրենքի 32-րդ հոդվածի 2-րդ մասում նշված անձանց` այդ օրենքին համապատասխան ստացած բոլոր եկամուտները (բացառությամբ տվյալների հաղորդման և ինտերնետ հասանելիության ծառայությունների մատուցումից, առևտրի հարկով կամ հաստատագրված վճարներով հարկվող գործունեությունից ստացած եկամուտների) հարկվում են շահութահարկի 20 տոկոս դրույքաչափով:

2. Տվյալների հաղորդման և ինտերնետ հասանելիության ծառայությունների մատուցումից ստացված եկամուտները հարկվում են շահութահարկի 10 տոկոս դրույքաչափով:

3. Առևտրի հարկով կամ հաստատագրված վճարներով հարկվող գործունեությունից ստացած եկամուտները հարկվում են «Առևտրի հարկի մասին» և «Հաստատագրված վճարների մասին» Լեռնային Ղարաբաղի Հանրապետության օրենքներով սահմանված կարգով և չափով: