ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

 ք.Ստեփանակերտ

Լեռնային Ղարաբաղի Հանրապետություն թափոնների ներմուծումը, արտահանումը և հանրապետության տարածքով տարանցիկ փոխադրումը կարգավորելու նպատակով Լեռնային Ղարաբաղի Հանրապետության կառավարությունը որոշում է.

1. Արգելել`

ա) բոլոր տեսակի թափոնների ներմուծումը հանրապետություն` դրանց պահեստավորման և թաղման նպատակով.

բ) վտանգավոր թափոնների ներմուծումը Լեռնային Ղարաբաղի Հանրապետություն և Լեռնային Ղարաբաղի Հանրապետության տարածքով դրանց տարանցիկ փոխադրումը` համաձայն Լեռնային Ղարաբաղի Հանրապետության կառավարության կողմից հաստատված` Լեռնային Ղարաբաղի Հանրապետության արգելված վտանգավոր թափոնների ցանկի:

2. Թափոնների և երկրորդային հումքի ներմուծումը հանրապետություն թույլատրել միայն դրանց ուղղակի կամ վերամշակումից հետո օգտագործելու նպատակով:

3. Հաստատել Լեռնային Ղարաբաղի Հանրապետություն վտանգավոր և այլ թափոնների ներմուծման, հանրապետությունից արտահանման և հանրապետության տարածքով տարանցիկ փոխադրման վերահսկողության կարգը` համաձայն հավելվածի:

4. Սահմանել, որ`

ա) վտանգավոր և այլ թափոնների ներմուծումը, արտահանումը և հանրապետության տարածքով տարանցիկ փոխադրումը ենթակա Է պարտադիր նախնական հայտավորման (ծանուցման) և կատարվում է Լեռնային Ղարաբաղի Հանրապետության իրավասու պետական մարմնի` Լեռնային Ղարաբաղի Հանրապետության կառավարությանն առընթեր շրջակա միջավայրի և բնական ռեսուրսների վարչության թույլտվությամբ.

բ) մարդու առողջության և շրջակա բնական միջավայրի համար վտանգ չներկայացնող թափոնների ներմուծումը, արտահանումը և հանրապետության տարածքով տարանցիկ փոխադրումը կատարվում է ընդհանուր հիմունքներով` առանց նախնական հայտավորման (ծանուցման):

5. Լեռնային Ղարաբաղի Հանրապետության կառավարությանն առընթեր շրջակա միջավայրի և բնական ռեսուրսների վարչությանը`

ա) Լեռնային Ղարաբաղի Հանրապետության ֆինանսների և էկոնոմիկայի նախարարության, Լեռնային Ղարաբաղի Հանրապետության տարածքային կառավարաման և ենթակառուցվածքների զարգացման նախարարության և շահագրգիռ այլ նախարարությունների ու գերատեսչությունների հետ համատեղ մշակել և հաստատել վտանգավոր ու այլ թափոնների ներմուծման, արտահանման և հանրապետության տարածքով տարանցիկ փոխադրման կարգավորման համար անհրաժեշտ ցուցակները, ցանկերը և փաստաթղթերի ձևերը, ինչպես նաև թափոնների վտանգավոր հատկությունների ցանկը.

բ) ստեղծել վտանգավոր թափոնների վերաբերյալ կոորդինացիոն-տեղեկատվական կենտրոն:

6. Սույն որոշումն ուժի մեջ է մտնում պաշտոնական հրապարակման օրվան հաջորդող 10-րդ օրը:

Կ Ա Ր Գ

Լեռնային Ղարաբաղի Հանրապետություն վտանգավոր և այլ թափոնների ներմուծման, արտահանման և հանրապետության տարածքով տարանցիկ փոխադրման վերահսկողության

I. ԸՆԴՀԱՆՈՒՐ ԴՐՈՒՅԹՆԵՐ

1. Լեռնային Ղարաբաղի Հանրապետություն վտանգավոր և այլ թափոնների ներմուծման, հանրապետությունից արտահանման և հանրապետության տարածքով տարանցիկ փոխադրման վերահսկողության կարգը մշակվել է վտանգավոր թափոնների երկրից երկիր փոխադրման, դրանց հեռացման նկատմամբ հսկողության մասին Բազելյան համաձայնագրի հիմնական դրույթներին համապատասխան:

Սույն կարգի գործողությունը չի տարածվում ռադիոակտիվ թափոնների վրա:

II. ՀԻՄՆԱԿԱՆ ՀԱՍԿԱՑՈՒԹՅՈՒՆՆԵՐԸ

2. Թափոններ` նյութեր և առարկաներ, որոնք հեռացվում են, նախատեսված են հեռացման համար կամ ենթակա են հեռացման:

3. Վտանգավոր թափոններ` թափոններ, որոնք վտանգ են ներկայացնում մարդու առողջության և շրջակա բնական միջավայրի համար:

4. Այլ թափոններ` բնակավայրերից հավաքվող թափոններ և կենցաղային թափոնների այրման հետևանքով առաջացած մնացորդներ:

5. Երկրորդային հումք` նյութեր և առարկաներ, որոնք արդյունաբերական կամ այլ մշակման, օգտագործման, պահպանման, տեղափոխման մնացորդներ են և որոշակի մշակումից հետո կարող են լիովին կամ մասամբ օգտագործվել:

Կարգում օգտագործվող "վտանգավոր և այլ թափոններ" հասկացությունը վերաբերում Է ինչպես թափոններին, այնպես Էլ երկրորդային հումքին:

6. Թափոնների կամ երկրորդային հումքի օգտագործում` գործողություն, որը բերում Է թափոնների կամ երկրորդային հումքի լրիվ կամ մասնակի վերականգնման, վերամշակման` պիտանի դարձնելով այն կրկնակի կամ այլ նպատակով օգտագործելու համար:

7. Երկրից երկիր փոխադրում` վտանգավոր և այլ թափոնների ցանկացած փոխադրում որևէ պետության իրավազորությանը պատկանող շրջանից այլ պետության իրավազորությանը պատկանող շրջան (կամ այդպիսի շրջանի տարածքով):

8. Հեռացում` գործողություն, որը հանգեցնում է թափոնների վերականգնման, օգտագործման կամ թաղման:

9. Վերջնական հեռացում` գործողություն, որը չի նախատեսում թափոնների վերականգնում կամ օգտագործում և հանգեցնում է դրանց թաղման:

10. Իրավասու մարմին` Լեռնային Ղարաբաղի Հանրապետության և օտարերկրյա պետական մարմին, որը կոչված է վտանգավոր և այլ թափոնների ներմուծման, արտահանման ու հանրապետության տարածքով տարանցիկ փոխադրման հայտերին (ծանուցումներին) պատասխանելու, ինչպես նաև նշված փոխադրման հետ կապված ցանկացած տեղեկատվություն ընդունելու համար:

11. Առանձնացված կենտրոն` տվյալ պետության կազմակերպություն, որը պատասխանատու է փոխադրման, փոխադրման ժամանակ տեղի ունեցած վթարների, միջադեպերի, ինչպես նաև հեռացման աշխատանքների, բնական միջավայրի վրա այդ թափոնների ունեցած ազդեցության մասին տեղեկատվություն ստանալու և տրամադրելու համար:

12. Անձ` ցանկացած ֆիզիկական, իրավաբանական անձ, ինչպես նաև իրավաբանական անձի կարգավիճակ չունեցող կազմակերպություն:

13. Արտահանող` արտահանող պետության իրավազորությանը պատկանող Լեռնային Ղարաբաղի Հանրապետության կամ օտարերկրյա ցանկացած անձ, որը կազմակերպում է վտանգավոր և այլ թափոնների արտահանում:

14. Ներմուծող` ներմուծող պետության իրավազորությանը պատկանող ցանկացած անձ, որը կազմակերպում Է վտանգավոր և այլ թափոնների ներմուծում:

15. Արտադրող` ցանկացած անձ, որի գործունեության հետևանքով առաջանում են կամ որի սեփականությունն են հանդիսանում վտանգավոր և այլ թափոններ:

16. Հեռացման համար պատասխանատու անձ` ցանկացած անձ, որին հասցեագրված են վտանգավոր և այլ թափոններ և որը կատարում է դրանց հեռացման աշխատանքները:

17. Անօրինական շրջանառություն` վտանգավոր և այլ թափոնների ցանկացած տեղափոխում, որը կատարվում Է սույն կարգի 34-րդ կետում նշված խախտումներով:

18. Վտանգավոր և այլ թափոնների ներմուծման, արտահանման և հանրապետության տարածքով տարանցիկ փոխադրման հայտը (ծանուցումը) հաստատված ձևով ներկայացվում Է Լեռնային Ղարաբաղի Հանրապետության իրավասու պետական մարմին: Թափոնների փոխադրման հայտում նշված տեղեկությունները պետք Է հստակ ցույց տան փոխադրման և վերամշակման հնարավոր ազդեցությունը մարդու առողջության և շրջակա բնական միջավայրի վրա:

19. Թափոնների փոխադրման հայտը ներկայացվում է վտանգավոր և այլ թափոններ Լեռնային Ղարաբաղի Հանրապետությունից արտահանելու դեպքում: Այն ներկայացնում են թափոններն արտադրող կամ արտահանող անձինք:

20. Թափոնների փոխադրման ծանուցումը ներկայացվում Է Լեռնային Ղարաբաղի Հանրապետություն վտանգավոր և այլ թափոնների ներմուծման կամ նրա տարածքով տարանցիկ փոխադրման դեպքում: Այն ներկայացնում են արտահանող պետությունների իրավասու պետական մարմինները:

21. Արտահանման հայտ ստանալուց հետո Լեռնային Ղարաբաղի Հանրապետության իրավասու պետական մարմինն ստուգում Է ներկայացված տեղեկատվությունը և 120 օրվա ընթացքում համապատասխան ծանուցումներ Է ուղարկում ներմուծման ու տարանցման պետությունների իրավասու պետական մարմիններին:

22. Ներմուծման և տարանցիկ փոխադրման ծանուցում ստանալուց հետո Լեռնային Ղարաբաղի Հանրապետության իրավասու պետական մարմինը ծանուցողին գրավոր տեղեկացնում Է ծանուցման ստացման մասին, ապահովման համար պահանջվող պայմաններով կամ առանց դրանց համաձայնություն Է տալիս թափոնների ներմուծման համար, մերժում Է այն, կամ հարցում Է անում լրացուցիչ տեղեկատվության համար: Ծանուցման պատասխանը պետք Է տրվի 60 օրվա ընթացքում, եթե լրացուցիչ տեղեկատվության անհրաժեշտություն չկա:

23. Եթե ֆիզիկական և քիմիական նույն հատկություններով բնութագրվող վտանգավոր և այլ թափոնները հասցեագրվում են դրանց հեռացման համար պատասխանատու նույն անձին ու փոխադրումը կատարվում Է ներմուծման և տարանցման պետությունների մաքսային նույն կետով, ապա շահագրգիռ բոլոր կողմերի համաձայնությամբ թույլատրվում է օգտագործել մեկ ընդհանուր ծանուցում: Այդ դեպքում շահագրգիռ կողմերին, բացի ընդհանուր ծանուցումից, ներկայացվում են տեղեկություններ առանձին բեռնաառաքումներով տեղափոխվող թափոնների ստույգ քանակության և կազմի մասին: Ընդհանուր ծանուցումը և համաձայնությունն ուժի մեջ են մնում 1 տարուց (12 ամսից) ոչ ավելի և կարող են ընդգրկել բազմակի բեռնաառաքումներ:

24. Լեռնային Ղարաբաղի Հանրապետության իրավասու պետական մարմինն իրավունք ունի պահանջելու, որպեսզի վտանգավոր և այլ թափոնների յուրաքանչյուր տեղափոխման անվտանգություն ապահովվի երաշխիքով, այդ թվում` գրավով:

25. Վտանգավոր և այլ թափոնները կարող են ներմուծվել, արտահանվել և Լեռնային Ղարաբաղի Հանրապետության տարածքով տարանցիկ փոխադրվել`

եթե արտահանող պետությունն իր տրամադրության տակ չունի տեխնիկական հնարավորություններ և անհրաժեշտ օբյեկտներ, հզորություններ կամ համապատասխան տեղեր` այդ թափոնների էկոլոգիապես հիմնավորված արդյունավետ հեռացման համար.

եթե նշված թափոններն անհրաժեշտ են ներմուծող պետությանը` որպես հումք.

կողմերի միջև պայմանավորված այլ դեպքերում, որոնք չեն հակասում սույն կարգին և Լեռնային Ղարաբաղի Հանրապետության օրենսդրությանը:

26. Լեռնային Ղարաբաղի Հանրապետության իրավասու պետական մարմինը թույլատրում Է վտանգավոր թափոնների արտահանում, ներմուծում և հանրապետության տարածքով տարանցիկ փոխադրում, եթե առկա Է սույն կարգի 25-րդ կետում նշված պայմաններից մեկը` հաստատված թափոններ արտահանող և թափոնների հեռացման համար պատասխանատու անձանց գրավոր համաձայնությամբ (որտեղ նշված Է թափոնների էկոլոգիապես հիմնավորված հեռացումը):

V. ՎՏԱՆԳԱՎՈՐ ԵՎ ԱՅԼ ԹԱՓՈՆՆԵՐԻ ԱՐՏԱՀԱՆՈՒՄԸ, ՆԵՐՄՈՒԾՈՒՄԸ ԵՎ ՀԱՆՐԱՊԵՏՈՒԹՅԱՆ ՏԱՐԱԾՔՈՎ ՏԱՐԱՆՑԻԿ ՓՈԽԱԴՐՈՒՄԸ

27. Վտանգավոր և այլ թափոններ փոխադրողները Լեռնային Ղարաբաղի Հանրապետության սահմանն անցնելիս պարտավոր են ներկայացնել Լեռնային Ղարաբաղի Հանրապետության իրավասու պետական մարմնից ստացված փոխադրման թույլտվություն:

28. Փոխադրվող թափոնները պետք Է փաթեթավորվեն, պիտակավորվեն և տեղափոխվեն ընդունված և համընդհանուր ճանաչում գտած միջազգային կանոնների համաձայն: Դրանք պետք Է ուղեկցվեն փոխադրման վերաբերյալ համապատասխան փաստաթղթով, որտեղ նշվում Է ամբողջ երթուղին` ելակետից մինչև հեռացման վայրը:

29. Վտանգավոր և այլ թափոնների փոխադրման համար պատասխանատու ցանկացած անձ պարտավոր Է ստորագրել փաստաթուղթ` թափոնների փոխադրման, ստացման կամ տեղհասցման մասին: Լեռնային Ղարաբաղի Հանրապետության տարածքով տարանցիկ փոխադրման դեպքում նա պարտավոր Է փոխադրումն սկսելուց 15 օր առաջ և փոխադրման ավարտից 10 օր հետո այդ մասին գրավոր տեղեկացնել Լեռնային Ղարաբաղի Հանրապետության իրավասու պետական մարմնին:

30. Թափոնների հեռացման մասին պատասխանատու անձը պարտավոր Է թափոններն ստանալու օրվանից 7-օրյա և դրանց հեռացման գործողությունների ավարտից հետո 10-օրյա ժամկետում այդ մասին գրավոր տեղեկացնել արտահանողին, արտահանող և ներմուծող երկրների իրավասու մարմիններին:

Լեռնային Ղարաբաղի Հանրապետությունից թափոնների արտահանման վերաբերյալ ժամանակին համապատասխան տեղեկություններ չստանալու դեպքում Լեռնային Ղարաբաղի Հանրապետության իրավասու պետական մարմինը պարտավոր Է այդ մասին տեղեկացնել ներմուծվող երկրի իրավասու մարմնին:

31. Լեռնային Ղարաբաղի Հանրապետության հարկային պետական ծառայության մարմինները գրանցում են վտանգավոր և այլ թափոնների ներմուծման, արտահանման ու հանրապետության տարածքով տարանցիկ փոխադրման յուրաքանչյուր դեպք, փոխադրվող թափոնների տեսակը, քանակը, փոխադրման երթուղին և յուրաքանչյուր կիսամյակ համապատասխան տեղեկանք ներկայացնում Լեռնային Ղարաբաղի Հանրապետության իրավասու պետական մարմնին:

32. Լեռնային Ղարաբաղի Հանրապետության իրավասու պետական մարմինը կարող Է սահմանել թափոնների փոխադրման և հեռացման վերաբերյալ սույն կարգին ու Լեռնային Ղարաբաղի Հանրապետության օրենսդրությանը չհակասող լրացուցիչ պայմաններ:

VI. ՎՏԱՆԳԱՎՈՐ ԵՎ ԱՅԼ ԹԱՓՈՆՆԵՐԻ ՀԵՌԱՑՄԱՆ ՊԱՅՄԱՆՆԵՐԸ

33. Էկոլոգիապես հիմնավորված են համարվում վտանգավոր և այլ թափոնների հեռացման այն ձևերը, որոնք երաշխավորված են Լեռնային Ղարաբաղի Հանրապետության իրավասու պետական մարմնի կողմից:

VII. ԱՆՕՐԻՆԱԿԱՆ ՇՐՋԱՆԱՌՈՒԹՅՈՒՆ

34. Անօրինական շրջանառություն է համարվում վտանգավոր և այլ թափոնների ցանկացած տեղափոխում, եթե այն`

կատարվել է առանց շահագրգիռ բոլոր պետություններին հաստատված կարգով ծանուցելու.

կատարվել է առանց շահագրգիռ բոլոր պետությունների համաձայնության.

կատարվել է շահագրգիռ պետությունների կեղծիքի, մոլորեցնելու կամ խաբեության միջոցով ստացված համաձայնությամբ.

չի համապատասխանում ուղեկցող փաստաթղթերին կամ ներկայացված ծանուցմանը.

հանգեցնում է Լեռնային Ղարաբաղի Հանրապետության օրենսդրությանը և սույն կարգին հակասող կանխամտածված հեռացման (օրինակ, վերջնական հեռացման):

35. Եթե Լեռնային Ղարաբաղի Հանրապետության տարածքում գտնվող վտանգավոր և այլ թափոնների փոխադրումը Լեռնային Ղարաբաղի Հանրապետության իրավազորությունից դուրս գտնվող անձանց` արտադրողի, արտահանողի, ներմուծողի կամ հեռացման համար պատասխանատու անձի մեղքով համարվում է անօրինական շրջանառություն, ապա Լեռնային Ղարաբաղի Հանրապետության իրավասու պետական մարմինը պարտավոր է այդ մասին տեղեկացնել համապատասխան պետության իրավասու մարմնին և միջոցներ ձեռնարկել, որպեսզի թափոնները հեռացվեն Լեռնային Ղարաբաղի Հանրապետության տարածքից նշված անձանց կամ պետության կողմից, որի իրավազորությանն են պատկանում նրանք: Եթե դա գործնականորեն նպատակահարմար չէ, ապա համապատասխան ծանուցումը հանձնելուց հետո 30 օրվա կամ փոխադարձ համաձայնությամբ որևէ այլ ժամկետի ընթացքում թափոնները պետք է մշակվեն էկոլոգիապես հիմնավորված ձևով:

36. Այն դեպքում, երբ վտանգավոր թափոնները գտնվում են Լեռնային Ղարաբաղի Հանրապետության տարածքից դուրս և փոխադրումը Լեռնային Ղարաբաղի Հանրապետության իրավազորությանը պատկանող անձանց մեղքով դիտվել է որպես անօրինական շրջանառություն ու դրա վերաբերյալ Լեռնային Ղարաբաղի Հանրապետության իրավասու պետական մարմինը պաշտոնական ծանուցում է ստացել, ապա նա պարտավոր է միջոցներ ձեռնարկել, որպեսզի նշված անձինք կամ Լեռնային Ղարաբաղի Հանրապետության պետական համապատասխան ծառայությունները վերադարձնեն թափոնները Լեռնային Ղարաբաղի Հանրապետության տարածք: Եթե դա գործնականորեն նպատակահարմար չէ, թափոնները պետք Է մշակվեն Էկոլոգիապես հիմնավորված ձևով` ծանուցումն ստանալուց հետո 30 օրվա կամ փոխադարձ պայմանավորվածությամբ այլ ժամկետի ընթացքում:

Լեռնային Ղարաբաղի Հանրապետության տարածքից դուրս թափոնների անօրինական շրջանառությունն իրականացնող, Լեռնային Ղարաբաղի Հանրապետության իրավազորությանը պատկանող իրավաբանական անձը պարտավոր Է լիովին հատուցել անօրինական շրջանառության վերացման համար Լեռնային Ղարաբաղի Հանրապետության կողմից կատարված բոլոր ծախսերը, ինչպես նաև մուծել տուգանք` Լեռնային Ղարաբաղի Հանրապետության օրենսդրությամբ սահմանված նվազագույն աշխատավարձի հազարապատիկի չափով:

37. Եթե անօրինական շրջանառության համար արտահանողը, ներմուծողը կամ հեռացման համար պատասխանատու անձը պատասխանատվություն չի կրում, ապա Լեռնային Ղարաբաղի Հանրապետության իրավասու պետական մարմինը, համագործակցելով շահագրգիռ բոլոր կողմերի հետ, հնարավոր կարճ ժամկետում ապահովում Է թափոնների հեռացումը:

38. Վտանգավոր և այլ թափոնների տեղափոխմանն ու հեռացմանը մասնակցող Լեռնային Ղարաբաղի Հանրապետության իրավազորությանը պատկանող, ինչպես նաև Լեռնային Ղարաբաղի Հանրապետության տարածքում գործող, նրա իրավազորությունից դուրս անձինք պարտավոր են`

ապահովել վտանգավոր և այլ թափոններով շրջակա միջավայրի աղտոտման կանխումը, իսկ եթե դա այնուամենայնիվ տեղի է ունենում, ապա հետևանքները նվազագույնի հասցնելու համար բոլոր անհրաժեշտ միջոցների ձևակերպումը.

թույլ չտալ վտանգավոր և այլ թափոնների ներմուծումը, եթե հիմքեր կան ենթադրելու, որ դրանց հեռացումն իրականացվելու է էկոլոգիապես ոչ հիմնավորված ձևով.

արգելել վտանգավոր և այլ թափոնների տեղափոխումն ու հեռացումը առանց համապատասխան թույլտվության:

Սույն կետով սահմանված պարտականությունները խախտող իրավաբանական անձինք պարտավոր են Լեռնային Ղարաբաղի Հանրապետությանը հատուցել իրենց մեղքով պատճառված վնասը, ինչպես նաև մուծել տուգանք` Լեռնային Ղարաբաղի Հանրապետության օրենսդրությամբ սահմանված նվազագույն աշխատավարձի երկու հազարապատիկի չափով: