ք. Ստեփանակերտ

Հիմք ընդունելով «Կենդանական աշխարհի մասին» Լեռնային Ղարաբաղի Հանրապետության օրենքի 27.1 -ին հոդվածի 3-րդ մասը`

ՀՐԱՄԱՅՈՒՄ ԵՄ՝

1. Սահմանել անազատ և կիսաազատ պայմաններում վայրի կենդանիներին, այդ թվում՝ Լեռնային Ղարաբաղի Հանրապետության Կարմիր գրքում գրանցված կենդանիներին պահելու տարածքների նվազագույն չափերը` համաձայն հավելվածի:

2. Սույն հրամանն ուժի մեջ է մտնում պաշտոնական հրապարակմանը հաջորդող օրվանից:

1. Սույնով սահմանվում է անազատ և կիսաազատ պայմաններում վայրի կենդանիներին, այդ թվում՝ Լեռնային Ղարաբաղի Հանրապետության Կարմիր գրքում գրանցված կենդանիներին պահելու տարածքների նվազագույն չափերը:

2. Սույն հրամանում օգտագործվող «վայրի կենդանի» հասկացությունն ունի հետևյալ իմաստը՝ բնության կողմից ստեղծված, բնության ընտրությամբ առանց մարդու (միջամտության) առաջացած, բնական ազատ պայմաններում ապրող անողնաշարավոր և ողնաշարավոր կենդանատեսակներ, ինչպես նաև դրանց անազատ և կիսաազատ պայմաններում պահվող առանձնյակներն ու դրանց սերունդները:

3. Անազատ և կիսաազատ պայմաններում վայրի կենդանիներին, այդ թվում՝ Լեռնային Ղարաբաղի Հանրապետության Կարմիր գրքում գրանցված կենդանիներին (այսուհետ՝ վայրի կենդանիներ) պահելու նպատակը վայրի կենդանիների պահպանության, պաշտպանության, վերարտադրության ու կայուն օգտագործման ապահովումն է:

4. Վայրի կենդանիներն անազատ և կիսաազատ պայմաններում պահելու դեպքում անհրաժեշտ է ապահովել կենսամիջավայրի հանդեպ այդ կենդանիների կենսաբանական, անհատական և տեսակային առանձնահատկություններից բխող ու դրանց գոյատևման համար անհրաժեշտ կարիքները բավարարող պայմանները՝ բացառելով պահելու վայրից դրանց փախուստը:

5. Անազատ և կիսաազատ պայմաններում վայրի կենդանիները պահվում են վանդակներում, մեծավանդակներում և դրանց պահելու համար նախատեսված այլ տարածքներում, որոնց նվազագույն չափերը համապատասխանում են սույն հավելվածի աղյուսակում նշված նվազագույն չափերին:

6. Անազատ և կիսաազատ պայմաններում նույն տարածքում երկու և ավելի վայրի կենդանիներ պահելու դեպքում տարածքների նվազագույն չափերը որոշվում են հետևյալ բանաձևերով՝

1) թռչունների և կաթնասունների համար՝

Մ’նվ = Մնվ + 0.7(Ք-1)Մնվ.

2) սողունների և երկկենցաղների համար՝

Մ’նվ = Մնվ + 0.5(Ք-1)Մնվ,

Որտեղ՝

Մ’նվ-ն՝ տարածքի նվազագույն նորմն է՝ տվյալ կենդանատեսակի մի քանի առանձնյակներ պահելու համար,

Մնվ-ն՝ տարածքի նվազագույն նորմն է՝ տվյալ կենդանատեսակի մեկ առանձնյակ պահելու համար,

Ք-1 –ն պահվող կենդանիների քանակությունն է:

7. Սույն հավելվածի 5-րդ և 6-րդ կետերում նշված պահանջները չեն տարածվում այն վայրի կենդանիների վրա, որոնք բազմացվում և աճեցվում են ուսումնական փորձերի, կենսաբանական թեստավորման, սննդում կամ այլ կենդանիների համար որպես կեր օգտագործելու և արգասիգ ստանալու նպատակներով:

8. Վայրի կենդանիների անազատ և կիսաազատ պայմաններում օգտագործումը թույլատրվում է Լեռնային Ղարաբաղի Հանրապետության օրենսդրությամբ նախատեսված՝ վերարտադրության, կլիմայավարժեցման, առևտրի, գիտահետազոտական, ուսումնական, կենսաբանական թեստավորման, սննդի կամ այլ կենդանիների համար որպես կեր օգտագործելու, մորթի ստանալու, որսի, մշակութային և գեղագիտական, բնության մեջ բաց թողնելու, որսի և որպես որսամիջոց (որսկան թռչուն) օգտագործելու նպատակներով:

9. Անազատ և կիսաազատ պայմաններում վայրի կենդանիներ պահող ֆիզիկական և իրավաբանական անձինք այդ կենդանիների և դրանցից ստացված սերնդի սեփականատերերն են և իրավունք ունեն դրանք տնօրինելու սույն հավելվածի 8-րդ կետով ամրագրված նպատակներով՝ բացառությամբ Լեռնային Ղարաբաղի Հանրապետության Կարմիր գրքում գրանցված կենդանիների:

10. Անազատ և կիսաազատ պայմաններում Լեռնային Ղարաբաղի Հանրապետության Կարմիր գրքում գրանցված կենդանիներ պահող Ֆիզիկական և իրավաբանական անձինք իրավունք ունեն դրանք օգտագործելու միայն վերարտադրության, կլիմայավարժեցման, մշակութային, գեղագիտական ու գիտահետազոտական նպատակներով, իսկ դրանցից ստացած երկրորդ կենսունակ սերնդի մինչև 10 տոկոսը կարող են օգտագործել որսի կամ այլ նպատակներով: