ք. Ստեփանակերտ

Հիմք ընդունելով «Պետական տուրքի մասին» օրենքի 30-րդ հոդվածի 1-ին մասի «բ» կետը և «Արցախի Հանրապետության բյուջետային համակարգի մասին» օրենքի 20-րդ հոդվածի 3-րդ մասը՝ Արցախի Հանրապետության կառավարությունը ո ր ո շ ու մ է.

1. Սահմանել, որ 2020 թվականին Արցախի Հանրապետության դեմ սանձազերծված պատերազմական գործողությունների արդյունքում տեղահանման պատճառով գյուղատնտեսական տեխնիկան, կցանքները, ճանապարհաշինարարական, շինարարական ու այլ մեքենամեխանիզմները և (կամ) դրանց վերաբերյալ փաստաթղթերը կորցրած քաղաքացիների փոխարեն մինչև 2021 թվականի դեկտեմբերի 31-ը պետական բյուջեի միջոցների հաշվին կատարվում են հետևյալ ծառայությունների համար սահմանված պետական տուրքերի վճարումները՝

1) գյուղատնտեսական ինքնագնաց մեքենաների վարման իրավունքի վկայականի կրկնօրինակը տալու համար.

2) ոչ ինքնագնաց գյուղատնտեսական մելիորատիվ, հիդրոմելիորատիվ մեքենաների և սարքավորումների կորցրած տեխնիկական վկայագրի կրկնօրինակը տալու համար.

3) գյուղատնտեսական ինքնագնաց մեքենաների, ինքնագնաց ճանապարհաշինարարական, շինարարական և այլ մեքենամեխանիզմների կորցրած պետական համարանիշները վերականգնելու համար.

4) գյուղատնտեսական ինքնագնաց մեքենաների, ինքնագնաց ճանապարհաշինարարական, շինարարական և այլ մեքենամեխանիզմների կորցրած տեխնիկական անձնագրերի (գրանցման վկայականների) կրկնօրինակը տալու համար.

5) տրակտորային կցանքների, ինքնագնաց ճանապարհաշինարարական և այլ մեքենամեխանիզմների կցորդների և կիսակցորդների պետական համարանիշները վերականգնելու համար.

6) գյուղատնտեսական ինքնագնաց մեքենաները, ոչ ինքնագնաց գյուղատնտեսական մելիորատիվ, հիդրոմելիորատիվ մեքենաները, սարքավորումները, ինքնագնաց ճանապարհաշինարարական, շինարարական և այլ մեքենամեխանիզմները գրանցելու, վերագրանցելու, հաշվառումից հանելու, ինչպես նաև դրանց գրանցման տվյալների փոփոխության հետ կապված որևէ գործողություն կատարելու համար:

2. Արցախի Հանրապետության էկոնոմիկայի և գյուղատնտեսության նախարարին ու Արցախի Հանրապետության տարածքային կառավարման և ենթակառուցվածքների նախարարին՝ մինչև յուրաքանչյուր եռամսյակին հաջորդող ամսվա 10-ն Արցախի Հանրապետության ֆինանսների նախարարություն ներկայացնել հաշվետվություն սույն որոշման 1-ին կետում նշված պետական տուրքերի չափերի վերաբերյալ:

3. Արցախի Հանրապետության ֆինանսների նախարարին` սույն որոշման 2-րդ կետում նշված հաշվետվությունն ստանալուց հետո մեկամսյա ժամկետում ապահովել Արցախի Հանրապետության կառավարության պահուստային ֆոնդից սույն որոշման 1-ին կետում նշված պետական տուրք վճարողների փոխարեն Արցախի Հանրապետության կառավարության կողմից վճարման ենթակա պետական տուրքերի վճարումը:

4. Սույն որոշումն ուժի մեջ է մտնում պաշտոնական հրապարակմանը հաջորդող օրվանից և դրա գործողությունը տարածվում է 2020 թվականի նոյեմբերի 10-ից ծագած հարաբերությունների վրա:

5. Մինչև սույն որոշումն ուժի մեջ մտնելը սույն որոշման 1-ին կետով նախատեսված դեպքերում քաղաքացիների կողմից վճարված պետական տուրքերը ենթակա են վերադարձման: