ԱՐՑԱԽԻ ՀԱՆՐԱՊԵՏՈՒԹՅԱՆ ՀԱՆՐԱՅԻՆ
ԾԱՌԱՅՈՒԹՅՈՒՆՆԵՐԸ ԵՎ ՏՆՏԵՍԱԿԱՆ ՄՐՑԱԿՑՈՒԹՅՈՒՆԸ
ԿԱՐԳԱՎՈՐՈՂ ՊԵՏԱԿԱՆ ՀԱՆՁՆԱԺՈՂՈՎ
2020 թվականի ապրիլի 3-ի
ԷՆԵՐԳԵՏԻԿԱՅԻ ԲՆԱԳԱՎԱՌՈՒՄ ԼԻՑԵՆԶԻԱ ՈՒՆԵՑՈՂ ԱՆՁԻ ԲԱԺՆԵՄԱՍԻ
(ԲԱԺՆԵՏՈՄՍԻ, ՓԱՅԻ) ԿԱՄ ԴՐԱ ՆԿԱՏՄԱՄԲ ԻՐԱՎՈՒՆՔԻ ՕՏԱՐՄԱՆ, ԱՅԼ ԿԵՐՊ
ՓՈԽԱՆՑՄԱՆ ԿԱՄ ԳՐԱՎԱԴՐՄԱՆ, ԻՆՉՊԵՍ ՆԱԵՎ ԼԻՑԵՆԶԱՎՈՐՎԱԾ ԳՈՐԾՈՒՆԵՈՒԹՅԱՆ
ԻՐԱԿԱՆԱՑՄԱՆ ՀԱՄԱՐ ԱՆՀՐԱԺԵՇՏ ԳՈՒՅՔԻ ԿԱՄ ԴՐԱ ՆԿԱՏՄԱՄԲ ԻՐԱՎՈՒՆՔԻ
ՕՏԱՐՄԱՆ,ԱՅԼ ԿԵՐՊ ՓՈԽԱՆՑՄԱՆ ԿԱՄ ԳՐԱՎԱԴՐՄԱՆ ՀԱՄԱՁԱՅՆԵՑՄԱՆ
ԿԱՐԳԸ ՀԱՍՏԱՏԵԼՈՒ ՄԱՍԻՆ
N 14-Ն
Ո Ր Ո Շ ՈՒ Մ
Հիմք ընդունելով «Էներգետիկայի մասին» օրենքի 12-րդ հոդվածի «դ» կետը և 21-րդ հոդվածը՝ Արցախի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովը որոշում է.
1. Հաստատել էներգետիկայի բնագավառում լիցենզիա ունեցող անձի բաժնեմասի (բաժնետոմսի, փայի) կամ դրա նկատմամբ իրավունքի օտարման, այլ կերպ փոխանցման կամ գրավադրման, ինչպես նաև լիցենզավորված գործունեության իրականացման համար անհրաժեշտ գույքի կամ դրա նկատմամբ իրավունքի օտարման, այլ կերպ փոխանցման կամ գրավադրման համաձայնեցման կարգը՝ համաձայն հավելվածի:
2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:
|
ԱՐՑԱԽԻ ՀԱՆՐԱՊԵՏՈՒԹՅԱՆ ՀԱՆՐԱՅԻՆ
ԾԱՌԱՅՈՒԹՅՈՒՆՆԵՐԸ ԵՎ ՏՆՏԵՍԱԿԱՆ
ՄՐՑԱԿՑՈՒԹՅՈՒՆԸ ԿԱՐԳԱՎՈՐՈՂ
ՊԵՏԱԿԱՆ ՀԱՆՁՆԱԺՈՂՈՎԻ ՆԱԽԱԳԱՀ |
Մ. ՎԻՐԱԲՅԱՆ |
| |
|
|
2020 թվականի ապրիլի 3
ք. Ստեփանակերտ |
|
| |
Հավելված
Արցախի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովի 2020 թվականի
ապրիլի 3-ի N 14-Ն որոշման |
ԿԱՐԳ
ԷՆԵՐԳԵՏԻԿԱՅԻ ԲՆԱԳԱՎԱՌՈՒՄ ԼԻՑԵՆԶԻԱ ՈՒՆԵՑՈՂ ԱՆՁԻ ԲԱԺՆԵՄԱՍԻ
(ԲԱԺՆԵՏՈՄՍԻ, ՓԱՅԻ) ԿԱՄ ԴՐԱ ՆԿԱՏՄԱՄԲ ԻՐԱՎՈՒՆՔԻ ՕՏԱՐՄԱՆ, ԱՅԼ
ԿԵՐՊ ՓՈԽԱՆՑՄԱՆ ԿԱՄ ԳՐԱՎԱԴՐՄԱՆ, ԻՆՉՊԵՍ ՆԱԵՎ ԼԻՑԵՆԶԱՎՈՐՎԱԾ
ԳՈՐԾՈՒՆԵՈՒԹՅԱՆ ԻՐԱԿԱՆԱՑՄԱՆ ՀԱՄԱՐ ԱՆՀՐԱԺԵՇՏ ԳՈՒՅՔԻ
ԿԱՄ ԴՐԱ ՆԿԱՏՄԱՄԲ ԻՐԱՎՈՒՆՔԻ ՕՏԱՐՄԱՆ, ԱՅԼ ԿԵՐՊ
ՓՈԽԱՆՑՄԱՆ ԿԱՄ ԳՐԱՎԱԴՐՄԱՆ ՀԱՄԱՁԱՅՆԵՑՄԱՆ
1. Սույն կարգով սահմանվում է «Էներգետիկայի մասին» օրենքի համաձայն լիցենզիա ունեցող անձի (այսուհետ` նաև լիցենզավորված անձ) բաժնեմասի (բաժնետոմսի, փայի) (այսուհետ՝ բաժնեմաս) կամ դրա նկատմամբ իրավունքի, ինչպես նաև լիցենզավորված գործունեության իրականացման համար անհրաժեշտ հիմնական գույքի (այսուհետ՝ գույք) կամ դրա նկատմամբ իրավունքի օտարման, այլ կերպ փոխանցման կամ գրավադրման համաձայնեցման կարգը:
2. Լիցենզավորված անձի 25 և ավելի տոկոս բաժնեմասի կամ դրա նկատմամբ իրավունքի, ինչպես նաև լիցենզավորված անձի որոշումները կանխորոշելու հնարավորություն տվող բաժնեմասի կամ դրա նկատմամբ իրավունքի՝ անկախ քանակից, օտարման, այլ կերպ փոխանցման կամ գրավադրման դեպքերում լիցենզավորված անձը պարտավոր է նախապես ստանալ Արցախի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովի (այսուհետ՝ հանձնաժողով) համաձայնությունը:
3. Գույքի կամ դրա նկատմամբ իրավունքի օտարման, այլ կերպ փոխանցման կամ գրավադրման համար լիցենզավորված անձը պարտավոր է նախապես ստանալ հանձնաժողովի համաձայնությունը:
4. Սույն կարգի դրույթները չեն տարածվում մինչև 30 մեգավատտ հզորությամբ կայանում էլեկտրական էներգիայի (հզորության) արտադրության, ինչպես նաև մինչև 30 մեգավատտ գումարային հզորությամբ մեկից ավելի կայաններում էլեկտրական էներգիայի (հզորության) արտադրության լիցենզիա ունեցող անձանց վրա, եթե վերջիններս չունեն այլ լիցենզիաներ, որոնց դեպքում պահանջվում է սույն կարգով նախատեսված համաձայնեցում:
5. Լիցենզավորված անձի բաժնեմասը (գույքը) կամ դրա նկատմամբ իրավունքը ժառանգման կարգով փոխանցելու, վերակազմավորման արդյունքում իրավահաջորդության կարգով անցնելու, գրավադրելու արդյունքում փոխանցելու, սերվիտուտ սահմանելու վերաբերյալ գործարքները չեն համարվում սույն կարգի 2-րդ և 3-րդ կետերով նախատեսված իմաստով գործարք և համաձայնեցման ենթակա չեն։
6. Սույն կարգի 2-րդ կետի իմաստով լիցենզավորված անձի որոշումները կանխորոշելու հնարավորություն տվող բաժնեմասը լիցենզավորված անձի քվեարկելու իրավունք տվող՝ լիցենզավորված անձի որոշումների կայացման վրա ազդելու կամ վերջինիս գործունեության ուղղությունները, ոլորտները կանխորոշելու հնարավորություն տվող բաժնեմասն է՝ անկախ այդ անձի կողմից տվյալ գործարքով ձեռք բերվող բաժնեմասի քանակից:
7. Սույն կարգի 3-րդ կետի իմաստով գույք է համարվում՝
1) 5 կիլոմետրից ավելի երկարություն ունեցող 35 կիլովատտ լարման էլեկտրահաղորդման գծերը.
2) 110 կիլովատտ և բարձր լարման էլեկտրահաղորդման գծերը.
3) 35 կիլովատտ և ավելի լարման տրանսֆորմատորները.
4) բարձր ճնշման գազատարները (բացառությամբ դրանց փոխարինման կամ ապամոնտաժման արդյունքում առաջացած խողովակների), գազաբաշխիչ կայանները կամ գազի ստորգետնյա պահեստ-կայանների ճնշակները.
5) շենքերը, շինությունները կամ հողատարածքները.
6) լիցենզիայով ամրագրված սարքավորումները.
7) սույն կետի 1-6-րդ ենթակետերով չնախատեսված՝ 50 000 000 և ավելի սկզբնական արժեքով այլ գույքը։
8. Լիցենզավորված անձը հանձնաժողով է ներկայացնում սույն կարգի պահանջներին համապատասխանող հայտ՝ նախքան`
1) լիցենզավորված անձի 25 և ավելի տոկոս բաժնեմասի կամ դրա նկատմամբ իրավունքի օտարումը, ինչպես նաև լիցենզավորված անձի որոշումները կանխորոշելու հնարավորություն տվող բաժնեմասի՝ անկախ քանակից, օտարումը՝ վաճառքի, մասնավորեցման (սեփականաշնորհման), փոխանակության, նվիրատվության կամ Արցախի Հանրապետության օրենսդրությամբ նախատեսված (չարգելված) այլ գործարքի կնքումը.
2) լիցենզավորված անձի 25 և ավելի տոկոս բաժնեմասի կամ դրա նկատմամբ իրավունքի, ինչպես նաև լիցենզավորված անձի որոշումները կանխորոշելու հնարավորություն տվող բաժնեմասի՝ անկախ քանակից, այլ կերպ փոխանցումը՝ հավատարմագրային կառավարման հանձնելը կամ Արցախի Հանրապետության օրենսդրությամբ նախատեսված (չարգելված) այլ գործարքի կնքումը.
3) լիցենզավորված անձի 25 և ավելի տոկոս բաժնեմասը կամ դրա նկատմամբ իրավունքի, ինչպես նաև լիցենզավորված անձի որոշումները կանխորոշելու հնարավորություն տվող բաժնեմասի՝ անկախ քանակից, գրավադրումը՝ գրավադրման գործարքի կնքումը.
4) գույքի կամ դրա նկատմամբ իրավունքի օտարումը՝ վաճառքի, մասնավորեցման (սեփականաշնորհման), փոխանակության, նվիրատվության կամ օրենսդրությամբ նախատեսված (չարգելված) այլ գործարքի կնքումը.
5) գույքի կամ դրա նկատմամբ իրավունքի այլ կերպ փոխանցումը՝ վարձակալության, անհատույց օգտագործման, հավատարմագրային կառավարման հանձնելը կամ օրենսդրությամբ նախատեսված (չարգելված) այլ գործարքի կնքումը.
6) գույքի կամ դրա նկատմամբ իրավունքի գրավադրումը` գրավադրման գործարքի կնքումը։ Գրավադրված գույքի կամ դրա նկատմամբ իրավունքի փոխանցման դեպքում լիցենզավորված անձը պարտավոր է համապատասխան հիմքի ի հայտ գալու օրվանից սկսած՝ 10 աշխատանքային օրվա ընթացքում, այդ մասին տեղեկացնել հանձնաժողովին։
9. Հայտը ներառում է`
1) բաժնեմաս (գույք) կամ դրա նկատմամբ իրավունք (այսուհետ՝ բաժնեմաս (գույք)) օտարող, այլ կերպ փոխանցող կամ գրավադրող և ձեռք բերող իրավաբանական անձի դեպքում՝ անվանումը, պետական գրանցման (հաշվառման) համարը, ֆիզիկական անձի դեպքում՝ անունը, ազգանունը և հայրանունը, անձնագրի կամ անձը հաստատող այլ փաստաթղթի պատճենը,
2) բաժնեմասի (գույքի) օտարման, այլ կերպ փոխանցման կամ գրավադրման գործարքի էական պայմանները, բաժնեմասի (գույքի) բնորոշ հատկանիշները, ինչպես նաև գործարքի կնքման հիմնավորումները,
3) լիցենզավորված անձի կանոնադրական (բաժնեհավաք կամ փայահավաք) կապիտալում բաժնեմաս ձեռք բերողի մասնակցության նախատեսվող չափը և տոկոսը, վերջինիս պատկանող՝ լիցենզավորված անձի բաժնեմասի (հավաստագրի) քանակը (եթե ունի նման մասնակցություն), նշում ձեռք բերող անձին պատկանող և ձեռք բերվող բաժնեմասերով հավաստվող քվեարկության իրավունքի մասին (բաժնեմասի օտարման դեպքում),
4) բաժնեմասի (գույքի) նկատմամբ իրավունքը հաստատող փաստաթղթի պատճենը, իսկ դրա բացակայության դեպքում՝ լիցենզավորված անձի հաշվապահական հաշվառման մեջ տվյալ գույքի հաշվառման գույքային համարը,
5) բաժնեմասը (գույքը) ձեռք բերող անձի անհրաժեշտ փորձառության վերաբերյալ հիմնավորող տեղեկություններ,
6) հայտը լրացնող պատասխանատու անձի հեռախոսահամարը, էլեկտրոնային փոստը և կապի այլ միջոցները,
7) հայտը ներկայացնելու տարին, ամիսը և ամսաթիվը,
8) այլ տեղեկություններ և (կամ) կից ներկայացվող փաստաթղթեր (գործարքի նախագիծ, գործարքի էական պայմանները պարունակող առաջարկ ու առաջարկն ընդունելու մասին պատասխան և այլն)՝ լիցենզավորված անձի հայեցողությամբ։
10. Հայտը, դրանում ներառված տեղեկությունները և կից ներկայացվող փաստաթղթերը պետք է համապատասխանեն Արցախի Հանրապետության օրենքների, այլ իրավական ակտերի ու սույն կարգի պահանջներին:
11. Հայտը ստորագրում է լիցենզավորված անձի գործադիր մարմնի ղեկավարը կամ սահմանված կարգով նրան փոխարինող, կամ լիազորված անձը, իսկ անհատ ձեռնարկատիրոջ դեպքում՝ վերջինս կամ նրա ներկայացուցիչը:
12. Հայտը ներկայացվում է հայերեն, մեկ օրինակից։ Հայտում օտար լեզվով փաստաթուղթ ներկայացնելիս լիցենզավորված անձը պարտավոր է միաժամանակ ներկայացնել դրա` օրենքով սահմանված կարգով կատարված հայերեն թարգմանությունը, բացառությամբ օրենքով նախատեսված դեպքերի։
13. Լիցենզավորված անձն օրենքով սահմանված՝ գաղտնի համարվող տեղեկությունը ներկայացնում է առանձին փաստաթղթով` «Գաղտնի է» նշումով փակ ծրարով։ Փաստաթղթի առաջին էջը նույնպես պետք է ներառի «Գաղտնի է» նշումը: Հայտում միաժամանակ ներկայացվում է տվյալ տեղեկությունը որպես գաղտնի նշելու հիմքը: Այդ դեպքում հանձնաժողովը հայտը քննարկում է օրենքով և այլ իրավական ակտերով սահմանված պահանջների պահպանմամբ:
14. Լիցենզավորված անձն օրենքով սահմանված կարգով պատասխանատվություն է կրում հանձնաժողով ներկայացրած տեղեկատվության հավաստիության համար:
15. Հայտի ներկայացման օրվանից՝ 10 աշխատանքային օրվա ընթացքում, հանձնաժողովի համապատասխան կառուցվածքային ստորաբաժանումը ստուգում է հայտի (դրան կից ներկայացվող փաստաթղթերի) ճշտությունն ու ամբողջականությունը և սույն կարգին համապատասխանության դեպքում՝ ընդունում ուսումնասիրության։
16. Հայտում (դրան կից ներկայացվող փաստաթղթերում) թերությունների առկայության դեպքում հանձնաժողովը դրանք հայտնաբերելու պահից 2 աշխատանքային օրվա ընթացքում, բայց ոչ ուշ, քան մինչև սույն կարգի 15-րդ կետում նշված ժամկետի ավարտը, գրավոր առաջարկում է լիցենզավորված անձին 5 աշխատանքային օրվա ընթացքում վերացնել թերությունները, որի դեպքում նշված կետով սահմանված ժամկետը երկարաձգվում է մինչև հայտատուի կողմից համապատասխան թերությունների վերացումը, բայց ոչ ուշ, քան մինչև դրա համար սահմանված ժամկետի ավարտը:
17. Հանձնաժողովը հայտի ուսումնասիրության բացասական արդյունքի մասին հայտն ստանալու օրվանից ոչ ուշ, քան 10 աշխատանքային օրվա ընթացքում, համապատասխան հիմնավորումներով իրազեկում է լիցենզավորված անձին, բացառությամբ սույն կարգի 16-րդ կետով նախատեսված դեպքի:
18. Հայտը սահմանված պահանջներին համապատասխանեցնելու դեպքում լիցենզավորված անձը և հանձնաժողովն առաջնորդվում են սույն կարգի 15-17-րդ կետերով սահմանված պահանջներով և ժամկետներով:
19. Հանձնաժողովը ոչ ուշ, քան հայտը սույն կարգի համաձայն ուսումնասիրության ընդունելու օրվան հաջորդող 2 աշխատանքային օրվա ընթացքում, այն ներկայացնում է Արցախի Հանրապետության Նախագահի աշխատակազմի «Կառավարության գործերի կառավարչություն» առանձնացված ստորաբաժանում՝ «Էներգետիկայի մասին» օրենքի 21-րդ հոդվածի 3-րդ մասի համաձայն՝ ազգային անվտանգությանը կամ պետական շահերին վնասելու տեսանկյունից Արցախի Հանրապետության կառավարության դիրքորոշումը ստանալու նպատակով։
20. Եթե սույն կարգի 19-րդ կետի համաձայն ներկայացված հայտով նախատեսված գործարքը Արցախի Հանրապետության կառավարության գնահատմամբ վնասում է կամ կարող է վնասել ազգային անվտանգությունը կամ պետական շահերը, ապա Արցախի Հանրապետության Նախագահի աշխատակազմի «Կառավարության գործերի կառավարչություն» առանձնացված ստորաբաժանումը, հայտն ստանալուց հետո 20 աշխատանքային օրվա ընթացքում, Արցախի Հանրապետության կառավարության համապատասխան դիրքորոշումը ուղարկում է հանձնաժողով։
21. Արցախի Հանրապետության կառավարության դիրքորոշումը սույն կարգի 20-րդ կետով սահմանված ժամկետում չներկայացվելու դեպքում այն համարվում է դրական։
22. Հանձնաժողովը, սույն կարգի 20-րդ կետի համաձայն Արցախի Հանրապետության կառավարության դիրքորոշումն ստանալու պահից, իսկ վերջինիս դիրքորոշումը չստանալու դեպքում՝ սույն կարգի 20-րդ կետում նշված ժամկետի ավարտից ոչ ուշ, քան 10 աշխատանքային օրվա ընթացքում ընդունում է գործարքի կնքմանը համաձայնություն տալու կամ գործարքի կնքմանը համաձայնության տրամադրումը մերժելու մասին որոշում։ Հանձնաժողովն իրավասու է գործարքի կնքմանը համաձայնություն տալու մասին որոշմամբ սահմանել դրա պարտադիր պայմաններ։
23. Գործարքի կնքմանը համաձայնություն տալու դեպքում հանձնաժողովի որոշմամբ սահմանվում է, որ գործարքի կնքման ժամկետը չի կարող գերազանցել 6 ամիսը, բացառությամբ լիցենզավորված անձի հիմնավորմամբ ավելի երկար ժամկետ սահմանելու դեպքերի։ Ժամկետի սկիզբը հաշվարկվում է որոշումն ուժի մեջ մտնելու օրվանից։
24. Հանձնաժողովը սույն կարգի 8-րդ կետում նշված գործարքի կնքմանը համաձայնություն չի տալիս, եթե այն՝
1) խախտում է կամ կարող է խախտել էներգետիկ համակարգի հուսալիությունը կամ անվտանգությունը.
2) խախտում է կամ կարող է խախտել ներքին շուկայի սպառողների շահերը.
3) Արցախի Հանրապետության կառավարության գնահատմամբ վնասում է կամ կարող է վնասել ազգային անվտանգությանը կամ պետական շահերին.
4) ձեռք բերողը չունի անհրաժեշտ փորձ.
5) հայտը չի համապատասխանում սույն կարգի պահանջներին։
25. Արգելվում է սույն կարգի 8-րդ կետում նշված գործարքի կնքումը՝
1) մինչև հանձնաժողովի կողմից տվյալ գործարքի կնքմանը համաձայնություն տալու մասին որոշում կայացնելը (չթույլատրված գործարք).
2) հանձնաժողովի կողմից տվյալ գործարքի կնքմանը համաձայնության տրամադրումը մերժելու մասին որոշում կայացնելու դեպքում (արգելված գործարք):
26. Հանձնաժողովի որոշմամբ պահանջ նախատեսվելու դեպքում լիցենզավորված անձը պարտավոր է գործարքի կնքումից հետո հանձնաժողովի սահմանած ժամկետում ներկայացնել գործարքին վերաբերող բոլոր փաստաթղթերի պատճենները։
27. Չթույլատրված կամ հանձնաժողովի կողմից սահմանված պայմաններին չհամապատասխանող գործարք կնքելու դեպքում հանձնաժողովն իրավասու է լիցենզավորված անձի նկատմամբ կիրառել օրենքով նախատեսված պատասխանատվության միջոցներ։ Արգելված գործարքի դեպքում հանձնաժողովը կարող է դիմել դատարան՝ օրենքով սահմանված կարգով գործարքն անվավեր ճանաչելու և դրա անվավերության հետևանքներ կիրառելու համար։