ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

 

Ո Ր Ո Շ ՈՒ Մ

 

«27» հունիսի 2006թ.

N 344

 ք.Ստեփանակերտ

 

ՊԵՏԱԿԱՆ ԿՆԻՔՆԵՐԻ, ԴՐՈՇՄԱԿՆԻՔՆԵՐԻ ՊԱՏՐԱՍՏՄԱՆ ԿԱՄ ԱՐՏԱԴՐՈՒԹՅԱՆ ԼԻՑԵՆԶԱՎՈՐՄԱՆ ԿԱՐԳԸ ԵՎ ԼԻՑԵՆԶԻԱՅԻ ՁԵՎԸ ՀԱՍՏԱՏԵԼՈՒ ՄԱՍԻՆ

 

«Լիցենզավորման մասին» Լեռնային Ղարաբաղի Հանրապետության օրենքի 10-րդ հոդվածի 3-րդ, 17-րդ հոդվածի 2-րդ և 43-րդ հոդվածի 2-րդ մասերին համապատասխան՝ Լեռնային Ղարաբաղի Հանրապետության կառավարությունը ո ր ո շ ու մ  է.

Հաստատել՝

ա) պետական կնիքների, դրոշմակնիքների պատրաստման կամ արտադրության լիցենզավորման կարգը՝ համաձայն թիվ 1 հավելվածի.

բ) պետական կնիքների, դրոշմակնիքների պատրաստման կամ արտադրության լիցենզիայի ձևը՝ համաձայն թիվ 2 հավելվածի:

Սույն որոշմամբ հաստատված կարգի համաձայն լիազորված մարմնի իրավասությունները վերապահել Լեռնային Ղարաբաղի Հանրապետության կառավարությանն առընթեր Լեռնային Ղարաբաղի Հանրապետության ոստիկանությանը:

Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

 

 

ԼՂՀ ՎԱՐՉԱՊԵՏ

Ա.ԴԱՆԻԵԼՅԱՆ

 

 

Հավելված 1 ԼՂՀ կառավարության «27» հունիսի 2006թ. թիվ 344 որոշման

 

Կ Ա Ր Գ

 

ՊԵՏԱԿԱՆ ԿՆԻՔՆԵՐԻ, ԴՐՈՇՄԱԿՆԻՔՆԵՐԻ ՊԱՏՐԱՍՏՄԱՆ ԿԱՄ ԱՐՏԱԴՐՈՒԹՅԱՆ ԼԻՑԵՆԶԱՎՈՐՄԱՆ

 

I. ԸՆԴՀԱՆՈՒՐ ԴՐՈՒՅԹՆԵՐ

 

1. Սույն կարգով կանոնակարգվում են Լեռնային Ղարաբաղի Հանրապետության օրենսդրությանը համապատասխան, Լեռնային Ղարաբաղի Հանրապետության կառավարության (այսուհետ՝ լիցենզավորող մարմին) կողմից պետական կնիքների, դրոշմակնիքների պատրաստման կամ արտադրության լիցենզիա (այսուհետ՝ լիցենզիա) ստանալու համար Լեռնային Ղարաբաղի Հանրապետության կառավարության լիազորած պետական կառավարման մարմին (այսուհետ՝ լիազորված մարմին) դիմած իրավաբանական անձանց, անհատ ձեռնարկատերերի և ֆիզիկական անձանց (այսուհետ՝ հայտատու) ներկայացվող պայմաններն ու պահանջները:

2. Լիցենզիան տրվում է մրցույթով: Մրցույթն անցկացվում է, եթե մրցույթին մասնակցելու համար ներկայացվել է նույնիսկ մեկ հայտ:

Մրցույթի կազմակերպման ու անցկացման համար Լեռնային Ղարաբաղի Հանրապետության կառավարությանն առընթեր Լեռնային Ղարաբաղի Հանրապետության ոստիկանությունն ստեղծում է մրցութային հանձնաժողով, որի աշխատանքներում կարող է ներգրավվել փորձագետ:

Մրցութային հանձնաժողովն ուսումնասիրում է հայտատուների կողմից ներկայացված հայտերը, անհրաժեշտ տեղեկությունները և նախապատրաստում նյութեր՝ հանձնաժողովի նիստում ներկայացնելու համար:

Մրցութային հանձնաժողովի որոշումներն ընդունվում են նիստին մասնակցող՝ ձայնի իրավունք ունեցող հանձնաժողովի անդամների ձայների պարզ մեծամասնությամբ: Մրցութային հանձնաժողովի որոշումները ձևակերպվում են արձանագրություններով, որոնք ստորագրում են նիստին մասնակցող՝ հանձնաժողովի բոլոր անդամները:

Մրցույթի արդյունքների մասին որոշումն ուժի մեջ է մտնում Լեռնային Ղարաբաղի Հանրապետության ոստիկանության պետի կողմից հաստատելու պահից:

Մրցույթի արդյունքների վերաբերյալ վեճերը լուծվում են օրենքով սահմանված կարգով:

Լիցենզիան չի կարող օգտագործման տրվել այլ անձանց, օտարվել կամ գրավադրվել՝ բացառությամբ օրենքով սահմանված դեպքերի:

4. Լիցենզիա տալու համար գանձվում է պետական տուրք՝ «Պետական տուրքի մասին» Լեռնային Ղարաբաղի հանրապետության օրենքով նախատեսված կարգով և չափով:

5. Պետական կնիքների, դրոշմակնիքների պատրաստմամբ կամ արտադրությամբ զբաղվող լիցենզավորված անձինք լիցենզավորման ենթակա տվյալ գործունեությունն իրականացնում են միայն լիցենզիայում նշված վայրում:

6. Պետական, ոչ պետական կնիքների, դրոշմակնիքների պատրաստմամբ կամ արտադրությամբ զբաղվող լիցենզավորված անձինք «Լիցենզավորման մասին» Լեռնային Ղարաբաղի Հանրապետության օրենքի 43-րդ հոդվածի 10-րդ մասով նախատեսված լիցենզավորված գործունեությանն առնչվող եռամսյակային հաշվետվություններ են ներկայացնում լիազորված մարմին՝ մինչև հաջորդ ամսվա 10-ը:

Հաշվետվությունում ներառվում են՝

ա) կնիքներ և դրոշմակնիքներ պատվիրած իրավաբանական և ֆիզիկական անձանց ցուցակը.

բ) պատվեր ընդունելու տարեթիվը, ամիսը, ամսաթիվը.

գ) լիազորված մարմնի կողմից տրված՝ կնիք պատվիրելու թույլտվության հերթական համարը.

դ) թույլտվության հետ ներկայացված ուրվագծի պատճենը՝ պատվիրված նմուշի դրոշմով.

ե) կնիք պատվիրելու համար կազմակերպությունը ներկայացնելու լիազորություն ունեցող անձի անձնագրի տվյալները:

Լիազոր մարմինը կատարում է իր կողմից տրված թույլտվությունների հիման վրա պատրաստված կնիքների հաշվառում՝ պետական ռեեստրի միջոցով:

Կնիքների պետական ռեեստրում գրանցումները համարակալվում են վեցանիշ թվերով, աճողական կարգով, ըստ հերթականության:

Կնիքների պետական ռեեստրում գրանցվում են հետևյալ տեղեկությունները՝

ա) պատվիրատուի անվանումը,

բ) պետական գրանցման համարը,

գ) հարկ վճարողի հաշվառման համարը,

դ) ռեեստրում կնիքի գրանցման համարը,

ե) ռեեստրում կնիքի գրանցման ամսաթիվը,

զ) կնիքների, դրոշմակնիքների պատրաստմամբ կամ արտադրությամբ զբաղվող լիցենզավորված անձանց լիցենզիայի համարը:

Կնիք պատվիրելու թույլտվությունը ձևակերպվում է լիազորված մարմնի կողմից՝ լիցենզավորված իրավաբանական կամ ֆիզիկական անձի ներկայացուցչի միջոցով պատվիրատուի ներկայացրած համապատասխան փաստաթղթերի առկայության դեպքում:

Կնիքներ պատվիրելու թույլտվության կարգը սահմանում է Լեռնային Ղարաբաղի Հանրապետության կառավարությունը:

Կազմակերպությունների պահարանները կնիքելու, գծագրերը հաստատելու, գործառական այլ կարիքների, ինչպես նաև քաղաքացիների անձնական օգտագործման համար գործածվող մյուս կնիքները պատրաստվում են առանց լիազորված մարմնի թույլտվության:

 

II. ԼԻՑԵՆԶԻԱ ՍՏԱՆԱԼՈՒ ՀԱՄԱՐ ՊԱՀԱՆՋՎՈՂ ԱՆՀՐԱԺԵՇՏ ՓԱՍՏԱԹՂԹԵՐԸ

 

7. Լիցենզիա ստանալու համար հայտատուն լիազորված մարմին է ներկայացնում հետևյալ փաստաթղթերը՝

ա) լիցենզիա ստանալու մասին հայտը (ձևը կցվում է)՝ նշելով՝

իրավաբանական անձի համար՝ իրավաբանական անձի անվանումը և կազմակերպական-իրավական ձևը, գտնվելու և գործունեության իրականացման վայրերը, իսկ անհատ ձեռնարկատիրոջ և ֆիզիկական անձի համար՝ անունը, ազգանունը, բնակության և գործունեության իրականացման վայրերը.

լիցենզավորման ենթակա գործունեության տեսակը, որը հայտատուն մտադիր է իրականացնել.

բ) իրավաբանական անձի համար՝ կանոնադրության և պետական գրանցման վկայականի պատճենները, իսկ անհատ ձեռնարկատիրոջ համար՝ պետական գրանցման վկայականի պատճենը.

գ) լիցենզավորման ենթակա գործունեության տեսակների վերաբերյալ՝ օրենքով նախատեսված փորձաքննությունների իրականացման լիցենզիա ունեցող ֆիզիկական կամ իրավաբանական անձի փորձագիտական եզրակացությունն արտադրության տեխնոլոգիական գործընթացի կազմակերպման մասին:

Փորձագիտական եզրակացությունը պահանջվում է փորձաքննությունների իրականացման լիցենզիա ունեցող անձի առկայության, ինչպես նաև նշված փորձաքննության անցկացման կարգի Լեռնային Ղարաբաղի Հանրապետության կառավարության կողմից հաստատման դեպքերում:

8. Լիցենզիա ստանալու համար անհրաժեշտ փաստաթղթերը կարող են լիազորած մարմին հանձնել առձեռն կամ փոստով:

9. Լիազորված մարմինը սույն կարգի 7-րդ կետում նշված փաստաթղթերը և լիցենզավորող մարմնի համապատասխան որոշման նախագիծը 20-օրյա ժամկետում՝ սահմանված կարգով ներկայացնում է լիցենզավորող մարմնի քննարկմանը, որը նշված փաստաթղթերի՝ լիազորված մարմնում մուտքագրումից հետո 30 օրվա ընթացքում ընդունում է համապատասխան որոշում:

Լիազորված մարմինը լիցենզիա տալու մասին լիցենզավորող մարմնի որոշման ընդունման պահից 5-օրյա ժամկետում լիցենզավորված անձին հանձնում է լիցենզիան (լիազորված մարմնի ղեկավարի ստորագրությամբ և այդ պետական մարմնի՝ Լեռնային Ղարաբաղի Հանրապետության զինանշանի պատկերով կնիքով վավերացված):

10. Լիազորված մարմինն իրականացնում է «Լիցենզավորման մասին» Լեռնային Ղարաբաղի Հանրապետության օրենքով նախատեսված՝ լիցենզավորող մարմնի բոլոր լիազորությունները՝ բացառությամբ լիցենզիա ստանալու կամ լիցենզիա ստանալու հայտը մերժելու, լիցենզիայի գործողության ժամկետը երկարաձգելու կամ լիցենզիայի գործողության ժամկետի երկարաձգման հայտը մերժելու, լիցենզիան վերաձևակերպելու կամ լիցենզիան վերաձևակերպելու մասին հայտը մերժելու, լիցենզիայի գործողությունը կասեցնելու, լիցենզիայի գործողությունը դադարեցնելու վերաբերյալ հարցերը քննելու և որոշումներ ընդունելու լիազորությունների:

11. Լիցենզիա ստանալու մասին հայտի մերժման, լիցենզիայի գործողության կասեցման կամ լիցենզիայի վերաձևակերպման մասին հայտի մերժման վերաբերյալ որոշումները կարող են բողոքարկվել դատական կարգով:

12. Լիցենզավորման ենթակա գործունեություն իրականացնելու համար հատկացված արտադրամասի տեխնիկական ամրացվածության պահանջներն են՝

ա) պատերը, միջնորմները, առաստաղը և հատակը պետք է լինեն կապիտալ կառուցված.

բ) դռների խորշերում տեղադրվում են առնվազն 3 միլիմետր հաստությամբ երկաթյա դռներ.

գ) մուտքի հիմնական և վանդակապատ դռները պետք է ունենան տարբեր գաղտնանիշով ներքին երկու փական.

դ) արտադրամասն անհրաժեշտ է սարքավորել Լեռնային Ղարաբաղի Հանրապետության կառավարությանն առընթեր Լեռնային Ղարաբաղի Հանրապետության ոստիկանության պետական պահպանության բաժնի պահնորդաազդանշանային կենտրոնացված պահպանության դիտակետին միացված ահազանգման համակարգով:

Եթե տեխնիկական պատճառներով հնարավոր չէ զետեղարանը պահնորդաազդանշանային կենտրոնացված պահպանության դիտակետին միացնելը, ապա այն սարքավորվում է ինքնաահազանգման համակարգով՝ ձայնային կամ լուսային ազդանշանը մոտակա պահակակետին միացնելով (եթե այն շուրջօրյա ծառայության է) կամ արտաքին մասին ամրացնելով:

13. Սույն կարգը տարածվում է նաև ոչ պետական կնիքների, դրոշմակնիքների պատրաստմամբ կամ արտադրությամբ զբաղվող իրավաբանական և ֆիզիկական անձանց վրա:

 

 

ԼՂՀ կառավարության աշխատակազմի ղեկավար-նախարար

Ս. ԳՐԻԳՈՐՅԱՆ

 

 

Ձև

 

________________________________

 

________________________________

(հայտատուի անվանումը (անունը, ազգանունը և

________________________________

կազմակերպական-իրավական ձևը)

________________________________

(գտնվելու վայրը, հասցեն, հեռախոսահամարը)

 

Հ Ա Յ Տ

 

լիցենզիա ստանալու մասին

 

 

Խնդրում եմ տալ լիցենզիա _______________________________________________________

                                                                                                        (գործունեության տեսակի անվանումը)

______________________________________________________________________________

 

Լիցենզավորման պայմաններին ու պահանջներին ծանոթացել ենք (եմ) և պարտավորվում ենք (եմ) պահպանել դրանք:

 

Կից ներկայացնում ենք (եմ)՝

______________________________________________________________________________

 

Հայտատու_______________	___________________________
(ստորագրությունը)	(պաշտոնը, անունը, ազգանունը)

 

 ____ ________________200 թ.

 

 

Կ.Տ.

 

 

Հավելված 2 ԼՂՀ կառավարության «27» հունիսի 2006թ. թիվ 344 որոշման

 

 

Ձև

 

ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԶԻՆԱՆՇԱՆ

ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

 

Լ Ի Ց Ե Ն Զ Ի Ա

 

ՊԵՏԱԿԱՆ ԿՆԻՔՆԵՐԻ, ԴՐՈՇՄԱԿՆԻՔՆԵՐԻ ՊԱՏՐԱՍՏՄԱՆ ԿԱՄ ԱՐՏԱԴՐՈՒԹՅԱՆ

 

ԿԴՊԱ N_________

 

Իրավաբանական անձի անվանումը կամ անհատ ձեռնարկատիրոջ

կամ ֆիզիկական անձի անունը, ազգանունը_____________________________________

 

__________________________________________________________________________

 

Գտնվելու կամ բնակության վայրը (հասցեն) _____________________________________

 

__________________________________________________________________________

 

Գործունեության իրականացման վայրը_________________________________________

 

Գործունեության տեսակը_____________________________________________________

 

Գործունեության ժամկետը____________________________________________________

 

 

Տրված է ____ ________________ 200 թ. __________________________

                                                                                     (ստորագրություն)

 

Կ. Տ.

 

 

ԼՂՀ կառավարության աշխատակազմի ղեկավար-նախարար

Ս. ԳՐԻԳՈՐՅԱՆ