ԱՐՑԱԽԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ք. Ստեփանակերտ

ՈՐՈՇ ԱՊՐԱՆՔՆԵՐԻ ՄԱՏԱԿԱՐԱՐՄԱՆ ՀԱՏՈՒԿ ԿԱՐԳ

ՍԱՀՄԱՆԵԼՈՒ ԵՎ ՀԱՆՁՆԱԺՈՂՈՎ ՍՏԵՂԾԵԼՈՒ ՄԱՍԻՆ

Հիմք ընդունելով «Ռազմական դրության իրավական ռեժիմի մասին» օրենքի 11-րդ հոդվածի 1-ին մասի 4-րդ կետը և ղեկավարվելով Արցախի Հանրապետության Նախագահի 2017 թվականի սեպտեմբերի 25-ի ՆՀ-108-Ն հրամանագրով սահմանված կարգի 105-րդ կետի 1-ին ենթակետով` Արցախի Հանրապետության կառավարությունը որոշում է.

1. Սահմանել որոշ ապրանքների մատակարարման հատուկ կարգ (այսուհետ՝ Կարգ)՝ համաձայն N 1 հավելվածի:

2. Կարգի կիրառմամբ պայմանավորված աշխատանքների համակարգման նպատակով ստեղծել Արցախի Հանրապետության Նախագահի 2022 թվականի դեկտեմբերի 13-ի ՆՀ-1792-Ն հրամանագրով ստեղծված օպերատիվ շտաբին (այսուհետ՝ օպերատիվ շտաբ) կից հանձնաժողով և հաստատել դրա անհատական կազմը՝ համաձայն N 2 հավելվածի։

3. Սահմանել, որ Կարգի կիրառման նկատմամբ վերահսկողությունն իրականացնում է օպերատիվ շտաբը:

4. Սույն որոշումն ուժի մեջ է մտնում հրապարակվելուց հետո՝ անմիջապես:

ՀԱՏՈՒԿ ԿԱՐԳ

ՈՐՈՇ ԱՊՐԱՆՔՆԵՐԻ ՄԱՏԱԿԱՐԱՐՄԱՆ

1. Որոշ ապրանքների մատակարարման հատուկ կարգով (այսուհետ՝ Կարգ) սահմանվում են Արցախի Հանրապետության տարածքում բնակչության կարիքների բավարարման նպատակով Արցախի Հանրապետության Նախագահի 2022 թվականի դեկտեմբերի 13-ի ՆՀ-1792-Ն հրամանագրով ստեղծված օպերատիվ շտաբի (այսուհետ՝ օպերատիվ շտաբ) կողմից որոշված ապրանքների (այսուհետ՝ ապրանքներ) մատակարարման ապահովման համար մատակարարների ընտրության հետ կապված հարաբերությունները:

2. Ապրանքների մատակարարումը կազմակերպվում է Արցախի Հանրապետության կառավարության 2023 թվականի փետրվարի 15-ի N 77–Ն որոշմամբ ստեղծված հանձնաժողովի (այսուհետ՝ հանձնաժողով) կողմից կազմակերպված մրցույթների (այսուհետ՝ մրցույթ) արդյունքներով հաղթող ճանաչված մատակարարների միջոցով:

3. Արցախի Հանրապետության տարածքում գրանցված և (կամ) գործունեություն ծավալող իրավաբանական անձինք և անհատ ձեռնարկատերերը ապրանքների մատակարարման մրցույթներին մասնակցելու հրավեր ստանալու համար գրանցվում են համապատասխան էլեկտրոնային հավելվածում:

4. Մրցույթների կազմակերպման նպատակով օպերատիվ շտաբը մատակարարման ենթակա ապրանքների ցանկն ըստ բնութագրերի (քանակ, մատակարարման ժամկետներ, մատակարարման վայր) տրամադրում է հանձնաժողովին:

5. Հանձնաժողովը կազմում և հաստատում է հրավերը, որը մասնակիցներին է ուղարկվում էլեկտրոնային հավելվածի միջոցով: Հրավերը ներառում է՝

1) ապրանքների բնութագրերը և որակական չափանիշները.

2) ապրանքների պահանջվող քանակը, մատակարարման ենթակա օբյեկտները.

3) ապրանքների մատակարարման ժամկետները.

4) հայտերի ներկայացման օրը, ժամը և վայրը:

6. Մասնակիցների կողմից մրցույթին մասնակցելու հայտը ներկայացվում է փակ ծրարով:

7. Հայտ ներկայացրած մասնակցի կամ նրա ներկայացուցչի ներկայությունը պարտադիր է հայտերի բացման նիստում:

8. Հանձնաժողովը հրավերով նշված վայրում և ժամին մասնակիցների ներկայությամբ բացում է հայտերը՝ որոշում և հայտարարում հրավերի պահանջներին բավարարող նվազագույն գին առաջարկած հաղթող մասնակցին:

9. Հանձնաժողովը հաղթող ճանաչված մասնակցի վերաբերյալ տվյալները տրամադրում է օպերատիվ շտաբին:

10. Հաղթող ճանաչված մասնակցի կողմից հրավերով նախատեսված պայմանները խախտելու դեպքում մասնակիցը հանձնաժողովի որոշմամբ կարող է զրկվել հետագայում մրցույթներին մասնակցելու իրավունքից:

ԱՆՀԱՏԱԿԱՆ ԿԱԶՄ

ՈՐՈՇ ԱՊՐԱՆՔՆԵՐԻ ՄԱՏԱԿԱՐԱՐՄԱՆ ՀԱՏՈՒԿ ԿԱՐԳԻ ԿԻՐԱՌՄԱՄԲ

ՊԱՅՄԱՆԱՎՈՐՎԱԾ ԱՇԽԱՏԱՆՔՆԵՐԻ ՀԱՄԱԿԱՐԳՄԱՆ ՆՊԱՏԱԿՈՎ ԱՐՑԱԽԻ

ՀԱՆՐԱՊԵՏՈՒԹՅԱՆ ՆԱԽԱԳԱՀԻ 2022 ԹՎԱԿԱՆԻ ԴԵԿՏԵՄԲԵՐԻ 13-Ի ՆՀ-1792-Ն

ՀՐԱՄԱՆԱԳՐՈՎ ՍՏԵՂԾՎԱԾ ՕՊԵՐԱՏԻՎ ՇՏԱԲԻՆ ԿԻՑ ՀԱՆՁՆԱԺՈՂՈՎԻ

Պաշտոնական հրապարակման օրը՝ 15 փետրվարի 2023 թվական