ՊԱՇՏՈՆԱԿԱՆ ՊԱՐԶԱԲԱՆՈՒՄ

«Քաղաքացիական ծառայության մասին» Լեռնային Ղարաբաղի Հանրապետության օրենքի /այսուհետ` Օրենք/ 8-րդ հոդվածի 1-ին մասի «ա» ենթակետի համաձայն` քաղաքացիական ծառայության բարձրագույն պաշտոններ զբաղեցնող քաղաքացիական ծառայողներին շնորհվում են քաղաքացիական ծառայության 1-ին կամ 2-րդ դասի պետական խորհրդականի դասային աստիճաններ:

Նշված հոդվածում ամրագրված դրույթի շուրջ արվող բազմաթիվ տարաբնույթ ընկալումների և մեկնաբանությունների ճշտման նպատակով, ղեկավարվելով «Իրավական ակտերի մասին» Լեռնային Ղարաբաղի Հանրապետության օրենքի 88-րդ հոդվածի պահանջներով, պաշտոնապես պարզաբանում եմ.

Օրենքի 7-րդ հոդվածի 3-րդ մասի համաձայն` քաղաքացիական ծառայության բարձրագույն պաշտոնների խումբը դասակարգվում է 1-ին և 2-րդ ենթախմբերի: Քաղաքացիական ծառայության պաշտոնների խմբերում 1-ին ենթախումբը տվյալ խմբի բարձրագույն ենթախումբն է:

Օրենքի 19-րդ հոդվածի 10-րդ մասի համաձայն` այն քաղաքացիական ծառայողները, որոնք ունեն զբաղեցրած պաշտոնի ենթախմբի համար օրենքով նախատեսված առավելագույն դասային աստիճան, ենթակա են փաստաթղթային ատեստավորման:

Հաշվի առնելով, որ քաղաքացիական ծառայության 1-ին դասի պետական խորհրդականի դասային աստիճանից բարձր դասային աստիճան օրենքով չի նախատեսված, բնականաբար, քաղաքացիական ծառայության 1-ին դասի պետական խորհրդականի դասային աստիճանը հանդիսանում է բարձրագույն պաշտոն զբաղեցնող քաղաքացիական ծառայողների համար առավելագույն դասային աստիճան: