ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

 ք.Ստեփանակերտ

Ղեկավարվելով «Հասարակության և պետության կարիքների համար սեփականության օտարման մասին» Լեռնային Ղարաբաղի Հանրապետության օրենքի 2-րդ, 4-րդ, 6-րդ և 7-րդ հոդվածներով` Լեռնային Ղարաբաղի Հանրապետության կառավարությունը ո ր ո շ ու մ է.

1. Ելնելով Լեռնային Ղարաբաղի Հանրապետության Շուշի քաղաքի Ն.Դուման, Ղազանչեցոց, Ազրյան և Մուրացան փողոցներով սահմանափակված հողատարածքի կառուցապատման և բարեկարգման քաղաքաշինական ծրագրի իրականացման անհրաժեշտությունից` Լեռնային Ղարաբաղի Հանրապետության Շուշի քաղաքի Սողոմոնյան փողոցի թիվ 2 բնակելի տան (սեփականության իրավունքի վկայականի համարը` 0000649 տրված 17.07.2001թվականին, սեփականատեր` Բաբկեն Թովմասի Գրիգորյան, տնամերձ հողամասի մակերեսը` 1960 քառ.մ, բնակելի շենքի ընդհանուր մակերեսը` 181.6 քառ.մ, շինությունների ընդհանուր մակերեսը` 119.6 քառ.մ, այսուհետ` տարածք) նկատմամբ ճանաչել բացառիկ` գերակա հանրային շահ` հետևյալ հիմնավորմամբ`

1) սույն որոշման 1-ին կետում նշված ծրագրի իրականացման շահը գերակայում է օտարվող տարածքի սեփականատիրոջ շահից, քանի որ այդ ծրագիրը քաղաքաշինական տեսակետից նպատակ է հետապնդում վերակառուցելու և բարեկարգելու Շուշի քաղաքի սույն որոշման 1-ին կետում նշված տարածքը (հատակագիծը կցվում է).

2) սույն որոշման 1-ին կետում նշված ծրագրի արդյունավետ իրականացումը չի կարող ապահովվել առանց սույն որոշման 1-ին կետում նշված տարածքի օտարման, քանի որ օտարման ենթակա տարածքը գտնվում է վերոհիշյալ քաղաքաշինական գոտու մեջ.

3) սույն որոշման 1-ին կետում նշված տարածքի նկատմամբ ճանաչված բացառիկ` գերակա հանրային շահը չհիմնավորված վնաս չի պատճառում նշված տարածքի սեփականատիրոջը:

2. Սահմանել, որ.

1) սույն որոշման 1-ին կետում նշված տարածքի ձեռքբերողը հանդիսանում է «Ավան» փակ բաժնետիրական ընկերությունը (պետական գրանցման համար` 445.120.10038)` համաձայն 2009 թվականի դեկտեմբերի 2-ին կնքված պայմանագրի (կցվում է).

2) տարածքի օտարման գործընթացն սկսելու վերջնական ժամկետ է համարվում սույն որոշման հրապարակման օրվանից ոչ ուշ, քան 6 ամիսը.

3) օտարման գործառույթների իրականացման աշխատանքները համակարգող և օտարման գործառույթների իրականացման համար պատասխանատու պետական լիազոր մարմինը Լեռնային Ղարաբաղի Հանրապետության Շուշիի շրջանի վարչակազմն է.

4) սույն որոշման 1-ին կետում նշված տարածքի օտարման դիմաց փոխհատուցումն իրականացվում է «Հասարակության և պետության կարիքների համար սեփականության օտարման մասին» Լեռնային Ղարաբաղի Հանրապետության օրենքով սահմանված կարգով, չափով և ժամկետներում:

3. Լեռնային Ղարաբաղի Հանրապետության Շուշիի շրջանի վարչակազմի ղեկավարին` սույն որոշումն ուժի մեջ մտնելուն հաջորդող 7-oրյա ժամկետում սույն որոշումը պատշաճ ձևով ուղարկել օտարվող տարածքի սեփականատիրոջը և օտարվող տարածքի նկատմամբ պետական գրանցում ունեցող գույքային իրավունքներ ունեցող անձանց:

4. Սույն որոշմամբ սահմանված բացառիկ` գերակա հանրային շահ ճանաչված տարածքի նկատմամբ սույն որոշումից բխող գույքային իրավունքներն ու սահմանափակումները ենթակա են պետական գրանցման` Լեռնային Ղարաբաղի Հանրապետության օրենսդրությամբ սահմանված կարգով ու ժամկետներում` սույն որոշմամբ սահմանված ձեռք բերողի սեփական միջոցների հաշվին:

5. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Օտարվող տարածք

ՊԱՅՄԱՆԱԳԻՐ

Լեռնային Ղարաբաղի Հանրապետությունը, ի դեմս Շուշիի շրջանի վարչակազմի ղեկավար Գ. Հայրիյանի (այսուհետ` համապատասխան մարմին), մի կողմից, և «Ավան» ՓԲԸ-ն ` ի դեմս գործադիր տնօրեն Ս. Գալստյանի (այսուհետ` ձեռքբերող), մյուս կողմից, կնքեցին սույն պայմանագիրը հետևյալի մասին.

I. Պայմանագրի առարկան

1. Սույն պայմանագրով համապատասխան մարմինը պարտավորվում է ԼՂՀ կառավարության որոշմամբ ճանաչել բացառիկ` գերակա հանրային շահ Շուշի քաղաքի Սողոմոնյան փողոցի թիվ 2 տան նկատմամբ (այսուհետ` գույք), իսկ ձեռքբերողը պարտավորվում է ընդունել այդ գույքը և դրա համար սեփականատիրոջը վճարել լիցենզավորված կազմակերպության կողմից անշարժ գույքի գնահատված արժեքը:

Գույքի հատակագիծը կցվում է սույն պայմանագրին և հանդիսանում է նրա անբաժանելի մասը:

2. Գույքի վաճառքի գինը որոշվում է «Հասարակության և պետության կարիքների համար սեփականության օտարման մասին» ԼՂՀ օրենքի 11-րդ հոդվածի 1-ին մասի համաձայն, շուկայական արժեքի մասին տեղեկանքի հիման վրա:

II. Կողմերի իրավունքները և պարտականությունները

3. Համապատասխան մարմինը պարտավոր է` սույն պայմանագրի կնքման պահից երկշաբաթյա ժամկետում սույն պայմանագրի 1-ին կետով նախատեսված գույքը, ճանաչել որպես բացառիկ` գերակա հանրային շահ:

4. Ձեռքբերողը պարտավոր է վճարել սույն պայմանագրի 2-րդ կետով նախատեսված գինը:

III. Կողմերի պատասխանատվությունը

5. Կողմերը սույն պայմանագրով ստանձնած պարտավորությունները չկատարելու կամ ոչ պատշաճ կերպով կատարելու համար կրում են գույքային պատասխանատվություն` Լեռնային Ղարաբաղի Հանրապետության օրենսդրությամբ սահմանված կարգով:

IV. Պայմանագրի գործողությունը

6. Սույն պայմանագիրն ուժի մեջ է մտնում բացառիկ` գերակա հանրային շահ ճանաչելու մասին կառավարության որոշումն ուժի մեջ մտնելու պահից:

V. Անհաղթահարելի ուժի ազդեցությունը

7. Սույն պայմանագրով սահմանված պարտավորություններն ամբողջությամբ կամ մասնակիորեն չկատարելու դեպքում կողմերն ազատվում են պատասխանատվությունից, եթե դա եղել է անհաղթահարելի ուժի ազդեցության արդյունք, որը ծագել է սույն պայմանագիրը կնքելուց հետո, և որը կողմերը չէին կարող կանխատեսել կամ կանխարգելել: Այդպիսի իրավիճակներն են երկրաշարժը, ջրհեղեղը, պատերազմը, ռազմական և արտակարգ դրության հայտարարումը, քաղաքական հուզումները, գործադուլները, հաղորդակցության միջոցների աշխատանքի դադարեցումը, պետական մարմինների ակտերը, և այլն, որոնք անհնար են դարձնում սույն պայմանագրով սահմանված պարտավորությունների կատարումը:

VI. Եզրափակիչ դրույթներ

8. Սույն պայմանագրով չնախատեսված դեպքերում կողմերն իրենց պարտականությունները չկատարելու համար պատասխանատվություն են կրում Լեռնային Ղարաբաղի Հանրապետության օրենսդրությամբ սահմանված կարգով:

9. Սույն պայմանագրում բոլոր փոփոխությունները և լրացումները կատարվում են կամ պայմանագիրը լուծվում է գրավոր համաձայնությամբ կամ դատարանի վճռով:

10. Սույն պայմանագիրը կնքված է 2 օրինակից, որոնք ունեն հավասարազոր իրավական ուժ: Յուրաքանչյուր կողմին տրվում է պայմանագրի մեկական օրինակ:

11. Կողմերի հասցեները, բանկային վավերապայմանները և ստորագրությունները: