ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

Համաձայն «Լեռնային Ղարաբաղի Հանրապետության վարչատարածքային բաժանման մասին» ԼՂՀ օրենքի 3-րդ և 4-րդ հոդվածների, մինչև ԼՂՀ շրջանների (այդ թվում` Ստեփանակերտ քաղաքի) և համայնքների (այդ թվում` համայնքում ընդգրկված մեկ կամ ավելի թվով բնակավայրերի) սահմանների նկարագրումը և տեղանշումը համապատասխանաբար ԼՂՀ-ի 1:200000 մասշտաբի և ԼՂՀ շրջանների 1:25000 մասշտաբի տեղագրական քարտեզների վրա, Լեռնային Ղարաբաղի Հանրապետության կառավարությունը որոշում է.

1. Սահմանել, որ շրջանի տարածքը, դա ԼՂՀ-ի տարածքի որոշակի մաս կազմող տարածքային ամբողջությունն է, որի մակերեսը սահմանազատված է հարևան շրջաններից, օտարերկրյա պետություններից ու կազմված է այդ տարածքի սահմանի մեջ ընդգրկված համայնքների (բնակավայրերի) տարածքներից (համաձայն «ԼՂՀ վարչատարածքային բաժանման մասին» ԼՂՀ օրենքի թիվ 2 և 4 հավելվածների) և այդ համայնքների (բնակավայրերի) տարածքների սահմաններից դուրս, բայց շրջանի վարչական տարածքի սահմանում գտնվող հողային և ջրային այլ տարածքներից:

2. Սահմանել, որ համայնքի (բնակավայրի) տարածքը, դա համապատասխան շրջանի տարածքի որոշակի մաս կազմող, մշտական բնակչություն ունեցող կամ այդ նպատակով նախատեսված, կառուցապատված, տարածքային միավոր ամբողջությունն է, որի մակերեսը սահմանազատված (տարանջատված) է այլ համայնքներից (բնակավայրերից) ու կազմված է այդ տարածքի սահմանի մեջ ընդգրկված քաղաքացիների (անկախ բնակության վայրից), իրավաբանական անձանց (անկախ գտնվելու վայրից), տվյալ համայնքի, այլ սեփականության սուբյեկտների և պետական սեփականություն հանդիսացող հողային և ջրային տարածքներից:

3. Մինչև ԼՂՀ տարածքում պետական գեոդեզիական ցանցի և կոորդինատային համակարգի վերականգնումը, ԼՂՀ շրջանների և համայնքների (բնակավայրերի) սահմանների վերջնական ճշտումը, դրանց նկարագրումը և տեղանշումն ուժը կորցրած ճանաչել նախկին ԼՂԻՄ-ի մարզային կամ շրջանային գործադիր կոմիտեների կողմից շրջաններին, համայնքներին (նախկին կոլտնտեսություններին) այլ շրջանների տարածքներից և շրջանի տարածքում ընդգրկված համայնքներին (նախկին կոլտնտեսություններին) իրենց տարածքներից դուրս, բայց տվյալ շրջանի այլ տարածքից առհավետ (անժամկետ) օգտագործելու համար պետական ակտերով ամրացված հողատարածքների վերաբերյալ որոշումները:

4. Սույն որոշումն ուժի մեջ է մտնում 2000թ. հունվարի 1-ից: