ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

Ղեկավարվելով «Հասարակության և պետության կարիքների համար սեփականության օտարման մասին» Լեռնային Ղարաբաղի Հանրապետության օրենքի 2-րդ, 4-րդ, 6-րդ և 7-րդ հոդվածներով` Լեռնային Ղարաբաղի Հանրապետության կառավարությունը ո ր ո շ ու մ է.

1. Ելնելով Լեռնային Ղարաբաղի Հանրապետությունում էներգետիկական անկախության խթանման ծրագրի (այսուհետ` ծրագիր) իրականացման անհրաժեշտությունից` Լեռնային Ղարաբաղի Հանրապետության Ստեփանակերտի քաղաքային համայնքի քաղաքացու սեփականություն հանդիսացող հողամասերի (հասցեն` ԼՂՀ, Քաշաթաղի շրջան, Աղավնո-Միրիկ ճանապարհի ձախ հատված, սեփականության իրավունքի վկայականներ` N 078344 և N 078345, տրված 09.08.2007 թվականին, մակերեսները համապատասխանաբար` 0,44 հա և 1,76 հա, սեփականատեր` Արփինե Մարտիրոսի Մաթևոսյան, այսուհետ` հողամաս) նկատմամբ ճանաչել բացառիկ` գերակա հանրային շահ` հետևյալ հիմնավորմամբ`

1) սույն որոշման 1-ին կետում նշված ծրագրի իրականացման շահը գերակայում է օտարվող սեփականության սեփականատիրոջ շահից, քանի որ ծրագրի իրականացումը նպատակաուղղված է երկրի էներգետիկ ոլորտի զարգացման ապահովմանը (հատակագծերը կցվում են).

2) սույն որոշման 1-ին կետում նշված ծրագրի արդյունավետ իրականացումը չի կարող ապահովվել առանց նշված սեփականության օտարման, քանի որ օտարման ենթակա հողամասը հանդիսանում է «ՍՅՈՒՆԻՔ-1» փոքր հիդրոէլեկտրակայանի անբաժան մասը.

3) սույն որոշման 1-ին կետում նշված հողամասի նկատմամբ ճանաչված բացառիկ` գերակա հանրային շահը չհիմնավորված վնաս չի պատճառում նշված հողամասի սեփականատիրոջը:

2. Սահմանել, որ`

1) սույն որոշման 1-ին կետում նշված հողամասի ձեռքբերողը հանդիսանում է «Իզոտոպ Դելտա» սահմանափակ պատասխանատվությամբ ընկերությունը (պետական գրանցման համար` 443.110.11498)` համաձայն 2011 թվականի սեպտեմբերի 22-ին կնքված պայմանագրի (կցվում է).

2) հողամասի օտարման գործընթացն սկսելու վերջնական ժամկետ է սահմանվում սույն որոշման հրապարակման օրվանից ոչ ուշ, քան 6 ամիսը.

3) օտարման գործառույթների իրականացման աշխատանքները համակարգող և օտարման գործառույթների իրականացման համար պատասխանատու պետական լիազոր մարմինը Լեռնային Ղարաբաղի Հանրապետության Քաշաթաղի շրջանի վարչակազմն է.

4) սույն որոշման 1-ին կետում նշված հողամասի օտարման դիմաց փոխհատուցումն իրականացվում է «Հասարակության և պետության կարիքների համար սեփականության օտարման մասին» Լեռնային Ղարաբաղի Հանրապետության օրենքով սահմանված կարգով, չափով և ժամկետներում:

3. Լեռնային Ղարաբաղի Հանրապետության Քաշաթաղի շրջանի վարչակազմի ղեկավարին`

1) սույն որոշումն ուժի մեջ մտնելուն հաջորդող 7-օրյա ժամկետում սույն որոշումը պատշաճ ձևով ուղարկել օտարվող սեփականության սեփականատիրոջը և օտարվող սեփականության նկատմամբ պետական գրանցում ունեցող գույքային իրավունքներ ունեցող անձանց.

2) սույն որոշումն ուժի մեջ մտնելուն հաջորդող մեկամսյա ժամկետում ապահովել սույն որոշմամբ սահմանված բացառիկ` գերակա հանրային շահ ճանաչված հողամասի նկատմամբ սույն որոշումից բխող գույքային իրավունքների ու սահմանափակումների պետական գրանցումը` Լեռնային Ղարաբաղի Հանրապետության օրենսդրությամբ սահմանված կարգով ու ժամկետներում` սույն որոշմամբ սահմանված հողամաս ձեռք բերողի սեփական միջոցների հաշվին:

4. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

ՊԱՅՄԱՆԱԳԻՐ

Լեռնային Ղարաբաղի Հանրապետությունը, ի դեմս Քաշաթաղի շրջանի վարչակազմի ղեկավար Ս. Խաչատրյանի (այսուհետ` համապատասխան մարմին), մի կողմից, և «Իզոտոպ-Դելտա» ՍՊԸ-ն` ի դեմս գործադիր տնօրեն Հ. Մաթիլյանի (այսուհետ` ձեռքբերող), մյուս կողմից, կնքեցին սույն պայմանագիրը հետևյալի մասին.

I. Պայմանագրի առարկան

1. Սույն պայմանագրով համապատասխան մարմինը պարտավորվում է ԼՂՀ կառավարության որոշմամբ ճանաչել բացառիկ` գերակա հանրային շահ Քաշաթաղի շրջանի Աղավնո համայնքի 0,44հա և 1,76հա հողամասերի /տրված հասարակական կառուցման և սպասարկման համար/նկատմամբ (այսուհետ` գույք), իսկ ձեռքբերողը պարտավորվում է ընդունել այդ գույքը և դրա համար սեփականատիրոջը վճարել լիցենզավորված կազմակերպության կողմից անշարժ գույքի գնահատված արժեքը:

Գույքի հատակագիծը կցվում է սույն պայմանագրին և հանդիսանում է նրա անբաժանելի մասը:

2. Գույքի վաճառքի գինը որոշվում է «Հասարակության և պետության կարիքների համար սեփականության օտարման մասին» ԼՂՀ օրենքի 11-րդ հոդվածի 1-ին մասի համաձայն, շուկայական արժեքի մասին տեղեկանքի հիման վրա:

II. Կողմերի իրավունքները և պարտականությունները

3. Համապատասխան մարմինը պարտավոր է` սույն պայմանագրի կնքման պահից, երկշաբաթյա ժամկետում, սույն պայմանագրի 1-ին կետով նախատեսված գույքը, ճանաչել որպես բացառիկ` գերակա հանրային շահ:

4. Ձեռքբերողը պարտավոր է վճարել սույն պայմանագրի 2-րդ կետով նախատեսված գինը:

III. Կողմերի պատասխանատվությունը

5. Կողմերը սույն պայմանագրով ստանձնած պարտավորությունները չկատարելու կամ ոչ պատշաճ կերպով կատարելու համար կրում են գույքային պատասխանատվություն` Լեռնային Ղարաբաղի Հանրապետության օրենսդրությամբ սահմանված կարգով:

IV. Պայմանագրի գործողությունը

6. Սույն պայմանագիրն ուժի մեջ է մտնում բացառիկ` գերակա հանրային շահ ճանաչելու մասին կառավարության որոշումն ուժի մեջ մտնելու պահից:

V. Անհաղթահարելի ուժի ազդեցությունը

7. Սույն պայմանագրով սահմանված պարտավորություններն ամբողջությամբ կամ մասնակիորեն չկատարելու դեպքում կողմերն ազատվում են պատասխանատվությունից, եթե դա եղել է անհաղթահարելի ուժի ազդեցության արդյունք, որը ծագել է սույն պայմանագիրը կնքելուց հետո, և որը կողմերը չէին կարող կանխատեսել կամ կանխարգելել: Այդպիսի իրավիճակներն են երկրաշարժը, ջրհեղեղը, պատերազմը, ռազմական և արտակարգ դրության հայտարարումը, քաղաքական հուզումները, գործադուլները, հաղորդակցության միջոցների աշխատանքի դադարեցումը, պետական մարմինների ակտերը և այլն, որոնք անհնար են դարձնում սույն պայմանագրով սահմանված պարտավորությունների կատարումը:

VI. Եզրափակիչ դրույթներ

8. Սույն պայմանագրով չնախատեսված դեպքերում կողմերն իրենց պարտականությունները չկատարելու համար պատասխանատվություն են կրում Լեռնային Ղարաբաղի Հանրապետության օրենսդրությամբ սահմանված կարգով:

9. Սույն պայմանագրում բոլոր փոփոխությունները և լրացումները կատարվում են կամ պայմանագիրը լուծվում է գրավոր համաձայնությամբ կամ դատարանի վճռով:

10. Սույն պայմանագիրը կնքված է 2 օրինակից, որոնք ունեն հավասարազոր իրավական ուժ: Յուրաքանչյուր կողմին տրվում է պայմանագրի մեկական օրինակ:

11. Կողմերի հասցեները, բանկային վավերապայմանները և ստորագրությունները: