ք. Ստեփանակերտ

«Խղճի ազատության և կրոնական կազմակերպությունների մասին» Լեռնային Ղարաբաղի Հանրապետության օրենքի 22-րդ հոդվածի 1-ին մասի 4-րդ կետին համապատասխան` Լեռնային Ղարաբաղի Հանրապետության կառավարությունը  որոշում է.

1. Սահմանել կրոնական թեմաներով գրականության և ծիսական նշանակության առարկաների արտադրության, ներմուծման և վաճառքի նկատմամբ հսկողություն իրականացնելու կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող օրվանից:

1. Սույն կարգով կարգավորվում են կրոնական թեմաներով գրականության և ծիսական նշանակության առարկաների (այսուհետ` գրականություն (առարկա)) արտադրության, ներմուծման և վաճառքի նկատմամբ Լեռնային Ղարաբաղի Հանրապետության կրոնի գործերով պետական լիազորված մարմնի (այսուհետ` լիազոր մարմին) կողմից հսկողություն իրականացնելու հետ կապված հարաբերությունները:

2. Արգելվում է Լեռնային Ղարաբաղի Հանրապետություն ներմուծել կամ Լեռնային Ղարաբաղի Հանրապետությունում արտադրել (հրատարակել) կամ վաճառել կրոնական թեմաներով այնպիսի գրականություն, որը`

1) սպառնում է Լեռնային Ղարաբաղի Հանրապետության պետական և հասարակական անվտանգությանը, կարգուկանոնին, քաղաքացիների առողջությանն ու բարոյականությանը, հասարակության մյուս անդամների իրավունքներին և ազատություններին,

2) ձևավորում է ատելություն այլ կրոնական կազմակերպությունների, նրանց դավանանքի և գործունեության նկատմամբ,

3) աղավաղված կամ խեղաթյուրված է ներկայացնում Աստվածաշունչը, հոգևոր հայրերի ժառանգությունը, տարբեր եկեղեցիների ծեսերն ու արարողությունները, աղոթքներն ու ավանդությունները:

3. Լեռնային Ղարաբաղի Հանրապետության քաղաքացիները և Լեռնային Ղարաբաղի Հանրապետությունում գործող կրոնական կազմակերպությունները գրականություն (առարկա) հրատարակելու (արտադրելու) կամ ներմուծելու կամ վաճառելու ցանկության դեպքում դրա նմուշը ներկայացնում են լիազոր մարմին` փորձագիտական եզրակացություն ստանալու նպատակով:

4. Սույն կարգի 3-րդ կետում նշված նմուշը ստանալուց հետո, երեք աշխատանքային օրվա ընթացքում լիազոր մարմինը տալիս է դրա վերաբերյալ եզրակացություն:

5. Բացասական փորձագիտական եզրակացության դեպքում Լեռնային Ղարաբաղի Հանրապետության քաղաքացիները և Լեռնային Ղարաբաղի Հանրապետությունում գործող կրոնական կազմակերպությունները պարտավոր են անմիջապես դադարեցնել չթույլատրված գրականության (առարկայի) տարածումը, իրացումն ու շահագործումը` դրանց նպատակային նշանակությանը համապատասխան:

6. Սույն կարգի 5-րդ կետում նշված պահանջը Լեռնային Ղարաբաղի Հանրապետության քաղաքացիների և Լեռնային Ղարաբաղի Հանրապետությունում գործող կրոնական կազմակերպությունների կողմից կամավոր հիմունքներով չկատարելու դեպքում, իրականացվում են չթույլատրված գրականության (առարկայի) ոչնչացման, ինչպես նաև դրանց տարածումը, իրացումն ու շահագործումը չթույլատրող` օրենսդրությամբ սահմանված այլ աշխատանքներ:

7. Բացասական փորձագիտական եզրակացությունը կարող է բողոքարկվել վերադասության կարգով և (կամ) Լեռնային Ղարաբաղի Հանրապետության վարչապետին առընթեր կրոնի հարցերով խորհրդին: