ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
|
“20” օգոստոսի 2002թ. |
N 207 |
ք.Ստեփանակերտ
Գիտահետազոտական և փորձակոնստրուկտորական աշխատանքների դասակարգման (հասկացության) մասին
‹‹Շահութահարկի մասին›› Լեռնային Ղարաբաղի Հանրապետության օրենքի 15-րդ հոդվածին համապատասխան` Լեռնային Ղարաբաղի Հանրապետության կառավարությունը որոշում է.
1. Սահմանել գիտահետազոտական և փորձակոնստրուկտորական աշխատանքների դասակարգումը (հասկացությունը) (կցվում է), որոնց վրա կատարված ծախսերը հարկվող շահույթը որոշելիս համախառն եկամտից նվազեցվում են դրանց կատարման տարվա ընթացքում ամբողջովին:
2. Սույն որոշման դրույթները տարածվում են անմիջականորեն կազմակերպության կատարած, ինչպես նաև իր կողմից պատվիրված գիտահետազոտական և փորձակոնստրուկտորական աշխատանքների վրա:
3. Կազմակերպությունների պատվերով իրականացվող աշխատանքները գիտահետազոտական և (կամ) փորձակոնստրուկտորական համարվող ու այլ աշխատանքներ ներառելու դեպքում պայմանագրերում, սկզբնական հաշվառման (հաշվապահական) փաստաթղթերում (հաշվարկային ու այլ փաստաթղթերում)` աշխատանքների ու ծառայությունների ընդհանուր արժեքից պետք է առանձնացվեն գիտահետազոտական և (կամ) փորձակոնստրուկտորական համարվող աշխատանքների համար վճարվելիք (վճարման ենթակա) գումարները:
4. Գիտահետազոտական և փորձակոնստրուկտորական աշխատանքների գծով վարվում է առանձնացված հաշվառում:
5. Սույն որոշումն ուժի մեջ է մտնում պաշտոնական հրապարակման պահից:
|
ԼՂՀ վարչապետ |
Ա. ԴԱՆԻԵԼՅԱՆ |
| |
Հավելված
ԼՂՀ կառավարության
20 օգոստոսի 2002թ.
թիվ 207 որոշման |
Դասակարգում (հասկացություն) գիտահետազոտական և փորձակոնստրուկտորական աշխատանքների
1. Գիտահետազոտական աշխատանքներ են համարվում գիտական հետազոտություններն ու մշակումները, որոնք իրականացվում են ձեռքբերված գիտելիքների ընդլայնման և նոր գիտելիքների ստացման ու կիրառման նպատակով, ներառյալ`
ա/ հիմնարար գիտական հետազոտությունները` բնության օրենքների, մարդու գործունեության, հասարակության կառուցվածքի և զարգացման հիմնական օրինաչափությունների մասին ունեցած գիտելիքների ընդլայնմանն ու նոր գիտելիքների ձեռքբերմանն ուղղված տեսական կամ փորձարարական գործունեությունը.
բ/ կիրառական գիտական հետազոտությունները` հիմնականում գործնական նշանակություն ունեցող, որոշակի խնդիրների լուծմանը նպատակաուղղված հետազոտությունները կամ գործնական փորձի միջոցով ձեռք բերված գիտելիքների վրա հիմնված և մարդու կյանքի ու առողջության պահպանմանը, նոր նյութերի, արտադրանքի, ծառայությունների, համակարգերի կամ մեթոդների ստեղծմանը և դրանց հետագա կատարելագործմանն ուղղված փորձարարական մշակումները:
2. Փորձակոնստրուկտորական աշխատանքներ են համարվում ինժեներական օբյեկտի կամ տեխնիկական համակարգի որոշակի կոնստրուկցիայի մշակումը, գծագիր կամ նշանային միջոցների այլ համակարգի մակարդակով նոր օբյեկտի մտահաղացումների և տարբերակների մշակումը, տեխնոլոգիական պրոցեսների մշակումը, այդ թվում`
արտադրանքի կամ տեխնոլոգիայի այլընտրանքների գնահատումը.
արտադրանքի փորձանմուշների նախագծումը, կառուցումը և փորձարկումը.
նոր տեխնոլոգիաների կիրառմամբ` գործիքների, ձուլամայրերի, կաղապարների և դրոշմոցների նախագծումը:
3. Գիտահետազոտական և փորձակոնստրուկտորական աշխատանքում չեն ներառվում, մասնավորապես, գործունեության հետևյալ տեսակները`
ա/ կրթությունը և կադրերի պատրաստումը (վերապատրաստումը),
բ/ մարքետինգային գործունեությունը,
գ/ ընդհանուր նշանակության տեղեկությունների հավաքումը և մշակումը,
դ/ ստանդարտացումը,
ե/ մասնագիտացված բժշկական ծառայությունները,
զ/ գոյություն ունեցող ծրագրային ապահովման հարմարեցումը (ադապտացումը, պահպանումը և ուղեկցումը),
է/ արտադրության պրոցեսում նորամուծությունների ներդրումը,
ը/ կառավարումը,
թ/ սոցոլոգիական և այլ հարցումների անցկացումը, դրանց արդյունքների ամփոփումը և առաջարկությունների մշակումը, գործող օրենդրության ու վիճակագրական տվյալների վերլուծությունը,
ժ/ ինովացիոն գործունեությունը:
|
ԼՂՀ կառավարության
աշխատակազմի ղեկավար |
Ս. ԳՐԻԳՈՐՅԱՆ |