ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

Հասարակական կազմակերպության անվան մեջ «Ղարաբաղ» բառի հոլովաձևերը և դրանց թարգմանությունները, ինչպես նաև ժառանգ չունենալու դեպքում մահացած հանրահայտ անձի անունն օգտագործելու կարգը հաստատելու մասին       

«Հասարակական  կազմակերպությունների մասին» Լեռնային Ղարաբաղի  Հանրապետության օրենքի 10-րդ  հոդվածի 4-րդ կետին  համապատասխան` Լեռնային Ղարաբաղի  Հանրապետության  կառավարությունը ո ր ո շ ու մ է.

1. Հաստատել հասարակական կազմակերպության անվանման մեջ «Ղարաբաղ» բառի հոլովաձևերը և դրանց թարգմանությունները, ինչպես նաև ժառանգ չունենալու դեպքում մահացած հանրահայտ անձի անունն օգտագործելու կարգը /կցվում է/:

2. Սահմանել, որ Լեռնային Ղարաբաղի Հանրապետության կառավարության որոշմամբ իրենց անվանման մեջ «Ղարաբաղ» բառն օգտագործելու թույլտվություն ստացած հասարակական կազմակերպությունները պահպանում են այդ իրավունքը:

Կ Ա Ր Գ

1. Սույն կարգը կարգավորում է հասարակական կազմակերպության անվանման մեջ «Ղարաբաղ» բառի հոլովաձևերը և դրանց թարգմանությունները, ինչպես նաև ժառանգ չունենալու դեպքում մահացած հանրահայտ անձի անունն օգտագործելու հետ կապված հարաբերությունները:

2. Հասարակական կազմակերպությունն իր անվանման մեջ «Ղարաբաղ» բառի հոլովաձևերը և դրանց թարգմանությունները, ինչպես նաև ժառանգ չունենալու դեպքում մահացած հանրահայտ անձի անունը կարող է օգտագործել միայն պետական ռեգիստրի ղեկավարի թույլտվությամբ:

3. Հասարակական կազմակերպությունը «Ղարաբաղ» բառի հոլովաձևերը և դրանց թարգմանությունները, ինչպես նաև ժառանգ չունենալու դեպքում մահացած հանրահայտ անձի անունն իր անվանման մեջ օգտագործելու թույլտվություն ստանալու համար պետական ռեգիստրի կենտրոնական մարմին է ներկայացնում հետևյալ փաստաթղթերը`

ա/ դիմում.

բ/ հասարակական կազմակերպության գործունեությունը բնութագրող նյութեր /բրոշյուրներ, մամուլում հրապարակումներ, լուսանկարներ, տեսահոլովակներ և այլն/, եթե կան այդպիսիք.

գ/ տեղեկություններ հասարակական կազմակերպության անդամների թվի մասնաճյուղերի, ներկայացուցիչների, հիմնարկների և տնտեսական ընկերությունների մասին.

դ/ հասարակական կազմակերպության բարձրագույն մարմնի կողմից հաստատված` դիմելու օրվան նախորդող հաշվետու ժամանակաշրջանի գործունեության և գույքի օգտագործման մասին հաշվետվության պատճենը.

ե/ հասարակական կազմակերպության հիմնադիրների և /կամ/ բարձրագույն մարմնի կողմից ձևավորված մարմիններում ընդգրկված անձանց ցուցակը.

զ/ տեղեկանքներ հարկային և սոցիալական ապահովության մարմիններից պարտավորություններ չունենալու մասին:

Նոր հիմնադրված և պետական գրանցում չունեցող հասարակական կազմակերպությունը ներկայացնում է միայն սույն կետի «ա» և «ե» ենթակետերով սահմանված փաստաթղթերը:

Հասարակական կազմակերպությունն իր ցանկությամբ կարող է ներկայացնել նաև այլ փաստաթղթեր:

4. Պետական ռեգիստրի ղեկավարը սույն կարգով սահմանված փաստաթղթերն ստանալուց հետո 30 օրվա ընթացքում քննարկում է ներկայացված հարցը և կայացնում համապատասխան որոշում: Անհրաժեշտության դեպքում քննարկմանը հրավիրվում են նաև տվյալ հասարակական կազմակերպության և շահագրգիռ պետական մարմինների, կազմակերպությունների ներկայացուցիչները:

5. Պետական ռեգիստրի ղեկավարը «Ղարաբաղ» բառի հոլովաձևերը և դրանց թարգմանությունները հասարակական կազմակերպության անվանման մեջ օգտագործելու թույլտվության մասին որոշում է կայացնում, հաշվի առնելով հասարակական կազմակերպության կանոնադրական խնդիրներն ու նպատակները, ինչպես նաև հասարակական կազմակերպության գործունեության ընթացքում դրա /նոր հիմնադրված և պետական գրանցում չունեցող հասարակական կազմակերպության համար նրա հիմնադիրների/ ձեռք բերած հեղինակությունն ու համբավը:

6. Պետական ռեգիստրի ղեկավարը` ժառանգ չունենալու դեպքում մահացած հանրահայտ անձի անունը հասարակական կազմակերպության անվանման մեջ օգտագործելու թույլտվության մասին որոշում է կայացնում, եթե այդ անձը հանրահայտ է այն ոլորտում, որը համընկնում է տվյալ հասարակական կազմակերպության գործունեության առարկային և նպատակներին: Պետական ռեգիստրի ղեկավարը մերժման մասին որոշում է կայացնում բոլոր այն դեպքերում, երբ այդ անվան օգտագործումն անհարիր է տվյալ անձի համբավին ու կարող է ստվեր գցել նրա հեղինակության վրա:

7. Մերժման դեպքում հասարակական կազմակերպությունը կարող է կրկին դիմել մերժման օրվանից վեց ամիս հետո սույն կարգին համապատասխան:

8. Եթե հասարակական կազմակերպությունը «Ղարաբաղ» բառի հոլովաձևերը և դրանց թարգմանությունները, ինչպես նաև ժառանգ չունենալու դեպքում մահացած հանրահայտ անձի անունն իր անվանման մեջ օգտագործելու թույլտվությունն ստանալուց հետո իր գործունեությամբ արատավորում է Լեռնային Ղարաբաղի Հանրապետության հեղինակությունը կամ հանրահայտ անձի պատիվը, արժանապատվությունը, բարի անունը կամ գործարար համբավը, ինչպես նաև թույլտվություն տալու հիմքերը վերանալու դեպքում պետական ռեգիստրի ղեկավարը որոշում է ընդունում «Ղարաբաղ» բառի հոլովաձևերը և դրանց թարգմանությունները, ինչպես նաև ժառանգ չունենալու դեպքում մահացած հանրահայտ անձի անունը հասարակական կազմակերպության անվանման մեջ օգտագործելու իրավունքից զրկելու մասին:

9. Սույն կարգի 8-րդ կետին համապատասխան որոշում ընդունվելուց հետո եռօրյա ժամկետում հասարակական կազմակերպությանը ծանուցվում է դրա մասին:

10. Սույն կարգի 9-րդ կետով սահմանված ծանուցումն ստանալու օրվանից եռամսյա ժամկետում հասարակական կազմակերպությունը պարտավոր է իր կանոնադրության մեջ կատարել համապատասխան փոփոխություններ և օրենքով սահմանված կարգով այն ներկայացնել պետական գրանցման:

11. Եթե հասարակական կազմակերպությունը համապատասխան ծանուցումն ստանալուց հետո եռամսյա ժամկետում իր կանոնադրության մեջ չի կատարում համապատասխան փոփոխություններ, ապա Լեռնային Ղարաբաղի Հանրապետության արդարադատության պետական վարչությունը կարող է դիմել դատարան` հասարակական կազմակերպության լուծարման պահանջով:

12. Սույն կարգի կիրառման ընթացքում ծագած վեճերը լուծվում են դատական կարգով: