ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

Հիմք ընդունելով «Պետական ոչ առևտրային կազմակերպությունների մասին» Լեռնային Ղարաբաղի Հանրապետության օրենքի 13-րդ հոդվածի 1-ին կետի պահանջները՝ Լեռնային Ղարաբաղի Հանրապետության կառավարությունը ո ր ո շ ու մ է.

1. Հաստատել պետական ոչ առևտրային կազմակերպությունների ֆինանսատնտեսական գործունեության վերաբերյալ ծրագրային ցուցանիշների ներկայացման, այդ գործունեության մասին հաշվետվությունների կազմման, ներկայացման ու ամփոփման կարգը՝ համաձայն հավելվածի:

2. Սահմանել, որ

ա) պետական ոչ առևտրային կազմակերպությունները չեն կարող վերցնել և տրամադրել վարկեր կամ փոխառություններ.

բ) լիազորված մարմնի կողմից, պետական ոչ առևտրային կազմակերպությունների 2004 թվականի ֆինանսատնտեսական գործունեության վերաբերյալ ծրագրային ցուցանիշների մասին ամփոփ տեղեկատվությունը, Լեռնային Ղարաբաղի Հանրապետության ֆինանսների և էկոնոմիկայի նախարարություն է ներկայացվում ոչ ուշ, քան 2004 թվականի մարտի 15-ը:

Կ Ա Ր Գ

1. Սույն կարգով սահմանվում են պետական ոչ առևտրային կազմակերպությունների (այսուհետև` կազմակերպություն) ֆինանսական և տնտեսական գործունեության վերաբերյալ ծրագրային ցուցանիշների, այդ գործունեության մասին հաշվետվությունների կազմման, ներկայացման ու ամփոփման պայմանները:

2. Սույն կարգի իմաստով`

ա) հաշվետվություններ են համարվում կազմակերպությունների ֆինանսատնտեսական գործունեության վերաբերյալ Լեռնային Ղարաբաղի Հանրապետության ֆինանսների և էկոնոմիկայի նախարարություն (այսուհետև` նախարարություն) որոշակի պարբերականությամբ և տեսքով (բովանդակությամբ) ներկայացվող թվային և (կամ) վերլուծական տեղեկատվությունը.

բ) հաշվետու ժամանակահատված է համարվում տվյալ ֆինանսական տարվա այն ժամանակահատվածը, որի ընթացքում իրականացված գործառույթների մասին ներկայացվում է հաշվետվությունը.

գ) հաշվետու ժամանակահատվածի ավարտ է համարվում հաշվետու ժամանակահատվածի վերջին օրացուցային օրը.

դ) հաշվետու մարմիններ են համարվում կազմակերպությունները:

3. Կազմակերպությունները նախարարության սահմանված ձևով և ժամկետներում կազմակերպությունների ընդհանուր կառավարումն իրականացնող լիազորված պետական մարմիններին (այսուհետև` լիազորված մարմին) են տրամադրում տվյալ տարվան հաջորդող տարում կազմակերպության ֆինանսատնտեսական գործունեության վերաբերյալ ծրագրային ցուցանիշները:

4. Լիազորված մարմիններն ամփոփում են սույն կարգի 3-րդ կետի համաձայն ներկայացված ծրագրային ցուցանիշները և նախարարության սահմանված ձևով ու ժամկետներում վերջինիս են ներկայացնում այդ ցուցանիշների վերաբերյալ ամփոփ տեղեկատվություն:

5. Կազմակերպության ֆինանսատնտեսական գործունեության մասին հաշվետվությունն իրենից ներկայացնում է հաշվետու ժամանակահատվածում կազմակերպության կողմից իրականացված ֆինանսատնտեսական գործունեության մասին թվային և (կամ) վերլուծական տեղեկատվություն:

6. Հաշվետվությունը կազմվում, ամփոփվում և նախարարություն է ներկայացվում եռամսյակային ու տարեկան պարբերականությամբ: Նախարարության կողմից կարող են սահմանվել նաև կազմակերպությունների կողմից առանձին դեպքերում ամսական պարբերականությամբ հաշվետվություններ ներկայացվելու պահանջներ:

7. Նախարարություն հաշվետվություններ ներկայացնելու ժամկետ է համարվում`

ա) ամսական պարբերականությամբ ներկայացվող հաշվետվությունների համար` հաշվետու ամսվան հաջորդող ամսվա 27-ը.

բ) եռամսյակային պարբերականությամբ ներկայացվող հաշվետվությունների համար` հաշվետու եռամսյակին հաջորդող ամսվա ավարտը.

գ) տարեկան պարբերականությամբ ներկայացվող հաշվետվությունների համար` հաշվետու ֆինանսական տարվան հաջորդող տարվա մարտի 1-ը:

8. Հաշվետվությունների առանձին տեսակների ցանկը, կազմն ու բովանդակությունը, դրանց կազմման, ամփոփման ու ներկայացման առանձնահատկությունները, ինչպես նաև հաշվետվությունների ձևերը և դրանց լրացման պահանջները սահմանում է նախարարությունը:

9. Հաշվետվությունները նախարարություն են ներկայացվում հետևյալ կարգով`

ա) հաշվետու մարմինները` տվյալ հաշվետվությունների կազմման համար սահմանված ձևերին համապատասխան կազմում և հաշվետու ժամանակահատվածի ավարտից հետո 10-օրյա ժամկետում (տարեկան հաշվետվությունների դեպքում` մինչև հաշվետու ֆինանսական տարվան հաջորդող տարվա փետրվարի 10-ը) լիազորված մարմիններին են տրամադրում համապատասխան հաշվետվություններ.

բ) լիազորված մարմիններն ամփոփում են հաշվետու մարմինների կողմից ներկայացված տեղեկատվությունը և մինչև տվյալ հաշվետվության ներկայացման համար սույն կարգի 7-րդ կետով սահմանված ժամկետի ավարտը ներկայացնում են նախարարություն:

10. Ելնելով հաշվետվություններում ներառված տեղեկատվության բովանդակությունից հաշվետվությունների առանձին տեսակների համար նախարարության կողմից կարող են սահմանվել հաշվետվություններ ներկայացնելու այլ ժամկետներ, քան սահմանված են սույն կարգի 9-րդ կետով` պայմանով, որ այդ ժամկետների ընդհանուր տևողությունը տվյալ հաշվետվության համար չպետք է գերազանցի սույն կարգի 7-րդ կետով սահմանված` համաձայն հաշվետվություններ ներկայացնելու վերջնական ժամկետի տևողությունը:

11. Սույն կարգի 9-րդ կետի համաձայն նախարարություն ներկայացված հաշվետվություններն ամփոփվում են նախարարությունում և նախարարության սահմանված ձևին համապատասխան առանձին հավելվածով կցվում են Լեռնային Ղարաբաղի Հանրապետության պետական բյուջեի կատարման մասին հաշվետվությանը: