ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

Լեռնային Ղարաբաղի Հանրապետության աշխարհագրական օբյեկտների անվանակոչումների և անվանափոխումների մասնագիտական հանձնաժողով ստեղծելու և հանձնաժողովի կանոնադրությունը հաստատելու մասին

«Աշխարհագրական անվանումների մասին» Լեռնային Ղարաբաղի Հանրապետության օրենքի 10-րդ հոդվածին համապատասխան` Լեռնային Ղարաբաղի Հանրապետության կառավարությունը ո ր ո շ ու մ է.

1. Ստեղծել Լեռնային Ղարաբաղի Հանրապետության աշխարհագրական օբյեկտների անվանակոչումների և անվանափոխումների մասնագիտական հանձնաժողով և հաստատել դրա կազմը /հավելված 1/:

2. Հաստատել Լեռնային Ղարաբաղի Հանրապետության աշխարհագրական օբյեկտների անվանակոչումների և անվանափոխումների մասնագիտական հանձնաժողովի կանոնադրությունը /հավելված 2/:

ԿԱԶՄ

Յուրի Առաքելյան        ԱրՊՀ աշխարհագրության ամբիոնի վարիչ, աշխարհագրական գիտությունների

                                     թեկնածու /հանձնաժողովի նախագահ/

Արմեն Սարգսյան        ԱրՊՀ բանասիրական ֆակուլտետի դեկան, բանասիրական գիտությունների

                                     թեկնածու, դոցենտ

Վահրամ Բալայան      ԱրՊՀ պատմության ամբիոնի վարիչ, պատմական գիտությունների

                                     թեկնածու, դոցենտ

Սլավա Սարգսյան       ԼՂՀ կրթության, մշակույթի և սպորտի նախարարության հուշարձանների

                                     պահպանության և ուսումնասիրման բաժնի վարիչ

Վիլեն Սաֆարյան        ԼՂՀ պաշտպանության նախարարության տեղագրության ծառայության պետ

Գարիկ Գրիգորյան      ԼՂՀ շրջակա միջավայրի և բնական ռեսուրսների վարչության պետ

Լևոն Լալայան              ԼՂՀ անշարժ գույքի կադաստրի պետական կոմիտեի աշխատակազմի

                                     քարտեզագրման, գեոդեզիայի և գեոդեզիական պետական տեսչության բաժնի պետ

Ֆելիքս Հակոբյան       «Գեոդեզիայի, քարտեզագրության, հողաշինարարության և անշարժ գույքի

                                     գնահատման կենտրոն» ՊՈԱԿ-ի գործադիր տնօրեն

Մհեր Հարությունյան    ԼՂՀ պաշտպանության նախարարության «Մարտիկ» թերթի ավագ գրական

                                     աշխատող, պատմական գիտությունների թեկնածու /հանձնաժողովի քարտուղար/

Կ Ա Ն Ո Ն Ա Դ Ր ՈՒ Թ Յ ՈՒ Ն

I. Ընդհանուր դրույթներ

1. Լեռնային Ղարաբաղի Հանրապետության աշխարհագրական օբյեկտների անվանակոչումների և անվանափոխումների մասնագիտական հանձնաժողովը /այսուհետև` հանձնաժողով/ ստեղծվել է «Աշխարհագրական անվանումների մասին» Լեռնային Ղարաբաղի Հանրապետության օրենքի համաձայն և Լեռնային Ղարաբաղի Հանրապետության կառավարության 2005 թվականի ապրիլի 26-ի «Լեռնային Ղարաբաղի Հանրապետության աշխարհագրական օբյեկտների անվանակոչումների և անվանափոխումների մասնագիտական հանձնաժողով ստեղծելու և հանձնաժողովի կանոնադրությունը հաստատելու մասին» թիվ 231 որոշմամբ:

2. Հանձնաժողովը Լեռնային Ղարաբաղի Հանրապետության աշխարհագրական օբյեկտների անվանակոչումների ու անվանափոխումների, ինչպես նաև Լեռնային Ղարաբաղի Հանրապետության սահմաններից դուրս գտնվող աշխարհագրական օբյեկտների անվանումների օգտագործման կանոնակարգման հարցերով զբաղվող մարմին է:

3. Հանձնաժողովն իր գործունեության ընթացքում ղեկավարվում է «Աշխարհագրական անվանումների մասին» Լեռնային Ղարաբաղի Հանրապետության օրենքով, այլ օրենքներով և իրավական ակտերով ու սույն կանոնադրությամբ:

4. Հանձնաժողովի խնդիրներն են`

ա/ Լեռնային Ղարաբաղի Հանրապետության աշխարհագրական օբյեկտների անվանակոչումների և անվանափոխումների վերաբերյալ առաջարկությունների քննարկումն ու եզրակացությունների տրամադրումը.

բ/ Լեռնային Ղարաբաղի Հանրապետության աշխարհագրական օբյեկտների անվանումների տառադարձությունների, ինչպես նաև Լեռնային Ղարաբաղի Հանրապետության սահմաններից դուրս գտնվող այլ աշխարհագրական օբյեկտների անվանումների հայերենով տառադարձության և արտասանության մեթոդաբանության հիմքերի մշակումը.

գ/ աշխարհագրական օբյեկտների պատմական անունները վերականգնելու, օտարամուտ, անբարեհունչ և կրկնվող անունները վերացնելու հիմնավորումը.

դ/ պաշտոնական տեղեկատուի /գազետիրի/, ինչպես նաև այլ տեղեկատուների ու բառարանների հրատարակման մասին կարծիքների և եզրակացությունների տրամադրումը.

ե/ աշխարհագրական օբյեկտների անվանակոչումների և անվանափոխումների կանոնակարգմանն առնչվող հարցերի պարզաբանման համար Լեռնային Ղարաբաղի Հանրապետության նախարարությունների, գերատեչությունների, այլ հիմնարկների ու կազմակերպությունների մասնագետների հետ համագործակցված աշխատանքի կազմակերպումը:

5. Հանձնաժողովն իր խնդիրներին համապատասխան`

ա/ մասնագիտական եզրակացություն է տալիս գրանցման ենթակա աշխարհագրական օբյեկտների անվանումների մասին.

բ/ Լեռնային Ղարաբաղի Հանրապետության անշարժ գույքի կադաստրի պետական կոմիտեի հետ համատեղ ուսումնասիրում է աշխարհագրական օբյեկտների անվանումների, վերանվանումների, ճշտումների վերաբերյալ առաջարկությունները.

գ/ կարծիք է տալիս Լեռնային Ղարաբաղի Հանրապետության անշարժ գույքի կադաստրի պետական կոմիտեի կողմից կազմված աշխարհագրական անվանումների, անվանակոչումների և անվանափոխումների վերաբերյալ նորմատիվ-տեխնիկական փաստաթղթերի մասին.

դ/ հարցերի լուծման նպատակով ներգրավում է համապատասխան կազմակերպություններ, հիմնարկներ, մասնագետների և գիտնականների:

6. Հանձնաժողովի կազմը հաստատում է Լեռնային Ղարաբաղի Հանրապետության կառավարությունը:

7. Հանձնաժողովի նախագահը`

ա/ Լեռնային Ղարաբաղի Հանրապետության անշարժ գույքի կադաստրի պետական կոմիտե է ներկայացնում հանձնաժողովի նախապատրաստած առաջարկությունները.

բ/ նշանակում է հանձնաժողովի նիստի վայրը, օրը, ժամը և առաջարկում օրակարգը.

գ/ կատարում է հանձնաժողովի անդամների միջև աշխատանքի բաշխում.

դ/ իրականացնում է սույն կանոնադրությամբ նախատեսված այլ լիազորություններ:

8. Հանձնաժողովի քարտուղարը`

ա/ ապահովում է հանձնաժողովի աշխատանքային ծրագրերի, նիստերի օրակարգերի անհրաժեշտ նյութերի, ինչպես նաև որոշումների նախագծերի նախապատրաստումը.

բ/ հանձնաժողովի անդամներին ոչ ուշ, քան հանձնաժողովի նիստից 7 օր առաջ ուղարկում է հանձնաժողովի նիստի օրակարգը և քննարկվելիք հարցերին վերաբերող անհրաժեշտ նյութերը, նրանց տեղեկացնում հանձնաժողովի նիստի անցկացման վայրի և ժամանակի մասին.

գ/ կազմում է հանձնաժողովի նիստերի արձանագրությունները և հետևում հանձնաժողովի ընդունած որոշումների կատարման ընթացքին:

9. Հանձնաժողովի անդամները`

ա/ իրավունք ունեն հարցեր և առաջարկություններ ներկայացնելու հանձնաժողովի քննարկմանը և ծանոթանալու հանձնաժողովի նիստերի արձանագրություններին.

բ/ պարտավոր են մասնակցել հանձնաժողովի աշխատանքներին և կատարել հանձնաժողովի ու նրա նախագահի հանձնարարականները:

10. Հանձնաժողովի գործունեությունն իրականացվում է հանձնաժողովի նիստերի միջոցով: Նիստերը գումարվում են ըստ անհրաժեշտության, բայց ոչ պակաս, քան յուրաքանչյուր եռամսյակը մեկ անգամ: Հանձնաժողովի նիստն իրավազոր է, եթե դրան մասնակցում է հանձնաժողովի անդամների կեսից ավելին:

Հանձնաժողովի որոշումներն ընդունվում են բաց քվեարկությամբ, նիստի մասնակիցների ձայների թվի պարզ մեծամասնությամբ:

Հանձնաժողովի որոշումներն ունեն խորհրդատվական բնույթ:

Հանձնաժողովի նախագահի հրավերով հանձնաժողովի նիստերին կարող են մասնակցել այլ անձինք` խորհրդակցական ձայնի իրավունքով:

11. Հանձնաժողովն ունի իր անվամբ ձևաթուղթ:

12. Հանձնաժողովի գործունեությունը դադարում է օրենքով սահմանված կարգով: