ք. Ստեփանակերտ

ՔԱՂԱՔԱՑԻՆԵՐԻ ՍԵՓԱԿԱՆՈՒԹՅՈՒՆ ՀԱՆԴԻՍԱՑՈՂ ՀՈՂԱՄԱՍԵՐԻ ՆԿԱՏՄԱՄԲ ԲԱՑԱՌԻԿ` ԳԵՐԱԿԱ ՀԱՆՐԱՅԻՆ ՇԱՀ ՃԱՆԱՉԵԼՈՒ ՄԱՍԻՆ

Ղեկավարվելով «Հասարակության և պետության կարիքների համար սեփականության օտարման մասին» Լեռնային Ղարաբաղի Հանրապետության օրենքի 2-րդ, 4-րդ, 6-րդ և 7-րդ հոդվածներով` Լեռնային Ղարաբաղի Հանրապետության կառավարությունը ո ր ո շ ու մ է.

1. Ելնելով Լեռնային Ղարաբաղի Հանրապետության Ասկերանի շրջանի Ավետարանոց գյուղում 50 տեղանոց մանկապարտեզի նոր շենքի կառուցապատման քաղաքաշինական ծրագրի իրականացման անհրաժեշտությունից` Լեռնային Ղարաբաղի Հանրապետության Ասկերանի շրջանի Ավետարանոց գյուղում քաղաքացիների սեփականություն հանդիսացող հողամասերի (հասցե` ԼՂՀ, Ասկերանի շրջան, գյուղ Ավետարանոց, անշարժ գույքի սեփականության իրավունքի գրանցման` NN 117654, 117655 վկայականներ, տրված` 05.12.2011թ., մակերեսները համապատասխանաբար` 0.1506, 0.1176 հա, սեփականատերեր` Կամո, Օֆելյա, Էռնեստ, Գրետա, Լուսինե, Էռնեստ և Էրիկ Մնացականյաններ, այսուհետ` հողամաս) նկատմամբ ճանաչել բացառիկ` գերակա հանրային շահ` հետևյալ հիմնավորմամբ`

1) սույն որոշման 1-ին կետում նշված ծրագրի իրականացման շահը գերակայում է օտարվող սեփականության սեփականատերերի շահերից, քանի որ ծրագիրը նպատակ է հետապնդում նոր նախակրթական ուսումնական հաստատություն կառուցելու միջոցով ապահովելու երեխաների վաղ շրջանի զարգացման, դաստիարակության, ինչպես նաև զբաղվածության հիմնախնդիրները.

2) սույն որոշման 1-ին կետում նշված ծրագրի արդյունավետ իրականացումը չի կարող ապահովվել առանց նշված սեփականության օտարման, քանի որ մանկապարտեզի շենքի կառուցման համար հողամասի ուղղահայաց հատակագծման համար լրացուցիչ ծախսեր չպահանջող և ռելիեֆի տեսանկյունից բարենպաստ միակ տարածքը հանդիսանում է սույն որոշման 1-ին կետում նշված հողամասը.

3) սույն որոշման 1-ին կետում նշված հողամասի նկատմամբ ճանաչված բացառիկ` գերակա հանրային շահը չհիմնավորված վնաս չի պատճառում նշված հողամասերի սեփականատերերին:

2. Սահմանել, որ`

1) սույն որոշման 1-ին կետում նշված հողամասի ձեռք բերողը հանդիսանում է Լեռնային Ղարաբաղի Հանրապետությունը, որի անունից հանդես է գալիս Լեռնային Ղարաբաղի Հանրապետության քաղաքաշինության նախարարությունը.

2) հողամասի օտարման գործընթացն սկսելու վերջնական ժամկետ է սահմանվում սույն որոշման հրապարակման օրվանից ոչ ուշ, քան 6 ամիսը.

3) օտարման գործառույթների իրականացման աշխատանքները համակարգող և օտարման գործառույթների իրականացման համար պատասխանատու պետական լիազոր մարմինը Լեռնային Ղարաբաղի Հանրապետության քաղաքաշինության նախարարությունն է.

4) սույն որոշման 1-ին կետում նշված հողամասի օտարման դիմաց փոխհատուցումն իրականացվում է «Հասարակության և պետության կարիքների համար սեփականության օտարման մասին» Լեռնային Ղարաբաղի Հանրապետության օրենքով սահմանված կարգով, չափով և ժամկետներում:

3. Լեռնային Ղարաբաղի Հանրապետության քաղաքաշինության նախարարին`

1) սույն որոշումն ուժի մեջ մտնելուն հաջորդող 7-օրյա ժամկետում սույն որոշումը պատշաճ ձևով ուղարկել օտարվող սեփականության սեփականատերերին և օտարվող սեփականության նկատմամբ պետական գրանցում ունեցող գույքային իրավունքներ ունեցող անձանց.

2) ապահովել սույն որոշմամբ սահմանված բացառիկ` գերակա հանրային շահ ճանաչված հողամասի նկատմամբ սույն որոշումից բխող գույքային իրավունքների ու սահմանափակումների պետական գրանցումը` Լեռնային Ղարաբաղի Հանրապետության օրենսդրությամբ սահմանված կարգով ու ժամկետներում` սույն որոշմամբ սահմանված հողամաս ձեռք բերողի սեփական միջոցների հաշվին:

4. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը: