ք. Ստեփանակերտ

Ղեկավարվելով «Պետական ոչ առևտրային կազմակերպությունների մասին» Լեռնային Ղարաբաղի Հանրապետության օրենքի 13-րդ ու «Բաժնետիրական ընկերությունների մասին» Լեռնային Ղարաբաղի Հանրապետության օրենքի 84-րդ հոդվածներով, ինչպես նաև պետական ոչ առևտրային կազմակերպությունների և 100 տոկոս պետական մասնակցությամբ բաժնետիրական ընկերությունների կողմից մատուցվող ծառայությունների, կատարվող աշխատանքների, մատակարարվող ապրանքների առավելագույն գների (սակագների) հաստատման գործընթացի կանոնակարգման նպատակով, Լեռնային Ղարաբաղի Հանրապետության կառավարությունը որոշում է.

1. Սահմանել, որ`

1) Պետական ոչ առևտրային կազմակերպությունների կողմից մատուցվող ծառայությունների, կատարվող աշխատանքների, մատակարարվող ապրանքների առավելագույն գները (սակագները) հաստատվում են պետական ոչ առևտրային կազմակերպության կառավարումն իրականացնող լիազորված պետական մարմնի կողմից և համաձայնեցվում են Լեռնային Ղարաբաղի Հանրապետության ֆինանսների և էկոնոմիկայի նախարարության հետ.

2) 100 տոկոս պետական մասնակցությամբ բաժնետիրական ընկերությունների (բացառությամբ «Հանրային ծառայությունները և տնտեսական մրցակցությունը կարգավորող մարմնի մասին» Լեռնային Ղարաբաղի Հանրապետության օրենքի 2-րդ հոդվածով սահմանված ոլորտների ընկերությունների) կողմից մատուցվող ծառայությունների, կատարվող աշխատանքների, մատակարարվող ապրանքների առավելագույն գները (սակագները) հաստատվում են.

ա. հիմնադրի անունից հանդես եկող պետական կառավարման մարմնի կողմից և համաձայնեցվում են Լեռնային Ղարաբաղի Հանրապետության ֆինանսների և էկոնոմիկայի նախարարության հետ, եթե այդ ծառայությունները, աշխատանքները, ապրանքները ձեռք են բերվում պետական բյուջեի միջոցների հաշվին,

բ. հիմնադրի անունից հանդես եկող պետական կառավարման մարմնի կողմից` եթե այդ ծառայությունները, աշխատանքները, ապրանքները ձեռք են բերվում ոչ պետական բյուջեի միջոցների հաշվին:

2. Առաջարկել տեղական ինքնակառավարման մարմիններին` նախքան «Տեղական ինքնակառավարման մասին»  Լեռնային Ղարաբաղի Հանրապետության օրենքի 60-րդ հոդվածի համաձայն մատուցվող ծառայությունների դիմաց գանձվող վճարների դրույքաչափերի սահմանումը, դրանք համաձայնեցնել Լեռնային Ղարաբաղի Հանրապետության ֆինանսների և էկոնոմիկայի նախարարության հետ:

3. Սույն որոշման 1-ին կետի 1-ին ենթակետով և 2-րդ ենթակետի «ա»  պարբերությամբ նախատեսված դեպքերում Լեռնային Ղարաբաղի Հանրապետության ֆինանսների և էկոնոմիկայի նախարարությունը եռամսյա ժամկետում ուսումնասիրում և հայտնում է իր դիրքորոշումը` ներկայացված առավելագույն գների (սակագների) վերաբերյալ: Լեռնային Ղարաբաղի Հանրապետության ֆինանսների և էկոնոմիկայի նախարարության դիրքորոշումը չընդունելու դեպքում լիազորված մարմինը առավելագույն գների (սակագների) հաստատման վերաբերյալ հարցը ներկայացնում է Լեռնային Ղարաբաղի Հանրապետության կառավարության քննարկմանը, որի ընդունած որոշումը կողմերի համար վերջնական է: Լեռնային Ղարաբաղի Հանրապետության ֆինանսների և էկոնոմիկայի նախարարությունը համաձայնեցման նպատակով ներկայացվող տեղեկությունների համար կարող է սահմանել ձևեր:

4. Հաստատված առավելագույն գները (սակագները) ուժի մեջ են մտնում ոչ շուտ, քան դրանց հաստատման մասին հրամանի պաշտոնական հրապարակման օրվանից մեկ ամիս հետո:

5. Պետական կառավարման մարմինների ղեկավարներին` սույն որոշումն ուժի մեջ մտնելուց հետո եռամսյա ժամկետում ապահովել ենթակա պետական ոչ առևտրային կազմակերպությունների և 100 տոկոս պետական մասնակցությամբ բաժնետիրական ընկերությունների կողմից մատուցվող ծառայությունների, կատարվող աշխատանքների, մատակարարվող ապրանքների գործող գների (սակագների) վերահաստատումը և ներկայացումը Լեռնային Ղարաբաղի Հանրապետության ֆինանսների և էկոնոմիկայի նախարարություն` սույն որոշման 1-ին կետով սահմանված կարգով համաձայնեցման: Սույն կետով սահմանված հարաբերությունների նկատմամբ չեն տարածվում սույն որոշման 4-րդ կետով սահմանված նորմերը:

6. Սույն որոշման պահանջները չեն կիրառվում, եթե Լեռնային Ղարաբաղի Հանրապետության օրենսդրությամբ գների (սակագների) հաստատման այլ կարգ է նախատեսված:

7. Սույն որոշումն ուժի մեջ է մտնում պաշտոնական հրապարակմանը հաջորդող օրվանից: