ք. Ստեփանակերտ

«Հարկային ծառայության մասին» Լեռնային Ղարաբաղի Հանրապետության օրենքի 30-րդ հոդվածի 1-ին մասին համապատասխան` Լեռնային Ղարաբաղի Հանրապետության կառավարությունը ո ր ո շ ու մ է.

1. Սահմանել հարկային ծառայողներին զենք տրամադրելու, զենքը պահելու, կրելու և օգտագործելու կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Կ Ա Ր Գ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կանոնակարգվում են հարկային ծառայողներին պահելու և կրելու իրավունքով հաշվեցուցակային զենք (այդ թվում` ռազմամթերք) (այսուհետ` զենք) տրամադրելու, զենքը պահելու, կրելու և օգտագործելու հետ կապված հարաբերությունները:

2. Հարկային ծառայողին հատկացվող զենքի հետ միասին տրվում են համապատասխան հարմարանքներ` զենքը բացահայտ կամ քողարկված կրելու համար, ինչպես նաև զենքի խնամքի համար նախատեսված պարագաներ:

3. Լեռնային Ղարաբաղի Հանրապետության կառավարությանն առընթեր հարկային պետական ծառայության (այսուհետ` ծառայության) պետին, պետի տեղակալներին, օպերատիվ հետախուզության վարչության պետին, օպերատիվ հետախուզության վարչության օպերատիվ արձագանքման բաժնի և քննչական բաժնի պետերին Լեռնային Ղարաբաղի Հանրապետության կառավարության 2009 թվականի փետրվարի 24-ի N 89-Ն որոշմամբ սահմանված զենք հատկացվում է նրանց պաշտոնի նշանակելու պահից:

4. Լեռնային Ղարաբաղի Հանրապետության կառավարության 2009 թվականի փետրվարի 24-ի N 89-Ն որոշմամբ սահմանված զենք պահելու և կրելու իրավունք ունեցող այլ հարկային ծառայողներին զենք հատկացնելու իրավունքը վերապահվում է ծառայության պետին:

5. Պահելու և կրելու իրավունքով հատկացված զենքը հարկային ծառայողի կողմից գործադրվում (կիրառվում) և օգտագործվում է «Հարկային ծառայության մասին» Լեռնային Ղարաբաղի Հանրապետության օրենքով սահմանված դեպքերում և կարգով:

II. ԶԵՆՔԸ ՏՐԱՄԱԴՐԵԼՈՒ ՊԱՅՄԱՆՆԵՐԸ ԵՎ ԿԱՐԳԸ

6. Լեռնային Ղարաբաղի Հանրապետության կառավարության 2009 թվականի փետրվարի 24-ի N 89-Ն որոշմամբ սահմանված զենք հատկացվում է սույն կարգի 9-րդ կետով նախատեսված ստուգարքը հանձնած հարկային ծառայողներին:

7. Ստուգարքներն ընդունվում են ծառայության պետի հրամանով ստեղծված մշտական գործող հանձնաժողովի կողմից (այսուհետ` հանձնաժողով):

8. Հանձնաժողովը բաղկացած է հանձնաժողովի նախագահից, հանձնաժողովի անդամներից և հանձնաժողովի քարտուղարից:

9. Պահելու և կրելու իրավունքով զենք հատկացնելու համար ստուգարքն ընդունվում է պարզելու համար հարկային ծառայողի`

1) զենքի նյութական մասի, մարտավարատեխնիկական բնութագրի, ինչպես նաև զենքի հետ վարվելու անվտանգության կանոնների իմացությունը.

2) զենքի գործադրման (կիրառման) և օգտագործման իրավական հիմքերը կանոնակարգող Լեռնային Ղարաբաղի Հանրապետության օրենսդրական և այլ իրավական ակտերի իմացությունը.

3) կրակային պատրաստության վարժության կատարման ունակությունը:

10. Հարկային ծառայողներին զենք հատկացնելու համար հիմք է հանդիսանում հարկային ծառայողի զեկուցագիրը` համաձայն ձև N 1-ի, ուղղված ծառայության պետին` անմիջական ղեկավարի միջնորդությամբ:

11. Ստուգարքին մասնակցած և այն դրական հանձնած հարկային ծառայողի զեկուցագիրը և հանձնաժողովի եզրակացությունը` համաձայն ձև N 2-ի, ներկայացվում են սպառազինության համար պատասխանատու անձին` զենքը տվյալ հարկային ծառայողին հատկացնելու համար:

Հարկային ծառայողի զեկուցագիրն ու եզրակացությունը հանձնվում են ծառայության կադրերի բաժին` հարկային ծառայողի անձնական գործին կցելու համար:

12. Հարկային ծառայողին զենք հատկացնելու համար պարտադիր է Լեռնային Ղարաբաղի Հանրապետության կառավարության 2002 թվականի նոյեմբերի 26-ի թիվ 56 որոշմամբ սահմանված զենքի տիրապետմանը խոչընդոտող հիվանդություններ և ֆիզիկական թերություններ չունենալու վերաբերյալ տեղեկանքի առկայությունը:

13. Զենքը հարկային ծառայողին է հատկացվում ծառայության պետի հրամանով նշանակված սպառազինության գծով պատասխանատու անձի կողմից:

14. Սպառազինության համար պատասխանատու անձը վարում է հաշվեցուցակային զենքի և ռազմամթերքի ամրակցման մատյանը` համաձայն ձև N 3-ի ու զենքի և ռազմամթերքի հանձնման-ընդունման գիրքը` համաձայն ձև N 4-ի: Հաշվեցուցակային զենքի և ռազմամթերքի ամրակցման մատյանը և զենքի ու ռազմամթերքի հանձնման-ընդունման գիրքը կարվում և համարակալվում են ծառայության գործավարության կազմակերպման կարգին համապատասխան:

III. ԶԵՆՔԸ ՊԱՀԵԼՈՒ, ԿՐԵԼՈՒ ԵՎ ՕԳՏԱԳՈՐԾԵԼՈՒ ԿԱՐԳԸ

15. Պահելու և կրելու կամ ծառայության ընթացքում կրելու իրավունքով զենք ստացած հարկային ծառայողը պարտավոր է սարքին, անվտանգ և մաքուր պահել ստացած զենքը:

16. Զենքի կորուստը բացառելու նպատակով այն պետք է համապատասխան ամրակապով հուսալիորեն ամրացված լինի հարկային ծառայողի հագուստին:

17. Արգելվում է հարկային ծառայողի կողմից զենք կրել առանց համապատասխան հարմարանքների (ատրճանակի պատյան, ամրակապ և այլն):

18. Զենքը հարկային ծառայողի բնակության վայրում պետք է պահվի փականով ամրացված պահարանում կամ արկղում` միջոցներ ձեռնարկելով այլ անձանց զենքին հասանելիությունը բացառելու ուղղությամբ:

19. Քաղաքացիական հագուստ կրող հարկային ծառայողը զենքը կրում է քողարկված:

20. Հարկային ծառայողին արգելվում է մերկացնել զենքը, փոխանցել այլ անձանց կամ թողնել առանց հսկողության, բացառությամբ Լեռնային Ղարաբաղի Հանրապետության օրենսդրությամբ սահմանված դեպքերի:

21. Հարկային ծառայողի` ծառայողական զենքով գործուղման մեկնելու դեպքում գործուղման վկայականում նշվում է զենքի տեսակը, համարը, արտադրության տարեթիվը, փամփուշտների քանակը, որն էլ հաստատվում է ծառայության կնիքով:

22. Լեռնային Ղարաբաղի Հանրապետության տարածքից դուրս (բացառությամբ Հայաստանի Հանրապետություն) հարկային ծառայողը զենքով գործուղվում է միջպետական պայմանագրերով սահմանված դեպքերում և կարգով:

23. Լեռնային Ղարաբաղի Հանրապետության և Հայաստանի Հանրապետության տարածքում գործուղման դեպքում` ժամանման վայրում զենքն անվտանգ պահելու հնարավորության բացակայության դեպքում գործուղված հարկային ծառայողը զենքն ի պահ է հանձնում մոտակա ոստիկանության բաժնի հերթապահ մաս:

24. Հարկային ծառայողին հատկացված զենքի, նրա տեխնիկական վիճակի, ինչպես նաև հատուկ պարագաների առկայության նկատմամբ վերահսկողությունն իրականացվում է`

1) հարկային ծառայողի ստորաբաժանման ղեկավարի կողմից մշտական` հարկային ծառայողի ծառայության մեջ գտնվելու ժամանակ.

2) սպառազինության համար պատասխանատու անձի կողմից` եռամսյակը մեկ անգամ և խախտում հայտնաբերելու դեպքում զեկուցագրով ներկայացնում է ծառայության պետին:

25. Այլ ստորաբաժանում տեղափոխվելու, ծառայությունից ազատվելու դեպքերում հարկային ծառայողը պարտավոր է զենքը հանձնել սպառազինության համար պատասխանատու անձին:

26. Հարկային ծառայողը ստացիոնար բուժման, ուսման կամ արձակուրդ մեկնելիս, զենքը ժամանակավորապես ի պահ է հանձնում սպառազինության համար պատասխանատու անձին:

27. Հարկային ծառայողը ստորաբաժանման պետի կարգադրությամբ պարտավոր է զենքը հանձնել, եթե`

1) հարկային ծառայողի կողմից խախտվել են սույն կարգով նախատեսված զենքը պահելու և կրելու պայմանները.

2) հարկային ծառայողը ազատվել է ծառայությունից.

3) հարկային ծառայողին արգելվել է զենք կրել բժշկական եզրակացությամբ:

28. Սպառազինության համար պատասխանատու անձի կողմից հանձնած զենքի վերաբերյալ համապատասխան գրառում է կատարվում զենքի և հատուկ միջոցների հանձնման-ընդունման գրքում:

29. Զենքը գործադրելու և օգտագործելու, ինչպես նաև զենքը կորցնելու կամ փչացնելու դեպքերում հարկային ծառայողը ստորաբաժանման ղեկավարին զեկուցում է վերադասության կարգով և միջոցներ ձեռնարկում զենքը վերանորոգելու, կորած զենքը որոնելու համար:

ԼՂՀ ԿԱ հարկային պետական ծառայության պետ

Զ Ե Կ ՈՒ Ց Ա Գ Ի Ր

Խնդրում եմ Ձեր թույլտվությունը` պահելու և կրելու իրավունքով հաշվեցուցակային զենք ստանալու համար համապատասխան տեսական և գործնական ստուգարքներ հանձնելու համար:

Զենքի նյութական մասը, պահելու և կրելու կարգը, գործադրելու (կիրառելու) և օգտագործելու իրավական հիմքերն ուսումնասիրել եմ:

Հաշվեցուցակային զենք պահելու անվտանգության պայմանները աշխատավայրում և բնակության վայրում ապահովված են:

Տեղյակ եմ զենքի անօրինական գործադրման (կիրառման) կամ օգտագործման հետևանքների մասին:

«Միջնորդում եմ

հատկացնել հաշվեցուցակային զենք»

«Թույլատրում եմ

հատկացնել հաշվեցուցակային զենք»

ԼՂՀ ԿԱ հարկային պետական ծառայության պետ

Ե Զ Ր Ա Կ Ա Ց ՈՒ Թ Յ ՈՒ Ն N ________

ԼՂՀ ԿԱ հարկային պետական ծառայության  _____________________________________

                                                                              ^{(ստորաբաժանման անվանումը)}

___________________________________________________________________

                                        ^{(պաշտոնը, դասային (հատուկ) կոչումը, անունը, ազգանունը)}

հաշվեցուցակային զենք հատկացնելու վերաբերյալ:

Հաշվեցուցակային զենքի նյութական մասի, մարտավարատեխնիկական բնութագրի, պահելու և կրելու անվտանգության, ինչպես նաև գործադրման (կիրառման) և օգտագործման իրավական հիմքերի վերաբերյալ ստուգարքը հանձնել է:

Հաշվեցուցակային զենքից գործնական վարժությունը կատարել է:

Հանձնաժողովը որոշեց _______________________________________ հատկացնել

                                                               ^{(անունը, ազգանունը)}

___________________________________________________________________

      ^{նշվում է` պահելու և կրելու իրավունքով կամ ծառայության ընթացքում կրելու իրավունքով}

Հանձնաժողովի նախագահ`

Հանձնաժողովի անդամներ`

Հանձնաժողովի քարտուղար`

ՀԱՇՎԵՑՈՒՑԱԿԱՅԻՆ ԶԵՆՔԻ ԵՎ ՌԱԶՄԱՄԹԵՐՔԻ ԱՄՐԱԿՑՄԱՆ ՄԱՏՅԱՆ

Գ Ի Ր Ք

ԶԵՆՔԻ ԵՎ ՌԱԶՄԱՄԹԵՐՔԻ ՀԱՆՁՆՄԱՆ-ԸՆԴՈՒՆՄԱՆ