ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆՆ

 ԱՌԸՆԹԵՐ ՀԱՐԿԱՅԻՆ ՊԵՏԱԿԱՆ ԾԱՌԱՅՈՒԹՅՈՒՆ

Հ Ր Ա Մ Ա Ն

Հիմք ընդունելով «Շահութահարկի մասին» Լեռնային Ղարաբաղի Հանրապետության օրենքի 69-րդ հոդվածը, «Եկամտահարկի մասին» Լեռնային Ղարաբաղի Հանրապետության օրենքի 39-րդ հոդվածը, «Ավելացված արժեքի հարկի մասին» Լեռնային Ղարաբաղի Հանրապետության օրենքի 45-րդ հոդվածը և «Հաստատագրված վճարների մասին» Լեռնային Ղարաբաղի Հանրապետության օրենքի 101-րդ հոդվածը՝

Հաստատել «Արտարժույթի առք ու վաճառքի գործունեություն, արտարժույթի դիլերային առք ու վաճառքի գործունեություն իրականացնող հարկ վճարողների հարկման որոշ հարցերի վերաբերյալ» հրահանգչական նամակը՝ համաձայն հավելվածի:

Սույն հրահանգչական նամակը հրապարակվում է ի կատարումն «Շահութահարկի մասին» Լեռնային Ղարաբաղի Հանրապետության օրենքի 69-րդ հոդվածի, «Եկամտահարկի մասին» Լեռնային Ղարաբաղի Հանրապետության օրենքի 39-րդ հոդվածի, «Ավելացված արժեքի հարկի մասին» Լեռնային Ղարաբաղի Հանրապետության օրենքի 45-րդ հոդվածի և «Հաստատագրված վճարների մասին» Լեռնային Ղարաբաղի Հանրապետության օրենքի 101-րդ հոդվածի և պարզաբանում է 2005 թվականի նոյեմբերի 1-ից հետո Լեռնային Ղարաբաղի Հանրապետությունում արտարժույթի առք ու վաճառքի գործունեություն, արտարժույթի դիլերային առք ու վաճառքի գործունեություն իրականացնող հարկ վճարողների հարկման որոշ հարցեր:

1. Արտարժույթի առք ու վաճառքի, արտարժույթի դիլերային առք ու վաճառքի գործունեությունները չեն համարվում «Հաստատագրված վճարների մասին» Լեռնային Ղարաբաղի Հանրապետության օրենքին համապատասխան հաստատագրված վճարներով հարկվող օբյեկտ: Գործունեության այդ տեսակների գծով դադարեցվում է հաստատագրված վճարների հաշվարկը, որի համար գործունեության դադարեցման մասին դիմում չի ներկայացվում:

2. Հարկման նպատակով արտարժույթի առք ու վաճառքի գործունեությունն ընդգրկում է հետևյալ փուլերը`

ա) արտարժույթի ձեռք բերում Հայաստանի Հանրապետության դրամով`

- մեկ միավոր արտարժույթի գնման գին է համարվում մեկ միավոր արտարժույթի դիմաց վճարված Հայաստանի Հանրապետության դրամի գումարը,

- արտարժույթի ձեռքբերման պահին Հայաստանի Հանրապետության կենտրոնական բանկի կողմից սահմանված հաշվարկային փոխարժեքով հաշվարկված արտարժույթի և գնման փոխարժեքով հաշվարկված արտարժույթի միջև առաջացած դրական տարբերությունը համարվում է եկամուտ, իսկ բացասական տարբերությունը` ծախս.

բ) արտարժույթի վերագնահատում`

- ձեռք բերված արտարժույթը վերագնահատվում է Հայաստանի Հանրապետության կենտրոնական բանկի կողմից սահմանված հաշվարկային փոխարժեքի յուրաքանչյուր փոփոխության դեպքում,

- արտարժույթի վերագնահատումից առաջացած տարբերությունները կազմակերպությունների մոտ չեն համարվում եկամուտ կամ ծախս.

գ) արտարժույթի վաճառք Հայաստանի Հանրապետության դրամով`

- մեկ միավոր արտարժույթի վաճառքի գին է համարվում մեկ միավոր արտարժույթի դիմաց ստացված Հայաստանի Հանրապետության դրամի գումարը,

- արտարժույթի վաճառքի պահին Հայաստանի Հանրապետության կենտրոնական բանկի կողմից սահմանված հաշվարկային փոխարժեքով հաշվարկված արտարժույթի և վաճառքի փոխարժեքով հաշվարկված արտարժույթի միջև առաջացած բացասական տարբերությունը համարվում է եկամուտ, իսկ դրական տարբերությունը` ծախս:

3. Սույն հրահանգչական նամակի 2-րդ կետի «ա» և «գ» ենթակետերում նշված ծախսերը ենթակա են նվազեցման հարկ վճարողի համախառն եկամտից, եթե այդ ծախսերը հիմնավորող փաստաթղթերը ըստ էության համապատասխանում են Լեռնային Ղարաբաղի Հանրապետության կառավարության 2000 թվականի դեկտեմբերի 26-ի N 254 որոշմամբ հաստատված «Ծախսերը հիմնավորող փաստաթղթերի նկատմամբ ներկայացվող պահանջները սահմանելու և այդ փաստաթղթերի կազմման» կարգի պահանջներին:

4. Արտարժույթի առք ու վաճառքի գործունեության մասով չեն կիրառվում «Եկամտահարկի մասին» Լեռնային Ղարաբաղի Հանրապետության օրենքի 21-րդ հոդվածի 1-ին մասի «ա» կետով սահմանված դրույթները (այսինքն` արտարժույթի առք ու վաճառքի գործարքների գծով ֆիզիկական անձանց վճարված գումարները փաստաթղթերով հիմնավորված չլինելու դեպքում կազմակերպությունների և անհատ ձեռնարկատերերի մոտ եկամտահարկի պարտավորություն չի առաջանում):

5. «Հարկերի մասին» Լեռնային Ղարաբաղի Հանրապետության օրենքի 26-րդ հոդվածի դրույթների կիրառման առումով տուգանքները հաշվարկվում են` կազմակերպությունների համար սույն հրահանգչական նամակի 2-րդ կետի «ա» և «գ», իսկ անհատ ձեռնարկատերերի համար` «ա», «բ» և «գ» ենթակետերում նշված եկամուտների հանրագումարի (համախառն եկամտի) նկատմամբ:

6. Արտարժույթի առք ու վաճառքի գործունեություն և արտարժույթի դիլերային առք ու վաճառքի գործունեություն իրականացնողների համար մինչև 2005 թվականի հոկտեմբերի 1-ը հաստատագրված վճարի գումարի մեջ ավելացված արժեքի հարկի հաշվարկային մեծությունը ընդունվում է 0%:

«Շահութահարկի մասին» Լեռնային Ղարաբաղի Հանրապետության օրենքի 45¹-րդ հոդվածի և Լեռնային Ղարաբաղի Հանրապետության հարկային պետական վարչության պետի 2004 թվականի հուվարի 7-ի N2/Ղ հրամանով հաստատված «Ռեզիդենտների կողմից շահութահարկի հաշվարկման և վճարման կարգի մասին» հրահանգի 9.3.4 կետի համաձայն նախորդ տարվա հաստատագրված վճարի մեջ բաժին ընկնող շահութահարկի գումարները (տվյալ դեպքում` 100%-ը) հաշվի են առնվելու կազմակերպության ընթացիկ տարվա շահութահարկի կանխավճարների մուծումների ժամանակ: Կանխավճարների մուծումները կատարվում են յուրաքանչյուր ամիս, նախորդ տարվա շահութահարկի փաստացի գումարի 1/16-ի չափով (տվյալ ամսվա 25-ից ոչ ուշ): Նախորդ տարվա շահութահարկի գումարը (այդ թվում` հաստատագրված վճարի մեջ բաժին ընկնող շահութահարկի գումարները) 100,0 հազ. դրամը չգերազանցելու դեպքում կազմակերպությունները ընթացիկ տարում շահութահարկի կանխավճարներ կարող են չկատարել:

«Եկամտահարկի մասին» Լեռնային Ղարաբաղի Հանրապետության օրենքի 29-րդ հոդվածի համաձայն նախորդ տարվա հաստատագրված վճարի մեջ բաժին ընկնող եկամտահարկի գումարները (տվյալ դեպքում` 100%-ը) հաշվի են առնվելու ընթացիկ տարվա անհատ ձեռնարկատիրոջ եկամտահարկի կանխավճարների մուծումների ժամանակ: Կանխավճարների մուծումները կատարվում են յուրաքանչյուր եռամսյակ նախորդ տարվա եկամտահարկի փաստացի գումարի 1/6-ի չափով (յուրաքանչյուր եռամսյակի վերջին ամսվա 15-ից ոչ ուշ):

7. «Ավելացված արժեքի հարկի մասին» Լեռնային Ղարաբաղի Հանրապետության օրենքի 15-րդ հոդվածի 17-րդ մասի համաձայն ավելացված արժեքի հարկով ազատված շրջանառություն է համարվում արտարժույթի վաճառքից ստացված հասույթը, որը արտացոլվում է ԱԱՀ-ի հաշվարկում: