ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ

 

Օ Ր Ե Ն Ք Ը

 

 Ընդունված է 2007 թվականի

 ապրիլի 25-ին

 

ՏՈՒԳԱՆՔԻ ԴԱՏԱՊԱՐՏՎԱԾ ԱՆՁԱՆՑ ՊԱՏԺԻ ԿԱՏԱՐՄԱՆ ՄԱՍԻՆ

 

Գ Լ ՈՒ Խ  1

 

ԸՆԴՀԱՆՈՒՐ ԴՐՈՒՅԹՆԵՐ

 

Հոդված 1.

Օրենքի կարգավորման առարկան

 

Սույն օրենքով սահմանվում են Լեռնային Ղարաբաղի Հանրապետության տարածքում տուգանքի՝ որպես ազատությունից զրկելու հետ չկապված պատժի (այսուհետ` տուգանք), կատարման հիմքը, կարգն ու պայմանները, ինչպես նաև դրանց հետ առնչվող այլ հարաբերություններ:

 

Հոդված 2.

Հիմնական սկզբունքները

 

 Տուգանքի կատարումն իրականացվում է մարդասիրության, օրինականության, մարդու և քաղաքացու իրավունքներն ու ազատությունները, պատիվն ու արժանապատվությունը հարգելու սկզբունքների պահպանմամբ:

 

Հոդված 3.

Տուգանքի կատարման իրավական հիմքերը

 

 Տուգանքի կատարումն իրականացվում է սույն օրենքին, Լեռնային Ղարաբաղի Հանրապետության քրեական օրենսգրքին և այլ իրավական ակտերին համապատասխան:

 

Հոդված 4.

Տուգանքի կատարման հիմքը

 

Տուգանքի կատարման հիմք է հանդիսանում դատարանի՝ օրինական ուժի մեջ մտած դատավճիռը:

 

Հոդված 5.

Տուգանքի կատարումն ապահովող մարմինը

 

 Տուգանքի կատարումն ապահովում է տուգանքի դատապարտված անձի (այսուհետ` դատապարտյալ) բնակության վայրի Լեռնային Ղարաբաղի Հանրապետության կառավարությանն առընթեր Լեռնային Ղարաբաղի Հանրապետության ոստիկանության քրեակատարողական բաժնի տվյալ տարածքային մարմինը կամ համապատասխան պաշտոնատար անձը (այսուհետ` քրեակատարողական բաժին):

 

Գ Լ ՈՒ Խ  2

 

ՏՈՒԳԱՆՔԻ ԿԱՏԱՐՈՒՄԸ

 

Հոդված 6.

Տուգանքի կատարումը

 

Դատապարտյալը պարտավոր է դատարանի դատավճիռն օրինական ուժի մեջ մտնելուց հետո անհապաղ և ամբողջությամբ վճարել դատավճռով որպես տուգանք նշանակված գումարը` վճարման անդորրագիրը ներկայացնելով պատիժը կատարող մարմին:

 

Հոդված 7.

Տուգանքը վճառելու անհնարինությունը և դրա հետևանքնրը

 

1.Դատարանը դատապարտյալի միջնորդությամբ, հաշվի առնելով դատապարտյալի կողմից տուգանքն անհապաղ կամ ամբողջությամբ վճարելու անհնարինության հանգամանքը, նրա համար վճարման ժամկետ է սահմանում առավելագույնը մեկ տարի ժամկետով կամ թույլատրում է տուգանքը մաս առ մաս վճարել նույն ժամկետում:

 Նշված արտոնությունն ուժը կորցնում է, եթե դատապարտյալը նշանակված գումարի մասը կամ մասերը ժամանակին չի մուծում, և պատժի չկրած մասը փոխարինվում է հանրային աշխատանքներով` սույն օրենքի 8-րդ հոդվածով սահմանված կարգով:

 2.Տուգանքի վճարումը հետաձգելու կամ տարաժամկետելու միջնորդությամբ դատարան դիմելիս դատապարտյալը պետք է հիմնավորի տուգանքը վճարելու անհնարինության հանգամանքը, ինչպես նաև անհրաժեշտության դեպքում իր գույքային դրությունը պարզելու նպատակով տա համապատասխան պարզաբանումներ:

 

Հոդված 8.

Տուգանքը չվճարելը և դրա հետևանքները

 

1.Տուգանքը չվճարելու դեպքում այն փոխարինվում է հանրային աշխատանքներով` Լեռնաին Ղարաբաղի Հանրապետության քրեական օրենսգրքով սահմանված ժամկետով և կարգով:

2.Դատապարտյալի նկատմամբ դատավճռով նշանակված տուգանքը հանրային աշխատանքներով փոխարինելու նպատակով քրեակատարողական բաժինը միջնորդություն է ներկայացնում դատարան:

 3.Եթե տուգանքը վճարված է մասնակիորեն, ապա հանրային աշխատանքների ժամկետը որոշվում է` հաշվի առնելով, թե տուգանքի որ մասն է վճարված:

 

Գ Լ ՈՒ Խ  3

 

ՀԱՆՐԱՅԻՆ ԱՇԽԱՏԱՆՔՆԵՐԸ

 

Հոդված 9.

Հանրային աշխատանքներ կատարելը

 

1.Հանրային աշխատանքների կատարումը դատական ակտի հիման վրա ապահովում է քրեակատարողական բաժինը` իր որոշած վայրերում:

2.Հանրային աշխատանքների դատապարտված անձը պարտավոր է քրեակատարողական բաժին ներկայանալ դատարանի դատավճիռն օրինական ուժի մեջ մտնելուց հետո` յոթ օրվա ընթացքում:

Դատապարտյալը հանրային աշխատանքների ներգրավվում է, և նշանակված պատիժը կատարվում է դատավճիռն օրինական ուժի մեջ մտնելուց հետո` երկու տարվա ընթացքում: Հանրային աշխատանքների կատարման ընթացքում պատժի կատարումը կարող է մինչև մեկ տարի ժամկետով ընդհատվել ոչ ավելի, քան մեկ անգամ:

Հանրային աշխատանքների ներգրավման կարգը և ժամկետները սահմանում է Լեռնային Ղարաբաղի Հանրապետության կառավարությունը:

3.Դատապարտյալի հաշվառումը, պատիժը կրելու կարգն ու պայմանները պահպանելու նկատմամբ հսկողությունն իրականացնում է, ինչպես նաև պատիժը կրելու կարգը և պայմանները նրան բացատրում է քրեակատարողական բաժինը:

 

Հոդված 10.

Հանրային աշխատանքներ կատարելու կարգը

 

1.Դատապարտյալը պարտավոր է դատավճռով սահմանված ողջ ժամանակահատվածի ընթացքում պահպանել այն մարմինների կամ կազմակերպությունների ներքին աշխատանքային կանոնները, որտեղ նա կատարում է հանրային աշխատանքները, բարեխիղճ վերաբերմունք դրսևորել աշխատանքին, աշխատել իր համար որոշված վայրերում, ինչպես նաև բնակության վայրը փոխելու դեպքում այդ մասին տեղյակ պահել քրեակատարողական բաժնին:

2.Աշխատանքի հիմնական վայրում դատապարտյալին հերթական ամենամյա արձակուրդ տրամադրելը չի կասեցնում հանրային աշխատանքների ձևով պատժի կատարումը:

3.Դատապարտյալի կենսաթոշակային տարիքը լրանալու կամ նրան առաջին կամ երկրորդ խմբի հաշմանդամ ճանաչելու, պատիժը կրելուն խոչընդոտող այլ ծանր հիվանդությամբ հիվանդանալու, ինչպես նաև հղիության դեպքում քրեակատարողական բաժինը միջնորդություն է ներկայացնում դատարան` պատժից ազատելու կամ պատժի կրումը հետաձգելու նպատակով:

4.Հանրային աշխատանքները կատարելիս ստացած վնասվածքների դիմաց փոխհատուցումը կատարվում է Լեռնային Ղարաբաղի Հանրապետության քաղաքացիական օրենսդրությամբ սահմանված կարգով:

5.Դատապարտյալի` պարտադիր զինվորական կամ այլընտրանքային ծառայության զորակոչվելու դեպքում հանրային աշխատանքների ձևով պատժի կատարումը զինվորական կամ այլընտրանքային ծառայության ժամկետով կասեցվում է:

 

Գ Լ ՈՒ Խ  4

 

ՎԵՐԱՀՍԿՈՂՈՒԹՅՈՒՆԸ ԵՎ ՊԱՏԱՍԽԱՆԱՏՎՈՒԹՅՈՒՆԸ

 

Հոդված 11.

Վերահսկողությունը հանրային աշխատանքների կատարման նկատմամբ

 

1.Դատապարտյալի համար որոշված աշխատանքների կատարումը վերահսկելու նպատակով քրեակատարողական բաժինը վարում է հանրային աշխատաժամերի հաշվառման քարտ, որը լրացնում, ստորագրում և կնքում է տվյալ աշխատանքները կազմակերպող մարմնի կամ կազմակերպության վարչակազմը:

2.Դատապարտյալը պարտավոր է քրեակատարողական բաժնին տեղեկացնել հանրային աշխատանքները կատարելու մասին:

Հանրային աշխատանքները կատարելու, դրանք ոչ պատշաճ կատարելու կամ դատապարտյալի կողմից պատիժը կրելուց խուսափելու մասին քրեակատարողական բաժնին կարող է տեղեկացնել նաև աշխատանքները կազմակերպող մարմնի կամ կազմակերպության վարչակազմը:

3.Հանրային աշխատաժամերի հաշվառման կարգը սահմանում է Լեռնային Ղարաբաղի Հանրապետության կառավարությունը:

 

Հոդված 12.

Դատապարտյալի պատասխանատվությունը

 

1. Պատիժը կրելու կարգն ու պայմանները խախտելու դեպքում քրեակատարողական բաժինը դատապարտյալին նախազգուշացնում է օրենքով սահմանված պատասխանատվության մասին:

2. Հանրային աշխատանքները կատարելուց չարամտորեն խուսափող դատապարտյալի վերաբերյալ քրեակատարողական բաժինը միջնորդություն է ներկայացնում դատարան` հանրային աշխատանքների չկրած մասը կալանքով կամ որոշակի ժամկետով ազատազրկմամբ փոխարինելու մասին Լեռնային Ղարաբաղի Հանրապետության քրեական օրենսգրքով սահմանված ժամկետների սահմաններում:

3.Հանրային աշխատանքների ձևով պատիժը կրելուց չարամտորեն խուսափող է համարվում այն դատապարտյալը, ով`

1) մեկ ամսվա ընթացքում կատարել է հանրային աշխատաժամերի հաշվառման քարտով նախատեսված աշխատանքների իննսուն տոկոսից պակաս հանրային աշխատանքներ` առանց հարգելի պատճառի.

2) հանրային աշխատանքների կատարման ժամանակ մեկ ամսվա ընքացքում երկուսից ավելի անգամ կոպտորեն խախտել է աշխատանքային կարգապահության կանոնները.

3) ծանուցվելու դեպքում երկու և ավելի անգամ անընդմեջ կամ օրենքով նախատեսված դեպքում չի ներկայացել քրեակատարողական բաժին:

 

Գ Լ ՈՒ Խ  5

 

ԵԶՐԱՓԱԿԻՉ ԴՐՈՒՅԹ

 

Հոդված 13.

Օրենքի ուժի մեջ մտնելը

 

Սույն օրենքն ուժի մեջ է մտնում պաշտոնական հրապարակմանը հաջորդող տասներորդ օրվանից:

 

ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ՆԱԽԱԳԱՀ՝	Ա.ՂՈՒԿԱՍՅԱՆ
23 մայիսի 2007թ. ք. Ստեփանակերտ ՀՕ-25