ք.Ստեփանակերտ

Հիմք ընդունելով Լեռնային Ղարաբաղի Հանրապետության կառավարության 2004 թվականի մարտի 16-ի «Լեռնային Ղարաբաղի Հանրապետությունում սոցիալական ապահովության քարտերի համակարգ ներդնելու մասին» թիվ 85 որոշման 1-ին կետը՝

1. Սահմանել, որ առողջական վիճակի պատճառով նոր նմուշի անձնագիր ստանալու հնարավորություն չունեցող անձը կարող է սոցիալական ապահովության քարտ ստանալ ծննդյան վկայականի կամ խորհրդային նմուշի անձնագրի հիման վրա:

2. Հաստատել առողջական վիճակի պատճառով նոր նմուշի անձնագիր ստանալու հնարավորություն չունեցող անձին ծննդյան վկայականի կամ խորհրդային նմուշի անձնագրի հիման վրա սոցիալական ապահովության քարտ հատկացնելու կարգը՝ համաձայն հավելվածի:

3. Լեռնային Ղարաբաղի Հանրապետության սոցիալական ապահովության նախարարության աշխատակազմի սոցիալական ապահովագրության և կենսաթոշակային ապահովության վարչության պետին՝ վարել սույն հրամանով հաստատված կարգի համաձայն հատկացված սոցիալական ապահովության քարտերի և դրանց հատկացման համար հիմք հանդիսացած փաստաթղթերի հաշվառում:

4. Լեռնային Ղարաբաղի Հանրապետության սոցիալական ապահովության նախարարության Լեռնային Ղարաբաղի Հանրապետության բժշկասոցիալական փորձաքննության կենտրոնի տնօրենին՝ ինքնուրույն տեղաշարժման ունակության 3-րդ աստիճանի սահմանափակում ունեցող հաշմանդամներին խնամող անձանց դիմելու դեպքում ապահովել սույն հրամանով հաստատված կարգի 2-րդ կետի 2-րդ ենթակետում նշված տեղեկանքի անհապաղ տրամադրումը:

1. Սույն կարգի համաձայն՝ սոցիալական ապահովության քարտ է հատկացվում առողջական վիճակի պատճառով լուսանկարվելու և նոր նմուշի անձնագիր ստանալու հնարավորություն չունեցող՝

1) հոգեկան հիվանդությամբ տառապող՝ դատարանի վճռով անգործունակ ճանաչված անձին,

2) ինքնուրույն տեղաշարժման ունակության 3-րդ աստիճանի սահմանափակում ունեցող՝ 1-ին խմբի հաշմանդամին:

2. Սոցիալական ապահովության քարտ ստանալու համար՝ սույն կարգի 1-ին կետում նշված անձը (նրա ներկայացուցիչը) գրավոր դիմումի հետ Լեռնային Ղարաբաղի Հանրապետության սոցիալական ապահովության նախարարություն է ներկայացնում՝

1) ծննդյան վկայականն ու պատճենը կամ խորհրդային նմուշի անձնագիրն ու պատճենը,

2) անգործունակ ճանաչելու մասին դատարանի վճռի պատճենը կամ ինքնուրույն տեղաշարժման ունակության 3-րդ աստիճանի սահմանափակում ունենալու մասին բժշկասոցիալական փորձաքննության կենտրոնի տված տեղեկանքը:

3. Սույն կարգի 1-ին կետում նշված անձանց սոցիալական ապահովության քարտերը հատկացվում են «Սոցիալական ապահովության քարտերի մասին» Լեռնային Ղարաբաղի Հանրապետության օրենքի 9-րդ հոդվածով սահմանված կարգով և ժամկետներում: