ք. Ստեփանակերտ

Ղեկավարվելով Լեռնային Ղարաբաղի Հանրապետության ընտրական օրենսգրքի 42-րդ հոդվածի 1-ին մասի 7-րդ կետով՝ Լեռնային Ղարաբաղի Հանրապետության կենտրոնական ընտրական հանձնաժողովը որոշում  է.

1. Թեկնածու առաջադրված քաղաքացին ներկայացնում է գույքի և եկամուտների հայտարարագիր (այսուհետ՝ հայտարարագիր)՝ «Լեռնային Ղարաբաղի Հանրապետության իշխանության մարմինների ղեկավար աշխատողների գույքի և եկամուտների հայտարարագրման մասին» Լեռնային Ղարաբաղի Հանրապետության օրենքով (այսուհետ՝ Օրենք) սահմանված ընթացակարգով:

2. Թեկնածու առաջադրված քաղաքացին հայտարարագիրն ընտրական հանձնաժողով ներկայացնելով հրապարակում է հայտարարագրում ներառված նաև այն տեղեկությունները, որոնք Օրենքով հրապարակման ենթակա չեն:

3. Ընտրական հանձնաժողովները չեն կարող պատասխանատվության ենթարկվել ներկայացված հայտարարագրերը թեկնածուներին, վստահված անձանց, դիտորդներին, զանգվածային լրատվության միջոցների ներկայացուցիչներին տրամադրելու համար:

4. Հայտարարագրի ձևը թեկնածու առաջադրված քաղաքացուն տրամադրում է համապատասխան ընտրական հանձնաժողովը:

5. Հայտարարագրի բոլոր էջերը ստորագրվում են թեկնածու առաջադրված քաղաքացու կողմից:

6. Հայտարարագրում գրառումները կատարվում են գրչով կամ համակարգչային տեխնիկայի միջոցով, իսկ կատարված ուղղումները վավերացվում են թեկնածու առաջադրված քաղաքացու ստորագրությամբ:

7. Հայտարարագրում՝ թեկնածու առաջադրված քաղաքացին, առաջին էջում.

1) «հաշվետու ժամանակաշրջանը» տողում նշում է ընտրությունների անցկացման նախորդ տարվա հունվարի 1-ից մինչև դեկտեմբերի 31-ն ընկած ժամանակաշրջանը.

2) «2. Աշխատանքի վայրը, ղեկավար աշխատողի պաշտոնը» տողում լրացնում է աշխատանքի վայրի լրիվ անվանումը և իր պաշտոնը.

3) «3. Պաշտոնավարման ժամանակաշրջանը» տողը չի լրացնում.

4) «8. Հայտարարագիրը բաղկացած է» տողում նշում է բոլոր լրացված էջերի, այդ թվում՝ սույն որոշման 12-րդ կետում նշված նույնօրինակ (պատճենված) ձևաթղթերի թիվը թվերով և տառերով.

5) «Լեռնային Ղարաբաղի Հանրապետության իշխանության մարմինների ղեկավար աշխատողների փոխկապակցված անձանց գույքի և եկամուտների» բաժինը չի լրացնում:

8. 2-րդ էջի «I. I. Տվյալներ ղեկավար աշխատողների փոխկապակցված անձանց և խնամառուների վերաբերյալ» և «I. 2. Տվյալներ հայտարարատուին փոխկապակցված ղեկավար աշխատողների վերաբերյալ» բաժինները չեն լրացվում:

9. «Գույքի նկատմամբ իրավունքը» սյունակներում լրացվում է տվյալ բաժնի 2-րդ սյունակի համապատասխան տողում նշված, թեկնածու առաջադրված քաղաքացուն պատկանող գույքի նկատմամբ իրավունքը՝ միանձնյա սեփականություն, ընդհանուր համատեղ սեփականություն, ընդհանուր բաժնային սեփականություն, անհատույց օգտագործում կամ վարձակալություն: Ընդհանուր համատեղ սեփականության դեպքում նշվում է նաև համասեփականատերերի թիվը:

10. 7-րդ էջում «IV. Ծանոթագրություններ» հատվածում նշվում են հայտարարագրի լրացման ժամանակ նախորդ էջերում չտեղավորված կամ բաց թողնված մանրամասները, ինչպես նաև թեկնածու առաջադրված քաղաքացու հայեցողությամբ լրացուցիչ բացատրության կարիք ունեցող տեղեկատվությունը:

11. 8-րդ էջի «V. «II. Տվյալներ հայտարարագրման ենթակա գույքի վերաբերյալ» հատվածի փոփոխության մասին» բաժինը չի լրացվում:

12. Եթե հայտարարագրի բաժիններից որևէ մեկի տողերի թիվը բավարար չէ հայտարարագրման ենթակա բոլոր տեղեկությունները լրացնելու համար, ապա դրանք լրացվում են այդ բաժինն ընդգրկող նույնօրինակ (պատճենված) ձևաթղթերի վրա:

13. ՈՒժը կորցրած ճանաչել Լեռնային Ղարաբաղի Հանրապետության կենտրոնական ընտրական հանձնաժողովի 2005 թվականի փետրվարի 25-ի «Համայնքի ղեկավարի և ավագանու անդամի թեկնածուների իր սեփականության (ունեցվածքի) և վերջին մեկ տարում իր և իր ընտանիքի անդամների եկամուտների վերաբերյալ հայտարարագրի ձևը հաստատելու մասին» թիվ 3/13, 2005 թվականի մարտի 16-ի «Ազգային ժողովի պատգամավորության թեկնածու առաջադրվող քաղաքացիների սեփականության (ունեցվածքի) և վերջին մեկ տարում իր և իր ընտանիքի անդամների եկամուտների վերաբերյալ հայտարարագրերի ձևերը հաստատելու մասին» թիվ 5/57 և 2007 թվականի ապրիլի 23-ի «Լեռնային Ղարաբաղի Հանրապետության Նախագահի թեկնածու առաջադրված քաղաքացու սեփականության (ունեցվածքի) և վերջին մեկ տարում իր և իր ընտանիքի անդամների եկամուտների մասին հայտարարագրի ձևը հաստատելու մասին» թիվ 31/108 որոշումները: