ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ

Օ Ր Ե Ն Ք Ը

Ընդունված է 2009 թվականի

ապրիլի 29-ին

«ԱԶԳԱՅԻՆ ԺՈՂՈՎԻ ԿԱՆՈՆԱԿԱՐԳ» ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

Հոդված 1. «Ազգային ժողովի կանոնակարգ» Լեռնային Ղարաբաղի Հանրապետության օրենքի (4 ապրիլի 2007 թվականի, ՀՕ-23, այսուհետ` օրենք) 5-րդ հոդվածի 1-ին կետի «ժ» ենթակետի «Վերահսկիչ պալատի» բառերը փոխարինել «Լեռնային Ղարաբաղի Հանրապետության վերահսկիչ պալատի (այսուհետ` Վերահսկիչ պալատ)» բառերով:

Հոդված 2. Օրենքի 8-րդ հոդվածի 5-րդ կետը շարադրել հետևյալ խմբագրությամբ`

«5. Պատգամավորին տրվում է ամենամյա արձակուրդ` 48 օրացուցային օր տևողությամբ, որից 16-ը` ձմռանը, իսկ 32-ը` ամռանը:»:

Հոդված 3. Օրենքի 16-րդ հոդվածի 3-րդ կետը շարադրել հետևյալ խմբագրությամբ`

«3. Խմբակցությունն ու պատգամավորական խումբն ունեն Ազգային ժողովի աշխատակազմի (այսուհետ` Աշխատակազմ) հաստիքացուցակով սահմանված մեկական գործավար: Գործավարները աշխատանքի են ընդունվում և ազատվում խմբակցության և պատգամավորական խմբի ղեկավարների համաձայնությամբ և կատարում նրանց հանձնարարականները:»:

Հոդված 4. Օրենքի 17-րդ հոդվածում`

1) 3-րդ կետը շարադրել հետևյալ խմբագրությամբ`

«3. Ազգային ժողովի նախագահը և նրա տեղակալը ընտրվում են գաղտնի քվեարկությամբ, պատգամավորների ընդհանուր թվի ձայների մեծամասնությամբ:».

2) 4-րդ կետն ուժը կորցրած ճանաչել:

Հոդված 5. Օրենքի 21-րդ հոդվածում`

1) 2-րդ կետն ուժը կորցրած ճանաչել.

2) 4-րդ կետը շարադրել հետևյալ խմբագրությամբ`

«4. Մշտական հանձնաժողովները և նրանց գործունեության ոլորտներն են`

ա) արտաքին հարաբերությունների մշտական հանձնաժողով` միջազգային պայմանագրեր, միջազգային հարաբերություններ և միջխորհրդարանական կապեր, Լեռնային Ղարաբաղի Հանրապետության օրենքների և եվրոպական օրենսդրության ներդաշնակեցում, զբոսաշրջություն, մամուլ, ռադիո, հեռուստատեսություն.

բ) արտադրության և արտադրական ենթակառուցվածքների հարցերի մշտական հանձնաժողով` արդյունաբերություն, քաղաքաշինություն, էներգետիկա, տրանսպորտ, կապ, հեռահաղորդակցություն, արտադրական ենթակառուցվածքի այլ ճյուղեր, առևտուր և ծառայություններ, գյուղատնտեսություն, բնական պաշարներ, բնության պահպանություն.

գ) պաշտպանության, անվտանգության և օրինապահպանության հարցերի մշտական հանձնաժողով` պաշտպանություն, անվտանգություն, արտակարգ իրավիճակներ, ոստիկանություն, ռազմարդյունաբերական համալիր, ռազմական ուսումնական հաստատություններ, զինվորական և ոստիկանական ծառայություններ.

դ) պետական-իրավական հարցերի մշտական հանձնաժողով` սահմանադրական փոփոխություններ, ընտրական համակարգ, հանրային ծառայություն, դատարանակազմություն, արդարադատություն, դատախազություն, քաղաքացիական, քրեական, վարչական օրենսդրություն, Ազգային ժողովի կանոնակարգ, տարածքային կառավարում, տեղական ինքնակառավարում, մարդու և քաղաքացու իրավունքներ և ազատություններ, փաստաբանական և նոտարական ծառայություններ, երեխայի իրավունքներ, կուսակցություններ և այլ հասարակական միավորումներ, կրոն, գենդերային հարցեր, ազգային փոքրամասնություններ.

ե) սոցիալական ոլորտի հարցերի մշտական հանձնաժողով` գիտություն, կրթություն, հրատարակչական գործ, մշակույթ, երիտասարդություն, սպորտ, սոցիալական ապահովություն, հաշմանդամության հիմնահարցեր, աշխատանք, զբաղվածություն, բնակարանային պայմաններ, ժողովրդագրություն և հայրենադարձություն, առողջապահություն, մայրություն և մանկություն.

զ) ֆինանսաբյուջետային և տնտեսական կառավարման հարցերի մշտական հանձնաժողով` բյուջետային օրենսդրություն, պետական բյուջե, փոխառություններ, վարկեր, դրամ, դրամաշրջանառություն, ներքին և օտարերկրյա ներդրումներ, տնտեսության պետական կարգավորում, սեփականաշնորհում, շուկայական ենթակառուցվածքներ, բանկային համակարգ, ֆինանսավարկային կազմակերպություններ` հարկեր, տուրքեր, վճարներ, տարածքային զարգացում, ձեռնարկատիրական գործունեություն, պետական գույքի կառավարում, արտաքին տնտեսական կապեր, ֆինանսական և տնտեսական բնույթի միջազգային պայմանագրեր:».

3) 6-րդ կետի 2-րդ նախադասությունը շարադրել հետևյալ խմբագրությամբ`

«Մշտական հանձնաժողովի փորձագետը աշխատանքի է ընդունվում և ազատվում Ազգային ժողովի աշխատակազմում պետական ծառայության մասին օրենսդրությանը համապատասխան:»:

Հոդված 6. Օրենքի 30-րդ հոդվածը լրացնել հետևյալ բովանդակությամբ 2¹-րդ կետով.

«2¹. Եթե քվեարկությանը մասնակցած գլխադասային հանձնաժողովի անդամների առնվազն 1/3-ը քվեարկությունից հետո դեմ է հանձնաժողովի եզրակացությանը և դրա վերաբերյալ ունի հատուկ կարծիք, ապա նրանց ներկայացուցիչը կարող է Ազգային ժողովում հարցի քննարկման ընթացքում հանդես գալ հարակից զեկուցմամբ` ներկայացնելով հանձնաժողովի եզրակացության վերաբերյալ իրենց հատուկ կարծիքը:

Հատուկ կարծիքով հանդես գալու հանձնաժողովի անդամների նախաձեռնության մասին նշվում է Ազգային ժողովի նախագահին ուղարկվող` հանձնաժողովի նիստի արձանագրության քաղվածքում:»:

Հոդված 7. Օրենքի 32-րդ հոդվածի 2-րդ կետից հանել «լինի ուրբաթ օրը կամ» բառերը:

Հոդված 8. Օրենքի 34-րդ հոդվածի 4-րդ կետի «երդվում են.» բառերը փոխարինել «երդվում և ստորագրում են երդման տեքստի տակ.» բառերով, իսկ «նիստում» բառից հետո ավելացնել «երդվում և» բառերը:

Հոդված 9. Օրենքի 35-րդ հոդվածի 2-րդ կետի երրորդ նախադասության մեջ հանել «, որպես կանոն,» բառերը, իսկ «չորեքշաբթի» բառից հետո ավելացնել «կամ հինգշաբթի» բառերը:

Հոդված 10. Օրենքի 39-րդ հոդվածի 3-րդ կետը շարադրել հետևյալ խմբագրությամբ`

«3. Արտահերթ նստաշրջան կամ նիստ գումարելու մասին պատգամավորների նախաձեռնությունն իրականացվում է Աշխատակազմից ստացված ձևաթուղթը սահմանված կարգով ստորագրելու և Ազգային ժողովի նախագահին ներկայացնելու միջոցով: Ձևաթղթում նշվում են արտահերթ նստաշրջանի օրակարգը և անցկացման ժամկետը, ինչպես նաև կցվում են օրակարգային հարցերի նախագծերը: Ձևաթուղթն Ազգային ժողովի նախագահին ներկայացվելուց հետո փոփոխման ենթակա չէ: Եթե ստացման պահից 24 ժամվա ընթացքում անհրաժեշտ քանակի ստորագրություններով ձևաթուղթը հանձնվում է Ազգային ժողովի նախագահին, ապա նա գումարում է արտահերթ նստաշրջան կամ նիստ նախաձեռնողի սահմանած օրակարգով և ժամկետում` միաժամանակ օրակարգային հարցերի նախագծերն ուղարկելով Հանրապետության Նախագահին և կառավարություն: Ձևաթուղթը սահմանված ժամկետում Ազգային ժողովի նախագահին չներկայացվելու դեպքում համարվում է մարված:»:

Հոդված 11. Օրենքի 46-րդ հոդվածում.

1) 4-րդ կետը շարադրել հետևյալ խմբագրությամբ`

«4. Կառավարության առաջադրած օրենքի նախագծին կամ նախագծերի փաթեթին կից ներկայացվում են`

ա) իրավական ակտի ընդունման հիմնավորումը, ներառյալ` տեղեկատվություն այն իրավական ակտերի, ինչպես նաև նախագիծ մշակող մարմնի հայեցողությամբ` նյութերի վերաբերյալ, որոնց հիման վրա կամ որոնցից օգտվելով` մշակվել է նորմատիվ իրավական ակտի նախագիծը, նախագիծը մշակողների անունները.

բ) տեղեկանք` օրենքի ընդունման առնչությամբ այլ օրենքների ընդունման անհրաժեշտության բացակայության, ինչպես նաև այլ նորմատիվ իրավական ակտերի ընդունման անհրաժեշտության կամ բացակայության մասին.

գ) ամփոփաթերթ` նախագծի վերաբերյալ ստացված դիտողությունների և առաջարկությունների, դրանց ընդունման կամ չընդունման վերաբերյալ` չընդունման պատճառների հիմնավորմամբ, ընդ որում` ամփոփաթերթում ներառվում են հանրային քննարկումների հետևանքով ստացված այն դիտողությունները և առաջարկությունները, որոնք ընդունվել են:».

2) ավելացնել հետևյալ բովանդակությամբ 4¹-րդ կետ՝

«4¹. Պատգամավորի առաջադրած օրենքի նախագծին կամ նախագծերի փաթեթին կից ներկայացվում են`

ա) իրավական ակտի ընդունման հիմնավորումը, ներառյալ` տեղեկատվություն այն իրավական ակտերի, ինչպես նաև նախագիծ մշակող մարմնի հայեցողությամբ` նյութերի վերաբերյալ, որոնց հիման վրա կամ որոնցից օգտվելով` մշակվել է նորմատիվ իրավական ակտի նախագիծը, նախագիծը մշակողների անունները.

բ) տեղեկանք` օրենքի ընդունման առնչությամբ այլ օրենքների ընդունման անհրաժեշտության բացակայության մասին:»:

Հոդված 12. Օրենքի 50-րդ հոդվածի 5-րդ կետում «գլխադասային հանձնաժողով և հեղինակին /հիմնական զեկուցողին/» բառերը փոխարինել «գլխադասային հանձնաժողով, հեղինակին /հիմնական զեկուցողին/ և մշտական հանձնաժողովներ» բառերով:

Հոդված 13. Օրենքի 54-րդ հոդվածը լրացնել հետևյալ բովանդակությամբ 6¹-րդ կետով.

«6¹. Սույն օրենքի 30-րդ հոդվածի 2¹-րդ կետով նախատեսված դեպքում գլխադասային հանձնաժողովի անդամների ներկայացուցիչը կարող է հանձնաժողովների ներկայացուցիչներից հետո հանդես գալ հարակից զեկուցմամբ` առանց եզրափակիչ ելույթի իրավունքի:»:

Հոդված 14. Օրենքի 67-րդ հոդվածը լրացնել հետևյալ բովանդակությամբ 6-րդ կետով.

«6. Ազգային ժողովի նախագահն ընդունված օրենքը 10-օրյա ժամկետում ուղարկում է Հանրապետության Նախագահին, որն ստանալուց հետո` 30-օրյա ժամկետում ստորագրում և հրապարակում է այն կամ առարկություններով, առաջարկություններով վերադարձնում է Ազգային ժողով:»:

Հոդված 15. Օրենքի 81-րդ հոդվածի 1-ին կետն ուժը կորցրած ճանաչել:

Հոդված 16. Օրենքի 85-րդ հոդվածում`

1) 2-րդ կետում «գլխադասային հանձնաժողով(ներ)» բառերը փոխարինել «պետական-իրավական հարցերի մշտական հանձնաժողով» բառերով.

2) 3-րդ և 4-րդ կետերում «գլխադասային հանձնաժողովի(ների)» բառերը փոխարինել «պետական-իրավական հարցերի մշտական հանձնաժողովի» բառերով:

Հոդված 17. Օրենքի 95-րդ հոդվածի 8-րդ կետը շարադրել հետևյալ խմբագրությամբ.

«8. Վերահսկիչ պալատի գործունեության տարեկան ծրագրում փոփոխություններ կամ լրացումներ չեն կատարվում:»:

Հոդված 18. Օրենքի 96-րդ հոդվածում`

1) 2-րդ կետը լրացնել «և ավարտվում եզրափակիչ ելույթներով` առանց որոշում ընդունելու:» բառերով.

2) 5-րդ և 6-րդ կետերն ուժը կորցրած ճանաչել:

Հոդված 19. Օրենքի 102-րդ հոդվածի 7-րդ կետում «ռազմական» բառը փոխարինել «պատերազմի» բառով: