ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ

Օ Ր Ե Ն Ք Ը

Ընդունված է 2009 թվականի

մայիսի 27-ին

ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԴԱՏԱԿԱՆ ՕՐԵՆՍԳՐՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

Հոդված 1. Լեռնային Ղարաբաղի Հանրապետության 2008 թվականի դեկտեմբերի 17-ի դատական օրենսգրքի (այսուհետ՝ օրենսգիրք) 4-րդ հոդվածի 1-ին մասը շարադրել հետևյալ խմբագրությամբ.

«1. Դատավոր է Գերագույն, վերաքննիչ և առաջին ատյանի դատարանների նախագահների և դատավորների պաշտոնում օրենքով սահմանված կարգով նշանակված անձը:»:

Հոդված 2. Օրենսգրքի 22-րդ հոդվածում`

1)1-ին մասի «Քրեական և քաղաքացիական գործերով առաջին» բառերը փոխարինել «Առաջին» բառով.

2) 4-րդ մասը ճանաչել ուժը կորցրած:

Հոդված 3. Օրենսգրքի 26-րդ հոդվածը «պահից» բառից հետո լրացնել «մեկ ամիս հետո» բառերով:

Հոդված 4. Օրենսգրքի 31-րդ հոդվածում`

1) 1-ին մասի «, պալատների նախագահներից և չորս» բառերը փոխարինել «և վեց» բառերով.

2) 3-րդ մասը շարադրել հետևյալ խմբագրությամբ.

«3. Պալատները կազմավորվում են յուրաքանչյուր գործով` Գերագույն դատարանի նախագահի կողմից:»:

Հոդված 5. Օրենսգրքի 32-րդ հոդվածում`

1) 2-րդ մասի «պալատի նախագահին և» բառերը փոխարինել «Գերագույն դատարանի» բառերով.

2) 3-րդ մասի 7-րդ կետի «պալատի նախագահի կամ պալատի» բառերը հանել.

3) լրացնել հետևյալ բովանդակությամբ 4-րդ մասով.

«4. Գերագույն դատարանի նախագահի բացակայության ժամանակ, վերջինիս հանձնարարությամբ, նրա լիազորություններն իրականացնում է Գերագույն դատարանի դատավորներից մեկը, իսկ նման հանձնարարության անհնարինության դեպքում` Գերագույն դատարանի տարիքով ավագ դատավորը:»:

Հոդված 6. Օրենսգրքի 33-րդ հոդվածն ուժը կորցրած ճանաչել:

Հոդված 7. Օրենսգրքի 34-րդ հոդվածի 6-րդ մասը շարադրել հետևյալ խմբագրությամբ.

«6. Քրեական գործի քննության ժամանակ ամբաստանյալի կողմից դատական նիստի կարգը խախտելու և նիստի բնականոն ընթացքին խոչընդոտելու կամ նախագահող դատավորի կարգադրությունները չկատարելու դեպքում դատարանը կիրառում է նախազգուշացում: Միաժամանակ, նախագահող դատավորն ամբաստանյալին բացատրում է, որ դատական նիստի կարգը կրկին խախտելու և նիստի բնականոն ընթացքին կրկին խոչընդոտելու կամ նախագահող դատավորի կարգադրությունները չկատարելու դեպքում նա կարող է հեռացվել նիստերի դահլիճից: Նույն դատական նիստում ամբաստանյալի կողմից դատական նիստի բնականոն ընթացքին կրկին խոչընդոտելը կամ նախագահող դատավորի կարգադրությունները չկատարելը հիմք է սույն հոդվածի 1-ին մասի 2-րդ կետով նախատեսված սանկցիան կիրառելու համար, որի դեպքում գործի քննությունը շարունակվում է ամբաստանյալի բացակայությամբ, սակայն դատավճիռը հրապարակվում է ամբաստանյալի ներկայությամբ:

Դատարանի նկատմամբ անհարգալից վերաբերմունք դրսևորելու դեպքում դատարանը ամբաստանյալի  նկատմամբ սույն հոդվածի 1-ին մասի 2-րդ կետով նախատեսված սանկցիան կիրառում է առանց նախազգուշացման, և գործի քննությունը շարունակվում է ամբաստանյալի բացակայությամբ, սակայն դատավճիռը հրապարակվում է ամբաստանյալի ներկայությամբ կամ հրապարակումից հետո անհապաղ հանձնվում է նրան:

Սույն մասով նախատեսված կարգով ամբաստանյալը նիստերի դահլիճից հեռացվում է մինչև 10 օր ժամկետով:»:

Հոդված 8. Օրենսգրքի 43-րդ հոդվածում`

1) 2-րդ մասը շարադրել հետևյալ խմբագրությամբ.

«2. Դատարանների նախագահների խորհրդի անդամներն են առաջին ատյանի, վերաքննիչ և Գերագույն դատարանների նախագահները: Խորհրդի անդամի բացակայության դեպքում նրա լիազորություններն իրականացնում է նրան դատարանի նախագահի պաշտոնում փոխարինող անձը:».

2) 5-րդ մասը շարադրել հետևյալ խմբագրությամբ.

«5. Դատարանների նախագահների խորհրդի նիստերը գումարվում են ըստ անհրաժեշտության, բայց ոչ պակաս, քան եռամսյակը մեկ: Խորհուրդն իրավազոր է, եթե խորհրդի նիստին ներկա են խորհրդի բոլոր անդամները: Խորհրդի որոշումներն ընդունվում են խորհրդի անդամների ձայների պարզ մեծամասնությամբ: Խորհրդի կանոնակարգով նախատեսված դեպքերում կարող են անցկացվել փակ քվեարկություններ:»:

Հոդված 9. Օրենսգրքի 45-րդ հոդվածի 2-րդ մասի 3-րդ կետի «, պալատի նախագահը՝ պաշտոնային դրույքաչափի 15 տոկոսի չափով» բառերը հանել:

Հոդված 10. Օրենսգրքի 68-րդ հոդվածի 1-ին մասի 2-րդ պարբերության «, պալատի նախագահը չեն» բառերը փոխարինել «չի» բառով:

Հոդված 11. Օրենսգրքի 76-րդ հոդվածի 2-րդ մասի «պալատի և» բառերը հանել:

Հոդված 12. Օրենսգրքի 12-րդ գլխի վերնագրի «, ԴԱՏԱՐԱՆՆԵՐԻ ԵՎ ՊԱԼԱՏՆԵՐԻ» բառերը փոխարինել «ԵՎ ԴԱՏԱՐԱՆՆԵՐԻ» բառերով:

Հոդված 13. Օրենսգրքի 99-րդ հոդվածում`

1) վերնագրի «, դատարանի և պալատների նախագահների» բառերը փոխարինել «և դատարանի նախագահի» բառերով.

2) տեքստի «, դատարանի և պալատների նախագահներին» բառերը փոխարինել «և դատարանի նախագահին» բառերով:

Հոդված 14. Օրենսգրքի 103-րդ հոդվածում`

1) 2-րդ մասի «պալատի դատավորի և պալատի նախագահի» բառերը փոխարինել «դատավորի» բառով.

2) 4-րդ մասի «պալատի դատավորի կամ պալատի նախագահի» բառերը փոխարինել «դատավորի» բառով:

Հոդված 15. Օրենսգրքի 104-րդ հոդվածի 5-րդ մասի «պալատի դատավորի կամ պալատի նախագահի» բառերը փոխարինել «դատավորի» բառով:

Հոդված 16. Օրենսգրքի 113-րդ հոդվածում`

1) վերնագրից և տեքստից հանել «(պալատի)» բառը.

2) 5-րդ մասի «և պալատի նախագահի» բառերը հանել:

Հոդված 17. Անցումային դրույթներ

1. Սույն օրենքն ուժի մեջ է մտնում պաշտոնական հրապարակմանը հաջորդող տասներորդ օրվանից:

2. Մինչև սույն օրենքի ուժի մեջ մտնելը օրենսգրքի 34-րդ հոդվածի 1-ին մասի 2-րդ կետով նախատեսված սանկցիայի կիրառման դեպքում կալանավորված անձանց համար հետաձգման ժամկետը հաշվվում է պատժի ժամկետի մեջ: