ԱՐՑԱԽԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ք. Ստեփանակերտ

Համաձայն «Ոստիկանության մասին» օրենքի 11-րդ հոդվածի 2-րդ մասի՝ Արցախի Հանրապետության կառավարությունը ո ր ո շ ու մ  է.

1. Սահմանել Արցախի Հանրապետության ոստիկանության կողմից հանցագործությունների, վարչական իրավախախտումների, պատահարների վերաբերյալ հաղորդումներն ընդունելու, գրանցելու, հաշվառելու և դրանց ընթացք տալու կարգը` համաձայն հավելվածի:

2. Արցախի Հանրապետության ոստիկանության պետին`

1) սույն որոշումն ուժի մեջ մտնելուց հետո 10-օրյա ժամկետում հաստատել սույն որոշման պահանջների կատարման նկատմամբ ներգերատեսչական հսկողության կարգը.

2) մինչև 2022 թվականի հունվարի 10-ն Արցախի Հանրապետության ոստիկանության կենտրոնական ապարատի իրավասու ստորաբաժանումներում և տարածքային ստորաբաժանումների հերթապահ մասերում ապահովել անցումը հանցագործությունների, վարչական իրավախախտումների և պատահարների մասին հաղորդումների էլեկտրոնային գրանցամատյանների.

3) մինչև 2022 թվականի երկրորդ կիսամյակն ապահովել Արցախի Հանրապետության ոստիկանության համապատասխան ստորաբաժանումները հեռախոսային խոսակցությունները ձայնագրող տեխնիկական միջոցներով:

3. Սույն որոշումն ուժի մեջ է մտնում 2020 թվականի հունվարի 1-ից:

1. Սույն կարգով կարգավորվում են Արցախի Հանրապետության ոստիկանության (այսուհետ` ոստիկանություն) կողմից հանցագործությունների, վարչական իրավախախտումների, պատահարների վերաբերյալ հաղորդումներն ընդունելու, գրանցելու, հաշվառելու և դրանց ընթացք տալու հետ կապված հարաբերությունները:

2. Սույն կարգի գործողությունը չի տարածվում ոստիկանության ծառայողների կողմից անմիջականորեն հայտնաբերված վարչական իրավախախտումների դեպքերի վրա, որոնցով կազմվել են վարչական իրավախախտման վերաբերյալ արձանագրություններ կամ վարչական պատասխանատվության ենթարկելու մասին որոշում է կայացվել առանց վարչական իրավախախտման վերաբերյալ արձանագրություն կազմելու:

3. Սույն կարգում օգտագործվող հիմնական հասկացություններն են՝

1) հանցագործության մասին հաղորդումներ՝ Քրեական դատավարության օրենսգրքի 188-190-րդ հոդվածներով նախատեսված քրեական գործ հարուցելու առիթներ.

2) վարչական իրավախախտումների մասին հաղորդումներ՝ գրավոր կամ բանավոր հաղորդումներ, որոնք պարունակում են Վարչական իրավախախտումների վերաբերյալ օրենսգրքով նախատեսված վարչական իրավախախտումների վերաբերյալ տեղեկություններ, ոստիկանության ծառայողի զեկուցագիրը` հայտնաբերված վարչական իրավախախտման մասին, վարչական իրավախախտում հայտնաբերելու մասին նախաքննության մարմնից, պետական այլ մարմնից, ոստիկանության ստորաբաժանումից ստացված գրությունը կամ հաղորդումը.

3) պատահարների վերաբերյալ հաղորդումներ՝ անմիջապես ոստիկանությունում հաղորդված կամ կապի միջոցներով ֆիզիկական կամ իրավաբանական անձանցից, պետական մարմիններից, ոստիկանության ծառայողից ստացված բանավոր տեղեկություններ դեպքերի մասին, որոնք առերևույթ հանցագործության կամ վարչական իրավախախտման հատկանիշներ չեն պարունակում.

4) հանցագործությունների, վարչական իրավախախտումների և պատահարների վերաբերյալ հաղորդումների (այսուհետ՝ հաղորդումներ) ընդունում` ոստիկանության կենտրոնական ապարատի իրավասու ստորաբաժանման կամ տարածքային ստորաբաժանման իրավասու ծառայողի կողմից հաղորդումների ստացում.

5) հաղորդումների գրանցում՝ ոստիկանության կենտրոնական ապարատի իրավասու ստորաբաժանման կամ տարածքային ստորաբաժանման իրավասու ծառայողի կողմից հաղորդումների բովանդակության համառոտագրում հանցագործությունների, վարչական իրավախախտումների և պատահարների մասին հաղորդումների գրանցամատյանում.

6) հաղորդումների հաշվառում՝ յուրաքանչյուր ընդունված հաղորդման հերթական համարով համարակալում, դրա հետագա ընթացքի վերլուծություն և սույն կարգով նախատեսված դեպքերում` նյութերի մատյանային և համակարգչային հաշվառում.

7) հաղորդումներին ընթացք տալը՝ ոստիկանության իրավասու ծառայողների կողմից հաղորդման մեջ նշված փաստական հանգամանքների ստուգման նպատակով օրենքով սահմանված գործողությունների իրականացում և որոշումների ընդունում (այսուհետ՝ ստուգում).

8) նյութեր՝ հաղորդումների ընդունման և ստուգման արդյունքում ձեռք բերված (ստեղծված) փաստաթղթերի, նյութական այլ կրիչների և առարկաների ամբողջություն.

9) անանուն հաղորդումներ՝ կեղծ ստորագրությամբ կամ մտացածին անձի անունից գրված կամ առանց հաղորդում ներկայացնողի անվան, ազգանվան հիշատակման, ինչպես նաև առանց ստորագրության հաղորդում, իսկ էլեկտրոնային եղանակով ֆիզիկական անձից ստացված հաղորդման դեպքում՝ առանց էլեկտրոնային թվային ստորագրության կամ ֆիզիկական անձի նույնականացումն ապահովող այլ միջոցի (բացառությամբ ծրիչի (սկաների) միջոցով ներբեռնված ստորագրության), անվան, ազգանվան նշման հաղորդում:

4. Ոստիկանության տարածքային ստորաբաժանումները պարտավոր են տեսանելի վայրերում ամրացնել ցուցապաստառներ, որոնցում առկա կլինեն տեղեկություններ՝ բանավոր հաղորդումներ ընդունելու մասին արձանագրությունների ձևի, հաղորդումները ոստիկանության ծառայողի կողմից ապօրինաբար չընդունելու իրավական հետևանքների, դրանք գրանցելու և ստուգելու կարգի և ժամկետների, սույն կարգի պահանջների նկատմամբ ներգերատեսչական հսկողություն իրականացնող վերադաս ստորաբաժանման, հսկող դատախազի, վերջինիս աշխատանքային, ինչպես նաև ոստիկանության «Թեժ գիծ» ծառայության հեռախոսահամարների վերաբերյալ: Նույնաբովանդակ տեղեկություններ զետեղվում են նաև ոստիկանության պաշտոնական կայքէջում:

5. Հաղորդումները, անկախ իրավախախտումների կատարման կամ պատահարների առաջացման վայրից և ժամանակից, ինչպես նաև դրանցում պարունակվող տեղեկությունների ամբողջականությունից, պարտադիր ենթակա են ընդունման և գրանցման ոստիկանության տարածքային ստորաբաժանումների հերթապահ մասերում (այսուհետ` հերթապահ մաս):

6. Հերթապահ մասերն ապահովում են հաղորդումների շուրջօրյա ընդունումը և գրանցումը: Հաղորդումների ընդունում և գրանցում իրականացնում են նաև ոստիկանության քրեական հետախուզության վարչությունը, տնտեսական և պաշտոնեական հանցագործությունների դեմ պայքարի բաժինը, ներքին անվտանգության ծառայությունը, ճանապարհային ոստիկանությունը (այսուհետ` իրավասու ստորաբաժանումներ):

7. Էլեկտրոնային եղանակով ստացված հաղորդումները գրանցվում են, եթե դրանք ուղարկվել են ոստիկանության dimum@police.nkr.am էլեկտրոնային հասցեին:

8. Էլեկտրոնային հաղորդումները տպագրվում են թղթային կրիչի վրա, գրանցվում և ստուգվում են սույն կարգով սահմանված ընթացակարգով:

9. Փոստային, հեռագրական, ֆաքսիմիլային կամ կապի այլ միջոցներով ոստիկանության իրավասու ստորաբաժանումում կամ տարածքային ստորաբաժանումում ստացված հաղորդումները գրանցվում են ոստիկանության իրավասու ստորաբաժանման կամ տարածքային ստորաբաժանման քարտուղարությունում (այսուհետ` քարտուղարություն), որից հետո անհապաղ ներկայացվում են ոստիկանության իրավասու ստորաբաժանման կամ տարածքային ստորաբաժանման պետին, իսկ նրա բացակայության դեպքում` ոստիկանության իրավասու ստորաբաժանման իրավասու այլ պաշտոնատար անձին կամ տարածքային ստորաբաժանման ղեկավար պաշտոնատար անձանցից նշանակված օրվա պատասխանատու հերթապահին (այսուհետ` պատասխանատու): Ոստիկանության իրավասու ստորաբաժանման պետը (իրավասու այլ պաշտոնատար անձը) կամ տարածքային ստորաբաժանման պետը (պատասխանատուն) պարտավոր է հաղորդումն անհապաղ ուղարկել գրանցման:

10. Ոստիկանության իրավասու ստորաբաժանումում կամ տարածքային ստորաբաժանումում ընդունված բանավոր հաղորդումներն ամրագրվում են բանավոր հաղորդում ընդունելու մասին արձանագրության (այսուհետ՝ արձանագրություն) (ձև N 1) մեջ, որում նշվում են`

1) հաղորդում ներկայացնողի անունը, ազգանունը, հայրանունը, ծննդյան թիվը, բնակության (հաշվառման) վայրի և ծառայողական հասցեն, հեռախոսահամարը, անձը հաստատող փաստաթղթի տվյալները, նրա առնչությունն իրավախախտմանը կամ պատահարին և իրազեկության աղբյուրը, ստորագրությունը, առկայության դեպքում՝ էլեկտրոնային փոստի հասցեն, իրավախախտման կամ պատահարի նկարագրությունը, օրը, ամիսը, տարեթիվը, ժամը, վայրը.

2) 16 տարին լրացած անձի կողմից հանցագործության մասին հաղորդում ներկայացնելու դեպքում՝ սուտ մատնության համար քրեական պատասխանատվության մասին գրավոր նախազգուշացված լինելու մասին նշումը.

3) հաղորդում ընդունողի անունը, ազգանունը, պաշտոնը, կոչումը, ստորագրությունը, արձանագրությունը կազմելու վայրը, օրը, ամիսը, տարեթիվը, ժամը, րոպեն:

11. Հաղորդումն արձանագրության մեջ շարադրվում է առաջին դեմքով:

12. Հաղորդում ներկայացնողի կողմից հայերենին չտիրապետելու դեպքում հաղորդումն ընդունվում է հայերենին և այն օտար լեզվին տիրապետող, համապատասխան որակավորում ունեցող թարգմանչի մասնակցությամբ, որին տիրապետում է հաղորդում ներկայացնող անձը: Հաղորդում ներկայացնող անձը հաղորդումը շարադրում է այն լեզվով, որին ինքը տիրապետում է, ինչին հաջորդում է արձանագրությունում թարգմանչի կատարած թարգմանության շարադրումը, որը հաստատվում է թարգմանչի կողմից:

13. Եթե հաղորդում ներկայացնող անձը ֆիզիկական թերությունների կամ առողջական վիճակի կամ անգրագիտության հետևանքով զրկված է արձանագրությունն անձամբ ստորագրելու հնարավորությունից, ապա արձանագրությունը տվյալ անձին ծանոթության է ներկայացվում օրինական ներկայացուցչի (ներկայացուցչի) ներկայությամբ, ովքեր իրենց ստորագրությամբ հաստատում են արձանագրության բովանդակության համապատասխանությունն իրականությանը և հաղորդում ներկայացնող անձի կողմից այն ստորագրելու անհնարինությունը:

14. Եթե հաղորդում ներկայացնող անձը հայտնում է իր տվյալները, սակայն հրաժարվում է ստորագրել ոստիկանության ծառայողի կազմած արձանագրությունը, ապա ոստիկանության ծառայողը դրա մասին նշում է կատարում արձանագրության մեջ (հնարավորության դեպքում արտացոլելով հրաժարման պատճառները): Արձանագրությունը սույն կարգի համաձայն ներկայացվում է գրանցման:

15. Անհայտ կորածների մասին հաղորդումներն ընդունվում և գրանցվում են որպես հանցագործության մասին հաղորդումներ:

16. Քրեական դատավարության օրենսգրքի 187-րդ հոդվածով չնախատեսված աղբյուրներից ստացված և հանցագործության հատկանիշներ պարունակող հաղորդումները գրանցվում են դրանք ստացած ոստիկանության ծառայողի զեկուցագրի հիման վրա:

17. Հաղորդումները գրանցվում են հանցագործությունների, վարչական իրավախախտումների և պատահարների մասին հաղորդումների գրանցամատյանում (այսուհետ` գրանցամատյան) (ձև N 2):

18. Գրանցամատյանը կարվում, համարակալվում, կնքվում և գրանցվում է ոստիկանության իրավասու ստորաբաժանման կամ տարածքային ստորաբաժանման քարտուղարությունում:

19. Գրանցամատյանում գրառում կատարելու իրավունք ունի հերթապահ մասի համապատասխան ծառայողը, իրավասու ստորաբաժանման լիազորված ծառայողը:

20. Գրանցամատյանում գրառումները կատարվում են հստակ և ընթեռնելի ձեռագրով: Գրառումների վրա ուղղումներ կատարել չի թույլատրվում: Սխալ գրառումները վերցվում են փակագծերի մեջ, գրանցվում են նորից` նույն համարի ներքո և հաստատվում հերթափոխի ավագի ստորագրությամբ:

21. Գրանցամատյանում գրանցված հաղորդմանը տրվում է հերթական համար` սկսած օրացուցային տարվա սկզբից:

22. Գրանցամատյանում գրառումները պետք է պարունակեն հաղորդումը գրանցելու օրը, ամիսը, տարեթիվը, ժամը, րոպեն, իրավախախտման կամ պատահարի հակիրճ նկարագրությունը (ժամանակը, վայրը, հանգամանքները), հաղորդում ներկայացնող անձի տվյալները (անունը, ազգանունը, հայրանունը, հասցեն, իրավաբանական անձի անվանումը, գտնվելու վայրը, հեռախոսահամարը), ձեռնարկված միջոցառումները, հաղորդումը ստուգելու համար ստացող տարածքային ստորաբաժանման, ոստիկանության ծառայողի, այդ թվում` օպերատիվ խմբի ղեկավարի տվյալները, հաղորդումը ստուգելու համար այն ստանալու օրը, ամիսը, տարեթիվը, ժամը, րոպեն, ստուգելու արդյունքում ընդունված որոշումը և այն ընդունելու օրը, ամիսը, տարեթիվը, քրեական գործի համարը, այն ստորաբաժանումը, որին հաղորդումը (նյութերը) ուղարկվել է ըստ ենթակայության, նախկինում գրանցված հաղորդմանը նոր հաղորդման կցումը, կտրոն-ծանուցագրի համարը:

23. Բանավոր հաղորդումները գրանցելիս արձանագրության վրա, իսկ գրավոր հաղորդումները գրանցելիս գրավոր հաղորդման վրա, դրվում է գրանցամատյանի դրոշմակնիքը (ձև N 3), որի վրա լրացվում են ոստիկանության իրավասու ստորաբաժանման կամ տարածքային ստորաբաժանման անվանումը, գրանցման օրը, ամիսը, տարեթիվը, հերթական համարը, հաղորդումը գրանցող ոստիկանության ծառայողի պաշտոնը, կոչումը, անունը, ազգանունը և ստորագրությունը:

24. Գրանցամատյանի՝ օրվա ընթացքում կատարված գրառումների էջի, ինչպես նաև ստացված հաղորդումների պատճենները դատախազի պահանջով 24 ժամվա ընթացքում ուղարկվում են դատախազություն:

25. Քրեական դատավարության օրենսգրքի 197-րդ հոդվածով նախատեսված դեպքում ըստ ենթակայության պետական այլ մարմին կամ ոստիկանության տարածքային այլ ստորաբաժանում ուղարկելիս` հաղորդումը ոստիկանության իրավասու ստորաբաժանումում կամ տարածքային ստորաբաժանումում համարվում է գրանցումից հանված և ստուգման ենթակա չէ:

26. Քարտուղարության ծառայողներին արգելվում է քաղաքացիներից կամ նրանց ներկայացուցիչներից առձեռն ստանալ կամ ընդունել հաղորդումներ:

27. Հանցագործությունների, վարչական իրավախախտումների և պատահարների մասին անանուն հաղորդումները, որոնց ստուգումը պահանջում է պատահարի կամ իրավախախտման վայրի մեկնում, ենթակա են գրանցման գրանցամատյանում:

28. Եթե անանուն հաղորդումների ստուգումը չի պահանջում պատահարի կամ իրավախախտման վայրի մեկնում, ապա դրանք չեն գրանցվում և ոստիկանության ծառայողի զեկուցագրի հիման վրա, ոստիկանության իրավասու ստորաբաժանման պետի (իրավասու այլ պաշտոնատար անձի) կամ տարածքային ստորաբաժանման պետի (պատասխանատուի) ցուցումով (մակագրությամբ) թողնվում են անհետևանք:

29. Անանուն գրավոր հաղորդումները քարտուղարությունում գրանցվելուց հետո, իսկ բանավոր հաղորդումները հաղորդում ընդունող ոստիկանության ծառայողի զեկուցագրով հանձնվում են օպերատիվ-հետախուզական ստորաբաժանում՝ «Օպերատիվ-հետախուզական գործունեության մասին» օրենքով սահմանված կարգով ստուգելու համար, եթե հաղորդմամբ ներկայացվող տեղեկությունը բավարար չափով հիմնավորված է, վերաբերում է կոնկրետ պաշտոնատար անձի կամ մարմնի և պարունակում է տվյալներ, որոնք ողջամտորեն կարող են ստուգվել:

30. Եթե միևնույն հանցագործության, վարչական իրավախախտման կամ պատահարի մասին ստացվում է երկու և ավելի հաղորդում, ապա բոլոր հաղորդումները գրանցվում են և զեկուցագրով կցվում առաջինը գրանցված հաղորդմանը:

31. Միևնույն անձից երկու և ավելի անգամ ստացված հաղորդումները գրանցվում են սույն կարգի համաձայն, սակայն կարող են չստուգվել, եթե վերաբերում են միևնույն իրավախախտման կամ պատահարի միևնույն հանգամանքներին: Ստուգում չիրականացնելու հիմնավորումների մասին հաղորդում ներկայացնողին տրվում է գրավոր պարզաբանում:

32. Հեռախոսային կապի միջոցով ոստիկանության իրավասու ստորաբաժանումներ, հերթապահ մասեր ուղղված բոլոր զանգերը, ինչպես նաև ելքային զանգերը ձայնագրվում են, եթե դրանք ապահովված են հեռախոսային խոսակցությունները ձայնագրող տեխնիկական միջոցներով: Ձայնագրությունները պահպանվում են երեք ամիս և ենթակա են ոչնչացման ինքնաշխատ կարգով:

33. Քննիչի՝ հանցագործության նոր դեպքի կամ վարչական իրավախախտման հայտնաբերման մասին գրությունն անհապաղ գրանցվում է գրանցամատյանում:

34. Հանցագործության նոր դեպքի մասին գրությունը գրանցելուց հետո, 24 ժամվա ընթացքում, քննիչին գրավոր տրամադրվում է գրանցված գրության համարը:

35. Դիմողից, նրա ներկայացուցչից անմիջապես ոստիկանության իրավասու ստորաբաժանումում կամ տարածքային ստորաբաժանումում հանցագործության մասին հաղորդում ընդունելիս՝ հաղորդում ընդունող ոստիկանության իրավասու ծառայողը պարտավոր է վերջիններիս անհապաղ տրամադրել կտրոն-ծանուցագիր (ձև N 4), իսկ էլեկտրոնային եղանակով հանցագործության մասին հաղորդում ստանալու դեպքում հաղորդում ներկայացնողին կտրոն-ծանուցագիրն ուղարկվում է էլեկտրոնային եղանակով:

36. Կտրոն-ծանուցագրերը համարակալվում, գրքերի են կարվում և հաշվառվում քարտուղարությունում: Կտրոն-ծանուցագրերը ոստիկանության իրավասու ծառայողին են հանձնվում ստորագրությամբ, իսկ օգտագործված կտրոն-ծանուցագրի հիմքը վերադարձվում է քարտուղարություն:

37. Կտրոն-ծանուցագրի դարձերեսին ամրագրվում են տեղեկություններ հանցագործության մասին հաղորդումների քննարկման ժամկետների, ընդունվող որոշումների, որոշումները բողոքարկելու կարգի, սույն կարգի կատարման նկատմամբ ներգերատեսչական հսկողություն իրականացնող վերադաս ստորաբաժանման վերաբերյալ:

38. Հանցագործությունների մասին հաղորդումները գրանցելուց հետո կամ վարչական իրավախախտման վերաբերյալ նյութերի քննությամբ հանցագործության հատկանիշներ հայտնաբերելիս 4 ժամվա ընթացքում դեպքի վերաբերյալ տեղեկատվությունը մուտքագրվում է ոստիկանության ավտոմատացված տեղեկատվական համակարգի օպերատիվ հաղորդագրությունների հաշվառման շտեմարան:

39. Ոստիկանության ավտոմատացված տեղեկատվական համակարգի օպերատիվ հաղորդագրությունների հաշվառման շտեմարան մուտքագրված տեղեկատվությունը 24 ժամվա ընթացքում էլեկտրոնային եղանակով տրամադրվում է դատախազությանը:

40. Ոստիկանության ավտոմատացված տեղեկատվական համակարգում մուտքագրված տեղեկատվությունը շուրջօրյա ռեժիմով համակարգվում է ոստիկանության շտաբի հերթապահ մասում:

41. Վարչական իրավախախտումների հաշվառումն իրականացվում է Լեռնային Ղարաբաղի Հանրապետության կառավարության 2009 թվականի հունիսի 23-ի N 405-Ն որոշմամբ սահմանված կարգով:

42. Նյութերը, որոնցով ընդունվել են քրեական գործ հարուցելը մերժելու մասին որոշումներ, հաշվառվում են քրեական գործ հարուցելը մերժելու մասին որոշումների հաշվառման մատյանում, իսկ այն նյութերը, որոնցով վարչական իրավախախտման վերաբերյալ վարույթ հարուցելը մերժվել կամ հարուցված վարույթը կարճվել է, հաշվառվում են վարչական իրավախախտման վերաբերյալ գործի վարույթ հարուցելը մերժելու և հարուցված վարույթը կարճելու մասին որոշումների հաշվառման մատյանում: Հաշվառման մատյանները վարում է ոստիկանության լիազորված ծառայողը:

43. Եթե քրեական գործ հարուցելը մերժելու մասին որոշում կայացվելուց հետո ոստիկանության իրավասու ստորաբաժանումում կամ տարածքային ստորաբաժանումում ստացվում են այլ պետական մարմիններ, կազմակերպություններ ավելի վաղ ուղարկված հարցումների պատասխանները կամ նշանակված փորձաքննությունների եզրակացությունները, ապա նշված փաստաթղթերը (եթե նախապատրաստված նյութերը դատախազությունից վերադարձվել են, նախապատրաստված նյութերի հետ մեկտեղ) 24 ժամվա ընթացքում ոստիկանության իրավասու ստորաբաժանման կամ տարածքային ստորաբաժանման պետի կողմից ներկայացվում են դատախազին` նշված փաստաթղթերում առկա տվյալների վերլուծմամբ քրեական գործ հարուցելը մերժելու մասին որոշման օրինականության հարցը քննարկելու համար:

44. Ոստիկանության տարածքային ստորաբաժանումում հաղորդումը գրանցելուց հետո, այն տեղում ստուգելու անհրաժեշտության դեպքում, հերթափոխի ավագն օպերատիվ խումբ է ուղարկում իրավախախտման կամ պատահարի վայր, ինչպես նաև միջոցներ է ձեռնարկում իրավախախտումները կանխելու կամ խափանելու, պետական այլ մարմինների, բժշկական կազմակերպությունների փոխօգնությանը դիմելու ուղղությամբ և դրա մասին զեկուցում է ոստիկանության տարածքային ստորաբաժանման պետին կամ պատասխանատուին:

45. Ոստիկանության իրավասու ստորաբաժանումների կողմից հանցագործության մասին հաղորդումը գրանցելու դեպքում հաղորդման ստուգումն իրականացնում են իրավասու ստորաբաժանման ծառայողները կամ ոստիկանության պետի (սպասարկող տեղակալի) կողմից հաղորդման ստուգումը (բացառությամբ ոստիկանության ճանապարհային ոստիկանությունում գրանցված հաղորդումների) հանձնարարվում է տարածքային ստորաբաժանումներին (այդ թվում` համատեղության ձևով), որոնք էլ, անհրաժեշտության դեպքում, կազմակերպում են օպերատիվ խմբի մեկնումը դեպքի վայր: Ստուգման և ձեռնարկված այլ միջոցառումների արդյունքները զեկուցվում են ոստիկանության իրավասու ստորաբաժանման պետին (իրավասու այլ պաշտոնատար անձին)՝ սույն կարգով սահմանված որոշումները կայացնելու համար:

46. Ոստիկանության տարածքային ստորաբաժանումներում ճանապարհատրանսպորտային պատահարների վերաբերյալ ստացված հաղորդումներն ստուգման համար ուղարկվում են ոստիկանության ճանապարհային ոստիկանություն:

47. Իրավախախտման կամ պատահարի վայր ժամանած օպերատիվ խմբի ղեկավարը և անդամները (ճանապարհատրանսպորտային պատահարի դեպքում` ոստիկանության ճանապարհային ոստիկանության ծառայողները) իրենց իրավասության սահմաններում պարտավոր են`

1) կանխել, խափանել իրավախախտումները, իրավախախտում կատարած անձանց բռնելու նպատակով ձեռնարկել անհետաձգելի միջոցներ.

2) իրավախախտումից, պատահարից տուժած, կյանքի կամ առողջության համար վտանգավոր այլ վիճակներում գտնվող անձանց ցույց տալ անհրաժեշտ օգնություն.

3) միջոցներ ձեռնարկել իրավախախտման կամ պատահարի վայրը պահպանելու ուղղությամբ.

4) ընդունել հայտնաբերված իրավախախտման վերաբերյալ հաղորդումներ.

5) հանցագործության հատկանիշներ անմիջականորեն հայտնաբերելիս՝ կատարել դեպքի վայրի զննություն.

6) ձեռնարկվող միջոցների ընթացքի մասին հայտնել տարածքային ստորաբաժանման հերթապահ մաս, իսկ անհրաժեշտության դեպքում նաև տարածքային ստորաբաժանման պետին կամ պատասխանատուին:

48. Հայտնաբերված հանցագործության մասին անհապաղ տեղյակ են պահվում դատախազը և նախաքննության մարմինը:

49. Գործի քննությանը Քրեական դատավարության օրենսգրքով սահմանված կարգով քննիչ ներգրավելու դեպքում, մինչև վերջինիս դեպքի վայր ժամանելը, քրեադատավարական գործողություններ չեն կատարվում: Քննիչի ժամանելուց հետո, հետաքննության մարմնի ծառայողներն աջակցություն են ցուցաբերում քննչական և այլ դատավարական գործողությունների իրականացմանը:

50. Հայտնաբերված հանցագործության վերաբերյալ հաղորդում ընդունելու դեպքում հաղորդում ներկայացնողին պարզաբանվում է 24 ժամվա ընթացքում հերթապահ մասից կտրոն-ծանուցագիր ստանալու նրա իրավունքը:

51. Հաղորդումը հերթապահ մասում կամ ոստիկանության իրավասու ստորաբաժանումում գրանցման է ներկայացնում օպերատիվ խմբի ղեկավարը` անմիջապես դեպքի վայրից վերադառնալուց հետո:

52. Ոստիկանության տարածքային ստորաբաժանման պետի կողմից նախապես հաստատված գրաֆիկի համաձայն նշանակվում է օպերատիվ խմբի ղեկավար: Օպերատիվ խմբի ղեկավարը պատասխանատու է ստուգման համար:

53. Հերթապահության ընդունում-հանձնում իրականացնելիս լիազորված ծառայողը կամ հերթափոխի ավագը ոստիկանության իրավասու ստորաբաժանման պետին (իրավասու այլ պաշտոնատար անձին) կամ տարածքային ստորաբաժանման պետին (պատասխանատուին) զեկուցում է`

1) հերթապահ մասում ստացված հաղորդումների թիվը և դրանց համառոտ բովանդակությունը.

2) հերթապահ մասում գրանցված հաղորդումների թիվը.

3) հերթապահության օրվա դրությամբ նախկինում գրանցված հաղորդումներով սույն կարգով սահմանված որոշումներ ընդունելու ժամկետների խախտումների դեպքերը:

54. Գրանցված յուրաքանչյուր հաղորդման վերաբերյալ ոստիկանության իրավասու ստորաբաժանման պետին (իրավասու այլ պաշտոնատար անձին) կամ տարածքային ստորաբաժանման պետին (պատասխանատուին) ներկայացվում է զեկուցագիր, որում նշվում են իրավախախտման կամ պատահարի համառոտ բովանդակությունը և հերթապահության ընթացքում հաղորդման ստուգումն իրականացրած ոստիկանության ծառայողի տվյալները:

55. Ոստիկանության իրավասու ստորաբաժանման պետի (իրավասու այլ պաշտոնատար անձի) կամ տարածքային ստորաբաժանման պետի (պատասխանատուի) կողմից զեկուցագրերը մակագրվում են, այնուհետև հանձնվում ստուգման պարտականությունը կրող ոստիկանության ծառայողին:

56. Հաղորդումները ստուգում իրականացնելու համար ոստիկանության ծառայողին են հանձնվում հերթապահ մասում՝ հերթափոխի ավագի կամ լիազորված ծառայողի կողմից` գրանցամատյանում նշելով հաղորդումը (նյութերը) ստուգում իրականացնողին հանձնելու օրը, ամիսը, տարեթիվը, ժամը, րոպեն, ինչպես նաև ստուգում իրականացնողի տվյալները և նրա ստորագրությունը:

57. Ստուգում իրականացնող ոստիկանության ծառայողը պարտավոր է պարզել հաղորդում ներկայացնող անձի և նրա բնակության վայրի վերաբերյալ տվյալների լրիվությունն ու իսկությունը: Տվյալների ոչ լրիվության դեպքում ոստիկանության ծառայողը ոստիկանության իրավասության սահմաններում պետք է միջոցներ ձեռնարկի դրանք ճշտելու ուղղությամբ:

58. Եթե ստուգման ընթացքում պարզվում է, որ հաղորդում ներկայացրած անձի և նրա բնակության (հաշվառման) վայրի տվյալներն իրականությանը չեն համապատասխանում, ապա դրանք ստուգում իրականացրած ծառայողի զեկուցագրի հիման վրա ոստիկանության իրավասու ստորաբաժանման պետի (իրավասու այլ պաշտոնատար անձի) կամ տարածքային ստորաբաժանման պետի (պատասխանատուի) մակագրությամբ թողնվում են անհետևանք, դրա մասին նշում է կատարվում գրանցամատյանում և ընթացքը լուծվում է սույն կարգի 29-րդ կետով սահմանված կարգով:

59. Այն դեպքում, երբ պարզ չէ հաղորդմամբ ներկայացվող իրավախախտման տեսակը (հանցանք, թե զանցանք) դրա ստուգումն իրականացվում է Քրեական դատավարության օրենսգրքի 191-րդ հոդվածով սահմանված կարգով:

60. Պատահարների մասին հաղորդումները ստուգելու ընթացքում հանցագործության կամ վարչական իրավախախտման հատկանիշներ հայտնաբերելիս` ստուգում իրականացնող ոստիկանության ծառայողը պարտավոր է ոստիկանության իրավասու ստորաբաժանման պետին (իրավասու այլ պաշտոնատար անձին) կամ տարածքային ստորաբաժանման պետին (պատասխանատուին) անհապաղ ներկայացնել զեկուցագիր՝ սույն կարգով նախատեսված որոշում ընդունելու նպատակով:

61. Վարչական իրավախախտումների մասին հաղորդումների ստուգման ընթացքում հանցագործության հատկանիշներ հայտնաբերելիս` ստուգում իրականացնող ոստիկանության ծառայողը պարտավոր է ոստիկանության իրավասու ստորաբաժանման պետին (իրավասու այլ պաշտոնատար անձին) կամ տարածքային ստորաբաժանման պետին (պատասխանատուին) անհապաղ ներկայացնել զեկուցագիր: Այս դեպքում Քրեական դատավարության օրենսգրքի 192-րդ հոդվածով նախատեսված որոշումներից մեկն ընդունելուց հետո ընդունված որոշման մասին նշում է կատարվում գրանցամատյանում:

62. Հանցագործության մասին հաղորդումների ստուգումն իրականացվում է Քրեական դատավարության օրենսգրքի 191-րդ հոդվածի պահանջների պահպանմամբ, որի արդյունքում ընդունվում է Քրեական դատավարության օրենսգրքի 192-րդ հոդվածով նախատեսված որոշումներից մեկը:

63. Վարչական իրավախախտումների մասին հաղորդումները ստուգվում և որոշումներն ընդունվում են Վարչական իրավախախտումների վերաբերյալ օրենսգրքով սահմանված կարգով:

64. Վարչական իրավախախտման մասին հաղորդումների ստուգման արդյունքում, ստուգում իրականացնող ոստիկանության ծառայողի զեկուցագրի հիման վրա, ոստիկանության իրավասու ստորաբաժանման պետը (իրավասու այլ պաշտոնատար անձը) կամ տարածքային ստորաբաժանման պետը (պատասխանատուն) կայացնում է հետևյալ որոշումներից մեկը`

1) վարչական իրավախախտման վերաբերյալ գործի վարույթ հարուցելու.

2) վարչական իրավախախտման վերաբերյալ գործի վարույթ հարուցելը մերժելու.

3) հաղորդումը (նյութերը) վարչական իրավախախտման վերաբերյալ արձանագրություն կազմելու (գործը քննելու) լիազորություն ունեցող պետական մարմին կամ ըստ տարածքային ենթակայության ոստիկանության տարածքային այլ ստորաբաժանում ուղարկելու մասին:

65. Սույն կարգի 64-րդ կետով նախատեսված որոշումների ձևերը հաստատում է ոստիկանության պետը:

66. Պատահարի մասին հաղորդումներն ստուգվում և սույն կարգի 68-րդ կետով նախատեսված որոշումներն ընդունվում են պատահարի վերաբերյալ հաղորդումը գրանցվելուց հետո 5-օրյա ժամկետում:

67. Սույն կարգի 68-րդ կետի 2-րդ ենթակետով նախատեսված որոշումը կայացվելու դեպքում Քրեական դատավարության օրենսգրքի 191-րդ հոդվածի 1-ին մասով սահմանված ժամկետը հաշվվում է որոշման կայացման օրվանից:

68. Պատահարի վերաբերյալ հաղորդման ստուգման արդյունքներով ոստիկանության իրավասու ստորաբաժանման պետը (իրավասու այլ պաշտոնատար անձը) կամ տարածքային ստորաբաժանման պետը (պատասխանատուն), ոստիկանության ծառայողի զեկուցագրի վրա մակագրություն կատարելու ձևով, ընդունում է հետևյալ որոշումներից մեկը՝

1) ստուգում իրականացրած ոստիկանության ծառայողի զեկուցագրի հիման վրա նյութերը թողնել անհետևանք, եթե ստուգմամբ հնարավոր է փաստել հանցագործության կամ վարչական իրավախախտման հատկանիշների բացակայությունը.

2) ստուգում իրականացրած ոստիկանության ծառայողի զեկուցագրի հիման վրա նյութերի հետագա ընթացքը լուծել Քրեական դատավարության օրենսգրքով սահմանված կարգով: Այս դեպքում Քրեական դատավարության օրենսգրքի 192-րդ հոդվածով նախատեսված որոշումներից մեկն ընդունելուց հետո ընդունված որոշման մասին նշում է կատարվում գրանցամատյանում.

3) ստուգում իրականացրած ոստիկանության ծառայողի զեկուցագրի հիման վրա նյութերի հետագա ընթացքը լուծել Վարչական իրավախախտումների վերաբերյալ օրենսգրքով սահմանված կարգով: Այս դեպքում գրանցամատյանում նշվում է սույն կարգի 64-րդ կետով նախատեսված որոշումներից մեկը.

4) ստուգում իրականացրած ոստիկանության ծառայողի զեկուցագրի հիման վրա հաղորդումը (նյութերը) ուղարկել այն պետական մարմին, որն օրենքով լիազորված է պատահարի քննության արդյունքներով կայացնել որոշում կամ իրավասու ստորաբաժանում կամ ըստ տարածքային ենթակայության՝ ոստիկանության տարածքային այլ ստորաբաժանում:

69. Ստուգման արդյունքներով ընդունված որոշման պատճենը 24 ժամվա ընթացքում հանձնվում է ոստիկանության իրավասու ստորաբաժանման լիազորված ծառայողին կամ հերթափոխի ավագին` գրանցամատյանում նշում կատարելու համար:

70. Ոստիկանությունում գրանցված հանցագործության մասին հաղորդումների ստուգումը նախաքննության մարմնի կողմից իրականացվելու դեպքում ստուգման արդյունքում ընդունված որոշման մասին տեղեկությունները գրանցամատյանում գրառում է ոստիկանության լիազորված ծառայողը:

«___» ________________20 թ. քաղաք (համայնք)___________________________________________

Ժամը` ____ ____ րոպե

Ես` _________________________________________________________________________________

   (ԱՀ ոստիկանության կենտրոնական ապարատի ստորաբաժանման կամ տարածքային ստորաբաժանման անվանումը,

_____________________________________________________________________________________

                                                             (ծառայողի պաշտոնը, կոչումը, անունը, ազգանունը)

ընդունեցի հաղորդում քաղաքացի`______________________________________________________

                                                                                            (անունը, ազգանունը, հայրանունը, ծննդյան թիվը)

____________________________________________________________________________________

                                      (բնակության վայրի (հաշվառման) հասցեն, հեռախոսահամարը)

____________________________________________________________________________________

                                          (էլեկտրոնային փոստի հասցեն (առկայության դեպքում)

____________________________________________________________________________________

                                                  (ծառայողական հասցեն, պաշտոնը)

____________________________________________________________________________________

                                (անձը հաստատող փաստաթղթի սերիան, համարը, երբ և ում կողմից է տրվել)

հաղորդում տվողի առնչությունն իրավախախտմանը կամ պատահարին և իրազեկության աղբյուրը         

___________________________________________________________________________________

___________________________________________________________________________________

Քաղաքացի_______________________________________________________________________-ը

նախազգուշացվել է սուտ մատնության համար Քրեական օրենսգրքի 357-րդ հոդվածով նախատեսված

քրեական պատասխանատվության մասին (զգուշացվում է, եթե ընդունվել է հանցագործության մասին հաղորդում)

_________________________________________________________________________________

                                                    (ստորագրությունը)

Իրավախախտման կամ պատահարի նկարագրությունը ________________________________

_________________________________________________________________________________

                                             (օրը, ամիսը, տարեթիվը, ժամը, վայրը)

_________________________________________________________________________________

_________________________________________________________________________________

_________________________________________________________________________________

_________________________________________________________________________________

_________________________________________________________________________________

_________________________________________________________________________________

_________________________________________________________________________________

Հաղորդումն ընդունեց _____________________________________________________________

                                                                   (ծառայողի ստորագրությունը)

«____» ________________________ 20 թ.

(դիմերես)

(դարձերես)