ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ

Օ Ր Ե Ն Ք Ը

 «ԶԻՆԱՊԱՐՏՈՒԹՅԱՆ ՄԱՍԻՆ» ԼՂՀ ՕՐԵՆՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

1. Օրենքի ամբողջ տեքստում օգտագործված «շրջանային, քաղաքային» բառերը փոխարինել «տվյալ տարածքի» բառերով:

2. 7-րդ հոդվածի 2-րդ մասը շարադրել հետևյալ խմբագրությամբ.

«Գնդապետ և դրանից բարձր զինվորական կոչումները շնորհվում են ԼՂՀ նախագահի, իսկ մյուս զինվորական կոչումները՝ ԼՂՀ պաշտպանության նախարարության կողմից»:

3. Օրենքը լրացնել նոր 8-1 հոդվածով` հետևյալ բովանդակությամբ.

«Հոդված 8-1. ԼՂՀ զինված ուժերում արգելվում է հասարակական կազմակերպությունների, միավորումների և կուսակցությունների ստեղծումը:

Զինված ուժերի զինծառայողների կուսակցական պատկանելիությունը կասեցվում է զինվորական ծառայության ամբողջ ընթացքում»:

4. 10-րդ հոդվածում «18 տարին» բառերը փոխարինել «17 տարին» բառերով:

5. 11-րդ հոդվածում «3 տարի» բառակապակցությունը փոխարինել «2 տարի» բառակապակցությամբ:

6. 14-րդ հոդվածը լրացնել 3-րդ մասով` հետևյալ բովանդակությամբ .

«Զինվորական ուսումնական հաստատություններից հեռացված անձինք զորակոչվում են ժամկետային պարտադիր զինվորական ծառայության սույն օրենքով սահմանված ընդհանուր հիմունքներով, ուսման ժամանակաշրջանը չհաշվարկելով զինվորական ծառայության ժամկետում»:

7. 22-րդ հոդվածը շարադրել հետևյալ խմբագրությամբ.

«Հոդված 22. Ուսումը շարունակելու հետ կապված՝ պարտադիր զինվորական ծառայությունից տարկետում տրվում է.

ա) բարձրագույն ուսումնական հաստատությունների բժշկական, իրավաբանական և տնտեսագիտական ֆակուլտետների ուսանողներին,

բ) միջնակարգ հանրակրթական դպրոցների և միջնակարգ մասնագիտական ուսումնական հաստատությունների սովորողներին՝ մինչև ուսումն ավարտելը կամ մինչև 20 տարեկան դառնալը:

 Բարձրագույն ուսումնական հաստատությունների այլ ֆակուլտետների ուսանողները առաջին կուրսն ավարտելուց կանչվում են ժամկետային զինվորական ծառայության, տարկետում ստանալով ըստ ուսման վայրի՝ սույն օրենքի 11-րդ հոդվածով նախատեսված ժամկետով:

Բարձրագույն ուսումնական հաստատություններից և հանրակրթական դպրոցներից հեռացված, ինչպես և ուսման կապակցությամբ տարկետում ստացած անձինք կորցնում են ժամկետային զինվորական ծառայությունից կրկնակի տարկետում ստանալու իրավունքը»:

Հոդված 8. 47-րդ հոդվածը շարադրել հետևյալ խմբագրությամբ.

«Հոդված 47. Պահեստազորի սպաները խաղաղ ժամանակ կարող են կանչվել զինվորական ծառայության.

- պայմանագրային կարգով՝ Լեռնային Ղարաբաղի Հանրապետության պաշտպանության նախարարության որոշմամբ,

- զորակոչի միջոցով՝ մինչև 3 տարի ժամկետով, ԼՂՀ կառավարության կողմից որոշվող մասնագիտությունների գծով և քանակով»:

9. Օրենքը լրացնել նոր 67-րդ հոդվածով` հետևյալ բովանդակությամբ .

«Հոդված 67. Սույն փոփոխությունների և լրացումների ընդունման կապակցությամբ ուժը կորցրած համարել ԼՂՀ Գերագույն խորհրդի նախագահության 1994 թվականի մայիսի 24-ի հրամանագիրը «ԼՂՀ պաշտպանության բանակի համար հրամանատարական կադրերի և զինվորական մասնագետների պատրաստման լրացուցիչ միջոցառումների մասին»: