Հիմք ընդունելով «Նորմատիվ իրավական ակտերի մասին» օրենքի 37-րդ հոդվածը` ո ր ո շ ու մ եմ.

1. Արցախի Հանրապետության Նախագահի 2017 թվականի սեպտեմբերի 25-ի «Արցախի Հանրապետության կառավարության կառուցվածքի սահմանումից բխող մի շարք միջոցառումների մասին» ՆՀ-107-Ն հրամանագրի (այսուհետ՝ հրամանագիր) 5-րդ կետով հաստատված՝ Արցախի Հանրապետության Նախագահի աշխատակազմի կանոնադրությունում կատարել հետևյալ փոփոխությունը և լրացումները՝

1) 51-րդ կետից հանել 12-րդ ենթակետը.

2) լրացնել հետևյալ բովանդակությամբ 51.1-ին և 51.2-րդ կետեր՝

«51.1. Քաղաքացիների դիմումների բաժինը՝

1) իրականացնում է աշխատակազմում ստացված գրավոր դիմումների հաշվառում, ինչպես նաև համակարգչային մուտքագրում և ուսումնասիրություն.

2) ընթացք է տալիս դիմումներին, կազմակերպում դրանցում արծարծված հարցերի քննարկումը, անհրաժեշտության դեպքում դրանք հասցեագրում այն պետական և տեղական ինքնակառավարման մարմիններին, որոնք իրավասու են լուծում տալու բարձրացված հարցերին, առավել էական առաջարկությունները, դիմումները և գանգատները զեկուցում է աշխատակազմի ղեկավարին.

3) հսկողություն է իրականացնում բաժնի միջոցով պատրաստված` աշխատակազմի ղեկավարի ստորագրությամբ ուղարկված դիմումների կատարման ժամկետների պահպանման նկատմամբ։

51.2. Քաղաքացիների ընդունելության և զանգերի բաժինը՝

1) կատարում է քաղաքացիների ընդունելություն, քաղաքացու մասնակցությամբ իրականացնում է բարձրացված հարցերի վերաբերյալ քննարկում, տալիս պարզաբանում, տրամադրում խորհրդատվություն, հնարավորության դեպքում աշխատանքային կարգով կարգավորում բարձրացված խնդիրները.

2) ապահովում է Նախագահի աշխատակազմի «թեժ» գծի բնականոն գործունեությունը, «թեժ» գծով (հեռախոսակապ, ինչպես նաև էլեկտրոնային կապ) և ընդունելությունների միջոցով ստացված բանավոր դիմումների և բողոքների ընդունումն ու գրանցումը, քննարկումը և սահմանված կարգով ընթացք տալը, իրականացնում դրանցում ներկայացված փաստերի ուսումնասիրություն.

3) վերլուծում է պետական կառավարման և տեղական ինքնակառավարման մարմիններից ստացված տեղեկատվությունը և անհրաժեշտության դեպքում առաջարկություններ ներկայացնում քաղաքացիների կողմից բարձրացված խնդիրների կամ բողոքների լուծման վերաբերյալ, ինչպես նաև Նախագահին ու աշխատակազմի ղեկավարին տրամադրում է պետական կառավարման համակարգի մարմինների կողմից լուծում չստացած, քաղաքացու կողմից բարձրացված հարցերի հնարավոր լուծման այլընտրանքային տարբերակներ.

4) վերլուծում և ամփոփոում է աշխատակազմում քաղաքացիներից, այդ թվում՝ «թեժ» գծով ստացված առաջարկությունները, դիմումները և բողոքներն ըստ ոլորտների և բնույթի, պարբերաբար դրանց մասին տեղեկատվություն և առաջարկություններ ներկայացնում Նախագահին և աշխատակազմի ղեկավարին։»։

2. Հրամանագրի 5-րդ կետով հաստատված՝ Արցախի Հանրապետության Նախագահի աշխատակազմի կառուցվածքում՝

1) 20-րդ կետից հանել «քաղաքացիների ընդունելության և նամակների բաժին» բառերը.

2) 21-րդ կետը շարադրել հետևյալ խմբագրությամբ.

«21. Տեղեկատվության գլխավոր վարչություն (հանրային կապերի և տեղեկատվական քաղաքականության համակարգման բաժին, մշտադիտարկման և վերլուծության բաժին)».

3) լրացնել հետևյալ բովանդակությամբ 23.1-ին և 23.2-րդ կետեր՝

«23.1. Քաղաքացիների դիմումների բաժին

23.2. Քաղաքացիների ընդունելության և զանգերի բաժին»։

3. Սույն հրամանագիրն ուժի մեջ է մտնում պաշտոնական հրապարակմանը հաջորդող օրվանից։