Գրանցված է Լեռնային Ղարաբաղի Հանրապետության արդարադատության նախարարության կողմից «29» հունիսի 2012թ. Պետական գրանցման համարը 21112107

 

ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆՆ

ԱՌԸՆԹԵՐ ՔԱՂԱՔԱՑԻԱԿԱՆ ԱՎԻԱՑԻԱՅԻ ՎԱՐՉՈՒԹՅՈՒՆ

 

Հ Ր Ա Մ Ա Ն

 

«27» հունիսի 2012թ.

N 16-Ն

 Ք. Ստեփանակերտ

 

ԱՎԻԱՑԻՈՆ ԱՆՎՏԱՆԳՈՒԹՅԱՆ ԾԱՌԱՅՈՒԹՅՈՒՆՆԵՐԻ

ԱՆՁՆԱԿԱԶՄԵՐԻ ԱՆԴԱՄՆԵՐԻ ԱՏԵՍՏԱՎՈՐՄԱՆ

 ԿԱՆՈՆԱԿԱՐԳԸ ՀԱՍՏԱՏԵԼՈՒ ՄԱՍԻՆ

 

Ղեկավարվելով «Ավիացիայի մասին» Լեռնային Ղարաբաղի Հանրապետության օրենքի 8-րդ հոդվածի 1-ին մասով`

 

ՀՐԱՄԱՅՈՒՄ ԵՄ՝

 

1. Հաստատել ավիացիոն անվտանգության ծառայությունների անձնակազմերի անդամների ատեստավորման կանոնակարգը` համաձայն հավելվածի:

2. Սույն հրամանն ուժի մեջ է մտնում պաշտոնական հրապարակման օրվան հաջորդող տասներորդ օրը:

 

 

ՊԵՏ	Դ. ԱԹԲԱՇՅԱՆ

 

 

Հավելված Լեռնային Ղարաբաղի Հանրապետության կառավարությանն առընթեր քաղաքացիական ավիացիայի վարչության պետի 2012 թվականի հունիսի 27-ի N 16-Ն հրամանի

 

Կ Ա Ն Ո Ն Ա Կ Ա Ր Գ

ԱՎԻԱՑԻՈՆ ԱՆՎՏԱՆԳՈՒԹՅԱՆ ԾԱՌԱՅՈՒԹՅՈՒՆՆԵՐԻ

 ԱՆՁՆԱԿԱԶՄԵՐԻ ԱՆԴԱՄՆԵՐԻ ԱՏԵՍՏԱՎՈՐՄԱՆ

 

I. ԸՆԴՀԱՆՈՒՐ ԴՐՈՒՅԹՆԵՐ

 

1. Ավիացիոն անվտանգության ծառայությունների անձնակազմերի անդամների ատեստավորման կանոնակարգով (այսուհետ՝ կանոնակարգ) սահմանվում են Լեռնային Ղարաբաղի Հանրապետության օդանավակայանների, Լեռնային Ղարաբաղի Հանրապետության օդանավ շահագործողների և քաղաքացիական ավիացիայի բնագավառում գործունեություն իրականացնող կազմակերպությունների ավիացիոն անվտանգության ծառայությունների անձնակազմերի անդամների (այսուհետ՝ Անձնակազմի անդամ) ատեստավորման անցկացման (այսուհետ` Ատեստավորման անցկացում) կանոնակարգն ու պայմանները:

2. Ատեստավորումն անցկացվում է զբաղեցրած պաշտոնին անձնակազմի անդամի մասնագիտական գիտելիքների և աշխատանքային ունակությունների համապատասխանությունը որոշելու նպատակով:

3. Անձնակազմի անդամի ատեստավորումն անցկացվում է յուրաքանչյուր 3 տարին մեկ անգամ, իսկ առաջին ատեստավորումը` նրա աշխատանքի ընդունվելուց առնվազն 6 ամիս անց:

4. Յուրաքանչյուր տարի անձնակազմի անդամների առնվազն 1/3-ը ենթակա է ատեստավորման:

5. Անձնակազմի անդամի արտահերթ ատեստավորումն անցկացվում է հերթական ատեստավորումից առնվազն մեկ տարի հետո:

6. Անձնակազմի անդամի արտահերթ ատեստավորումն անցկացվում է.

1) նրան պաշտոնի նշանակելու իրավասություն ունեցող պաշտոնատար անձի պատճառաբանված միջնորդության հիման վրա.

2) Արցախի Հանրապետության էկոնոմիկայի և արտադրական ենթակառուցվածքների նախարարության (այսուհետ՝ Նախարարություն) կողմից ավիացիոն անվտանգության աշխատանքների որակի շարունակական ապահովման և վերահսկողության նպատակներով անցկացվող ուսումնասիրությունների, թեստերի և տեսչական գործառույթների իրականացման ընթացքում հայտնաբերված թերությունների արդյունքում.

3) Անձնակազմի անդամի ցանկությամբ:

(6-րդ կետը փոփ. 05.02.18 N 01-Ն)

7. Ատեստավորման ենթակա չեն`

1) օդանավակայանի ավիացիոն անվտանգության ծառայության ղեկավար պաշտոն զբաղեցնող անձինք.

2) տվյալ պաշտոնը վեց ամսից պակաս ժամկետով զբաղեցնող Անձնակազմի անդամները, եթե նրանք նման ցանկություն չեն հայտնել.

3) հղի կամ մինչև 3 տարեկան երեխայի խնամքի կապակցությամբ արձակուրդում գտնվող Անձնակազմի անդամները, եթե նրանք նման ցանկություն չեն հայտնել:

8. Հղիության կամ երեխայի խնամքի կապակցությամբ արձակուրդում գտնվող Անձնակազմի անդամները ենթակա են ատեստավորման` արձակուրդից վերադառնալուց հետո՝ ոչ շուտ, քան վեց ամիս հետո, եթե նրանք ցանկություն չեն հայտնել ավելի վաղ ատեստավորվելու:

9. Ատեստավորման ենթակա, սակայն արձակուրդում, գործուղման մեջ գտնվող կամ ժամանակավոր անաշխատունակ Անձնակազմի անդամները ենթակա են ատեստավորման` ծառայության անցնելուց հետո եռամսյա ժամկետում:

 

II. ԱՏԵՍՏԱՎՈՐՄԱՆ ՆԱԽԱՊԱՏՐԱՍՏԱԿԱՆ ԱՇԽԱՏԱՆՔՆԵՐԻ ԿԱԶՄԱԿԵՐՊՈՒՄԸ

 

10. Սույն կանոնակարգի առաջին կետում նշված կազմակերպությունները մինչև ընթացիկ տարվա օգոստոսի 1-ը Նախարարություն են ներկայացնում հերթական ատեստավորման ենթակա Անձնակազմի անդամների ցուցակները (N 1 ձև):

(10-րդ կետը փոփ. 05.02.18 N 01-Ն)

11. Սույն կանոնակարգի 6-րդ կետի 1-ին և 3-րդ ենթակետերով նախատեսված դեպքերում պաշտոնատար անձը, կամ ատեստավորվելու ցանկություն հայտնած Անձնակազմի անդամը ներկայացնում է զեկուցագիր կազմակերպության գործադիր մարմին, որն հնգօրյա ժամկետում այն ներկայացնում է Նախարարություն, իսկ սույն Կանոնակարգի 6-րդ կետի 2-րդ ենթակետով նախատեսված դեպքում՝ Նախարարության համապատասխան կառուցվածքային ստորաբաժանման ղեկավարը զեկուցագիր է ներկայացնում Արցախի Հանրապետության էկոնոմիկայի և արտադրական ենթակառուցվածքների նախարարին, որից հետո մեկամսյա ժամկետում Անձնակազմի անդամը ատեստավորվում է համապատասխան ատեստավորող հանձնաժողովի (այսուհետ՝ հանձնաժողով) կողմից:

(11-րդ կետը փոփ. 05.02.18 N 01-Ն)

12. Ատեստավորման հանձնաժողովը կազմվում է Արցախի Հանրապետության էկոնոմիկայի և արտադրական ենթակառուցվածքների նախարարի հրամանով:

(12-րդ կետը փոփ. 05.02.18 N 01-Ն)

13. Անձնակազմի ատեստավորման ենթակա անդամները ատեստավորման օրվանից ոչ ուշ, քան մեկ ամիս առաջ տեղեկացվում են ատեստավորման անցկացման մասին` Ծանուցագրով (N 2 ձև):

14. Ատեստավորումից առնվազն երկու շաբաթ առաջ Անձնակազմի անդամի անմիջական ղեկավարը հանձնաժողով է ներկայացնում Անձնակազմի անդամի ծառայողական բնութագիրը:

15. Անձնակազմի անդամը ատեստավորման անցկացման օրվանից առնվազն մեկ շաբաթ առաջ, ստորագրությամբ, պետք է ծանոթանա իր ծառայողական բնութագրին: Ծառայողական բնութագրին համաձայն չլինելու դեպքում Անձնակազմի անդամը ներկայացնում է գրավոր առարկություններ, որոնք ծառայողական բնութագրի հետ միասին փոխանցվում են հանձնաժողովին:

16. Ծառայողական բնութագիր չներկայացնելը չի կարող բացասաբար ազդել Անձնակազմի անդամի ատեստավորման արդյունքների վրա:

17. Ատեստավորումն անցկացվում է Անձնակազմի անդամի անմիջական մասնակցությամբ՝ թեստավորման միջոցով:

18. Թեստային առաջադրանքներն ատեստավորումից առնվազն մեկ ամիս առաջ կազմում է Նախարարության համապատասխան ստորաբաժանումը, հաստատում՝ Արցախի Հանրապետության էկոնոմիկայի և արտադրական ենթակառուցվածքների նախարարը:

(18-րդ կետը փոփ. 05.02.18 N 01-Ն)

 

III. ԹԵՍՏԱՎՈՐՄԱՆ ԱՆՑԿԱՑՈՒՄԸ

 

19. Ատեստավորման հանձնաժողովը Նախարարության համապատասխան ստորաբաժանումից ստանում է համապատասխան կնքված ամփոփաթերթեր` 2 օրինակից: Ամփոփաթերթի առաջին օրինակը կնքված է ձախ կողմում` կտրոնի հիմնական մասի վրա` հավասարաչափ, իսկ երկրորդ օրինակը՝ ներքևի ձախ մասում:

(19-րդ կետը փոփ. 05.02.18 N 01-Ն)

20. Ատեստավորման հանձնաժողովը մինչև թեստավորման փուլի սկիզբը նախապես պատրաստված և Արցախի Հանրապետության էկոնոմիկայի և արտադրական ենթակառուցվածքների նախարարի կողմից հաստատված թեստային առաջադրանքներից պատահական ընտրությամբ ընտրում է Անձնակազմի ատեստավորման ենթակա անդամի զբաղեցրած պաշտոնի գործառութային պարտականություններին համապատասխանող հարցեր և կազմում թեստ, որը բաղկացած է 30 հարցից:

(20-րդ կետը փոփ. 05.02.18 N 01-Ն)

21. Թեստային առաջադրանքները ներառում են Լեռնային Ղարաբաղի Հանրապետության քաղաքացիական ավիացիայի բնագավառի ավիացիոն անվտանգության ոլորտը կարգավորող օրենսդրական և նորմատիվ ակտերի, ինչպես նաև Անձնակազմի ատեստավորման ենթակա անդամների պաշտոնական հրահանգներով նախատեսված գործառույթներից բխող պահանջները:

22. Թեստավորումն անցկացվում է գրավոր:

23. Թեստավորումն անցկացվում է համապատասխան պայմաններով ապահովված սենյակում (սրահ, լսարան, դահլիճ և այլն):

24. Անձնակազմի ատեստավորման ենթակա անդամը թեստավորմանը ներկայանում է անձնագրով կամ անցագրով: Հանձնաժողովը ստուգում է անձնակազմի ատեստավորման ենթակա անդամի ինքնությունը և թույլատրում նրան մուտք գործել թեստավորման սենյակ: Անձնակազմի ատեստավորման ենթակա անդամների մուտքը թեստավորման սենյակ դադարեցվում է թեստավորումն սկսվելուց 10 րոպե առաջ:

25. Անձնակազմի ատեստավորման ենթակա անդամին չի թույլատրվում իր հետ թեստավորման սենյակ բերել կապի միջոցներ, տպագիր, մեքենագիր, ձեռագիր նյութեր կամ այլ տեխնիկական սարքեր:

26. Հանձնաժողովի քարտուղարը անձնակազմի անդամին բացատրում է թեստավորման հետ կապված տեխնիկական հարցերը:

27. Հանձնաժողովի քարտուղարը անձնակազմի ատեստավորման ենթակա անդամին տալիս է սույն Կանոնակարգի 19-րդ կետում նշված ամփոփաթերթ՝ 2 օրինակից: Անձնակազմի ատեստավորման ենթակա անդամը ամփոփաթերթի առաջին օրինակի կտրոնի վրա լրացնում է իր ազգանունը, անունը, հայրանունը և անջատելով այն հիմնական մասից, հանձնում է հանձնաժողովի քարտուղարին: Կտրոնը գցվում է ամփոփաթերթի պահպանման համար նախատեսված կնքված արկղի մեջ:

28. Թեստավորման ժամանակ Անձնակազմի ատեստավորման ենթակա անդամը կտրոնը հանձնելուց հետո ստանում է թեստավորման առաջադրանքների տետր: Առաջադրանքները բաղկացած են հարցերից և դրանց 3 կամ 4 ենթադրյալ պատասխաններից, որոնցից մեկը ճիշտ պատասխանն է:

29. Հանձնաժողովի քարտուղարը թեստավորման առաջադրանքների տետրն անձնակազմի ատեստավորման ենթակա անդամին տալուց հետո հայտարարում է թեստավորման սկիզբը:

30. Թեստավորման սկիզբը հայտարարվելուց հետո Անձնակազմի ատեստավորման ենթակա անդամը ծանոթանում է առաջադրանքներին և յուրաքանչյուր առաջադրանքի համար ամփոփաթերթում նախատեսված համապատասխան վանդակում կատարում է նշում` ընտրելով մեկ (իր կարծիքով` ճիշտ) պատասխան:

31. Անձնակազմի ատեստավորման ենթակա անդամը թեստավորման առաջադրանքների տետրում կարող է կատարել ցանկացած նշում, որոնք արդյունքների գնահատման ժամանակ հիմք չեն հանդիսանում և չեն կարող վկայակոչվել արդյունքների գնահատումը բողոքարկելիս:

32. Ամփոփաթերթի վրա ջնջումներ, ուղղումներ կամ վերականգնումներ կատարել չի թույլատրվում: Այդ դեպքում տվյալ հարցի (խնդրի) պատասխանը համարվում է սխալ:

33. Թեստավորման առաջադրանքների համար հատկացված ժամանակն սպառվելուց հետո Անձնակազմի ատեստավորման ենթակա անդամն ամփոփաթերթի առաջին օրինակի հիմնական մասը գցում է կնքված արկղի մեջ, իսկ թեստավորման առաջադրանքների տետրը հանձնում հանձնաժողովի անդամին: Անձնակազմի ատեստավորման ենթակա անդամը աշխատանքը հանձնելիս ամփոփաթերթի երկրորդ օրինակի կնքված մասում լրացնում է իր ազգանունը, անունը, հայրանունը, վերցնում այն և դուրս է գալիս թեստավորման սենյակից:

34. Թեստավորման առաջադրանքները կատարելու համար անձնակազմի անդամներին հատկացվում է 50 րոպե:

35. Թեստավորման համար հատկացված ժամանակն ավարտվելուց հետո հանձնաժողովի քարտուղարը հայտարարում է դրա մասին, որից հետո Անձնակազմի ատեստավորման ենթակա անդամը դադարեցնում է աշխատանքը:

 

IV. ԹԵՍՏԱՎՈՐՄԱՆ ԱՐԴՅՈՒՆՔՆԵՐԻ ԱՄՓՈՓՈՒՄԸ

 

36. Հանձնաժողովի անդամները բացում են արկղը և հաշվում ամփոփաթերթի կտրոններն ու հիմնական մասերը` կազմելով համապատասխան արձանագրություն:

37. Գրավոր աշխատանքների ստուգման համար օպերատորը, հանձնաժողովի նախագահի հանձնարարությամբ, համակարգչի միջոցով տպում է թեստավորման առաջադրանքների ճիշտ պատասխանները, որոնց հիման վրա տեղում պատրաստվում է ձևանմուշ:

38. Հանձնաժողովի անդամները համատեղ` ձևանմուշի միջոցով ստուգում են Անձնակազմի ատեստավորման ենթակա անդամի կողմից ամփոփաթերթում նշված պատասխանները: Յուրաքանչյուր Անձնակազմի ատեստավորման ենթակա անդամի համար հաշվարկվում է հավաքած միավորների քանակը և տոկոսը:

39. Յուրաքանչյուր ճիշտ պատասխան գնահատվում է մեկ միավոր, իսկ սխալ պատասխանը՝ 0 միավոր: Սխալ պատասխաններ են համարվում ոչ միայն ճիշտ պատասխան չնշելը, այլև մեկից ավելի պատասխաններ նշելը, որևէ պատասխան չնշելը, ինչպես նաև սույն Կանոնակարգի 32-րդ կետում նշված դեպքերը:

40. Ստուգման աշխատանքների ավարտից հետո Անձնակազմի թեստավորմանը մասնակցած բոլոր անդամները հրավիրվում են թեստավորման սենյակ:

41. Հանձնաժողովի նախագահի կողմից մաքրվում են ամփոփաթերթերի հիմնական մասերի ծածկաշերտերը: Յուրաքանչյուր հիմնական մասի ծածկաշերտի մաքրումից հետո բարձրաձայն հայտարարվում են ամփոփաթերթի համարը և դրա վրա նշված տոկոսը, որոնք անմիջապես արձանագրվում են հանձնաժողովի քարտուղարի կողմից:

42. Հանձնաժողովի նախագահը բոլոր ամփոփաթերթերի հիմնական մասերի նկատմամբ սույն Կանոնակարգի 41-րդ կետում նշված գործողությունը կատարելուց հետո մեկ առ մեկ բարձրաձայն ընթերցում է ամփոփաթերթերի կտրոնների վրա նշված ազգանունը, անունը, հայրանունը: Յուրաքանչյուր աշխատող ներկայացնում է իր անձնագիրը (անցագիրը), ստանում իր կտրոնը, հանձնաժողովի անդամների ներկայությամբ մաքրում է ծածկաշերտը և բարձրաձայն հայտնում իր կտրոնի համարը, որն անմիջապես արձանագրվում է: Թեստավորմանը չներկայացած անդամների կտրոնների ծածկաշերտերը նույնպես մաքրվում են բոլորի ներկայությամբ: Հանձնաժողովի նախագահը բարձրաձայն հայտարարում է թեստավորման մասնակիցներից յուրաքանչյուրի հավաքած միավորները (տոկոսները):

43. Հանձնաժողովը միավորները (տոկոսները) հայտարարելուց հետո համապատասխան ցուցանակի վրա հրապարակում է թեստավորման արդյունքները և ամփոփաթերթի ձևանմուշը` ճիշտ պատասխանների նշմամբ:

44. Հանձնաժողովն ընդունում է որոշում առաջադրանքների 80 տոկոս և ավելի ճիշտ պատասխան տված մասնակցի ատեստավորման թերթում (N 3 ձև) կատարելով համապատասխան գրառում` համապատասխանում է զբաղեցրած պաշտոնին:

45. Հանձնաժողովն ընդունում է որոշում առաջադրանքների 80 տոկոսից պակաս ճիշտ պատասխան տված մասնակցի ատեստավորման թերթում կատարելով համապատասխան գրառում` չի համապատասխանում զբաղեցրած պաշտոնին:

 

V. ԱՏԵՍՏԱՎՈՐՄԱՆ ԱՐԴՅՈՒՆՔՆԵՐԻ ԱՄՓՈՓՈՒՄԸ

 

46. Հանձնաժողովն ատեստավորման ավարտից հետո ամփոփում է արդյունքները և յուրաքանչյուր մասնակցի համար կազմում ատեստավորման թերթ (N 3 ձև):

47. Հանձնաժողովի նախագահը և անդամներն ստորագրում են ատեստավորման թերթը: Հատուկ կարծիք ունեցող անդամներն ստորագրելիս նշում են դրա մասին` ստորագրության կողքին գրելով «Հատուկ կարծիքը կցվում է» բառերը և կցված հատուկ կարծիքի թերթերի թիվը:

48. Թեստավորման մասնակիցն ատեստավորման ավարտից հետո ծանոթանում է ատեստավորման թերթին և ստորագրում այն, ինչպես նաև ցանկության դեպքում կարող է գրավոր դիմել հանձնաժողովին և ստանալ ատեստավորման թերթի պատճենը:

49. Անձնակազմի անդամն ատեստավորման արդյունքների հետ չհամաձայնելու դեպքում կարող է դրանք, ատեստավորման ավարտից հետո եռօրյա ժամկետում բողոքարկել Արցախի Հանրապետության էկոնոմիկայի և արտադրական ենթակառուցվածքների նախարարին: Արցախի Հանրապետության էկոնոմիկայի և արտադրական ենթակառուցվածքների նախարարը բողոքը ստանալու օրվանից 7-օրյա ժամկետում ընդունում է համապատասխան որոշում:

(49-րդ կետը փոփ. 05.02.18 N 01-Ն)

50. Անձնակազմի անդամի ատեստավորման արդյունքները և ընդունված որոշումները Արցախի Հանրապետության էկոնոմիկայի և արտադրական ենթակառուցվածքների նախարարին են ներկայացվում հաշվետվության ձևով:

(50-րդ կետը փոփ. 05.02.18 N 01-Ն)

51. Հանձնաժողովի նախագահը հանձնաժողովի աշխատանքների ավարտից հետո Արցախի Հանրապետության էկոնոմիկայի և արտադրական ենթակառուցվածքների նախարարին է ներկայացնում Անձնակազմի անդամների համար ստացված, սակայն չօգտագործված ամփոփաթերթերը, հանձնաժողովի որոշումները, արձանագրությունները և մնացած բոլոր փաստաթղթերը` ատեստավորման արդյունքները Անձնակազմի անդամի անձնական գործում պահելու և սահմանված կարգով դրանք արխիվացնելու համար:

(51-րդ կետը փոփ. 05.02.18 N 01-Ն)

 

VI. ԱՏԵՍՏԱՎՈՐՄԱՆ ԱՐԴՅՈՒՆՔՆԵՐԻ ՀԻՄԱՆ ՎՐԱ ԱՆՁՆԱԿԱԶՄԵՐԻ

ԱՆԴԱՄՆԵՐԻ ՄԱՍԻՆ ՈՐՈՇՈՒՄՆԵՐԻ ԸՆԴՈՒՆՈՒՄԸ

 

52. Արցախի Հանրապետության էկոնոմիկայի և արտադրական ենթակառուցվածքների նախարարի հաստատված ատեստավորման արդյունքների հիման վրա սույն Կանոնակարգի 1-ին կետում նշված կազմակերպությունները ձեռնարկում են համապատասխան միջոցներ` հանձնաժողովի որոշումները 7-օրյա ժամկետում կատարելու համար:

(52-րդ կետը փոփ. 05.02.18 N 01-Ն)

(Կանոնակարգը փոփ. 05.02.18 N 01-Ն)

 

Ց ՈՒ Ց Ա Կ

ԱՏԵՍՏԱՎՈՐՈՂ ԱՆՁՆԱԿԱԶՄԻ ԱՆԴԱՄՆԵՐԻ

 

Ձև N 1

 

Ձև N 2

 

ԾԱՆՈՒՑԱԳԻՐ

_____________________ 20__թ.                                                                           ք. ________________

 

Տեղեկացնում ենք Ձեզ, որ Արցախի Հանրապետության էկոնոմիկայի և արտադրական ենթակառուցվածքների նախարարի__________________ 20__թ. ____________-ի N____ հրամանի համաձայն 20__թ. ___________ ին անց է կացվելու Ձեր ատեստավորումը:

 

______________________                                                                          ______________________

             (ստորագրություն)                                                                                                  (անուն, ազգանուն)

 

 

 

------------------------------------------------------------------------------------------------------------------------------------

 

 

 

_____________________ 20__թ.                                                                           ք. ________________

 

Ես՝ ________________________________________________________________________________

                                          (անձնակազմի անդամի անունը, հայրանունը, ազգանունը)

___________________________________________________________________________________,

                                                                                     (զբաղեցրած պաշտոնը)

 

Տեղեկացվել եմ Արցախի Հանրապետության էկոնոմիկայի և արտադրական ենթակառուցվածքների նախարարի__________________________20    թ. _______________ -ի N ____ հրամանին 20 թ. ______________________ ին իմ ատեստավորումն անցկացնելու մասին:

 

 

_______________________                                                                          ______________________

             (ստորագրությունը)                                                                                                  (անունը, ազգանունը)

(Ձև N 2-ը փոփ. 05.02.18 N 01-Ն)

 

 

Ձև N 3

 

ԱՏԵՍՏԱՎՈՐՄԱՆ ԹԵՐԹ ԱՆՁՆԱԿԱԶՄԻ ԱՆԴԱՄԻ

 

Ատեստավորման ձևը`

* թեստավորում

 

1. Ազգանունը, անունը, հայրանունը __________________________________________________

2. Ծննդյան օրը, ամիսը, տարեթիվը __________________________________________________

3. Ատեստավորման պահին զբաղեցրած պաշտոնը և այդ պաշտոնում նշանակվելու տարեթիվը

________________________________________________________________________________

________________________________________________________________________________

________________________________________________________________________________

 

4. Թեստավորման արդյունքը (տոկոսով)

5. Ատեստավորման արդյունքում ատեստավորող հանձնաժողովի ընդունած որոշումը`

________________________________________________________________________________

________________________________________________________________________________

________________________________________________________________________________

 

Հանձնաժողովի նախագահ		__________________		____________________
		(ստորագրությունը)		(անունը, ազգանունը)
Հանձնաժողովի անդամներ		__________________		____________________
		(ստորագրությունը)		(անունը, ազգանունը)

__________________      _____________________________

__________________      _____________________________

__________________      _____________________________

 

Ատեստավորման անցկացման ամսաթիվը ____ _____________ 20   թ.

Ատեստավորման թերթին ծանոթացա`       _________________     ____________________

                                                                           (ստորագրությունը)                    (անունը, ազգանունը)

 

___ _____________ 20   թ.