ք. ՍՏԵՓԱՆԱԿԵՐՏ

Ղեկավարվելով «Իրավական ակտերի մասին» Լեռնային Ղարաբաղի Հանրապետության օրենքի 71-րդ կետով`

1. Լեռնային Ղարաբաղի Հանրապետության արդարադատության նախարարի 2005 թվականի սեպտեմբերի 16-ի «Քաղաքացիական կացության ակտերի պետական գրանցումների վկայականների լրացման կարգը, դրանց նմուշները և քաղաքացիական կացության ակտերի պետական գրանցման փաստը հաստատող այլ փաստաթղթերի ձևաթղթերի նմուշները հաստատելու մասին» թիվ 175 հրամանում կատարել հետևյալ փոփոխությունները`

1) 2-րդ կետի «Լեռնային Ղարաբաղի Հանրապետությունում» բառերը փոխարինել «Արցախի Հանրապետությունում» բառերով, իսկ «ԼՂՀ» հապավումը՝ «Արցախի Հանրապետության» բառերով,

2) հրամանով հաստատված հավելված 1-ը շարադրել նոր խմբագրությամբ՝ համաձայն հավելվածի:

2. Սույն հրամանն ուժի մեջ է մտնում պաշտոնական հրապարակման օրվան հաջորդող տասներորդ օրը:

1. Քաղաքացիական կացության ակտի գրանցման հիման վրա դիմողին տրվում է քաղաքացիական կացության ակտի պետական գրանցման վկայական (այսուհետ՝ պետական գրանցման վկայական):

2. Պետական գրանցման վկայականը պատրաստվում է բացառապես Արցախի Հանրապետության արդարադատության նախարարությունում գործող քաղաքացիական կացության ակտերի գրանցման միասնական էլեկտրոնային կառավարման համակարգի միջոցով քաղաքացիական կացության ակտային գրանցում կատարելիս՝ ինքնաշխատ:

3. Պետական գրանցման վկայականի ձևաթղթի լրացման ենթակա տողերը արտատպվում են Արցախի Հանրապետության արդարադատության նախարարությունում գործող քաղաքացիական կացության ակտերի գրանցման միասնական էլեկտրոնային կառավարման համակարգի միջոցով` «Քաղաքացիական կացության ակտերի մասին» Լեռնային Ղարաբաղի Հանրապետության օրենքի համաձայն:

4. Պետական գրանցման վկայականը տրամադրվում է քաղաքացիական կացության ակտերի գրանցում իրականացնող կամ վկայականի կրկնօրինակը տրամադրող մարմնի կնիքով և ղեկավարի ստորագրությամբ:

5. Պետական գրանցման վկայականի վրա ներքևի մասում զետեղվում է Արցախի Հանրապետության արդարադատության նախարարությունում գործող քաղաքացիական կացության ակտերի գրանցման միասնական էլեկտրոնային կառավարման համակարգի միջոցով գեներացվող պետական վկայականի սերիան և համարը, ինչպես նաև իսկության ստուգման համար նախատեսված հատուկ համարանիշը և արագ արձագանքման (տեղեկացման) ծածկագիրը:

6. Պետական գրանցման վկայականի իսկության ստուգումը կարող է կատարվել սույն կարգի 5-րդ կետով ամրագրված հատուկ համարանիշը մուտքագրելով Հայաստանի Հանրապետության արդարադատության նախարարությունում գործող պաշտոնական փաստաթղթերի իսկության ստուգման պաշտոնական կայքում կամ օգտագործելով տեղեկատվական տեխնոլոգիաների միջոցները՝ արագ արձագանքման ծածկագրի միջոցով:

7. Սխալ լրացված պետական գրանցման վկայականները պահվում են տվյալ քաղաքացիական կացության ակտերի գրանցում իրականացնող կամ վկայականի կրկնօրինակը տրամադրող մարմնում և ենթակա են սահմանված կարգով ոչնչացման:»։