Գրանցված է Արցախի Հանրապետության արդարադատության նախարարության կողմից 17-ին հուլիսի 2018թ. Պետական գրանցման համարը 2071850

ԱՐՑԱԽԻ ՀԱՆՐԱՊԵՏՈՒԹՅԱՆ ՈՍՏԻԿԱՆՈՒԹՅԱՆ ՊԵՏ

 

Հ Ր Ա Մ Ա Ն

 

«28» հունիսի 2018թ.

N 1-Ն

ք. Ստեփանակերտ

 

ՈՍՏԻԿԱՆՈՒԹՅԱՆ ԾԱՌԱՅՈՂԻՆ ՀԱՄԱԶԳԵՍՏ ՏՐԱՄԱԴՐԵԼՈՒ,

ԱՅՆ ԿՐԵԼՈՒ ԿԱՐԳՆ ՈՒ ՊԱՅՄԱՆՆԵՐԸ ՍԱՀՄԱՆԵԼՈՒ ՄԱՍԻՆ

 

«Ոստիկանությունում ծառայության մասին» Լեռնային Ղարաբաղի Հանրապետության օրենքի 27-րդ հոդվածի 2-րդ մասի, Լեռնային Ղարաբաղի Հանրապետության կառավարության 2014 թվականի օգոստոսի 5-ի N 513-Ն որոշման 2-րդ կետի և Արցախի Հանրապետության կառավարության 2018 թվականի հունվարի 25-ի N 34-Ն որոշմամբ հաստատված Արցախի Հանրապետության ոստիկանության կանոնադրության 15-րդ կետի 6-րդ ենթակետի համաձայն.

 

ՀՐԱՄԱՅՈՒՄ ԵՄ՝

 

1. Սահմանել`

1) ոստիկանության ծառայողին համազգեստ տրամադրելու կարգը և պայմանները` համաձայն N 1 հավելվածի.

2) ոստիկանության ծառայողի համազգեստ կրելու կարգը և պայմանները` համաձայն N 2 հավելվածի:

2. Հրամանը ծանոթացնել Արցախի Հանրապետության ոստիկանության ողջ անձնակազմին:

3. Սույն հրամանն ուժի մեջ է մտնում պաշտոնական հրապարակման օրվան հաջորդող տասներորդ օրը:

 

 

ՈՍՏԻԿԱՆՈՒԹՅԱՆ ԳՆԴԱՊԵՏ

Ի.ԳՐԻԳՈՐՅԱՆ

 

 

Հավելված N 1 Արցախի Հանրապետության ոստիկանության պետի 2018 թվականի հունիսի 28-ի N 1-Ն հրամանի

 

ԿԱՐԳՆ ՈՒ ՊԱՅՄԱՆՆԵՐԸ

ՈՍՏԻԿԱՆՈՒԹՅԱՆ ԾԱՌԱՅՈՂԻՆ ՀԱՄԱԶԳԵՍՏ ՏՐԱՄԱԴՐԵԼՈՒ

 

1. ԸՆԴՀԱՆՈՒՐ ԴՐՈՒՅԹՆԵՐ

 

1. Սույն կարգով և պայմաններով կարգավորվում են ոստիկանության ծառայողին համազգեստ տրամադրելու հետ կապված հարաբերությունները:

2. Ոստիկանության ծառայողին համազգեստ տրամադրելը ենթադրում է ոստիկանության ծառայողին համազգեստով, տարբերանշաններով և համազգեստի մաս կազմող այլ պարագաներով, ինչպես նաև անկողնային պարագաներով և վրաններով ապահովում (այսուհետ` հանդերձանք):

3. Ոստիկանության ծառայողին հանդերձանքով ապահովումն իրականացվում է Արցախի Հանրապետության ոստիկանության ֆինանսատնտեսական վարչության կողմից՝ ըստ սահմանված նորմաների:

4. Ոստիկանության ֆինանսատնտեսական վարչության խնդիրներն են` ոստիկանության ստորաբաժանումների ծառայողներին ժամանակին և ամբողջությամբ հանդերձանքով ապահովումը, ստորաբաժանումների հանդերձանքի պահեստներում և օգտագործման մեջ եղած համազգեստի հաշվառումը, պահպանման աշխատանքների իրականացումը, ոստիկանության ծառայողների համազգեստի կարի անհատական պատվերների կազմակերպումը, ինչպես նաև արտադրանքի որակի նկատմամբ հսկողությունը:

5. Ոստիկանության ծառայողներին համազգեստը տրամադրվում է Լեռնային Ղարաբաղի Հանրապետության կառավարության 2014 թվականի օգոստոսի 5-ի «Ոստիկանության ծառայողի համազգեստի նկարագիրն ու այն կրելու ժամկետները սահմանելու և Լեռնային Ղարաբաղի Հանրապետության կառավարության 2013 թվականի ապրիլի 19-ի N 203-Ն որոշումն ուժը կորցրած ճանաչելու մասին» N 513-Ն որոշման N 2 հավելվածով սահմանված ժամկետներով:

6. Անձնական օգտագործման հանդերձանքի պարագաները անձնակազմին տրվում են անհատական օգտագործման համար:

7. Հանդերձանքը պատվիրվում և պահեստավորվում է կենտրոնացված կարգով` ոստիկանության ծառայողների թվաքանակին համապատասխան:

8. Արցախի Հանրապետության ոստիկանությունում առկա` սահմանված նորմերին չհամապատասխանող հանդերձանքի բաշխումը կատարվում է ըստ նպատակահարմարության:

 

2. ՈՍՏԻԿԱՆՈՒԹՅԱՆ ԾԱՌԱՅՈՂԻՆ ՀԱՄԱԶԳԵՍՏ ՏՐԱՄԱԴՐԵԼՈՒ

ԿԱՐԳՆ ՈՒ ՊԱՅՄԱՆՆԵՐԸ

 

9. Ոստիկանությունում նոր ստորաբաժանում կազմավորվելու դեպքում վերջինիս ծառայողներին համազգեստ տրամադրելու համար հիմք է հանդիսանում տվյալ ստորաբաժանման կազմավորման մասին համապատասխան իրավական ակտը:

10. Ոստիկանության ծառայողների հանդերձանքը բաշխվում է անհատական կարգով:

11. Ոստիկանության ծառայողին համազգեստի ուսադիրներ, տարբերանշաններ, թևքանշաններ և համազգեստի մաս կազմող այլ պարագաներ հատկացվում են հասանելիք համազգեստի հետ միասին:

12. Բարձրագույն խմբի կոչում ստացած ոստիկանության ծառայողները ապահովվում են Լեռնային Ղարաբաղի Հանրապետության կառավարության 2014 թվականի օգոստոսի 5-ի «Ոստիկանության ծառայողի համազգեստի նկարագիրն ու այն կրելու ժամկետները սահմանելու և Լեռնային Ղարաբաղի Հանրապետության կառավարության 2013 թվականի ապրիլի 19-ի N 203-Ն որոշումն ուժը կորցրած ճանաչելու մասին» N 513-Ն որոշման N 2 հավելվածի 1-ին նորմայով նախատեսված համազգեստի ողջ լրակազմով:

13. Ոստիկանության գլխավոր, ավագ, միջին և կրտսեր խմբի կոչումներ ունեցող ոստիկանության ծառայողները ոստիկանությունում ծառայություն անցնելիս անմիջապես ստանում են ամենօրյա և տոնական համազգեստների ողջ լրակազմը:

14. Այլ պետությունների ոստիկանության ուսումնական հաստատություններ գործուղված սովորողների հանդերձանքի ապահովումն իրականացվում է Արցախի Հանրապետության ոստիկանության համար նախատեսված նորմաներով՝ հաշվի առնելով տվյալ պետության բնակլիմայական առանձնահատկությունները:

 

Հավելված N 2 Արցախի Հանրապետության ոստիկանության պետի 2018 թվականի հունիսի 28-ի N 1-Ն հրամանի

 

ԿԱՐԳՆ ՈՒ ՊԱՅՄԱՆՆԵՐԸ

ՈՍՏԻԿԱՆՈՒԹՅԱՆ ԾԱՌԱՅՈՂԻ ՀԱՄԱԶԳԵՍՏ ԿՐԵԼՈՒ

 

1. ԸՆԴՀԱՆՈՒՐ ԴՐՈՒՅԹՆԵՐ

 

1. Սույն կարգով և պայմաններով կարգավորվում են ոստիկանության ծառայողի համազգեստ կրելու հետ կապված հարաբերությունները:

2. Ծառայության ընթացքում ոստիկանության ծառայողները շնորհված կոչմանը համապատասխան կրում են Լեռնային Ղարաբաղի Հանրապետության կառավարության 2014 թվականի օգոստոսի 5-ի «Ոստիկանության ծառայողի համազգեստի նկարագիրն ու այն կրելու ժամկետները սահմանելու և Լեռնային Ղարաբաղի Հանրապետության կառավարության 2013 թվականի ապրիլի 19-ի N 203-Ն որոշումն ուժը կորցրած ճանաչելու մասին» N 513-Ն որոշմամբ սահմանված նկարագրի համազգեստ, բացառությամբ այն դեպքերի, երբ անհրաժեշտություն է առաջանում ծառայության ժամանակ կրելու քաղաքացիական հագուստ:

3. Ոստիկանության ծառայողների համազգեստը դասակարգվում է տոնական, ամենօրյա և արտաքին ծառայություն իրականացնելու համար նախատեսված, ինչպես նաև ամառային և ձմեռային տեսակների:

4. Տոնական համազգեստը կրում են`

1) երդման արարողության.

2) ոստիկանության ստորաբաժանումներին դրոշներ հանձնելու.

3) պատվո պահակի կազմի մեջ ընդգրկվելու.

4) պետական պարգևներ ստանալու.

5) պաշտոնի նշանակման և կոչում շնորհելու դեպքերում` ղեկավարներին ներկայանալու.

6) ոստիկանության ծառայողների մասնակցությամբ պաշտոնական միջոցառումների անցկացման ժամանակ.

7) տոների և հիշատակի օրերին` ծառայությունից դուրս:

5. Արտաքին ծառայություն իրականացնելու համար նախատեսված համազգեստը կրում են`

1) պարեկային ծառայության մեջ գտնվելիս.

2) ծառայողական հատուկ խնդիրներ կատարելիս.

3) հերթապահությունների և ծառայողական պարապմունքների ժամանակ:

6. Սույն կարգի 4-րդ և 5-րդ կետերով չնախատեսված մյուս բոլոր դեպքերում ոստիկանության ծառայողները կրում են ամենօրյա համազգեստ:

7. Համազգեստի տեսակը որոշվում է ոստիկանության ստորաբաժանման ղեկավարի կողմից` ելնելով տվյալ ստորաբաժանման տեղակայման վայրից և իրականացվող խնդիրների բնույթից:

8. Շարային երթի, ստուգատեսների, խորհրդակցությունների և ծառայողական պարապմունքների ժամանակ ոստիկանության ծառայողների համազգեստի տեսակը որոշվում է դրանք անցկացնողների կողմից:

9. Ոստիկանության ծառայողների առանձին խմբեր զինվորական նմուշի համազգեստ կրելիս ղեկավարվում են Արցախի Հանրապետության պաշտպանության բանակի կողմից տվյալ համազգեստը կրելու համար սահմանված կարգով և նորմաներով:

10. Ոստիկանության ծառայողներին չի թույլատրվում կրել.

1) չսահմանված նմուշի համազգեստի պարագաներ, տարբերանշաններ և կրծքանշաններ.

2) միաժամանակ ամենօրյա, տոնական և արտաքին ծառայության համար նախատեսված համազգեստների պարագաները` բացառությամբ սույն կարգով նախատեսված հատուկ դեպքերի.

3) գունաթափ կամ կեղտոտված փողկապներ.

4) կեղտոտ, վնասված վերնամասով, մաշված կրունկներով կամ ոլորված սրնքակալներով կոշիկներ.

5) համազգեստ` քաղաքացիական հագուստի հետ համատեղ:

 

2. ՈՍՏԻԿԱՆՈՒԹՅԱՆ ԾԱՌԱՅՈՂԻՆ ՏՐԱՄԱԴՐՎՈՂ

ՀԱՄԱԶԳԵՍՏԻ ՏԵՍԱԿՆԵՐԸ

 

11. Ոստիկանության ծառայողները կրում են`

1) տոնական համազգեստ.

ա. ամառային` գլխարկ տոնական, տարազաբաճկոն և տաբատ մուգ փիրուզագույն, վերնաշապիկ սպիտակ` սև փողկապով, սև կոշիկներ,

բ. ձմեռային` գլխարկ ականջակալներով, մորթե (բարձրագույն խմբի կոչում ունեցողների համար` կարակուլե), վերարկու մուգ փիրուզագույն (բարձրագույն խմբի կոչում ունեցողների համար` կարակուլե օձիքով), կիսավերարկու մորթե օձիքով, տարազաբաճկոն և տաբատ մուգ փիրուզագույն, սպիտակ վերնաշապիկ` սև փողկապով, սև կոշիկներ կամ կիսաճտքավոր կոշիկներ, սպիտակ ձեռնոցներ, սպիտակ վզպատ թաշկինակ.

2) ամենօրյա համազգեստ.

ա. ամառային` գլխարկ, մուգ փիրուզագույն տարազաբաճկոն և տաբատ, վերնաշապիկ (մոխրաերկնագույն/սպիտակ), մուգ փիրուզագույն փողկապ, սև կոշիկներ կամ կիսաճտքավոր կոշիկներ,

բ. ձմեռային` գլխարկ ականջակալներով մորթե (բարձրագույն խմբի կոչումներ ունեցողների համար` կարակուլե), վերարկու մուգ փիրուզագույն (բարձրագույն խմբի կոչում ունեցողների համար` կարակուլե օձիքով), կիսավերարկու մորթե օձիքով, մուգ փիրուզագույն տարազաբաճկոն և տաբատ, սվիտեր, մոխրաերկնագույն կամ սպիտակ վերնաշապիկ` մուգ փիրուզագույն փողկապով, սև կոշիկներ կամ կիսաճտքավոր կոշիկներ, սև ձեռնոցներ, մուգ փիրուզագույն վզպատ թաշկինակ.

3) արտաքին ծառայություն իրականացնելու համար նախատեսված համազգեստ.

ա. ամառային` գլխարկ կեպի (ոստիկանության հատուկ նշանակության ստորաբաժանումներում` սպորտային գլխարկ), կիսաբամբակյա բաճկոն և տաբատ` մուգ փիրուզագույն, ճանապարհապարեկային ծառայողների համար երկուական լուսաանդրադարձնող ժապավեններ, փորձաքրեագետների համար՝ բաճկոն (ժիլետ), մոխրաերկնագույն վերնաշապիկ (շապիկ), մուգ փիրուզագույն փողկապ, սև գոտի, սև կոշիկներ կամ կիսաճտքավոր կոշիկներ,

բ. ձմեռային` գլխարկ ականջակալներով (ոչխարի մորթուց` գլխավոր, ավագ և միջին խմբի կոչումներ ունեցողների համար և արհեստական մորթուց` կրտսեր խմբի կոչումներ ունեցողների համար), կիսավերարկու մորթե օձիքով, ճանապարհապարեկային ծառայողների համար երկուական լուսաանդրադարձնող ժապավեններ, փորձաքրեագետների համար՝ բաճկոն (ժիլետ), մուգ փիրուզագույն տարազաբաճկոն և տաբատ, սվիտեր, մոխրաերկնագույն վերնաշապիկ, սև գոտի, սև կոշիկներ կամ կիսաճտքավոր կոշիկներ, սև ձեռնոցներ, մուգ փիրուզագույն վզպատ թաշկինակ:

(11-րդ կետը լրաց. 18.05.20 N 2-Ն)

12. Ոստիկանության ծառայողները կարող են կրել.

1) ձմեռային, ամենօրյա և տոնական համազգեստների հետ ականջակալներով գլխարկի փոխարեն մուգ փիրուզագույն կիսաբրդյա գլխարկ.

2) արտաքին ծառայության համար նախատեսված ձմեռային համազգեստի դեպքում՝ տաք եղանակներին ականջակալներով մորթուց գլխարկի փոխարեն կիսաբրդյա գլխարկ, մորթե օձիքը հանված կիսավերարկուի հետ.

3) ամառային ամենօրյա համազգեստի դեպքում` մուգ փիրուզագույն կեպի, մոխրաերկնագույն (սպիտակ) վերնաշապիկի հետ առանց տարազաբաճկոնի.

4) ձմեռային ամենօրյա համազգեստի դեպքում` ձմեռային մուգ փիրուզագույն կիսավերարկու, մուգ փիրուզագույն վզպատ թաշկինակի հետ.

5) ամառային ամենօրյա համազգեստի դեպքում` տարազաբաճկոնի փոխարեն կիսաբրդյա մուգ փիրուզագույն բաճկոն (գլխարկի կամ կեպիի հետ).

6) ամառային ամենօրյա առանց տարազաբաճկոնի համազգեստի դեպքում` սպիտակ և մոխրաերկնագույն վերնաշապիկ, ուսադիրներով (երկար թևքերովը` փողկապով, կարճ թևքերովը` առանց փողկապի).

7) արտաքին ծառայության համար նախատեսված համազգեստի դեպքում` առանց կիսաբամբակյա բաճկոնի, տաբատով, սպիտակ կամ մոխրաերկնագույն վերնաշապիկ ուսադիրներով (երկար թևքերովը` փողկապով, կարճ թևքերովը` առանց փողկապի).

8) անձրևային եղանակներին` ամենօրյա, տոնական և արտաքին ծառայության համար նախատեսված համազգեստների դեպքում` մուգ փիրուզագույն թիկնոց-ուսնոց:

 

3. ՈՍՏԻԿԱՆՈՒԹՅԱՆ ԿԻՆ ԾԱՌԱՅՈՂԻՆ ՏՐԱՄԱԴՐՎՈՂ

ՀԱՄԱԶԳԵՍՏԻ ՏԵՍԱԿՆԵՐԸ

 

13. Ոստիկանության կին ծառայողները կրում են տոնական համազգեստի հետևյալ տեսակները.

1) ամառային` գլխարկ, կիսաշրջազգեստ մուգ փիրուզագույն, վերնաշապիկ սպիտակ` սև փողկապով, սև կոշիկներ, զուգագուլպա (գուլպա).

2) ձմեռային` գլխարկ ականջակալներով, մուգ փիրուզագույն կիսավերարկու` մորթե օձիքով, տարազաբաճկոն, մուգ փիրուզագույն կիսաշրջազգեստ, սվիտեր, վերնաշապիկ սպիտակ` սև փողկապով, կոշիկներ սև գույնի, կամ կիսաճտքավոր կոշիկներ, զուգագուլպա (գուլպա), սև ձեռնոցներ, սպիտակ վզպատ թաշկինակ:

14. Ոստիկանության կին ծառայողները կրում են ամենօրյա համազգեստի հետևյալ տեսակները.

1) ամառային` գլխարկ, մուգ փիրուզագույն կիսաշրջազգեստ, վերնաշապիկ մոխրաերկնագույն (սպիտակ), փողկապ մուգ փիրուզագույն, սև կոշիկներ, զուգագուլպա.

2) ձմեռային` գլխարկ ականջակալներով, մուգ փիրուզագույն կիսավերարկու` մորթե օձիքով, մուգ փիրուզագույն տարազաբաճկոն, կիսաշրջազգեստ կամ տաբատ, սվիտեր, վերնաշապիկ մոխրաերկնագույն (սպիտակ), փողկապ մուգ փիրուզագույն, կոշիկներ սև գույնի կամ կիսաճտքավոր կոշիկներ, զուգագուլպա (գուլպա), սև ձեռնոցներ, մուգ փիրուզագույն վզպատ թաշկինակ:

15. Ոստիկանության կին ծառայողները կրում են արտաքին ծառայության համար նախատեսված համազգեստի հետևյալ տեսակները.

1) ամառային` գլխարկ, բաճկոն, տաբատ, վերնաշապիկ մոխրաերկնագույն, փողկապ մուգ փիրուզագույն, կոշիկ կամ կիսաճտքավոր կոշիկ` սև.

2) ձմեռային` գլխարկ ականջակալներով, կիսավերարկու մուգ փիրուզագույն, տաբատ կիսաբրդյա, սվիտեր, վերնաշապիկ մոխրաերկնագույն` մուգ փիրուզագույն փողկապով, կոշիկ կամ կիսաճտքավոր կոշիկ` սև, սև ձեռնոցներ, վզպատ թաշկինակ` մուգ փիրուզագույն:

16. Ոստիկանության կին ծառայողները կարող են կրել.

1) ձմեռային ամենօրյա և տոնական համազգեստի դեպքում` ականջակալներով գլխարկի փոխարեն կիսաբրդյա գլխարկ,

2) արտաքին ծառայության համար նախատեսված ձմեռային համազգեստի դեպքում` ականջակալներով մորթուց գլխարկի փոխարեն կիսաբրդյա գլխարկ, մորթե օձիքը հանված կիսավերարկուի հետ,

3) ամառային ամենօրյա համազգեստի դեպքում` մուգ փիրուզագույն կիսաբրդյա բաճկոն, գլխարկով,

4) ամառային ամենօրյա համազգեստի դեպքում` սպիտակ կամ մոխրաերկնագույն վերնաշապիկ (երկար թևքերովը` փողկապով, կարճ թևքերովը` առանց փողկապի),

5) արտաքին ծառայության համար նախատեսված համազգեստի դեպքում` առանց կիսաբրդյա բաճկոնի, սպիտակ կամ մոխրաերկնագույն վերնաշապիկ (երկար թևքերովը` փողկապով, կարճ թևքերովը` առանց փողկապի),

6) անձրևային եղանակներին` մուգ փիրուզագույն թիկնոց-ուսնոց:

 

4. ՈՍՏԻԿԱՆՈՒԹՅԱՆ ԾԱՌԱՅՈՂԻ ԿՈՂՄԻՑ ՀԱՄԱԶԳԵՍՏ

ԿՐԵԼՈՒ ԿԱՐԳԸ ԵՎ ԱՌԱՆՁՆԱՀԱՏԿՈՒԹՅՈՒՆՆԵՐԸ

 

17. Ականջակալներով գլխարկը, ամենօրյա գլխարկը կրում են ուղիղ, առանց թեքելու: Ականջակալներով գլխարկի ներքևի եզրը պետք է լինի 2-4 սանտիմետր հոնքերից վերև:

18. Բարձրագույն խմբի կոչում ունեցող ծառայողները կրում են արծաթազօծ թելերով ասեղնագործված դափնե ճյուղերով, փոքր գլխարկանշանով և զինանշանով բրդյա գլխարկ: Ոստիկանության մյուս ծառայողները` արծաթագույն մեծ գլխարկանշանով գլխարկ:

19. Ականջակալներով գլխարկը կրում են արծաթագույն փոքր գլխարկանշանով:

20. Գլխարկանշանի կենտրոնը` գլխարկանշանի և խորհրդանշանի միջնագիծը պետք է գտնվեն քթարմատի վերևում:

21. Ականջակալներով գլխարկը` ականջակալներն իջեցրած, կրում են օդի -10 աստիճան ցելսիուս և ավելի ցածր ջերմաստիճանների դեպքում, կոճկված դնչափոկով` ուժեղ քամու դեպքում: Իջեցված ականջակալների քուղերը կապվում են կզակի տակ, բարձրացված ականջակալների դեպքում` իրար կապված քուղերի ծայրերը պահվում են ականջակալների տակ:

22. Գլխից հանված գլխարկը պահում են ձախ իջեցրած ազատ ձեռքում: Ականջակալներով գլխարկը պահում են գլխարկանշանով դեպի առաջ, ականջակալներով գլխարկի ներքևի ծայրը ուղղված դեպի ծառայողի ոտքի կողմը:

23. Ձմեռային վերարկուն կրում են բոլոր կոճակները կոճկված: Ձմեռային վերարկուի երկարությունը պետք է լինի ծնկից 15 սանտիմետր վերև:

24. Կիսաշրջազգեստի երկարությունը` ծնկից:

25. Մորթե օձիքով ձմեռային կիսավերարկուն կրում են կափույրով ծածկվող շղթան մինչև վերջ բարձրացված:

26. Թիկնոց-ուսնոցը անձրևային եղանակին կրում են բոլոր կոճակները կոճկված, գլխանոցով կամ առանց դրա` ամառային կամ ձմեռային հագուստի պարագաների վրայից: Թիկնոց-ուսնոցը թույլատրվում է կրել ուսագոտու վրա գլանափաթեթավորված, կամ երեսով դեպի դուրս խնամքով ծալված` ձախ ձեռքում:

27. Տարազաբաճկոնը կրում են բոլոր կոճակները կոճկված:

28. Կիսաբրդյա բաճկոնը կրում են շղթան մինչև վերին կտրվածքը բարձրացված: Ցուրտ եղանակին շղթան բարձրացվում է մինչև վերջ:

29. Կիսաբամբակյա տաբատը կրում են կիսաճտքավոր կոշիկների մեջ` ոչ ձիգ վիճակում տեղավորված, իսկ կիսաբրդյա տաբատը կրում են կոշիկների վրա իջեցված:

30. Ամառային կիսաբամբակյա բաճկոնը կրում են օձիքի կոճակը արձակված վիճակում:

31. Երկարաթևք վերնաշապիկները կրում են բոլոր կոճակները կոճկված, ուսադիրներով և փողկապով, իսկ կարճաթևք վերնաշապիկները` առանց փողկապի, ուսադիրներով, վերևի կոճակը արձակված: Վերնաշապիկի օձիքը հետևից պետք է լինի տարազաբաճկոնի օձիքի վերին ծայրին հավասար կամ նրանից բարձր ոչ ավելի, քան 0,5 սանտիմետր:

32. Սվիտերը կրում են ձմեռային վերարկուի, կիսավերարկուի հետ (շենքերի ներսում ՝ ուսադիրներով):

33. Տաբատները պետք է ունենան երկայնակի արդուկված ծալքեր: Վերարկուի, տարազաբաճկոնի, բաճկոնների և վերնաշապիկի գրպանների կափույրները պետք է լինեն դուրս հանված:

34. Վզպատ թաշկինակը կրում են վերարկուի, ձմեռային կիսավերարկուի օձիքի տակ խնամքով ծալված: Վզպատ թաշկինակի վերին եզրը պետք է հավասարաչափ երևա օձիքի տակից 1-2 սանտիմետր:

35. Ձեռնոցները կրում են ձմեռային հագուստի հետ: Պատիվ տալուց ձեռնոցները չեն հանում:

36. Ոստիկանության ծառայողները կրում են սահմանված նմուշի սև կոշիկ և կիսաճտքավոր կոշիկ: Կիսաճտքավոր կոշիկները կրում են կոշկեքաշերը խնամքով քողակապված վիճակում:

37. Ոստիկանության կին ծառայողները կրում են սև, մարմնագույն կամ մոխրագույն զուգագուլպաներ, գուլպաներ:

38. Գոտին կրում են այնպես, որ նրա ճարմանդը առջևից գտնվի մեջտեղում:

39. Դաշտային պայուսակը կրում են հագուստի վրայից` գոտու վրա:

40. Փողկապը վերնաշապիկին ամրացնում են սահմանված նմուշի արծաթագույն ամրակով` վերևից երրորդ և չորրորդ կոճակների միջև:

41. Ոստիկանության ծառայողները կարող են կրել.

1) առանց տարազաբաճկոնի (բաճկոնի) ուսադիրներով և փողկապով վերնաշապիկներ` ամառային ամենօրյա համազգեստի դեպքում, իսկ շենքերի ներսում` տարվա ցանկացած եղանակին.

2) առանց տարազաբաճկոնի (բաճկոնի), առանց փողկապի, ուսադիրներով, վերին կոճակը արձակված կարճ թևքերով վերնաշապիկներ` ամառային ամենօրյա համազգեստի դեպքում` օդի +20 աստիճան ցելսիուս և բարձր ջերմաստիճանի ժամանակ:

 

5. ՈՒՍԱԴԻՐՆԵՐ, ԽՈՐՀՐԴԱՆՇԱՆՆԵՐ, ԿՐԾՔԱՆՇԱՆՆԵՐ ԵՎ

ԹԵՎՔԱՆՇԱՆՆԵՐ ԿՐԵԼՈՒ ԿԱՐԳԸ

 

42. Ոստիկանության ծառայողները համազգեստի և հատուկ հանձնարարություններ կատարելու համար նախատեսված հագուստի վրա կրում են ուսադիրներ.

1) կարվող` ձմեռային վերարկուի, տարազաբաճկոնի, բաճկոնի վրա,

2) հանվող` կիսավերարկուի և վերնաշապիկի վրա:

43. Կարվող և հանվող ուսադիրների վրա ուսադրի վերին ծայրից 15 միլիմետր հեռավորության վրա տեղադրվում է արծաթագույն կոճակ, իսկ երեսի կտորից կարված ուսադիրներին արծաթագույն կոճակը տեղադրվում է 10 միլիմետր հեռավորության վրա:

44. Ոստիկանության բարձրագույն, գլխավոր, ավագ, միջին և կրտսեր խմբի կոչումներ ունեցող ծառայողների ուսադիրների վրա աստղերի քանակը և դիրքը համապատասխանաբար որոշվում է`

1) գեներալ-գնդապետի կոչում ունեցողների համար աստղերի թիվը` երեք, աստղերի տրամագիծը 22 միլիմետր, հեռավորությունը ուսադրի ներքին ծայրից մինչև առաջին աստղի կենտրոնը 25 միլիմետր, հեռավորությունը աստղերի կենտրոնների միջև ուսադրի երկայնքով` 25 միլիմետր,

2) գեներալ-լեյտենանտի կոչում ունեցողների համար աստղերի թիվը` երկու, աստղերի տրամագիծը 22 միլիմետր, հեռավորությունը ուսադրի ներքին ծայրից մինչև առաջին աստղի կենտրոնը 25 միլիմետր, հեռավորությունը աստղերի կենտրոնների միջև ուսադրի երկայնքով` 25 միլիմետր,

3) գեներալ-մայորի կոչում ունեցողների համար աստղերի թիվը` մեկ, աստղերի տրամագիծը` 22 միլիմետր, հեռավորությունը ուսադրի ներքին ծայրից մինչև աստղի կենտրոնը` 50 միլիմետր,

4) գնդապետի կոչում ունեցողների համար աստղերի թիվը` երեք, աստղերի տրամագիծը` 22 միլիմետր, հեռավորությունը ուսադրի ներքին ծայրից մինչև առաջին աստղի կենտրոնը` 30 միլիմետր, հեռավորությունը աստղերի կենտրոնների միջև ուսադրի երկայնքով` 25 միլիմետր,

5) փոխգնդապետի կոչում ունեցողների համար աստղերի թիվը` երկու, աստղերի տրամագիծը 20 միլիմետր, հեռավորությունը ուսադրի ներքին ծայրից մինչև առաջին աստղի կենտրոնը 30 միլիմետր,

6) մայորի կոչում ունեցողների համար աստղերի թիվը` մեկ, աստղերի տրամագիծը 20 միլիմետր, հեռավորությունը ուսադրի ներքին ծայրից մինչև աստղի կենտրոնը 45 միլիմետր,

7) կապիտանի կոչում ունեցողների համար աստղերի թիվը` չորս, աստղերի տրամագիծը 13 միլիմետր, հեռավորությունը ուսադրի ներքին ծայրից մինչև առաջին աստղի կենտրոնը 30 միլիմետր, հեռավորությունը աստղերի կենտրոնների միջև ուսադրի երկայնքով 25 միլիմետր,

8) ավագ լեյտենանտի կոչում ունեցողների համար աստղերի թիվը` երեք, աստղերի տրամագիծը 13 միլիմետր, հեռավորությունը ուսադրի ներքին ծայրից մինչև առաջին աստղի կենտրոնը 30 միլիմետր, հեռավորությունը աստղերի կենտրոնների միջև ուսադրի երկայնքով 25 միլիմետր,

9) լեյտենանտի կոչում ունեցողների համար աստղերի թիվը` երկու, աստղերի տրամագիծը 13 միլիմետր, հեռավորությունը ուսադրի ներքին ծայրից մինչև առաջին աստղի կենտրոնը 30 միլիմետր,

10) ավագ ենթասպայի կոչում ունեցողների համար աստղերի թիվը` երեք, աստղերի տրամագիծը 13 միլիմետր, հեռավորությունը ուսադրի ներքին ծայրից մինչև առաջին աստղի կենտրոնը 30 միլիմետր, հեռավորությունը աստղերի կենտրոնների միջև ուսադրի երկայնքով 25 միլիմետր,

11) ենթասպայի կոչում ունեցողների համար աստղերի թիվը` երկու, աստղերի տրամագիծը 13 միլիմետր, հեռավորությունը ուսադրի ներքին ծայրից մինչև առաջին աստղի կենտրոնը 30 միլիմետր, հեռավորությունը աստղերի կենտրոնների միջև ուսադրի երկայնքով 25 միլիմետր:

45. Ոստիկանության ծառայողների ուսադիրների վրա աստղերը համապատասխանաբար տեղադրվում են`

1) կարվող և հանվող ուսադիրների վրա`

ա. գեներալի կոչում ունեցողների համար` երկայնակի առանցքի գծի վրա.

բ. գնդապետի կոչում ունեցողների համար` երկու ներքևի աստղերը մակաշերտերի վրա, երրորդը` առաջին երկուսից վերև երկայնակի առանցքային գծի վրա.

գ. փոխգնդապետի կոչում ունեցողների համար` մակաշերտերի վրա.

դ. մայորի կոչում ունեցողների համար` երկայնակի առանցքային գծի վրա.

ե. կապիտանի կոչում ունեցողների համար` երկու ներքևի աստղերը` ուսադրի եզրերի և մակաշերտի միջև, երրորդը և չորրորդը` մակաշերտի վրա առաջին երկուսից վերև.

զ. ավագ լեյտենանտի կոչում ունեցողների համար` երկու ներքևի աստղերը` ուսադրի եզրերի և մակաշերտի միջև, երրորդ աստղը` մակաշերտի վրա առաջին երկուսից վերև.

է. լեյտենանտի կոչում ունեցողների համար` մեկական աստղ ուսադրի ծայրերի և մակաշերտի միջև.

ը. ավագ ենթասպայի, ենթասպայի կոչում ունեցողների համար` երկայնակի առանցքային գծի վրա.

2) ներկարված ուսադիրների համար`

ա. գնդապետի, ավագ լեյտենանտի կոչում ունեցողների համար` երկու ներքևի աստղերը երկայնակի առանցքային գծի երկու կողմերում, կողքերից և առանցքային գծից հավասար հեռավորության վրա, երրորդը` առաջին երկուսից վերև երկայնակի առանցքային գծի վրա.

բ. մայորի, ավագ ենթասպայի, ենթասպայի կոչում ունեցողների համար` երկայնակի առանցքային գծի վրա.

գ. կապիտանի կոչում ունեցողների համար` երկու ներքևի աստղերը երկայնակի առանցքային գծի երկու կողմերում, կողքերից և առանցքային գծից հավասար հեռավորության վրա, երրորդը և չորրորդը` առաջին երկուսից վերև` երկայնակի առանցքային գծի վրա:

46. Ոստիկանության կրտսեր խմբի կոչում ունեցող ծառայողների ուսադիրների վրա (բացի ենթասպաներից) տեղադրվում են արծաթագույն նշաքուղեր`

1) ավագի կոչում ունեցողների համար նշաքուղերի քանակը` մեկ երկայնակի, լայնությունը` 20 միլիմետր.

2) ավագ սերժանտի կոչում ունեցողների համար նշաքուղերի քանակը` մեկ լայնակի, լայնությունը` 20 միլիմետր.

3) սերժանտի կոչում ունեցողների համար նշաքուղերի քանակը` երեք լայնակի, լայնությունը` 10 միլիմետր.

4) կրտսեր սերժանտի կոչում ունեցողների համար նշաքուղերի քանակը` երկու լայնակի, լայնությունը` 10 միլիմետր:

47. Նշաքուղերը տեղադրվում են հետևյալ կարգով` ավագ սերժանտի, սերժանտի, կրտսեր սերժանտի ուսադիրների վրա` 40 միլիմետր հեռավորության վրա ներքևի ծայրից մինչև առաջին լայնակի նշաքուղը: Հաջորդ լայնակի նշաքուղերը սերժանտի և կրտսեր սերժանտի կոչում ունեցողների ուսադիրների վրա տեղադրվում են առաջինից 2 միլիմետր հեռավորությամբ, ավագի կոչում ունեցողների ուսադիրների մեջտեղում տեղադրվում է երկայնակի արծաթագույն շերտագիծ, իսկ ավագի կոչում ունեցողների ներկարված ուսադիրի մեջտեղում տեղադրվում է մետաղյա թիթեղ 45 միլիմետր հեռավորությամբ` ուսադրի ներքևի ծայրից 10 միլիմետր հեռավորության վրա:

48. Ոստիկանության բարձրագույն խմբի կոչումներ ունեցող ծառայողների ձմեռային վերարկուի և գարնանային-աշնանային վերարկուի օձիքների անկյուններում ամրացվում են արծաթազօծ տարբերանշաններ (դափնե ճյուղեր):

49. Արծաթազօծ տարբերանշանները համազգեստի վրա տեղադրվում են օձիքի ծայրի կիսանջատ հատվածին զուգահեռ այնպես, որ ներքևի ծայրը համընկնի օձիքի ծայրի հետ (չծածկելով օձիքի եզրաքուղը), իսկ արծաթազօծ տարբերանշանի արտաքին կողեզրը ձմեռային վերարկուի վրա հպվի օձիքի ներսի հարթակին` 10 միլիմետր հեռավորության վրա օձիքի ծայրի կիսանջատ հատվածից:

50. Տարազաբաճկոնների օձիքների անկյուններում տեղադրվում են արծաթագույն ասեղնագործված դափնե ճյուղեր:

51. Մետաղյա խորհրդանշանները ամրացվում են տարազաբաճկոնների, գարնանային-աշնանային և ձմեռային (առանց մորթե օձիքի) վերարկուների օձիքի վրա, օձիքի անկյան կիսորդի ուղղությամբ 30 միլիմետր հեռավորության վրա, ձմեռային և գարնանային-աշնանային վերարկուների վրա (բացի բարձրագույն խմբի կոչում ունեցողների) 35 միլիմետր հեռավորության վրա օձիքի անկյունից մինչև խորհրդանշանի կենտրոնը, ընդ որում` խորհրդանշանի համաչափության ուղղահայաց առանցքը պետք է զուգահեռ լինի օձիքի կիսանջատ հատվածին:

52. Գնդապետների, փոխգնդապետների, մայորների համազգեստի վրա տեղադրվում է նույն խորհրդանշանը եռագույն դրոշի պատկերով:

53. «Ճանապարհային ոստիկան» կրծքանշանը կրում են կրծքավանդակի ձախ կողմում: Տարազաբաճկոնների վրա կրծքանշանը ամրացվում է ձախ գրպանի վրա: Եթե տարազաբաճկոնի և բաճկոնի վրա առկա են շքանշանների ժապավեններ և մեդալների շերտաձողիկներ` նշանը ամրացվում է դրանցից 10 միլիմետր ներքև, ձմեռային կիսավերարկուի վրա` ուսադրի ներքևի եզրից 90 միլիմետր հեռավորության վրա և շղթայից 120 միլիմետր դեպի ձախ:

54. Արցախի Հանրապետության ոստիկանության բոլոր ծառայողները համազգեստի ձախ թևքին, ուսակարից 80 միլիմետր ներքև, կրում են Արցախի Հանրապետության ոստիկանությունը խորհրդանշող թևքանշան, որից վերև մուգ փիրուզագույն առանձին կտորի վրա ամրացվում է կիսաշրջանաձև ասեղնագործված «POLICE» բառը:

55. Ոստիկանության ճանապարհային ոստիկանության ծառայողների համազգեստի աջ թևքին, ուսակարից 80 միլիմետր ներքև, կրում են իրենց ծառայությունը խորհրդանշող թևքանշան:

 

6. ՈՍՏԻԿԱՆՈՒԹՅԱՆ ԾԱՌԱՅՈՂԻ ՇՔԱՆՇԱՆՆԵՐԻ, ՄԵԴԱԼՆԵՐԻ ԵՎ ԱՅԼ

ՏԱՐԲԵՐԱՆՇԱՆՆԵՐԻ ԴԱՍԱՎՈՐՈՒԹՅԱՆ ԱՌԱՆՁՆԱՀԱՏԿՈՒԹՅՈՒՆՆԵՐԸ

 

56. Շքանշանները, մեդալները, շքանշանների ժապավենները և շերտաձողիկների վրա ամրացված մեդալների ժապավենները, մյուս տարբերանշանները դասավորվում են համազգեստի վրա, պահպանելով հետևյալ առանձնահատկությունները`

1) պետական պարգևները տեղադրվում են պետական պարգևների և պարգևանշանների կրման կարգի համաձայն, հետևյալ հերթականությամբ` Արցախի Հանրապետության պետական պարգևներ, Հայաստանի Հանրապետության պետական պարգևներ, Խորհրդային Սոցիալիստական Հանրապետությունների Միության պետական պարգևներ, գերատեսչական նշանակության մեդալներ և օտարերկրյա պարգևներ: Գերատեսչական մեդալների և կրծքանշանների կրման առանձնահատկությունները նշվում է նրանց նկարագրում.

2) տոնական տարազաբաճկոնի վրա շքանշանները և մեդալները կրծքավանդակի ձախ կողմում տեղաբաշխվում են հորիզոնական շարքով կրծքավանդակի կենտրոնից դեպի դուրս, կրծքավանդակի ուղղահայաց առանցքին համաչափ դարձածալի անկյունից 70 միլիմետր ներքև, դարձածալի եզրից 10 միլիմետր հեռավորության վրա: Եթե շքանշանները և մեդալները չեն տեղավորվում մեկ շարքի վրա, ապա տեղափոխվում են երկրորդ և հաջորդ շարքերը, առաջին շարքից ներքև.

3) շքանշանները և մեդալները կրծքավանդակի աջ կողմում տեղադրվում են հորիզոնական շարքով կրծքավանդակի կենտրոնից դեպի դուրս: Առաջին շարքում չտեղավորվող շքանշանները և մեդալները տեղափոխվում են երկրորդ շարք, շարքով դասավորված շքանշանների պայմանական առանցքները պետք է լինեն միևնույն մակարդակի վրա.

4) հեռավորությունը շքանշանների (մեդալների) շարքերի միջև` 10 միլիմետր, շքանշանների (մեդալների) միջև` 5-10 միլիմետր.

5) վահանակով ամրացվող շքանշանները, մեդալները և պարգևանշանները տեղադրվում են աջ կողմում.

6) շքանշանների ժապավենները և մեդալների ժապավենները շերտաձողի վրա տեղադրվում են ձախ կողմում հորիզոնական շարքով կրծքավանդակի կենտրոնից դեպի դուրս, գրպանի ուղղահայաց առանցքին համաչափ: Շարքում տեղադրվում են չորս ժապավեններից ոչ ավելին: Մեկ շարքում չտեղավորվող ժապավենները տեղափոխվում են երկրորդ, երրորդ և չորրորդ շարքերը: Ընդ որում` վերջին շարքի շերտաձողի ներքևի ծայրը պետք է լինի գրպանի կափույրի վերին ծայրի մակարդակին: Ավելի քան 16 շքանշանների և մեդալների դեպքում կրում են միայն առավել բարձր կարգավիճակի շքանշանների և մեդալների ժապավենները: Շքանշանների և մեդալների ժապավենների հետ միասին շերտաձողի բարձրությունը պետք է կազմի 8 միլիմետր.

7) Արցախի Հանրապետության «Պատվավոր կոչումների» կրծքանշանները տեղադրվում են դարձածալից 10 միլիմետր աջ այնպես, որ նշանի շերտաձողի ներքևի ծայրը լինի օձիքի անկյան մակարդակին, իսկ շքանշանների (մեդալների) առկայության դեպքում` նրանցից վերև.

8) «Ոստիկանության պատվավոր ծառայող» և «Գերազանց ծառայության համար» կրծքանշանները տեղադրվում են դարձածալից աջ` ուսումնական հաստատության ավարտական կրծքանշանից առաջ.

9) համազգեստի վրա կրելու թույլատրված կրծքանշանները տեղադրվում են կրծքավանդակի աջ կողմում հորիզոնական մեկ շարքով` կրծքավանդակի կենտրոնից դեպի դուրս գրպանի ուղղահայաց առանցքին համաչափ: Մյուս կրծքանշանները տեղադրվում են գրպանի կափույրի ներքևի եզրից, հավասար հեռավորության վրա, ընդ որում` դրանց թիվը պետք է լինի երեք նշանից ոչ ավելին: Մեկ նշանի դեպքում այն տեղադրվում է գրպանի կենտրոնում, երկուսի դեպքում` ծայրերին, երեքի դեպքում` հորիզոնական շարքով:

(հավելված 2-ը լրաց. 18.05.20 N 2-Ն)