ԱՐՑԱԽԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ

ՀՐԱՄԱՆԱԳԻՐԸ

ԱՐՑԱԽԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ 2017 ԹՎԱԿԱՆԻ

ՍԵՊՏԵՄԲԵՐԻ 25-Ի ՆՀ-107-Ն ՀՐԱՄԱՆԱԳՐՈՒՄ

ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

Հիմք ընդունելով «Նորմատիվ իրավական ակտերի մասին» օրենքի 37-րդ հոդվածը` որոշում եմ.

1. Արցախի Հանրապետության Նախագահի 2017 թվականի սեպտեմբերի 25-ի «Արցախի Հանրապետության կառավարության կառուցվածքի սահմանումից բխող մի շարք միջոցառումների մասին» ՆՀ-107-Ն հրամանագրի (այսուհետ՝ հրամանագիր) 5-րդ կետով հաստատված՝

1) Արցախի Հանրապետության Նախագահի աշխատակազմի կանոնադրությունում լրացնել հետևյալ բովանդակությամբ 53.1-ին կետ.

«53.1. Ռուսաց լեզվի զարգացման հարցերի բաժինը՝

1) իրականացնում է Արցախի Հանրապետությունում ռուսաց լեզվի զարգացման հարցերի համակարգային լուծման աշխատանքներ.

2) մշակում է տեղեկատվական, կրթական և հումանիտար բնագավառներում ռուսաց լեզվի միջավայրի պահպանման միջոցառումների արդյունավետ համակարգեր, օժանդակում դրանց զարգացմանը.

3) իրականացնում է լեզվական և կրթական նախաձեռնություններ, աջակցում դրանց իրագործմանը.

4) ապահովում է համագործակցությունը ռուսաց լեզվի խթանման և աջակցության ոլորտում գործունեություն ծավալող Հայաստանի Հանրապետության և Ռուսաստանի Դաշնության համապատասխան կառույցների հետ, համակարգում համատեղ միջոցառումների կազմակերպման աշխատանքները.

5) համագործակցում է ոլորտային պետական մարմինների, տեղական ինքնակառավարման մարմինների, կազմակերպությունների հետ՝ ռուսաց լեզվի դասավանդման որակի, որակավորված մասնագետների պատրաստման, միջմշակութային համագործակցության, լեզվական անվտանգության և մարդու իրավունքների պաշտպանության հարցերով:».

2) Արցախի Հանրապետության Նախագահի աշխատակազմի կառուցվածքում լրացնել հետևյալ բովանդակությամբ 25.1-ին կետ.

«25.1. Ռուսաց լեզվի զարգացման հարցերի բաժին»:

2. Սույն հրամանագիրն ուժի մեջ է մտնում պաշտոնական հրապարակմանը հաջորդող օրվանից։