ԱՐՑԱԽԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ,

ԳԻՏՈՒԹՅԱՆ, ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐ

Հ Ր Ա Մ Ա Ն

ք․Ստեփանակերտ

ԱՐՀԵՍՏԱԳՈՐԾԱԿԱՆ ԵՎ ՄԻՋԻՆ ՄԱՍՆԱԳԻՏԱԿԱՆ ԿՐԹՈՒԹՅԱՆ ՓՈՐՁՆԱԿԱՆ

ԿՐԹԱԿԱՆ ԾՐԱԳՐԵՐԻ ԻՐԱԿԱՆԱՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Նախնական մասնագիտական (արհեստագործական) և միջին մասնագիտական կրթության մասին» օրենքի 16-րդ հոդվածի 1-ին մասի 10-րդ կետը՝

ՀՐԱՄԱՅՈՒՄ ԵՄ`

1. Հաստատել արհեստագործական և միջին մասնագիտական կրթության փորձնական կրթական ծրագրերի իրականացման կարգը՝ համաձայն հավելվածի:

2. Սույն հրամանն ուժի մեջ է մտնում պաշտոնական հրապարակմանը հաջորդող օրվանից:

Կ Ա Ր Գ

ԱՐՀԵՍՏԱԳՈՐԾԱԿԱՆ ԵՎ ՄԻՋԻՆ ՄԱՍՆԱԳԻՏԱԿԱՆ ԿՐԹՈՒԹՅԱՆ

ՓՈՐՁՆԱԿԱՆ ԿՐԹԱԿԱՆ ԾՐԱԳՐԵՐԻ ԻՐԱԿԱՆԱՑՄԱՆ

1. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում են արհեստագործական և միջին մասնագիտական կրթության փորձնական կրթական ծրագրերի (այսուհետ` փորձնական ծրագիր) հիմնական նպատակները, խնդիրները և առանձնահատկությունները, ինչպես նաև այդ ծրագրերի մշակման և Արցախի Հանրապետության արհեստագործական և միջին մասնագիտական կրթական ծրագրեր իրականացնող ուսումնական հաստատություններում և այլ կազմակերպություններում (այսուհետ` Կազմակերպություն) ներդրման, փորձարկման և արդյունքների ամփոփման պայմաններն ու կարգը:

2. Փորձնական ծրագրերի հիմնական նպատակներն են`

1) Արցախի Հանրապետության արհեստագործական և միջին մասնագիտական կրթության համակարգի կայուն զարգացմանը և կրթության գլոբալ համակարգերին ինտեգրմանն ուղղված կրթական առաջավոր հայեցակարգերի, տեխնոլոգիաների, միջազգային փորձի և նորարարությունների ներդրումն ու տարածումը.

2) արհեստագործական և միջին մասնագիտական հիմնական կրթական ծրագրերի իրականացման գործընթացում ի հայտ եկած թերությունների շտկումը և այդ ծրագրերի արդյունավետության բարձրացումը.

3) Կազմակերպությունների կառավարչական, ուսումնամեթոդական, գիտամանկավարժական, մշակութային, նյութատեխնիկական ներուժի զարգացումը:

3. Փորձնական ծրագրերի հիմնական խնդիրներն են`

1) նոր կրթական ծրագրերի և տեխնոլոգիաների, ուսուցման և դաստիարակության նոր ձևերի, մեթոդների, հնարքների և միջոցների փորձարկումը, դրանց հետագա հնարավոր ներդրման համար էական նշանակություն ունեցող փաստացի արդյունքների ստացումը.

2) արհեստագործական և միջին մասնագիտական կրթության կազմակերպման և իրականացման բնագավառում սկզբունքային նոր, այլընտրանքային մոտեցումների ձևավորումը և զարգացումը.

3) Կազմակերպությունների նորարարական գործունության կարգավորումը և համակարգումը:

4. Փորձնական ծրագրերը կարող են արհեստագործական և միջին մասնագիտական հիմնական կրթական ծրագրերից, պետական կրթական չափորոշիչներից, ինչպես նաև Կազմակերպությունում կրթության և ուսուցման կազմակերպման համար Արցախի Հանրապետության օրենսդրությամբ սահմանված այլ պահանջներից տարբերվել`

1) Կազմակերպությունում ուսանողների (ունկնդիրների) ընդունելության կարգով և մասնագիտության համար պահանջվող կրթության հիմքով.

2) մասնագիտությամբ (մասնագիտացմամբ), որակավորմամբ կամ որակավորման աստիճանով.

3) ուսումնական գործընթացի կազմակերպման, իրականացման, ուսումնառության, գնահատման (ատեստավորման) ձևերով և ժամկետներով.

4) Կազմակերպության կառավարման, ղեկավարման, ինչպես նաև ֆինանսական և տնտեսական գործունության ձևով:

5. Փորձնական ծրագրի հեղինակ կարող են լինել Արցախի Հանրապետության կրթության, գիտության, մշակույթի և սպորտի նախարարությունը (այսուհետ` Նախարարություն) կամ Կազմակերպությունները, դրանց մասնագետները կամ այլ անձինք (այսուհետ` Հեղինակ):

6. Փորձնական ծրագիրն իրականացվում է Նախարարության թույլտվությամբ:

2. ՓՈՐՁՆԱԿԱՆ ԾՐԱԳՐԵՐԻ ՆԵՐԿԱՅԱՑՄԱՆ, ՓՈՐՁԱՐԿՄԱՆ, ԱՐԴՅՈՒՆՔՆԵՐԻ

ԱՄՓՈՓՄԱՆ ԵՎ ՆԵՐԴՐՄԱՆ ՊԱՅՄԱՆՆԵՐՆ ՈՒ ԿԱՐԳԸ

7. Փորձնական ծրագրի իրականացման թույլտվություն ստանալու համար Հեղինակը Նախարարություն է ներկայացնում Արցախի Հանրապետության կրթության, գիտության, մշակույթի և սպորտի նախարարի անունից դիմում` կցելով փորձնական ծրագրի փաթեթը, որը պետք է ներառի՝

1) ուսումնական պլան,

2) առարկայական (մոդուլային) ուսումնական ծրագրեր,

3) փորձնական ծրագրի իրականացման ընթացքի վերաբերյալ անհրաժեշտ պարզաբանումներ,

4) փորձնական ծրագրի ընթացքի և արդյունքների ներկայացման համար առաջադրվող ցուցանիշների խումբ, դրանց վերաբերյալ պարզաբանումներ, տվյալների ներկայացման պարբերականությունը և կարգ,

5) ծրագրի իրականացման արժեք,

6) ծրագրի հեղինակի հայեցողությամբ` այլ փաստաթղթեր:

8. Հայտը ստանալուց հետո` հինգ աշխատանքային օրվա ընթացքում, Նախարարությունը սույն կարգի 7-րդ կետով սահմանված փաթեթի առկայության դեպքում, այն ուղարկում է Հայաստանի Հանրապետության կրթության, գիտության, մշակույթի և սպորտի նախարարություն՝ համապատասխան կազմակերպությունում փորձաքննություն իրականացնելու նպատակով:

9. Փորձաքննության արդյունքների մասին Նախարարություն է ներկայացվում փորձագիտական եզրակացություն, որը ներառում է`

1) փորձնական ծրագրի նպատակի գնահատականը,

2) փորձնական ծրագրի կարևորության գնահատականը,

3) փորձնական ծրագրի տևողության և ժամկետի գնահատականը,

4) փորձնական ծրագրի փաթեթի միջոցով սահմանված նպատակին հասնելու իրատեսության վերաբերյալ գնահատականը,

5) պահանջվող ֆինանսական միջոցների հասանելիության և երաշխավորվածության վերաբերյալ գնահատականը,

6) փորձնական ծրագիրն իրականացնելու համար Հեղինակի կողմից ներկայացված Կազմակերպության հնարավորությունների` ծրագրի կարիքներին համապատասխանության գնահատականը,

7) փորձնական ծրագրի ընթացքի և արդյունքների վերաբերյալ այն իրականացնող կազմակերպության կողմից ներկայացվելիք հաշվետվությունների և տեղեկությունների բովանդակության, ցուցանիշների և պարբերականության գնահատականը,

8) փորձաքննություն անցկացնող կազմակերպության հայեցողությամբ` այլ գնահատականներ,

9) փորձաքննության ամփոփիչ եզրակացությունը` փորձնական ծրագիրը տվյալ բովանդակությամբ ներդնելու կամ մերժելու առաջարկությամբ:

10. Փորձաքննության եզրակացության հիման վրա Նախարարությունը թույլատրում կամ մերժում է հայտը և փորձաքննության եզրակացությունն ու ներկայացված փաստաթղթերը տրամադրում Հեղինակին:

11. Փորձաքննության դրական եզրակացության և համապատասխան ֆինանսական միջոցների առկայության դեպքում Նախարարությունը թույլատրում է փորձնական ծրագրի իրականացումը, սահմանելով`

1) Կազմակերպությունը(ները), որտեղ իրականացվելու է փորձնական ծրագիրը,

2) փորձնական ծրագրի իրականացման նպատակները,

3) փորձնական ծրագրի բովանդակությունը,

4) փորձնական ծրագրի տևողությունը և իրականացման ժամկետը,

5) փորձնական ծրագրի իրականացման համար անհրաժեշտ ֆինանսական միջոցների տրամադրման կարգը և աղբյուրները,

6) փորձնական ծրագրի իրականացման ընթացքի և արդյունքների վերաբերյալ միջանկյալ և ամփոփիչ հաշվետվությունների և (կամ) տեղեկությունների ստացման սահմանված ցուցանիշները, պարբերականությունը և կարգը,

7) անհրաժեշտության դեպքում՝ փորձնական ծրագրի իրականացման այլ պահանջներ և պարզաբանումներ:

12. Հեղինակը կարող է լրամշակել մերժված փորձնական ծրագիրը և կրկին ներկայացնել Նախարարություն:

13. Փորձնական ծրագիրն իրականացնող Կազմակերպությունը` սույն կարգի 9-րդ կետի 7-րդ ենթակետի պահանջներին համապատասխան, Նախարարությանը հաշվետվություններ և տեղեկություններ է ներկայացնում ծրագրի իրականացման ընթացքի և արդյունքների վերաբերյալ, որոնց հիման վրա Նախարարությունը որոշում է ընդունում փորձնական ծրագրի շարունակման, արհեստագործական և միջին մասնագիտական կրթության համակարգում ներդրման կամ դադարեցման մասին:

Պաշտոնական հրապարակման օրը՝ 30 դեկտեմբերի 2022 թվական