Հոդված 1. «Ազգային ժողովի կանոնակարգ» 2017 թվականի մայիսի 31-ի ՀՕ-6-Ն օրենքի 149.1-ին հոդվածը շարադրել հետևյալ խմբագրությամբ.

1. Սահմանադրության 93-րդ հոդվածի 10-րդ կետի համաձայն ընդունված հրամանագրի գործողության ընթացքում Հանրապետության նախագահի պաշտոնը թափուր մնալու դեպքում` ոչ շուտ, քան 7, ոչ ուշ, քան 10 օր հետո Ազգային ժողովը խմբակցությունների առաջարկությամբ ընտրում է Հանրապետության նախագահ, որը պաշտոնավարում է մինչև համապետական ընտրությունների միջոցով ընտրված Հանրապետության նախագահի պաշտոնի ստանձնումը:

2. Խմբակցությունները Հանրապետության նախագահի թեկնածուին առաջադրում են Հանրապետության նախագահի պաշտոնը թափուր մնալու դեպքում` ոչ շուտ, քան 3 և ոչ ուշ, քան 6 օր հետո:

3. Հանրապետության նախագահի թեկնածուն առաջադրվում է խմբակցության գրավոր դիմումով, որտեղ նշվում են Հանրապետության նախագահի թեկնածուի, ինչպես նաև նրան ներկայացնելու իրավասություն ունեցող խմբակցության ներկայացուցչի անունը, ազգանունը: Թեկնածուների առաջադրման ժամկետը լրանալուց հետո՝ 24 ժամվա ընթացքում, Ազգային ժողովի նախագահը հանդես է գալիս Հանրապետության նախագահի թեկնածուների, ինչպես նաև ընտրության անցկացման օրվա և ժամի մասին հայտարարությամբ, իսկ Սահմանադրության պահանջներին չհամապատասխանելու դեպքում դիմումը և դրան կից ներկայացված փաստաթղթերը վերադարձնում է խմբակցության ներկայացուցչին՝ նշելով պատճառների մասին:

4. Հանրապետության նախագահ կարող է ընտրվել 35 տարին լրացած, 2023 թվականի հոկտեմբերի 1-ի դրությամբ վերջին 10 տարում միայն Արցախի Հանրապետության քաղաքացի հանդիսացած, 2023 թվականի հոկտեմբերի 1-ի դրությամբ վերջին 10 տարում Արցախի Հանրապետությունում մշտապես բնակված, ընտրական իրավունք ունեցող Արցախի Հանրապետության քաղաքացին:

5. Հանրապետության նախագահի թեկնածուն վերջին 10 տարում Արցախի Հանրապետությունում մշտապես բնակվող չի համարվում, եթե 2023 թվականի հոկտեմբերի 1-ին նախորդող 10 տարիներից յուրաքանչյուրում նա առնվազն 183 օր բացակայել է Արցախի Հանրապետությունից, բացառությամբ այն դեպքերի, երբ բացակայությունը պայմանավորված է եղել Արցախի Հանրապետության հանրային ծառայության մեջ գտնվող անձի՝ ծառայողական նպատակներով գործուղվելու կամ արտերկրում բարձրագույն ուսումնական հաստատություններում ուսումնառության հանգամանքներով:

6. Հանրապետության նախագահի թեկնածուն ի լրումն օրենսդրությամբ սահմանված փաստաթղթերի Ազգային ժողովի աշխատակազմ է ներկայացնում նաև սույն հոդվածի 4-րդ մասում սահմանված պահանջները հավաստող փաստաթղթեր:

7. Հանրապետության նախագահի ընտրության հարցը սույն հոդվածի 1-ին մասով սահմանված ժամկետների ապահովման դեպքում քննարկվում է թեկնածուների առաջադրման ժամկետը լրանալուց հետո Ազգային ժողովի առաջիկա հերթական նիստում, իսկ այդ ժամկետներում Ազգային ժողովի հերթական նիստ չանցկացվելու դեպքում՝ իրավունքի ուժով գումարվող Ազգային ժողովի հատուկ նիստում:

8. Հարցը քննարկվում է Կանոնակարգի 121-րդ հոդվածով սահմանված կարգով՝ հետևյալ տարբերությամբ.

1) թեկնածուներին ներկայացնելու համար հատկացվում է մինչև տասական րոպե.

2) թեկնածուների ելույթների համար հատկացվում է մինչև մեկ ժամ.

3) թեկնածուների եզրափակիչ ելույթների համար հատկացվում է մինչև տասնհինգական րոպե:

9. Հանրապետության նախագահ է ընտրվում այն թեկնածուն, որը գաղտնի քվեարկությամբ ստացել է պատգամավորների ընդհանուր թվի ձայների առնվազն երկու երրորդը:

10. Եթե Հանրապետության նախագահ չի ընտրվում, ապա քվեարկությունից հետո` հաջորդ օրն անցկացվում է ընտրության երկրորդ փուլ, որին մասնակցում են առաջին փուլում առավել ձայներ ստացած երկու թեկնածուները: Հարցը քննարկվում է Կանոնակարգի 121-րդ հոդվածով սահմանված կարգով՝ հետևյալ տարբերությամբ.

1) թեկնածուներին ելույթի համար հատկացվում է մինչև տասնհինգական րոպե.

2) մտքերի փոխանակության ընթացքում մինչև տասական րոպե տևողությամբ ելույթներով կարող են հանդես գալ միայն խմբակցությունների ներկայացուցիչները:

11. Երկրորդ փուլում Հանրապետության նախագահ է ընտրվում այն թեկնածուն, որը գաղտնի քվեարկությամբ ստացել է պատգամավորների ընդհանուր թվի ձայների մեծամասնությունը:

12. Եթե Սահմանադրության 168.1-ին հոդվածով սահմանված ժամկետում Հանրապետության նախագահ չի ընտրվում, ապա քվեարկությունից հետո՝ հնգօրյա ժամկետում, կարող են առաջադրվել Հանրապետության նախագահի նոր թեկնածուներ, իսկ յոթնօրյա ժամկետում անցկացվում է Հանրապետության նախագահի նոր ընտրություն:

13. Հանրապետության Նախագահն իր պաշտոնը ստանձնում է եռօրյա ժամկետում՝ Ազգային ժողովի նախագահի կողմից հայտարարված վայրում, օրը և ժամին գումարված Ազգային ժողովի հատուկ նիստում Սահմանադրությամբ սահմանված կարգով տրված երդմամբ, իսկ Ազգային ժողովի նախագահի կողմից նիստի գումարման վայր, օր և ժամ չհայտարարվելու դեպքում իրավունքի ուժով գումարվող Ազգային ժողովի հատուկ նիստում:»:

Հոդված 2. Սույն օրենքն ուժի մեջ է մտնում պաշտոնական հրապարակման օրվան հաջորդող տասներորդ օրը:

Պաշտոնական հրապարակման օրը՝ 18 ապրիլի 2025 թվական: