ԱՐՑԱԽԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆ
ՓՈՓՈԽՈՒԹՅՈՒՆ
Ընդունվել է Ազգային ժողովի կողմից
2025 թվականի ապրիլի 15-ին
Հոդված 1. Արցախի Հանրապետության Սահմանադրության 168.1-ին հոդվածը շարադրել հետևյալ խմբագրությամբ.
|
«Հոդված 168.1 |
Հանրապետության նախագահի ընտրությունն Ազգային ժողովի կողմից՝ Սահմանադրության 93-րդ հոդվածի 10-րդ կետի համաձայն ընդունված հրամանագրի գործողության ընթացքում Հանրապետության նախագահի պաշտոնը թափուր մնալու դեպքում |
1. Սահմանադրության 93-րդ հոդվածի 10-րդ կետի համաձայն ընդունված հրամանագրի գործողության ընթացքում Հանրապետության նախագահի պաշտոնը թափուր մնալու դեպքում` ոչ շուտ, քան 7, ոչ ուշ, քան 10 օր հետո Ազգային ժողովը խմբակցությունների առաջարկությամբ ընտրում է Հանրապետության նախագահ, որը պաշտոնավարում է մինչև համապետական ընտրությունների միջոցով ընտրված Հանրապետության նախագահի պաշտոնի ստանձնումը:
2. Սույն հոդվածի 1-ին մասի համաձայն ընտրված Հանրապետության նախագահի պաշտոնը թափուր մնալու դեպքում կիրառվում են սույն հոդվածի իրավակարգավորումները:
3. Հանրապետության նախագահ է ընտրվում այն թեկնածուն, որը ստացել է պատգամավորների ընդհանուր թվի ձայների առնվազն երկու երրորդը: Եթե Հանրապետության նախագահ չի ընտրվում, ապա քվեարկությունից հետո՝ հաջորդ օրն անցկացվում է ընտրության երկրորդ փուլ, որին մասնակցում են առաջին փուլում առավել ձայներ ստացած երկու թեկնածուները: Երկրորդ փուլում Հանրապետության նախագահ է ընտրվում այն թեկնածուն, որն ստացել է պատգամավորների ընդհանուր թվի ձայների մեծամասնությունը:
4. Եթե Հանրապետության նախագահ չի ընտրվում, ապա յոթնօրյա ժամկետում անցկացվում է Հանրապետության նախագահի նոր ընտրություն:
5. Հանրապետության Նախագահն իր պաշտոնը ստանձնում է Ազգային ժողովի հատուկ նիստում Սահմանադրությամբ սահմանված կարգով տրված երդմամբ:
6. Սույն հոդվածով սահմանված կարգով ընտրված Հանրապետության նախագահին Ազգային ժողովը կարող է Սահմանադրությամբ սահմանված կարգով անվստահություն հայտնել՝ պատգամավորների ընդհանուր թվի ձայների առնվազն երկու երրորդով՝ անվանական քվեարկությամբ:
7. Ազգային ժողովի կողմից Հանրապետության նախագահի ընտրության կարգի մանրամասները սահմանվում են օրենքով:»:
Հոդված 2. Սահմանադրության սույն փոփոխությունն ուժի մեջ է մտնում պաշտոնական հրապարակմանը հաջորդող օրվանից:
Պաշտոնական հրապարակման օրը՝ 18 ապրիլի 2025 թվական: