ք.Ստեփանակերտ

Ելնելով ԼՂՀ բռնատեղահանված քաղաքացիների հետ նախկինում կնքված աշխատանքային պայմանագրերի լուծման գործի կարգավորման անհրաժեշտությունից, ԼՂՀ Պաշտպանության պետական կոմիտեն որոշում է.

1. Սահմանել, որ.

ա/ 1991-1992 թվականներին հակառակորդի կողմից ԼՂՀ բնակավայրերի ժամանակավոր օկուպացման հետևանքով այդ բնակավայրերի հիմնարկ-ձեռնարկությունների, կազմակերպությունների, կոլտնտեսությունների ոչնչացման կամ զավթման պատճառով նրանցում աշխատողների աշխատանքից ազատման փաստը հավասարեցվում է ԼՂՀ աշխատանքային օրենսգրքի 36 հոդվածի 1-ին մասով նախատեսված հիմնարկ-ձեռնարկության, կազմակերպության, կոլտնտեսության վերացման պատճառով աշխատանքից ազատմանը և ազատման հրամաններում գրառվում է հետևյալ ձևակերպումը. ,,Աշխատանքից ազատված է հակառակորդի կողմից ձեռնարկության ոչնչացման պատճառով,,:

բ/ ԼՂՀ բնակավայրերից բռնատեղահանված քաղաքացիների աշխատանքային գրքույկում սույն որոշման 1-ին կետի ա/ ենթակետին համապատասխան գրառումները կատարվում են համապատասխան հիմնարկ-ձեռնարկության, կազմակերպության, կոլտնտեսության ադմինիստրացիայի կամ դրա անհնարինության դեպքում գործադիր իշխանության համապատասխան տեղական մարմնի կողմից:

գ/ Բռնատեղահանված քաղաքացիների համար աշխատանքի տեղավորման ժամանակաշրջանում, բայց ոչ ավելի, քան համապատասխան հիմնարկ-ձեռնարկության կազմակերպության, կոլտնտեսության վերացման օրից հետո մեկ տարվա համար պահպանվում է անընդմեջ աշխատանքային ստաժը:

2. ԼՂՀ Մարտակերտի, Ասկերանի և Շուշիի շրջաններում լիազոր ներկայացուցիչներին, ժողովրդական պատգամավորների Հադրութի շրջանային խորհրդի նախագահին` հաստատել ԼՂՀ շրջանների բռնատեղահանված բնակավայրերի ցանկը և նրանում տեղաբաշխված այն հիմնարկ-ձեռնարկությունների, կազմակերպությունների ու կոլտնտեսությունների վերացման ստույգ ժամկետները, որոնց վրա տարածվում է սույն որոշումը:

3. ԼՂՀ նախարարություններին, պետական կոմիտեներին, պետական վարչություններին, գերատեսչություններին, գործադիր իշխանության տեղական մարմիններին, հիմնարկ-ձեռնարկությունների, կազմակերպությունների, կոլտնտեսությունների ղեկավարներին` անհրաժեշտ միջոցներ ձեռնարկել ԼՂՀ բռնատեղահանված քաղաքացիների նախկին աշխատանքային վայրից ազատման ձևակերպման, նրանց աշխատանքային գրքույկներում համապատասխան գրառումները ժամանակին կատարելու համար: