ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ПРАВИТЕЛЬСТВО НАГОРНО-КАРАБАХСКОЙ РЕСПУБЛИКИ

Ո Ր Ո Շ ՈՒ Մ

П О С Т А Н О В Л Е Н И Е

ք.Ստեփանակերտ

г.Степанакерт

Լեռնային Ղարաբաղի Հանրապետությունում բժշկական և դեղագործական գործունեության բարելավման և կանոնակարգման նպատակով Լեռնային Ղարաբաղի Հանրապետության կառավարությունը որոշում է.

1. Սահմանել, որ Լեռնային Ղարաբաղի Հանրապետությունում բժշկական և դեղագործական գործունեությունը ենթակա է պետական մասնագիտական լիցենզավորման:

Պետական մասնագիտական լիցենզավորումը բժշկական և դեղագործական գործունեության որոշակի տեսակներով զբաղվելու իրավունքի հաստատումն է, որն ամրագրվում է տրված լիցենզիայով:

2. Պետական մասնագիտական լիցենզավորման ենթակա են բժշկական և դեղագործական գործունեություն իրականացնող ձեռնարկությունները, հիմնարկները և կազմակերպությունները (անկախ սեփականության ձևից, կազմակերպական-իրավական տեսակից, գերատեսչական ենթակայությունից), ինչպես նաև ֆիզիկական անձինք` բժիշկները, պրովիզորները, միջին բուժաշխատողները և դեղագործները:

3. Հաստատել Լեռնային Ղարաբաղի Հանրապետության բժշկական և դեղագործական գործունեության պետական մասնագիտական լիցենզավորման կարգը (կցվում է)

4. Լեռնային Ղարաբաղի Հանրապետությունում բժշկական և դեղագործական գործունեության պետական մասնագիտական լիցենզավորումն իրականացնում է Լեռնային Ղարաբաղի Հանրապետության առողջապահության նախարարությունը` ԼՂՀ կառավարության կողմից սահմանված կարգով:

Լեռնային Ղարաբաղի Հանրապետության առողջապահության նախարարության համակարգում ստեղծված լիցենզավորման հանձնաժողովի որոշումները հաստատում է Լեռնային Ղարաբաղի Հանրապետության առողջապահության նախարարը:

Լիցենզավորման ենթակա բժշկական և դեղագործական գործունեության տեսակները և ծավալները, լիցենզավորման չափանիշները, կարգն ու պայմանները սահմանում է Լեռնային Ղարաբաղի Հանրապետության առողջապահության նախարարությունը (կցվում է):

5. Սահմանել, որ լիցենզիան տրվում է մինչև 5-տարի ժամկետով` կախված մասնագիտական ստաժից:

Լիցենզիայի գործունեության ժամկետը լրանալու, լիցենզիայի գործունեությունը կասեցնելու կամ անվավեր ճանաչելու դեպքերում սահմանված կարգով տրվում է նոր լիցենզիա:

6. Իրավաբանական և ֆիզիկական անձի կողմից իրականացվող լիցենզավորվող գործունեության տեսակների քանակը չի սահմանափակվում:

7. Իրավաբանական և ֆիզիկական անձինք իրավունք ունեն իրականացնելու բժշկական և դեղագործական գործունեություն միայն տրված լիցենզիայով սահմանված շրջանակներում:

8. Լիցենզիայի տրման համար Լեռնային Ղարաբաղի Հանրապետության օրենսդրությամբ սահմանված կարգով ու չափով գանձվում է վճար և մուծվում պետական բյուջե:

9. Լիցենզիայի տրման մերժումը, ինչպես նաև դրա գործունեության կասեցումը կամ անվավեր ճանաչումը կարող է գանգատարկվել դատական կարգով:

10. Լիցենզիայի տրման անհիմն մերժման կամ դրա տրման սահմանված ժամկետի խախտման հետևանքով իրավաբանական և ֆիզիկական անձանց պատճառված վնասը ենթակա է հատուցման Լեռնային Ղարաբաղի Հանրապետության քաղաքացիական օրենսդրությամբ սահմանված կարգով:

11. Իրավաբանական և ֆիզիկական անձանց կողմից առանց համապատասխան լիցենզիայի կամ լիցենզիայով չսահմանված բժշկական և դեղագործական գործունեությամբ զբաղվելն առաջացնում է պատասխանատվություն` Լեռնային Ղարաբաղի Հանրապետության օրենսդրությամբ սահմանված կարգով:

12. Մինչև սույն որոշման կիրարկումը սահմանված կարգով բժշկական ու դեղագործական գործունեություն իրականացնող իրավաբանական և ֆիզիկական անձինք ենթակա են լիցենզավորման մինչև 1999թ. հունվարի 1-ը:

13. Լեռնային Ղարաբաղի Հանրապետության առողջապահության նախարարությանը`

ա) եռամսյա ժամկետում ընդունել սույն որոշման 3-րդ կետի կիրարկումն ապահովող համապատասխան ակտեր.

բ) Լեռնային Ղարաբաղի Հանրապետության արդարադատության վարչության հետ համատեղ եռամսյա ժամկետում Լեռնային Ղարաբաղի Հանրապետության կառավարություն ներկայացնել սույն որոշման 10-րդ կետից բխող Լեռնային Ղարաբաղի Հանրապետության գործող օրենսդրության մեջ համապատասխան փոփոխություններ և լրացումներ կատարելու մասին առաջարկություն:

14. Սույն որոշումն ուժի մեջ է մտնում ընդունման պահից:

ԿԱՐԳ

1. Սույնով սահմանվում է Լեռնային Ղարաբաղի Հանրապետությունում բժշկական և դեղագործական գործունեության պետական մասնագիտական լիցենզավորման կարգը:

2. Սույն կարգը պարտադիր է Լեռնային Ղարաբաղի Հանրապետության տարածքում բժշկական և դեղագործական գործունեություն իրականացնող բոլոր ձեռնարկությունների, հիմնարկների և կազմակերպությունների (անկախ սեփականության ձևից, կազմակերպական-իրավական տեսակից, գերատեսչական ենթակայությունից) և ֆիզիկական անձանց` բժիշկների, պրովիզորների, միջին բուժաշխատողների և դեղագործների համար:

3. Բժիշկները, պրովիզորները, միջին բուժաշխատողները և դեղագործները (այսուհետ և լիցենզավորվող անձինք), ովքեր ունեն համապատասխան կրթություն, Լեռնային Ղարաբաղի Հանրապետության առողջապահության նախարարության կողմից սահմանված կարգով մասնագիտական գիտելիքների և ունակությունների գնահատման հիման վրա ստանում են մասնագիտական գործունեության լիցենզիա` անկախ նրանց աշխատանքի վայրից:

4. Լիցենզավորվող անձինք, ովքեր իրականացնում են բժշկական և դեղագործական գործունեություն, որպես անհատ ձեռներեցներ, տվյալ մասնագիտական գործունեության համար Լեռնային Ղարաբաղի Հանրապետության առողջապահության նախարարության կողմից սահմանված պայմանների ապահովման դեպքում ստանում են նաև անհատ ձեռներեցի բժշկական կամ դեղագործական գործունեության լիցենզիա:

5. Ձեռնարկությունները, հիմնարկները և կազմակերպությունները (այսուհետ և լիցենզավորվող հիմնարկներ), բժշկական և դեղագործական մասնագիտական որոշակի գործունեության համար անհրաժեշտ սանիտարա-տեխնիկական պայմանների և սարքավորումների ու բուժ. գործիքներով ապահովության առկայության դեպքում ստանում են լիցենզիա:

6. Լիցենզավորվող անձանց, հիմնարկների և անհատ ձեռներեցների (այսուհետ և լիցենզավորվող սուբյեկտներ) պետական մասնագիտական լիցենզավորումն իրականացնում է Լեռնային Ղարաբաղի Հանրապետության առողջապահության նախարարությունը` լիցենզավորող հանձնաժողովի (ԼՀ) միջոցով:

Լիցենզավորման հանձնաժողովի կազմը և գործունեության կարգը հաստատում է Լեռնային Ղարաբաղի Հանրապետության առողջապահության նախարարությունը:

7. Լիցենզավորող հանձնաժողովը իրականացնում է լիցենզավորման աշխատանքների համակարգումը, համապատասխան փաստաթղթերի ձևակերպումը և լիցենզավորվող անձանց մասնագիտական գիտելիքների ստուգումը համակարգչային տեստավորման ձևով:

8. Լիցենզիա տալը կարող է մերժվել սույն կարգին, ինչպես նաև Լեռնային Ղարաբաղի Հանրապետության առողջապահության նախարարության կողմից սահմանված լիցենզավորման պահանջներին և լիցենզավորման չափանիշներին լիցենզավորվող սուբյեկտի անհամապատասխանության դեպքում:

Լիցենզիա տալու մերժման որոշումը կարող է գանգատարկվել դատական կարգով:

9. Լիցենզավորման գործընթացն սկսվում է լիցենզավորվող սուբյեկտի կողմից Լեռնային Ղարաբաղի Հանրապետության առողջապահության նախարարության կողմից սահմանված լիցենզավորման պահանջվող փաստաթղթերի (համաձայն սույն կարգի NN1,2,3 հավելվածների) ԼՀ-ին ներկայացմամբ:

Փաստաթղթերի ընդունումից հետո լիցենզավորվող անձինք անցնում են մասնագիտական գիտելիքների ստուգում` համակարգչային տեստավորման ձևով:

ԼՀ-ին կողմից ներկայացրած տեստավորման արդյունքներով և մասնագիտական եզրակացությունով որոշվում է տալ լիցենզիա կամ մերժել լիցենզիա տալը:

ԼՀ-ի որոշումներն իրավաբանական ուժ են ստանում Լեռնային Ղարաբաղի Հանրապետության առողջապահության նախարարի կողմից հաստատվելուց հետո:

10. Լիցենզավորման վերաբերյալ որոշումն ընդունվում է ԼՂ համապատասխան փաստաթղթերը ներկայացնելուց հետո մեկ ամսյա ժամկետում, իսկ մասնագիտական ուսումնասիրության անհրաժեշտության դեպքում` մինչև 2 ամսյա ժամկետում:

11. Այլ պետություններում բժշկական կամ դեղագործական կրթություն ստացած և Լեռնային Ղարաբաղի Հանրապետությունում մասնագիտական գործունեություն իրականացնող անձինք ենթակա են լիցենզավորման սույն կարգի և Լեռնային Ղարաբաղի Հանրապետության միջազգային պայմանագրերի համաձայն:

Միջպետական, միջկառավարական և միջտեսչական պայմանագրերով իրականացվող մասնագիտական ծրագրերի շրջանակներում Լեռնային Ղարաբաղի Հանրապետություն հրավիրված օտարերկրյա մասնագետները նշված ծրագրերով բժշկական և դեղագործական գործունեություն իրականացնելու համար ենթակա չեն լիցենզավորման:

12. Լիցենզավորված սուբյեկտների մասնագիտական գործունեության համապատասխանությունը լիցենզիայի պահանջներին վերահսկում է Լեռնային Ղարաբաղի Հանրապետության առողջապահության նախարարությունը` Լեռնային Ղարաբաղի Հանրապետության օրենսդրությամբ սահմանված կարգով:

13. Լիցենզիայի գործունեությունը կարող է կասեցվել լիցենզավորված սուբյեկտի կողմից լիցենզիայի պահանջները խախտելու դեպքում:

Լիցենզիայի գործունեության կասեցման որոշումն ընդունվում է ԼՀ` սահմանելով ժամկետ թույլ տրված խախտումները վերացնելու համար:

Սահմանված ժամկետում խախտումները չվերացնելու դեպքում լիցենզիան ճանաչվում է անվավեր` սույն կարգի համաձայն:

14. Լիցենզիան անվավեր է ճանաչվում լիցենզիայի պահանջներին և մասնագիտական որակավորման չափանիշներին լիցենզավորվող սուբյեկտի անհամապատասխանության դեպքում:

Լիցենզիան անվավեր ճանաչելու միջնորդությամբ կարող են հանդես գալ Լեռնային Ղարաբաղի Հանրապետության առողջապահության նախարարությունը, պետական կառավարման տարածքային մարմինները, բժշկական և դեղագործական ձեռնարկությունները, հիմնարկները և կազմակերպությունները, ինչպես նաև Լեռնային Ղարաբաղի Հանրապետության օրենսդրությամբ սահմանված կարգով` այլ մարմիններ:

Լիցենզիան անվավեր ճանաչելու որոշումը սահմանված կարգով մեկամսյա ժամկետում կայացնում է ԼՀ-ը, որը հաստատում է Լեռնային Ղարաբաղի Հանրապետության առողջապահության նախարարը:

Լիցենզիան անվավեր ճանաչելու որոշումը կարող է գանգատարկվել դատական կարգով:

15. Լիցենզավորվող սուբյեկտն իրավունք ունի`

ստանալ անհրաժեշտ տեղեկություններ և փաստաթղթեր լիցենզավորման կարգի և ժամկետների մասին.

անցնել մասնագիտական գիտելիքների կրկնական ստուգում` Լեռնային Ղարաբաղի Հանրապետության առողջապահության նախարարության սահմանած կարգով և ժամկետներում.

մինչև գործող լիցենզիայի ժամկետի լրանալը դիմել լիցենզավորման` թույլատրված գործունեության տեսակների և ծավալների ընդլայնման նպատակով:

16. Լիցենզավորվող սուբյեկտը պարտավոր է.

ներկայացնել լիցենզավորման համար պահանջվող բոլոր փաստաթղթերը.

հնարավորություն ընձեռել տեղում մասնագիտական ուսումնասիրություն անցկացնելու համար.

լիցենզիա ստանալու համար մուծել Լեռնային Ղարաբաղի Հանրապետության օրենսդրությամբ սահմանված վճարը:

17. Մինչև սույն կարգի հաստատումը Լեռնային Ղարաբաղի Հանրապետության առողջապահության նախարարության կողմից տրված լիցենզիաները պահպանում են գործունեության ուժը` նրանցում սահմանված ժամկետներում: Այդ ժամկետը լրանալուց հետո լիցենզավորված սուբյեկտը ենթակա է լիցենզավորման` սույն կարգի համաձայն:

18. Նախկինում սահմնաված կարգով բժշկական և դեղագործական գործունեություն իրականացնող այն անձինք, ովքեր ունեն մասնագիտական որակավորման կարգ, համարվում են լիցենզավորված տվյալ մասնագիտությամբ` մինչև որակավորման կարգի գործունեության ժամկետի ավարտը և որակավորման կարգի շնորհման մասին հրամանի հիմնա վրա իրականացնում են մասնագիտական գործունեություն: Այդ ժամկետը լրանալուց հետո նշված անձինք ենթակա են լիցենզավորման` սույն կարգի համաձայն:

Այն անձանց համար, որոնց մասնագիտական որակավորման կարգի սահմանված ժամկետը լրանում է մինչև 1999թ. ապրիլի 1-ը, վերոհիշյալ ժամկետը երկարացվում է մեկ տարով:

19. Նախկինում սահմանված կարգով բժշկական և դեղագործական գործունեություն իրականացնող այն բժիշկները և պրովիզորները, ովքեր չունեն մասնագիտական որակավորման կարգ, լիցենզավորվում են սույն կարգի համաձայն և նրանց տրվում է լիցենզիա` հետևյալ ժամկետով.

մինչև 5 տարի մասնագիտական աշխատանքի ստաժ ունեցող անձանց` 3 տարի ժամկետով,

5-ից մինչև 10 տարի մասնագիտական աշխատանքի ստաժ ունեցող անձանց` 4 տարի ժամկետով,

10 տարուց ավելի մասնագիտական աշխատանքի ստաժ ունեցող անձանց` 5 տարի ժամկետով:

20. Նախկինում սահմանված կարգով պետական առողջապահական համակարգում մասնագիտական գործունեություն իրականացնող այն միջին բուժաշխատողները, ովքեր չունեն մասնագիտական որակավորման կարգ, համարվում են լիցենզավորված ըստ իրենց ստացած մասնագիտության, հետևյալ ժամկետով.

մինչև 5 տարի մասնագիտական աշխատանքի ստաժ ունեցող անձինք` 2 տարի ժամկետով:

5-ից մինչև 7 տարի մասնագիտական աշխատանքի ստաժ ունեցող անձինք` 3 տարի ժամկետով:

7-ից մինչև 10 տարի մասնագիտական աշխատանքի ստաժ ունեցող անձինք` 4 տարի ժամկետով:

10 տարուց ավելի մասնագիտական աշխատանքի ստաժ ունեցող անձնաց` 5 տարի ժամկետով:

Նշված ժամկետները լրանալուց հետո վերոհիշյալ անձինք ենթակա են լիցենզավորման` սույն կարգի համաձայն:

21. Այն մասնագիտությունների գծով, որոնց համար դեռևս չկան համակարգչային տեստավորման ծրագրերը, մինչև վերջիններիս ստեղծումը մասնագիտական գիտելիքների ստուգումն իրականացնում է ՊԼԿ-ի կողմից սահմանված քննության ձևով:

22. Մինչև մասնագիտական գործունեության նոր որակավորման բնութագրերի և չափանիշների ստեղծումը, լիցենզավորման համար որպես գնահատման չափանիշներ ընդունվում են գործող համապատասխան նորմատիվային ակտերում սահմանված պահանջները:

ՑԱՆԿ

Առաջին անգամ լիցենզավորվող անձը ներկայացնում է.

ՑԱՆԿ

ՑԱՆԿ