ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

«Արցախերկսևմետ» ՊՓԲԸ ստեղծելու և սև և գունավոր մետաղների թափոնների արտահանումը կանոնակարգելու մասին

Համաձայն «Բաժնետիրական ընկերության մասին» ԼՂՀ օրենքի 8-րդ հոդվածի և Լեռնային Ղարաբաղի Հանրապետությունից սև և գունավոր մետաղների թափոնների արտահանումը կանոնակարգելու նպատակով, Լեռնային Ղարաբաղի Հանրապետության կառավարությունը որոշում է.

1. Ստեղծել «Արցախերկսևմետ» պետական փակ բաժնետիրական ընկերություն:

2. «Արցախերկսևմետ» ՊՓԲԸ-ի «Բաժնետիրական ընկերության մասին» ԼՂՀ օրենքի 8-րդ հոդվածի 5-րդ կետով սահմանված լիազորությունները վերապահել ԼՂՀ տնտեսական և կառուցվածքային բարեփոխումների նախարարին:

3. ԼՂՀ տնտեսական և կառուցվածքային բարեփոխումների նախարարին` մեկամսյա ժամկետում հաստատել «Արցախերկսևմետ» պետական փակ բաժնետիրական ընկերության կանոնադրությունը և սահմանված կարգով ապահովել ընկերության պետական գրանցումը:

4. Սահմանել, որ ԼՂՀ-ում սև և գունավոր մետաղների թափոնների արտահանման պետական մենաշնորհ է հանդիսանում «Արցախերկսևմետ» պետական փակ բաժնետիրական ընկերությունը:

5. ԼՂՀ պաշտպանության նախարարությանը` նախկին «Ստեփանակերտ» երկաթգծի կայարանի տարածքում տեղակայված սև և գունավոր մետաղների թափոնների հավաքման համար հատկացված շենքերը իրենց տարածքներով անվարձահատույց հանձնել «Արցախերկսևմետ» պետական փակ բաժնետիրական ընկերությանը:

6. ԼՂՀ պաշտպանության նախարարությանը և ԼՂՀ տնտեսական և կառուցվածքային բարեփոխումների նախարարին` սահմանված կարգով ապահովել շենքերի հանձնման-ընդունման աշխատանքները:

7. ԼՂՀ հարկային պետական վարչությանը` աջակցել «Արցախերկսևմետ» պետական փակ բաժնետիրական ընկերությանը` Հայաստանի Հանրապետության մաքսային տարածքից դուրս սև և գունավոր մետաղներ արտահանելու հետ կապված փաստաթղթերի ձևակերպմանը:

8. ԼՂՀ ներքին գործերի նախարարությանը` ուժեղացնել սև և գունավոր մետաղների արտահանման նկատմամբ վերահսկողությունը:

9. ԼՂՀ կառավարության 1998թ. դեկտեմբերի 29-ի «Լեռնային Ղարաբաղի Հանրապետությունում տնտեսական գործունեության առանձին տեսակներով զբաղվելու կարգը հաստատելու մասին» թիվ 294 որոշման թիվ 1 ցանկում ավելացնել նոր կետ` հետևյալ խմբագրությամբ`

«9. Սև և գունավոր մետաղների թափոնների արտահանում»:

(9-րդ կետի գործողությունը դադարեցվել է 25.06.2002 N 128)

10. Ուժը կորցրած ճանաչել ԼՂՀ կառավարության 1995 թ. հունվարի 7-ի «Սև և գունավոր մետաղների թափոնների հանձնման մասին» թիվ 18 կարգադրությունը: