ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

«Իրավական ակտերի մասին» Լեռնային Ղարաբաղի Հանրապետության օրենքի 71-րդ հոդվածի 5-րդ մասին համապատասխան` Լեռնային Ղարաբաղի Հանրապետության կառավարությունը որոշում է.

1. Լեռնային Ղարաբաղի Հանրապետության կառավարության 2010 թվականի մարտի 31-ի «Լեռնային Ղարաբաղի Հանրապետության պետական բարձրագույն ուսումնական հաստատությունների և Հայաստանի Հանրապետության պետական բուհերում Լեռնային Ղարաբաղի Հանրապետությանը հատկացված տեղերի ընդունելության կարգը հաստատելու մասին» թիվ 151-Ն որոշմամբ հաստատված հավելվածում լրացնել հետևյալ բովանդակությամբ` նոր 71.1–րդ կետ.

«71.1. 2010-2011 ուսումնական տարվա ընդունելության միասնական քննությունների դրական շեմ համարել` Արցախի պետական համալսարանի դիմորդների համար նաև 6 և նրանից ավել` մինչև 7.5 միավորները, իսկ Հայաստանի պետական ագրարային համալսարանի Ստեփանակերտի մասնաճյուղի դիմորդների համար` նաև 5 և նրանից ավել` մինչև 7.5 միավորները, և նշված միավորներով դիմորդները, ըստ Լեռնային Ղարաբաղի Հանրապետության կրթության և գիտության նախարարության գնահատման և թեստավորման կենտրոնի կողմից տրված վկայագրերի, մյուս մրցութային առարկաներից դրական միավորներ ունենալու դեպքում կարող են ընդունվել վերոնշյալ բուհերի մասնագիտությունների թափուր տեղերում»:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից: