ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

 ք.Ստեփանակերտ

«Գանձապետական համակարգի մասին» Լեռնային Ղարաբաղի Հանրապետության օրենքի կիրարկումն ապահովող առաջնահերթ միջոցառումների շրջանակներում և համաձայն «Լեռնային Ղարաբաղի Հանրապետության բյուջետային համակարգի մասին» Լեռնային Ղարաբաղի Հանրապետության օրենքի 15-րդ հոդվածի 4-րդ կետի` Լեռնային Ղարաբաղի Հանրապետության կառավարությունը որոշում է.

1. Հաստատել Լեռնային Ղարաբաղի Հանրապետության պետական և համայնքների բյուջեների կատարման կարգը (կցվում է):

2. Սույն որոշումն ուժի մեջ է մտնում 2003 թվականի հունվարի 1-ից:

3. Ուժը կորցրած ճանաչել Լեռնային Ղարաբաղի Հանրապետության 2001 թվականի ապրիլի 10-ի «Լեռնային Ղարաբաղի Հանրապետության բյուջետային հիմնարկների կողմից կանխիկ ձևով կատարվող ծախսերի մասին» թիվ 91 որոշումը:

1. Սույն կարգով սահմանվում է Լեռնային Ղարաբաղի Հանրապետության պետական համայնքների բյուջեների կատարման, ներառյալ պետության և համայնքների բոլոր դրամական միջոցների (այսուհետ` բյուջեներ) շրջանառման գործընթացը և կարգավորում են այդ գործընթացի հետ կապված հիմնական հարաբերությունները:

2. Բյուջեների կատարումն իրականացվում է գանձապետական համակարգի միջոցով` միասնական դրամարկղի սկզբունքի հիման վրա, որը նախատեսվում է բյուջեների դրամական միջոցների շրջանառումը Լեռնային Ղարաբաղի Հանրապետության ֆինանսների և էկոնոմիկայի նախարարության միասնական գանձապետական հաշվով:

Միասնական գանձապետական հաշիվը գտնվում է «Արցախբանկ» ՓԲԸ-ում և արտահայտված է Հայաստանի Հանրապետության արժույթով: Միասնական գանձապետական հաշվին են հաշվեգրվում Լեռնային Ղարաբաղի Հանրապետությանը և համայնքներին ամրագրված` Հայաստանի Հանրապետության արժույթով արտահայտված բոլոր դրամական միջոցները:

Լեռնային Ղարաբաղի Հանրապետության ֆինանսների և էկոնոմիկայի նախարարության անվամբ «Արցախբանկ» ՓԲԸ-ում բացվում են արտարժույթով արտահայտված միասնական գանձապետական արտարժութային հաշիվներ: Լեռնային Ղարաբաղի Հանրապետության ֆինանսների և էկոնոմիկայի նախարարությունը միասնական գանձապետական արտարժութային հաշիվներ բացում է օրենքով, միջազգային պայմանագրերով և (կամ) Լեռնային Ղարաբաղի Հանրապետության կառավարության որոշմամբ նախատեսված դեպքերում:

Օրենքի կամ Լեռնային Ղարաբաղի Հանրապետության կառավարության որոշման հիման վրա հիմնարկների անվամբ բանկային հաշիվներ (այսուհետև` արտաբյուջետային հաշիվ) բացվում են միայն հիմնարկին սպասարկող Լեռնային Ղարաբաղի Հանրապետության ֆինանսների և էկոնոմիկայի նախարարության տեղական գանձապետական բաժանմունքում (այսուհետև` ՏԳԲ):

3. Լեռնային Ղարաբաղի Հանրապետության պետական բյուջեի կատարման համար պատասխանատու է Լեռնային Ղարաբաղի Հանրապետության կառավարությունը, իսկ համայնքի բյուջեի համար` համայնքի ղեկավարը:

4. Լեռնային Ղարաբաղի Հանրապետության ֆինանսների և էկոնոմիկայի նախարարությունն իրականացնում է բյուջեի կատարման գործընթացի կազմակերպումը, որի նպատակով ապահովում է`

ա) բյուջեների կատարման գործընթացի մեթոդական ապահովումը.

բ) Լեռնային Ղարաբաղի Հանրապետության պետական բյուջեի կատարման համամասնությունների կազմման ու հաստատման ներկայացման կազմակերպումը.

գ) բյուջեների դրամական միջոցների կառավարման և ծախսերի ֆինանսավորման կազմակերպումը.

դ) պետության և համայնքների տնօրինության տակ գտնվող դրամական միջոցների մուտքագրման և դրանց հաշվին ծախսերի` գանձապետական միասնական հաշվով կատարման կազմակերպումը.

ե) բյուջեների կատարմանը վերաբերող ֆինանսական հաշվետվություններ կազմելու, ներկայացնելու և ամփոփելու հետ կապված հարաբերությունների նորմատիվ կարգավորման ու բյուջետային հաշվապահական հաշվառման նորմերի սահմանման ապահովումը.

զ) բյուջեներից կատարվող վճարումների նկատմամբ նախնական հսկողության իրականացումը` գանձապետական համակարգի միջոցով.

է) բյուջեների կատարման մասին ստացված ֆինանսական հաշվետվությունների հիման վրա դրանցում արտացոլված տեղեկությունների արժանահավատությունը գնահատելը, ամփոփելը և ներկայացնելը.

ը) գանձապետական հաշիվների վարման կարգի հաստատումը.

թ) արտաքին պետական պարտքի սպասարկումը.

ժ) ներքին պետական պարտքի ընթացիկ կառավարումը.

ժա) օտարերկրյա պետությունների և միջազգային կազմակերպությունների կողմից Լեռնային Ղարաբաղի Հանրապետության տրամադրված ապրանքային վարկերի ու դրամաշնորհների (գրանտների) դրամայնացման հաշվառումը և դրա հետ կապված գործառույթների համակարգումն ու հսկումը (մոնիտորինգ).

ժբ) Լեռնային Ղարաբաղի Հանրապետության նկատմամբ առաջացած Լեռնային Ղարաբաղի Հանրապետության կառավարության սահմանած պարտավորությունների սպասարկումը.

ժգ) Լեռնային Ղարաբաղի Հանրապետության օրենսդրությունից և սույն կարգից բխող այլ գործառույթների իրականացումը:

5. Բյուջետային հատկացումների գլխավոր կարգադրիչ (այսուհետև` ԲԳԿ) են համարվում տվյալ տարվա բյուջեով բյուջետային ծախսերի գերատեսչական դասակարգմամբ նախատեսված պետական և տեղական ինքնակառավարման մարմինները:

ԲԳԿ-ները`

ա) սահմանված կարգով հաստատում և փոփոխում են իրենց և իրենց ենթակա հիմնարկների ֆինանսական գործունեության նախահաշիվները (այսուհետև` նախահաշիվ).

բ) պատասխանատու են իրենց և ենթակա հիմնարկների ֆինանսական, տնտեսական ու հաշվապահական գործունեության համար.

գ) իրականացնում են Լեռնային Ղարաբաղի Հանրապետության օրենսդրությամբ վերապահված այլ լիազորություններ և պարտականություններ:

6. ԲԳԿ-ի` սույն կարգով նախատեսված պարտականությունների կատարման համար պատասխանատու է այդ մարմնի ղեկավարը: ԲԳԿ-ի` սույն կարգով նախատեսված լիազորությունների իրականացումը կազմակերպում է ԲԳԿ-ի գլխավոր ֆինանսիստը:

7. Բյուջետային հատկացումների ստորադաս կարգադրիչ (այսուհետև` ԲՍԿ) են հանդիսանում այն հիմնարկները, որոնք ունեն Լեռնային Ղարաբաղի Հանրապետության օրենսդրությանը համապատասխան հաստատված նախահաշիվ:

8. ԲՍԿ-ի ղեկավարի կողմից Լեռնային Ղարաբաղի Հանրապետության օրենսդրությամբ սահմանված կարգով նշանակվում է գլխավոր հաշվապահ: ԲԳԿ չհանդիսացող ԲՍԿ-ի` Լեռնային Ղարաբաղի Հանրապետության օրենսդրությամբ գլխավոր ֆինանսիստին վերպահված լիազորությունների և պարտականությունների կատարումն ապահովում է գլխավոր հաշվապահը:

9. ԲԳԿ-ի ֆինանսական և հաշվապահական գործունեությանը վերաբերող փաստաթղթերը ստորագրում են`

ա) ԲԳԿ-ի ղեկավարը կամ ղեկավարի հրամանով լիազորված անձը` առաջին կարգի ստորագրության իրավունքով.

բ) ԲԳԿ-ի գլխավոր հաշվապահը կամ ղեկավարի հրամանով լիազորված անձը` երկրորդ կարգի ստորագրության իրավունքով:

10. ԲՍԿ-ի ֆինանսական և հաշվապահական գործունեությանը վերաբերող փաստաթղթերը ստորագրում են`

ա) ԲՍԿ-ի ղեկավարը կամ ղեկավարի հրամանով լիազորված անձը` առաջին կարգի ստորագրության իրավունքով.

բ) ԲՍԿ-ի գլխավոր հաշվապահը կամ ղեկավարի հրամանով լիազորված անձը` եկրորդ կարգի ստորագրության իրավունքով:

11. Բյուջեները կատարվում են միասնական մեթոդաբանության սկզբունքով, որը նախատեսում է բյուջեների կատարման միասնական մեթոդական հիմքի առկայություն և բյուջեների կատարման գործընթացին մասնակից` նույնատիպ գործառույթներ իրականացնող սուբյեկտների համար միատեսակ իրավասությունների և պատասխանատվության սահմանում: Բյուջեների կատարման մեթոդական ապահովումն իրականացնում է Լեռնային Ղարաբաղի Հանրապետության ֆինանսների և էկոնոմիկայի նախարարությունը, որը`

ա) բյուջեների կատարման հետ կապված հարաբերությունները կարգավորող օրենքները և իրավական ուժ ստացած այլ իրավական ակտերը (այսուհետև` ակտ) պաշտոնապես հրապարակվելուց հետո, սույն կետի «բ» ենթակետի համաձայն կազմում և ԲԳԿ-ներին է տրամադրում (ուղարկում) նորմատիվ բնույթ չունեցող մեթոդական ցուցում (այսուհետև` ցուցում).

բ) ցուցումը պարունակում է ակտի կարգավորման առարկայի, նպատակի, գործողության ոլորտի, ուժի մեջ մտնելու պահի, այդ ակտով սահմանվող իրավունքների և պարտականությունների համառոտ նկարագիրը.

գ) բացառությամբ սույն կետի «ա» ենթակետի համաձայն տրամադրվող ցուցումի ակտի (ակտերի) մասին իրեն վերապահված իրավասության սահմաններում, նորմատիվային բնույթ չունեցող պարզաբանումներ և (կամ) այլ ցուցումներ տրամադրում է իր հայեցողությամբ կամ ԲԳԿ-ների` պարզաբանում կամ ցուցումներ ստանալու համար գրավոր դիմումի առկայության դեպքում:

12. Բյուջեների եկամուտները (մուտքերը) ձևավորում են Լեռնային Ղարաբաղի Հանրապետության օրենսդրության պահանջներին համապատասխան:

13. Բյուջեների եկամուտների (մուտքերի) հավաքագրման գործի կազմակերպման համար պատասխանատու մարմիններ են հանդիսանում Լեռնային Ղարաբաղի Հանրապետության օրենսդրության համաձայն, այդ լիազորությամբ օժտված պետական և տեղական ինքնակառավարման մարմինները: Այդ մարմինները պատասխանատու են համապատասխան բյուջեներով նախատեսված ու բյուջե փոխանցման ենթակա եկամուտների (մուտքերի)` ամբողջությամբ և ժամանակին համապատասխան բյուջե փոխանցման համար: Լեռնային Ղարաբաղի Հանրապետության պետական բյուջեի եկամուտների (մուտքերի) հավաքագրման համար պատասխանատու մարմինների ցանկը սահմանում է Լեռնային Ղարաբաղի Հանրապետության կառավարությունը:

14. Բյուջեների եկամուտների հաշվառումը կազմակերպում է գանձապետարանը` այդ նպատակով բացված գանձապետական եկամտային հաշիվների վարման միջոցով: Բյուջեների եկամուտների հաշվառման հիմքը միասնական գանձապետական հաշվին եկամտի հաշվեգրումն է:

15. Բյուջեներով հաստատված եկամուտների մեծությունը չի հանդիսանում տվյալ եկամտատեսակի ձևավորման համար սահմանված տարեկան առավելագույն չափ, ինչը նախատեսում է սահմանված կարգով ձևավորված բյուջետային եկամուտների պարտադիր կարգով մուտքագրում գանձապետական հաշվին:

16. Բյուջեների եկամուտների հավաքագրման համար պատասխանատու մարմինները Լեռնային Ղարաբաղի Հանրապետության ֆինանսների և էկոնոմիկայի նախարարության սահմանած կարգով վերջինիս են ներկայացնում իրենց կողմից հավաքագրվող եկամուտների մասին տեղեկություններ:

17. Լեռնային Ղարաբաղի Հանրապետությանը օտարերկրյա պետությունների և միջազգային կազմակերպությունների, ինչպես նաև այլ անձանց կողմից ապրանքային վարկերի ու դրամաշնորհների (գրանտների) դրամայնացման (այսուհետև` դրամայնացում) հաշվառումը և դրա հետ կապված գործառույթների համակարգումն ու հսկումն իրականացնում է Լեռնային Ղարաբաղի Հանրապետության ֆինանսների և էկոնոմիկայի նախարարությունը:

Նշված գործառույթների շրջանակներում`

ա) օտարերկրյա պետությունների ու միջազգային կազմակերպությունների, ինչպես նաև այլ անձանց կողմից Լեռնային Ղարաբաղի Հանրապետության ապրանքային վարկերի  և դրամաշնորհների (գրանտների) տրամադրման նպատակով, հիշյալ մարմինների և Լեռնային Ղարաբաղի Հանրապետության կառավարության միջև կնքված բոլոր համաձայնագրերն ու պայմանագրերը (այսուհետև` համաձայնագիր) հաշվառվում են նաև Լեռնային Ղարաբաղի Հանրապետության ֆինանսների և էկոնոմիկայի նախարարությունում.

բ) համաձայնագրերի հաշվառումն իրականացնելու նպատակով յուրաքանչյուր առանձին համաձայնագրի վավերացումից հետո 10-օրյա ժամկետում այդ համաձայնագրերում Լեռնային Ղարաբաղի Հանրապետության կառավարությունը ներկայացնող մարմինները Լեռնային Ղարաբաղի Հանրապետության ֆինանսների և էկոնոմիկայի նախարարությանն են տրամադրում համաձայնագրի պատճենը.

գ) Լեռնային Ղարաբաղի Հանրապետության ֆինանսների և էկոնոմիկայի նախարարության կողմից համաձայնագրերը հաշվառվում են գրանցամատյանում, որի վարման կարգը սահմանում է Լեռնային Ղարաբաղի Հանրապետության ֆինանսների և էկոնոմիկայի նախարարությունը.

դ) համաձայնագրի շրջանակներում ապրանքների ստացման, դրամայնացման և դրա արդյունքում գոյացած միջոցների օգտագործման հետ կապված որևէ պայմանի փոփոխության դեպքում պատասխանատու պետական մարմինը 5-օրյա ժամկետում դրա մասին տեղեկացնում է Լեռնային Ղարաբաղի Հանրապետության ֆինանսների և էկոնոմիկայի նախարարությանը` վերջինիս տրամադրելով կատարված փոփոխությունը պարունակող փաստաթղթի պատճենը.

ե) ապրանքային վարկերի և դրամաշնորհների իրացման համար պատասխանատու պետական մարմինները Լեռնային Ղարաբաղի Հանրապետության ֆինանսների և էկոնոմիկայի նախարարության սահմանած կարգով վերջինիս են ներկայացնում տեղեկություններ.

զ) ապրանքային վարկը կամ դրամաշնորհը Լեռնային Ղարաբաղի Հանրապետություն ներկրվելուց և սահմանված կարգով իրացվելուց հետո իրացման արդյունքում ստացված ողջ դրամական հասույթը փոխանցվում է այդ նպատակով բացված գանձապետական հաշվին (այսուհետև` դրամայնացման հաշիվ).

է) դրամայնացման հետ կապված բոլոր ծախսերն իրականացվում են դրամայնացման հաշվում` համապատասխան ապրանքների իրացումից ստացված մուտքերի հաշվին, եթե այլ բան համաձայնագրով և (կամ) այլ նորմով նախատեսված չէ.

ը) յուրաքանչյուր ամսվա վերջին աշխատանքային օրը դրամայնացման հաշվում առկա դրամական միջոցները փոխանցվում են Լեռնային Ղարաբաղի Հանրապետության պետական բյուջեի` այդ նպատակով բացված եկամտային հաշվին, բացառությամբ այն միջոցների, որոնք տվյալ բյուջետային տարում ենթակա չեն փոխանցման և (կամ) անհրաժեշտ են դրամայնացման գործընթացը սահմանված կարգով ապահովելու համար: Սույն կետով նախատեսված միջոցների չափը որոշում է Լեռնային Ղարաբաղի Հանրապետության ֆինանսների և էկոնոմիկայի նախարարությունը:

18. Բյուջետային եկամուտների (մուտքերի) հաշվառման կազմակերպման շջանակներում Լեռնային Ղարաբաղի Հանրապետության ֆինանսների և էկոնոմիկայի նախարարությունը կազմակերպում է`

ա) եկամուտների ձևավորման մասին գանձապետարանում հաշվառված և պատասխանատու պետական մարմինների ներկայացրած տեղեկությունների համադրումը.

բ) համադրման արդյունքում արձանագրված անհամապատասխանությունների մասին պատասխանատու պետական մարմիններից հիմնավորումների ստացումը:

19. Բյուջետային ծախսերը (ելքերը) սահմանվում են տվյալ տարվա բյուջեներով և կատարվում են Լեռնային Ղարաբաղի Հանրապետության օրենսդրությամբ սահմանված կարգով:

20. Բյուջեներից վճարումները հաշվառում է գանձապետարանը` այդ նպատակով բացված գանձապետական ծախսային հաշիվների վարման միջոցով: Բյուջեների ծախսերի հաշվառման հիմքը գանձապետական հաշիվներից համապատասխան միջոցների ելքագրումը հավաստող սկզբնական փաստաթղթերի ստացումն է:

21. Բյուջեներով հաստատված ծախսերի մեծությունը հանդիսանում է տվյալ ծախսատեսակի կատարման համար սահմանված առավելագույն չափ:

22. Բյուջեների ծախսերի կատարման համար պատասխանատու են բյուջետային հատկացումների կարգադրիչները, իսկ միասնական գանձապետական հաշվից միջոցների ելքագրման համար` Լեռնային Ղարաբաղի Հանրապետության ֆինանսների և էկոնոմիկայի նախարարությունը հիմք ընդունելով ԲԳԿ-ների կողմից ներկայացված հիմնավորող փաստաթղթերը:

23. Յուրաքանչյուր տարվա Լեռնային Ղարաբաղի Հանրապետության պետական բյուջեի հաստատման օրվանից 45-օրյա ժամկետում Լեռնային Ղարաբաղի Հանրապետության ֆինանսների և էկոնոմիկայի նախարարությունը Լեռնային Ղարաբաղի Հանրապետության կառավարության հաստատմանն է ներկայացնում տվյալ տարվա Լեռնային Ղարաբաղի Հանրապետության պետական բյուջեի կատարման համամասնությունները:

24. Համայնքի բյուջեի կատարման համամասնությունները հաստատում է համայնքի ղեկավարը համայնքի բյուջեի հաստատման մասին համայնքի ավագանու որոշում ընդունելու օրվանից հետո 10-օրյա ժամկետում:

25. Մինչև բյուջեների կատարման հաստատությունների (այսուհետև` համամասնություններ) հաստատումը, բյուջեները յուրաքանչյուր ամիս կատարվում են Լեռնային Ղարաբաղի Հանրապետության ֆինանսների և էկոնոմիկայի նախարարության սահմանած համամասնությամբ:

26. Համայնքի ղեկավարը համայնքի բյուջեի կատարման համամասնությունների հաստատումից հետո 5 օրվա ընթացքում այն տրամադրում է համայնքին սպասարկող ՏԳԲ-ին:

27. Համամասնությունները հաստատվում և փոփոխվում են բյուջեների հիման վրա` ըստ բյուջետային ծախսերի դասակարգման և բյուջեների հավելվածների:

28. Համամասնությունները հաստատվելուց հետո ԲԳԿ-ները Լեռնային Ղարաբաղի Հանրապետության ֆինանսների և էկոնոմիկայի նախարարության սահմանած կարգով հաստատում են ԲՍԿ-ների նախահաշիվները` ըստ բյուջետային ծախսերի գործառնական դասակարգման ծրագրերի և տնտեսագիտական դասակարգման տարրերի: ԲԳԿ-ները ապահովում են նախահաշիվները ԲՍԿ-ին սպասարկող ՏԳԲ-ներ ներկայացնելը:

29. ՏԳԲ-ն դրոշմակնիքով հաստատում է նախահաշիվը, եթե այն կազմված և ներկայացված է սահմանված կարգով: Հաստատված նախահաշվի մեկ օրինակը պահվում է ՏԳԲ-ում: ՏԳԲ-ն սահմանած կարգին չհամապատասխանող նախահաշիվը, այն ներկայացվելու օրվանից 2 աշխատանքային օրվա ընթացքում, վերադարձնում է ներկայացնողին:

30. Գանձապետական հաշվից միջոցների ելքագրման հիմքը` ՏԳԲ-ի կողմից նախահաշվի հաստատումը և ծախսերը հիմնավորող` Լեռնային Ղարաբաղի Հանրապետության օրենսդրությամբ նախատեսված փաստաթղթերի ընդունումն է: Հիմնավորող փաստաթղթերի ցանկը և դրանց ձևերը սահմանում է Լեռնային Ղարաբաղի Հանրապետության ֆինանսների և էկոնոմիկայի նախարարությունը:

31. Նախահաշիվը ՏԳԲ-ի կողմից հաստատվելուց հետո ԲՍԿ-ն Լեռնային Ղարաբաղի Հանրապետության ֆինանսների և էկոնոմիկայի նախարարության սահմանած կարգով սպասարկող ՏԳԲ է ներկայացնում նախահաշվով նախատեսված միջոցների հաշվին կանխատեսվող ծախսերի գծով ստանձնվող ֆինանսական պարտավորությունների կատարման ժամանակացույցը (այսուհետև` վճարման ժամանակացույց)` ըստ ամիսների:

32. ՏԳԲ-ն դրոշմակնիքով հաստատում է ժամանակացույցը, եթե այն կազմված և ներկայացված է սահմանված կարգով: Հաստատված ժամանակացույցի մեկ օրինակը պահվում է ՏԳԲ-ում: Սահմանված կարգին չհամապատասխանող ժամանակացույցը, այն ներկայացվելու օրվանից երկու աշխատանքային օրվա ընթացքում, վերադարձվում է ԲՍԿ:

33. Վճարման ժամանակացույցը հաստատվելուց հետո և միայն դրան համապատասխան, ԲՍԿ-ն իրավունք ունի Լեռնային Ղարաբաղի Հանրապետության օրենսդրությամբ նախատեսված կարգով ստանձնելու ֆինանսական պարտավորություններ, որոնք պետք է ֆինանսավորվեն նախահաշվով նախատեսված միջոցների հաշվին:

34. ԲՍԿ-ների կարիքների համար կատարվող գնումների գծով ստանձնված պարտավորությունների ֆինանսավորման կարգը սահմանվում է գնումների մասին օրենսդրությամբ:

35. ԲՍԿ-ների կողմից` Լեռնային Ղարաբաղի Հանրապետության օրենսդրությանը համապատասխան ստանձնված և սույն կարգի 34-րդ կետում նշված պարտավորությունների խմբին չդասվող պարտավորությունները ֆինանսավորվում են հետևյալ կարգով`

ա) քաղաքացիաիրավական պայմանագրերով ստանձնած պարտավորությունների դեպքում` ԲՍԿ-ն Լեռնային Ղարաբաղի Հանրապետության ֆինանսների և էկոնոմիկայի նախարարության սահմանած ձևով ՏԳԲ է ներկայացնում քաղվածք պայմանագրից, պայմանագիրը կնքելու օրվանից 5 աշխատանքային օրվա ընթացքում: ՏԳԲ-ն դրոշմակնիքով հաստատում է քաղվածքը, եթե այն կազմված և ներկայացված է սահմանված կարգով: Հաստատված քաղվածքի մեկ օրինակը պահվում է ՏԳԲ-ում: Սահմանված կարգին չհամապատասխանող քաղվածքը, այն ներկայացվելու օրվանից 2 աշխատանքային օրվա ընթացքում, վերադարձվում է ԲՍԿ: Պայմանագրի շրջանակներում վճարում կատարելու համար ԲՍԿ-ն Լեռնային Ղարաբաղի Հանրապետության ֆինանսների և էկոնոմիկայի նախարարության սահմանած ձևով ՏԳԲ է ներկայացնում վճարման հանձնարարագիր և այդ վճարումը հիմնավորող փաստաթղթեր: ՏԳԲ-ն ընդունում է ներկայացված փաստաթղթերը, եթե դրանք կազմված են սահմանված կարգին համապատասխան: Հակառակ դեպքում, դրանք ներկայացվելու օրվանից 2 աշխատանքային օրվա ընթացքում վերադարձվում են ԲՍԿ.

բ) սույն կետի «ա» ենթակետով նշված պարտավորությունների խմբին չդասվող պարտավորությունները ֆինանսավորելու համար ԲՍԿ-ն Լեռնային Ղարաբաղի Հանրապետության ֆինանսների և էկոնոմիկայի նախարարության սահմանած ձևով ՏԳԲ է ներկայացնում վճարման հանձնարարագիր և այդ վճարումը հիմնավորող փաստաթղթեր: ՏԳԲ-ն ընդունում է ներկայացված փաստաթղթերը, եթե դրանք կազմված են սահմանված կարգին համապատասխան: Հակառակ դեպքում, դրանք ներկայացվելու օրվանից 2 աշխատանքային օրվա ընթացքում ՏԳԲ-ի կողմից վերադարձվում են ԲՍԿ:

36. Նախահաշիվների շրջանակներում վճարում կատարելու համար ԲՍԿ-ն Լեռնային Ղարաբաղի Հանրապետության օրենսդրությամբ նախատեսված փաստաթղթերը ՏԳԲ է ներկայացնում վճարման վերջնաժամկետից առնվազն 3 աշխատանքային օր առաջ:

39. ՏԳԲ-ն վճարում է կատարում միայն ԲՍԿ-ի գանձապետական հաշվում դրամական միջոցների առկայության դեպքում և դրա սահմաններում: ԲՍԿ-ի գանձապետական հաշվին դրամական միջոցներ փոխանցում է ԲԿԳ-ն` իրեն սպասարկող ՏԳԲ ներկայացված միջգանձապետական փոխանցագրի հիման վրա: ՏԳԲ-ն ԲԳԿ-ի գանձապետական հաշվից ԲՍԿ-ի գանձապետական հաշվին դրամական միջոցներ փոխանցում է ԲԳԿ-ի գանձապետական հաշվում դրամական միջոցների առկայության դեպքում և դրա սահմաններում: ԲԳԿ-ի գանձապետական հաշվին դրամական միջոցներ փոխանցում է կենտրոնական գանձապետարանը` ԲԳԿ-ի կողմից Լեռնային Ղարաբաղի Հանրապետության ֆինանսների և էկոնոմիկայի նախարարության սահմանված կարգով ներկայացված հայտի հիման վրա:

Լեռնային Ղարաբաղի Հանրապետության պետական բյուջեի ելքերի ֆինանսավորման նպատակով կենրոնական գանձապետարանի կողմից փոխանցված գումարների մեծությունը ցանացած պահի դրությամբ չի կարող գերազանցել այդ պահի դրությամբ միասնական գանձապետական հաշվին հաշվեգրված Լեռնային Ղարաբաղի Հանրապետության պետական բյուջեի մուտքերի փաստացի մեծության 115 տոկոսը` բյուջետային տարվա վերջին օրվա դրությամբ փոխանցված գումարների և տվյալ տարվա բյուջետային մուտքերի փաստացի մեծությունները հավասար մակարդակի պահելու պայմանով:

38. Գանձապետարանը բյուջեների կատարման նկատմամբ նախնական հսկողություն իրականացնում է սույն կարգով վերապահված լիազորությունների կատարմամբ, որի արդյունքում նախքան գանձապետական հաշիվներից ֆինանսական միջոցների ելքագրումը, գանձապետարանում սույն կարգի համաձայն գնահատվում է ԲՍԿ-ների կողմից իրականացվող ֆինանսական գործառույթների համապատասխանությունը` բյուջեների կատարման գործընթացը կարգավորող` օրենքներով և այլ ակտերով սահմանված պահանջներին: Անհամապատասխանության հայտնաբերման դեպքում ԲՍԿ-ների անվամբ բացված գանձապետական հաշիվներից ֆինանսական միջոցների ելքագրումը ժամանակավորապես դադարեցվում է, որից հետո`

ա) ՏԳԲ-ն ԲՍԿ-ին գրավոր հայտնում է անհամապատասխանության շտկման (կարգավորման) անհրաժեշտության մասին.

բ) պետական հիմնարկների համար արձանագրված անհամապատասխանությունը վերջիններիս կողմից չկարգավորվելու դեպքում ՏԳԲ-ն այդ մասին գրավոր տեղեկացնում է Լեռնային Ղարաբաղի Հանրապետության գլխավոր գանձապետին, որը մեկ աշխատանքային օրվա ընթացքում դրա մասին գրավոր հայտնում է Լեռնային Ղարաբաղի Հանրապետության ֆինանսների և էկոնոմիկայի նախարարին, որը ցուցում է տալիս հետագա գործողությունների վերաբերյալ.

գ) համայնքների կողմից ստեղծված հիմնարկների համար` ՏԳԲ-ի պետը գրավոր տեղյակ է պահում տեղական ինքնակառավարման մարմնի ղեկավարին, որն ապահովում է անհամապատասխանության շտկումը:

39. Վճարումը համարվում է կատարված, եթե վճարման ենթակա գումարը դուրս է գրվել գանձապետական հաշվից:

40. Տվյալ ժամանակահատվածում բյուջեներից վճարումները համարվում են ոչ ամբողջությամբ կատարված (այսուհետև չվճարում), եթե սահմանված կարգով ստանձնված և տվյալ ժամանակահատվածում կատարման ենթակա ֆինանսական պարտավորությունները գերազանցում է տվյալ ժամանակահատվածում կատարված փաստացի վճարումների մեծությունը: Չվճարված համարվող ֆինանսական պարտավորությունները հանդիսանում են բյուջետային պարտքեր և ենթակա են մարման (կատարման):

41. ԲՍԿ-ները Լեռնային Ղարաբաղի Հանրապետության օրենսդրությամբ սահմանված կարգով ստանձնած պարտավորությունների դիմաց վճարումներն իրականացնում են անկանխիկ` փոխանցման եղանակով, և կանխիկ դրամի ձևով: Անկանխիկ վճարումները իրականացվում են սույն կարգի համաձայն` գանձապետական հաշիվներից միջոցների ելքագրման ձևով: Կանխիկ դրամով վճարումներ կարող են իրականացվել բյուջետային ծախսերի տնտեսագիտական դասակարգման միայն հետևյալ հոդվածներով`

ա) աշխատավարձ և դրան հավասարեցված վճարումներ.

բ) նպաստներ.

գ) գործուղման և ծառայողական շրջագայությունների ծախսեր` միայն օրապահիկ, գիշերավարձ, տրանսպորտի (բացառությամբ օդային տրանսպորտի) ծախսեր.

դ) կրթաթոշակներ.

ե) կենսաթոշակներ.

զ) այլ անհատույց հատկացումներ ֆիզիկական անձանց` բացառությամբ իրավաբանական անձանց միջոցով նշված գումարների հատկացման դեպքերի.

է) մինչև գնումների մասին օրենսդրությամբ սահմանված գործառնությունների իրականացումը ֆինանսավորված գումարի մինչև 15 տոկոսը

42. Լեռնային Ղարաբաղի Հանրապետության պաշտպանական, ռազմական, հասարակական կարգի պահպանության և ազգային անվտանգության կարիքների համար, Լեռնային Ղարաբաղի Հանրապետության նախագահի, Լեռնային Ղարաբաղի Հանրապետության Ազգային ժողովի և Լեռնային Ղարաբաղի Հանրապետության կառավարության աշխատակազմի կողմից կանխիկ ձևով կատարվող ծախսերի տարեկան չափաքանակները հաստատում է Լեռնային Ղարաբաղի Հանրապետության կառավարությունը:

43. Սույն կարգի 41-րդ և 42-րդ կետերում չնշված ուղղություններով կանխիկ դրամով ծախսեր չեն կարող կատարվել:

44. ԲՍԿ-ները շաբաթական կտրվածքով սպասարկող ՏԳԲ են ներկայացնում Լեռնային Ղարաբաղի Հանրապետության ֆինանսների և էկոնոմիկայի նախարարության սահմանված ձևով հաշվետվություն կանխիկ ձևով կատարված ծախսերի վերաբերյալ` բացառությամբ սույն կարգի 42-րդ կետի համաձայն իրականացվող ծախսերի: Բյուջետային ծախսերի տնտեսագիտական դասակարգման նույն հոդվածով նախատեսված հատկացումների սահմաններում կարող է կանխիկ ձևով վճարում իրականացնել նախկին վճարումը հիմնավորող փաստաթղթեր ներկայացնելու դեպքում:

45. Կանխիկ դրամի ձևով վճարումներն իրականացվում են առևտրային բանկերի միջոցով` Լեռնային Ղարաբաղի Հանրապետության ֆինանսների և էկոնոմիկայի նախարարության հետ կնքված պայմանագրերի հիման վրա:

46. Տվյալ տարվա Լեռնային Ղարաբաղի Հանրապետության պետական բյուջեով նախատեսված` Լեռնային Ղարաբաղի Հանրապետության կառավարության պահուստային ֆոնդից հատկացումների, ինչպես նաև Լեռնային Ղարաբաղի Հանրապետության պետական բյուջեում վերաբաշխումների (Լեռնային Ղարաբաղի Հանրապետության կառավարությանն օրենքով տրված իրավասության շրջանակներում) վերաբերյալ Լեռնային Ղարաբաղի Հանրապետության կառավարության որոշումներն ընդունվում են Լեռնային Ղարաբաղի Հանրապետության ֆինանսների և էկոնոմիկայի նախարարության ներկայացմամբ:

47. «Լեռնային Ղարաբաղի Հանրապետության բյուջետային համակարգի մասին» Լեռնային Ղարաբաղի Հանրապետության օրենքի 23-րդ հոդվածի համաձայն պետական կառավարման մարմինների ղեկավարներին տրված իրավասության սահմաններում բյուջետային ծախսերի տնտեսագիտական դասակարգման հոդվածներով նախատեսված հատկացումների միջհոդվածային վերաբաշխումները նախապես համաձայնեցվում են Լեռնային Ղարաբաղի Հանրապետության ֆինանսների և էկոնոմիկայի նախարարության հետ` վերջինիս կողմից սահմանված կարգով:

48. Սույն կարգի իմաստով բյուջետային երաշխիք (այսուհետև` երաշխիք) է համարվում այլ անձի (պրինցիպալ) քաղաքացիաիրավական պարտավորությունների ապահովման նպատակով Լեռնային Ղարաբաղի Հանրապետության (այսուհետև` երաշխավոր) ստանձնած գրավոր պարտավորությունը` պրինցիպալի պարտատիրոջը (այսուհետև` բենեֆիցիար) Լեռնային Ղարաբաղի Հանրապետության պետական բյուջեի միջոցների հաշվին բենեֆիցիարի պահանջվող որոշակի գումար վճարելու վերաբերյալ: Երաշխիքի տրամադրման հետ կապված հարաբերությունները կարգավորվում են համապատասխան օրենսդրական և նորմատիվ ակտերով:

49. Լեռնային Ղարաբաղի Հանրապետության պետական բյուջեի միջոցների հաշվին երաշխիք տրամադրվում է Լեռնային Ղարաբաղի Հանրապետության կառավարության որոշման հիման վրա` Լեռնային Ղարաբաղի Հանրապետության ֆինանսների և էկոնոմիկայի նախարարության կողմից:

50. Երաշխիքը տրամադրվում է գրավոր փաստաթղթի ձևով և հանդիսանում է միակողմ գործարք:

51. Երաշխիքում նշվում են հետևյալ տեղեկությունները`

ա) պրինցիպալ անվանումը, գտնվելու վայրը.

բ) երաշխավորի անվանումը` Լեռնային Ղարաբաղի Հանրապետություն` ի դեմս Լեռնային Ղարաբաղի Հանրապետության ֆինանսների և էկոնոմիկայի նախարարության.

գ) երաշխիքի գումարը.

դ) երաշխիքի գումարի վճարման պայմանները, ներառյալ երաշխավորին պահանջի ներկայացման կարգը.

ե) երաշխիքի գործողության ժամկետը.

զ) Լեռնային Ղարաբաղի Հանրապետության օրենսդրությամբ նախատեսված այլ տեղեկություններ:

Սույն կետի պահանջներին չհամապատասխանող փաստաթուղթը երաշխիք չի համարվում:

52. Երաշխիքով երաշխավորը բենեֆիցիարի հանդեպ կրում է սահմանափակ պատասխանատվություն` դրանով ապահովված հիմնական պարտավորության կատարման համար:

53. Բենեֆիցիարի նկատմամբ երաշխավորի պատասխանատվությունը սահմանափակվում է երաշխիքում նշված գումարով:

54. Երաշխիքի կատարումը ձևակերպվում է Լեռնային Ղարաբաղի Հանրապետության պետական բյուջեով նախատեսված պահուստային ֆոնդի հատկացումների հաշվին:

55. Երաշխիքներ տրամադրելու նպատակով երաշխավորը պրինցիպալի հետ կնքում է երաշխիք տալու մասին պայմանագիր: Պայմանագրով պետք է նախատեսվի, որ երաշխիքի գումարը կամ դրա մի մասը երաշխավորի կողմից բենեֆիցիարին վճարելու հետևանքով ծագող հետադարձ պահանջի գումարը համարվում է երաշխավորի կողմից պրինցիպալին տրամադրված վարկ, որի տարեկան տոկոսադրույքը հավասար է բանկային տոկոսի հաշվարկային դրույքին:

56. Սույն կարգի 55-րդ կետի համաձայն տրամադրված վարկի մարման ժամկետ է համարվում երաշխավորի կողմից բենեֆիցիարին վճարված գումարի (դրա մի մասի) վճարման օրվան հաջորդող օրվանից հաշվված մեկամսյա ժամկետը, բայց ոչ ավելի, քան տվյալ բյուջետային տարվա վերջին օրը, եթե Լեռնային Ղարաբաղի Հանրապետության կառավարության որոշման հիման վրա Լեռնային Ղարաբաղի Հանրապետության ֆինանսների և էկոնոմիկայի նախարարության կողմից ավելի երկար ժամկետ չի առաջարկվել:

57. Պրինցիպալը, մինչև վարկի մարման ժամկետի ավարտը, պարտավոր է երաշխավորին վճարել վերջինիս կողմից բենեֆիցիարին երաշխիքով վճարված ամբողջ գումարը և հաշվարկված տոկոսագումարը:

58. Երաշխավորին պրինցիպալի կողմից վարկի գումարի և տոկոսագումարի վճարումն ապահովելու նպատակով պրինցիպալը երաշխիք տալու մասին պայմանագիրը կնքելուց հետո 15-օրյա ժամկետում երաշխավորին տրամադրում է ապահովման միջոց (գրավ, պահում, բանկային երաշխիք): Ապահովման չափը չի կարող փոքր լինել երաշխիքի գումարի մեծությունից:

59. Եթե պրինցիպալը պայմանագրով սահմանված ժամկետում չի վերադարձնում վարկի և (կամ) տոկոսների գումարը, ապա երաշխավորը ձեռնարկում է Լեռնային Ղարաբաղի Հանրապետության օրենսդրությամբ նախատեսված գործողություններ` իր պահանջի իրավունքի իրականացման համար:

60. Երաշխավորը երաշխիքի գործողության ամբողջ ընթացքում կարող է պայմանագրով սահմանված հաճախականությամբ և կարգով պրինցիպալից պահանջել տեղեկատվություն վերջինիս գործունեության վերաբերյալ:

61. Պրինցիպալի կողմից` պայմանագրով ստանձնած պարտավորությունների խախտման դեպքում երաշխավորն իրավունք ունի պայմանագրով սահմանված կարգով պրինցիպալի մոտ կատարելու ֆինանսատնտեսական գործունեության ստուգումներ:

62. Լեռնային Ղարաբաղի Հանրապետության ֆինանսների և էկոնոմիկայի նախարարությունն իրականացնում է երաշխիքներով ապահովված պարտավորությունների հաշվառում` ըստ պրինցիպալի, բենեֆիցիարի, երաշխավորված պարտքային պարտավորության մեծության, պրինցիպալի կողմից ներկայացված ապահովման միջոցի ձևի և չափի, պրինցիպալի կողմից ինքնուրույն կատարված ու երաշխավորի կողմից կատարված վճարումների, ձևակերպված վարկի տոկոսադրույքների և մարման ժամկետի, պրինցիպալի կողմից կատարված մարումների ու կետանցված պարտավորության:

63. Եթե Լեռնային Ղարաբաղի Հանրապետության պետական բյուջեի կատարման առաջին կիսամյակի արդյունքներով Լեռնային Ղարաբաղի Հանրապետության պետական բյուջեի փաստացի մուտքերի հանրագումարը ավելի քան 25 տոկոսով ցածր է Լեռնային Ղարաբաղի Հանրապետության պետական բյուջեի կատարման համամասնություններով սահմանված կիսամյակային համապատասխան ցուցանիշից (բացառությամբ Լեռնային Ղարաբաղի Հանրապետության պետական բյուջեով նախատեսված նպատակային ծրագրերի իրականացման հետ կապված արտաքին աղբյուրներից ստացվող պաշտոնական ու մասնավոր տրանսֆերտների և (կամ) վարկերի ստացման ժամկետների` տվյալ բյուջետային տարվա սահմաններում հետաձգման դեպքերի), ապա բյուջետային ծախսերի սահմանափակման գործընթացը սկսելու նպատակով Լեռնային Ղարաբաղի Հանրապետության ֆինանսների և էկոնոմիկայի նախարարությունը, Լեռնային Ղարաբաղի Հանրապետության վարչապետի համաձայնությամբ, մինչև տվյալ տարվա սեպտեմբերի 1-ը Լեռնային Ղարաբաղի Հանրապետության կառավարություն է ներկայացնում Լեռնային Ղարաբաղի Հանրապետության պետական բյուջեի մասին օրենքում փոփոխություն կատարելու մասին օրենքի նախագիծ:

64. Բյուջեների ծախսերի նկատմամբ եկամուտների գերազանցումը կազմում է բյուջեների հավելուրդը, որն առաջանում է`

ա) հավելուրդով հաստատված բյուջեների կատարմամբ.

բ) բյուջեներով սահմանված ծախսերի կատարման համեմատ` տարեկան մուտքերի գերակատարմամբ.

գ) բյուջեներով սահմանված մուտքերի կատարման համեմատ` տարեկան ծախսերի թերակատարմամբ:

65. Հավելուրդը տվյալ տարվան հաջորդող տարվա բյուջեի մուտքն է:

66. Տվյալ տարվա դեկտեմբերի 20-ից հետո հիմնարկներին չի թույլատրվում ստանձնել ֆինանսական նոր պարտավորություններ, ընդ որում մինչև սահմանված ժամկետն ստանձնած պարտավորությունների կատարման համար Լեռնային Ղարաբաղի Հանրապետության օրենսդրությամբ նախատեսված փաստաթղթերն ընթացիկ տարվա դեկտեմբերի 25-ից հետո ՏԳԲ-ն չի ընդունում:

67. Լեռնային Ղարաբաղի Հանրապետության ֆինանսների և էկոնոմիկայի նախարարությունը մինչև տվյալ տարվա դեկտեմբերի 31-ը պետք է ապահովի սահմանված կարգով ստանձնված ֆինանսական պարտավորությունների դիմաց վճարումների իրականացումը` միասնական գանձապետական հաշվում առկա միջոցների շրջանակներում:

68. Գանձապետական ծախսային հաշիվների և ԲՍԿ-ների դրամարկղներում առկա մնացորդը բյուջետային տարվա վերջին աշխատանքային օրվա ավարտին փոխանցվում են հաջորդ տարվա բյուջեի ազատ մնացորդի գանձապետական եկամտային հաշվին:

69. Լեռնային Ղարաբաղի Հանրապետության կառավարության որոշմամբ Լեռնային Ղարաբաղի Հանրապետության օրենսդրությամբ սահմանված ժամկետով կարող է երկարաձգվել տվյալ բյուջետային տարվա պարտավորությունների գծով գործառնությունների ձևակերպումը (եզրափակիչ շրջանառություն):

70. Եզրափակիչ շրջանառության դեպքում սույն կարգի 66-68-րդ կետերով նախատեսված աշխատանքները (բացառությամբ ֆինանսական նոր պարտավորությունների ստանձնման) երկարաձգվում են մինչև եզրափակիչ շրջանառության վերջին ժամկետը:

71. Եզրափակիչ շրջանառության ընթացքում տվյալ տարվա Լեռնային Ղարաբաղի Հանրապետության պետական և համայնքների բյուջեներով նախատեսված ծախսերը կատարվում են միայն տվյալ տարվա համապատասխան բյուջեների դրամական մուտքերի հաշվին:

72. Բյուջեների կատարման, ԲԳԿ-ների և ԲՍԿ-ների ֆինանսական ու հաշվապահական գործունեության մասին հաշվետվությունների ձևերը, դրանք կազմելու, ներկայացնելու և ամփոփելու կարգը սահմանում է Լեռնային Ղարաբաղի Հանրապետության ֆինանսների և էկոնոմիկայի նախարարությունը:

73. Սույն կարգով սահմանված գործառույթների չկատարումը կամ ոչ պատշաճ ձևով կատարումը հանդիսանում է բյուջեների կատարման կարգի խախտում և հանգեցնում է օրենքով սահմանված պատասխանատվության կիրառման: