ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

«Լեռնային Ղարաբաղի Հանրապետության բնակչության սանիտարահամաճարակային անվտանգության ապահովման մասին» Լեռնային Ղարաբաղի Հանրապետության օրենքի 22-րդ և «Բնակչության բժշկական օգնության և սպասարկման մասին» Լեռնային Ղարաբաղի Հանրապետության օրենքի 20-րդ հոդվածներին համապատասխան՝ Լեռնային Ղարաբաղի Հանրապետության կառավարությունը ո ր ո շ ու մ է.

Հաստատել՝

ա) առողջական վիճակի պարտադիր նախնական (աշխատանքի ընդունվելիս) և պարբերական բժշկական զննության կարգը՝ համաձայն թիվ 1 հավելվածի.

բ) գործունեության ոլորտների, որոնցում զբաղված անձինք ենթակա են առողջական վիճակի պարտադիր բժշկական զննության, և բժշկական զննության ծավալի ու հաճախականությունների ցանկը՝ համաձայն թիվ 2 հավելվածի.

գ) անձնական սանիտարական (բժշկական) գրքույկի ու բժշկական զննության ենթակա անձանց անվանացուցակի ձևերը՝ համաձայն թիվ 3 և 4 հավելվածների:

ԱՌՈՂՋԱԿԱՆ ՎԻՃԱԿԻ ՊԱՐՏԱԴԻՐ ՆԱԽՆԱԿԱՆ (ԱՇԽԱՏԱՆՔԻ ԸՆԴՈՒՆՎԵԼԻՍ) ԵՎ ՊԱՐԲԵՐԱԿԱՆ ԲԺՇԿԱԿԱՆ ԶՆՆՈՒԹՅԱՆ

1. Պարտադիր բժշկական զննության ենթակա են Լեռնային Ղարաբաղի Հանրապետության կառավարության կողմից հաստատված պարտադիր բժշկական զննության ցանկում թվարկված կազմակերպություններում աշխատանքի ընդունվող եւ աշխատող անձինք, ինչպես նաեւ անհատ ձեռնարկատերերը:

2. Բժշկական զննության գործընթացն իրականացնում են բժիշկ-մասնագետները՝ համաձայն Լեռնային Ղարաբաղի Հանրապետության կառավարության կողմից հաստատված պարտադիր բժշկական զննության ցանկի:

3. Պարտադիր նախնական (աշխատանքի ընդունվելիս) եւ պարբերական բժշկական զննություն անցկացվում է Լեռնային Ղարաբաղի Հանրապետության առողջապահության նախարարության կողմից տրված բժշկական օգնության եւ սպասարկման համապատասխան տեսակ իրականացնելու լիցենզիա ունեցող բուժկանխարգելիչ կազմակերպությունում թերապեւտի, մաշկավեներաբանի, իսկ առանձին դեպքերում՝ ատամնաբույժի, քիթ-կոկորդ-ականջի մասնագետի կողմից, ինչպես նաեւ կատարվում են հետազոտություններ տուբերկուլյոզի, աղիքային վարակիչ հիվանդությունների հարուցիչների, որդերի, վեներական ու վարակիչ մաշկային հիվանդությունների նկատմամբ:

4. Բժշկական զննման ժամանակ բժիշկ-թերապեւտը պարտավոր է՝

- հավաքել մանրամասն տվյալներ դիմողի՝ նախկինում տարած վարակիչ հիվանդությունների մասին.

- հետազոտել դիմողի ներքին օրգանների վիճակը.

- դիմողին տալ ուղեգիր անհրաժեշտ հետազոտությունների համար:

5. Բժիշկ-մաշկավեներաբանը պարտավոր է՝

- մանրամասնորեն զննել մաշկի մազածածկ մակերեսը, եղունգները, տեսանելի լորձաթաղանթները, այդ թվում՝ սեռական օրգանները (կանանց մոտ՝ հայելիով).

- շոշափել ավշային հանգույցները.

- նյութ վերցնել միզուկից (տղամարդկանցից՝ քերուկ), վզիկային խողովակից, հեշտոցի հետին կամարից, իսկ ցուցման դեպքում՝ ուղիղ աղիից՝ գոնոկոկերի, տրիխոմոնադի եւ այլ ախտածին մանրէների առկայությունը որոշելու համար.

- հետազոտել արյունը՝ սիֆիլիսի առկայությունը որոշելու համար (միկրոռեակցիա).

- ցուցման դեպքում հետազոտել մաշկը, մազերը, եղունգները՝ սնկային հիվանդությունների, ինչպես նաեւ դժգույն տրիպոնեմայի առկայությունը որոշելու համար:

Բժիշկ-մաշկավեներաբանի բացակայության դեպքում նրան կարող են փոխարինել այն թերապեւտները, մանկաբարձ-գինեկոլոգները, որոնք ունեն համապատասխան պատրաստվածություն:

Մաշկային եւ վեներական հիվանդությունների նկատմամբ հետազոտություններն անցկացվում են Լեռնային Ղարաբաղի Հանրապետության առողջապահության նախարարության կողմից տրված բժշկական օգնության եւ սպասարկման համապատասխան տեսակ իրականացնելու լիցենզիա ունեցող բուժկանխարգելիչ կազմակերպությունում:

6. Բժիշկ-ատամնաբույժը պարտավոր է մանրակրկիտ զննել շրթունքների կարմիր երիզը, բերանի խոռոչը՝ լնդերի բորբոքում, ատամի փտախտ, չհանված արմատ, խուղակ հայտնաբերելու նպատակով:

7. Լաբորատոր հետազոտությունները կատարվում են մանրէակրությունը սիֆիլիսի (էքսպրես մեթոդ), գոնորեայի, տրիխոմոնիազի եւ միզասեռական օրգանների (քսուքներ), ինչպես նաեւ սնկային հիվանդությունների, քոսի (նատիվ պատրաստուկներ) որոշման համար՝ Լեռնային Ղարաբաղի Հանրապետության առողջապահության նախարարության կողմից տրված բժշկական օգնության եւ սպասարկման համապատասխան տեսակ իրականացնելու լիցենզիա ունեցող բուժկանխարգելիչ կազմակերպությունում:

8. Լաբորատոր հետազոտությունները կատարվում են՝

ա) սիֆիլիսի նկատմամբ՝ միայն էքսպրես եղանակով: Արյունը վերցվում է միայն ձեռքի մատից: Արգելվում է արյունը վերցնել երակից.

բ) սուսանակի նկատմամբ՝ միզուկից, արգանդի վզիկից եւ հեշտոցի հետին կամարից վերցված երկու քսուքի մանրադիտակային հետազոտության միջոցով.

գ) սիֆիլիսի եւ սուսանակի առկայության համար պարտադիր զննումների եւ լաբորատոր հետազոտությունների ենթակա են 15-65 տարեկան անձինք, որոնց հետազոտության անհրաժեշտությունը որոշվում է տեղում՝ առողջապահական մարմինների կողմից:

9. Բժիշկ-մասնագետն անհրաժեշտ բժշկական զննություն (հետազոտություններ) կատարելուց հետո, հակացուցումների բացակայության դեպքում, հետազոտվողի սանիտարական (բժշկական) գրքույկում կատարում է նշում աշխատելու թույլտվության մասին:

Սույն կարգի 10-րդ կետում նշված հիվանդությունների ախտորոշման կամ մանրէակրության հայտնաբերման դեպքում արգելվում է աշխատել Լեռնային Ղարաբաղի Հանրապետության կառավարության կողմից հաստատված պարտադիր բժշկական զննության ցանկում նշված կազմակերպություններում ու մասնագիտություններով: Բուժկանխարգելիչ հաստատության ղեկավարն անհապաղ հաղորդում է դրա մասին եւ միաժամանակ գրավոր տեղեկատվություն է ներկայացնում բնակության վայրի՝ Լեռնային Ղարաբաղի Հանրապետության առողջապահության նախարարության պետական հիգիենիկ եւ հակահամաճարակային ծառայության տարածքային կենտրոն: Հիվանդները եւ մանրէակիրները ենթակա են բուժման: Նրանց թույլատրվում է աշխատել միայն բուժման կուրսն ավարտելուց հետո՝ կրկնակի բժշկական զննության արդյունքների հիման վրա:

10. Լեռնային Ղարաբաղի Հանրապետության կառավարության կողմից հաստատված պարտադիր բժշկական զննության ցանկում նշված կազմակերպություններում ու համապատասխան մասնագիտություններով աշխատող անձանց չի թույլատրվում աշխատել մանրէակրության եւ մակաբուծակրության հայտնաբերման ու հետեւյալ հիվանդությունների ախտորոշման դեպքում՝

ա) որովայնային տիֆ, պարատիֆեր, սալմոնելոզ, դիզենտերիա.

բ) հեմինելեպիդոզ, էնտերոբիոզ.

գ) սիֆիլիս՝ վարակիչ փուլում.

դ) սուսանակի բոլոր ձեւերը (միայն բուժկանխարգելիչ եւ մանկական նախադպրոցական հիմնարկների աշխատողներին, որոնք անմիջապես սպասարկում են երեխաներին, անտիբիոտիկներով բուժման շրջանում՝ մինչեւ առաջին հսկողական բացասական պատասխան ստանալը).

ե) բոր.

զ) վարակիչ մաշկային հիվանդություններ՝ քոս, տրիխոֆիթիա, գլխի, հարթ մաշկի եւ եղունգների մակրոսկոպիա, պարշ, մաշկի բաց մասերի ակտինոմիկոզ՝ խոցոտված կամ խուղակով.

է) թոքերի տուբերկուլյոզի բաց ձեւեր, թոքերի ակտիվ տուբերկուլյոզ՝ խորխի մեջ մանրէների բացակայությամբ, արտաթոքային տուբերկուլյոզի ձեւեր՝ խուղակի եւ մեզի մեջ մանրէների առկայությամբ.

ը) դեմքի եւ ձեռքերի գայլախտ.

թ) ամեոբիազ, լյամբլիոզ, բալանտիդիոզ:

Ոչ վարակիչ մաշկային հիվանդություններ (փսորիազ, էկզեմա, ալերգիկ մաշկաբորբեր) ունեցող հիվանդներին աշխատելու թույլտվություն տալու հարցը որոշվում է բժշկական զննության ավարտից հետո՝ բժշկական հանձնաժողովի որոշմամբ՝ ելնելով հիվանդության բնույթից ու աշխատանքի վայրից: Տրիխոմոնոզով հիվանդ կանանց թույլատրվում է աշխատել մանկական նախադպրոցական հիմնարկներում, բուժկանխարգելիչ հաստատությունում՝ կանոնավոր բուժում ստանալու պայմանով:

Թարախային հիվանդություն ունեցող անձանց չի թույլատրվում աշխատել վիրաբուժական, մանկաբարձական, նորածնի պաթոլոգիայի (անհասների) բաժանմունքներում, մանկական սննդի պատրաստման արտադրամասերում ու կետերում, կաթի, մսի, ձկան մշակման, կրեմային հրուշակեղենի արտադրություններում, ինչպես նաեւ հանրային սննդի եւ առեւտրի կազմակերպություններում: Ախտածին ստաֆիլոկոկակիրները ենթակա են առողջացման (սանացիա):

11. Սննդի եւ դրանց հավասարեցված կազմակերպություններում աշխատող անձինք, որոնք աշխատանքի ու բնակության վայրում շփվել են վարակիչ հիվանդների հետ, ենթարկվում են բժշկական հետազոտությունների եւ հսկողության:

12. Որդերով վարակված անձինք ենթակա են բուժման՝ որդակրությունից ազատվելու համար: Որդակրության դեմ բուժման ենթակա անձինք չեն ազատվում աշխատանքից (բացառությամբ՝ հեմինոլեպիդոզը եւ էնտերոբիոզը): Հեմինոլեպիդոզի եւ էնտերոբիոզի դեպքերում բուժված անձինք ստանում են աշխատելու թույլտվություն միայն բուժման կուրսն ավարտելուց հետո՝ կրկնակի բժշկական զննության արդյունքների հիման վրա:

13. Բժշկական զննության որակի համար պատասխանատու է այն իրականացնող բուժկանխարգելիչ հաստատության ղեկավարը:

14. Բժշկական զննությունը (հետազոտությունները) ավարտվելուց հետո բուժկանխարգելիչ հաստատության ղեկավարը համապատասխան կազմակերպությունների ղեկավարներին ուղարկում է սահմանված ժամանակացույցին համապատասխան բժշկական զննության ենթարկված եւ չենթարկված անձանց ցուցակները:

15. Բժշկական զննությունն ավարտվելուց հետո եռօրյա ժամկետում բուժկանխարգելիչ հաստատության ղեկավարն աշխատանքի ընդունվողի կամ աշխատողի անձնական բժշկական գրքույկում կատարում է նշում նրան աշխատելու թույլտվություն տալու մասին:

16. Լեռնային Ղարաբաղի Հանրապետության առողջապահության նախարարության պետական հիգիենիկ եւ հակահամաճարակային ծառայության «Լեռնային Ղարաբաղի Հանրապետության բնակչության սանիտարահամաճարակային անվտանգության ապահովման մասին» Լեռնային Ղարաբաղի Հանրապետության օրենքով սահմանված կարգով հսկողություն է իրականացնում սույն կարգի պահանջների կատարման նկատմամբ:

1. Պարտադիր բժշկական զննության (հետազոտությունների) ենթակա չեն խմորասնկերի, օսլայի արտադրության, բանջարեղենի չորացման, աղի հանքերի ու աղ մշակող կազմակերպությունների, աղացների, էլեւատորների, ձավարեղենի գործարանների, հացահատիկային ամբարների, ալրի, ձավարի, ցորենի պահեստների եւ այլ նմանատիպ կազմակերպությունների, ինչպես նաեւ սպիրտի, օղու, լիկյորի արտադրությունների ու գինեգործական գործարանների աշխատողները, այդ թվում՝ պատրաստի արտադրանքի առաքիչները:

2. Նորածնի, վաղ մանկական եւ նախադպրոցական հասակի երեխաների հետ աշխատելու համար, բացի սույն կարգի 9-րդ կետում թվարկված հիվանդություններից, հակացուցում են նաեւ թոքերի ոչ ակտիվ պալարախտային բնույթի օջախային փոփոխությունները:

3. Ախտածին ստաֆիլոկոկակիրները ենթարկվում են առողջացման:

Ձեւ _____

ԱՆՁՆԱԿԱՆ ՍԱՆԻՏԱՐԱԿԱՆ (ԲԺՇԿԱԿԱՆ ԳՐՔՈՒՅԿ)

_____________________________________________________________________

                              (գրքույկի տիրոջ ստորագրությունը, անունը, ազգանունը)

Կ. Տ.

_____________________________________________________________________

              (կազմակերպության ղեկավարի ստորագրությունը, անունը, ազգանունը)

                                    «____» __________________ 200 _ թ .

Կ. Տ.

                       1. Տվյալներ սանիտարական (բժշկական) գրքույկի տիրոջ մասին

Ազգանունը ___________________________________________________________

Անունը, հայրանունը ____________________________________________________

Ծննդյան ամսաթիվ, ամիսը, տարեթիվը ____________________________________

Բնակության վայրը ____________________________________________________

Մասնագիտությունը ____________________________________________________

Պաշտոնը ____________________________________________________________

Կազմակերպությունը __________________________________________________

ԲԺՇԿԱԿԱՆ ԶՆՆՈՒԹՅԱՆ ԵՆԹԱԿԱ ԱՆՁԱՆՑ

1. Կազմակերպության անվանումը

2. Կազմակերպության գտնվելու վայրը

3. Ցուցակը կազմելու ժամանակացույցը