ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

ք.Ստեփանակերտ

ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԱՇԽԱՐՀԱԳՐԱԿԱՆ ԱՆՎԱՆՈՒՄՆԵՐԻ ՀԱՇՎԱՌՄԱՆ ՈՒ ԳՐԱՆՑՄԱՆ, ՊԵՏԱԿԱՆ ՔԱՐՏԱԴԱՐԱՆԻ ՍՏԵՂԾՄԱՆ ԵՎ ՎԱՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

«Աշխարհագրական անվանումների մասին» Լեռնային Ղարաբաղի Հանրապետության օրենքի 9-րդ հոդվածին համապատասխան` Լեռնային Ղարաբաղի Հանրապետության կառավարությունը ո ր ո շ ո ւ մ է.

Հաստատել Լեռնային Ղարաբաղի Հանրապետության աշխարհագրական անվանումների հաշվառման ու գրանցման, պետական քարտադարանի ստեղծման և վարման կարգը՝ համաձայն հավելվածի:

Կ Ա Ր Գ

Լեռնային Ղարաբաղի Հանրապետության աշխարհագրական անվանումների հաշվառման ու գրանցման, պետական քարտադարանի ստեղծման և վարման

1. Սույն կարգով կանոնակարգվում է Լեռնային Ղարաբաղի Հանրապետության աշխարհագրական օբյեկտների անվանումների /այսուհետև` աշխարհագրական օբյեկտների անվանումներ/ հաշվառման ու գրանցման, պետական քարտադարանի ստեղծման և վարման կարգը:

2. Լեռնային Ղարաբաղի Հանրապետության աշխարհագրական անվանումները /այսուհետև` աշխարհագրական անվանումներ/ հաշվառվում ու գրանցվում են դրանց կանոնավորման, միօրինականացման, օգտագործման, ինչպես նաև նշված անվանումների մասին պաշտոնական տեղեկատվության ստեղծման և տրամադրման նպատակով:

3. Աշխարհագրական անվանումները հաշվառվում և գրանցվում են հայերենով` Լեռնային Ղարաբաղի Հանրապետության անշարժ գույքի կադաստրի պետական կոմիտեի /այսուհետև` կադաստրի պետական կոմիտե/ կողմից: Աշխարհագրական անվանումները հաշվառվում ու գրանցվում են ավանդական /թղթային/ և էլեկտրոնային եղանակներով:

4. Աշխարհագրական օբյեկտներ են`

մայրցամաքները, աշխարհամասերը, օվկիանոսները, ծովերը, լեռները, գետերը, լճերը, դաշտավայրերը, բարձրավանդակները և այլ ֆիզիկաաշխարհագրական օբյեկտները,

պետությունները, դրանց վարչատարածքային միավորները և գործառական տարածքները,

երկաթուղային կայարանները, օդանավակայանները, ջրամբարները, ջրանցքները և այլ ինժեներատեխնիկական կառույցները,

փողոցները, հրապարակները, պուրակները, զբոսայգիները և այլ ներբնակավայրային օբյեկտները:

5. Հաշվառման համար հիմք են հանդիսանում`

ա/ ԼՂՀ տարածքի` 1:10000, 1:25000, 1:50000, 1:100000, 1:200000, 1:500000 և 1:1000000 մասշտաբի տեղագրական քարտեզները և 1:500, 1:1000, 1:2000 և 1:5000 մասշտաբի տեղագրական հատակագծերը,

բ/ ԼՂՀ աշխարհագրական օբյեկտների անվանումների պաշտոնական տեղեկատուներում /գազետիրներ/, ընդհանուր և թեմատիկ բառարաններում, ցանկերում և ցուցակներում ընդգրկված աշխարհագրական անվանումները.

գ/ օրենքով և այլ իրավական ակտերով սահմանված աշխարհագրական անվանումները.

դ/ տեղագրական, աշխարհագրական, երկրագիտական, ազգագրական, պատմական և այլ ուսումնասիրություններում, գիտական աշխատություններում օգտագործված աշխարհագրական անվանումները.

ե/ քարտեզագրական աշխատանքների կատարման ժամանակ բացահայտված աշխարհագրական անվանումները.

զ/ դաշտային հետազոտությունները, տեղազննման աշխատանքները, բանավոր և գրավոր հարցումները:

6. Հաշվառման արդյունքում ստացված տվյալները լրացվում են համապատասխան ձևաթղթերում, որոնց ձևը սահմանվում է կադաստրի պետական կոմիտեի կողմից: Լրացված հաշվառման ձևաթղթերը ներկայացվում են ԼՂՀ կառավարության կողմից ստեղծված ԼՂՀ աշխարհագրական օբյեկտների անվանակոչումների և անվանափոխումների մասնագիտական հանձնաժողով /այսուհետև` հանձնաժողով/` հաշվառված աշխարհագրական օբյեկտների անվանումների գրանցման մասին եզրակացություն ստանալու համար:

7. Գրանցված աշխարհագրական անվանումներն արտացոլվում են 1:25000 կամ 1:50000 մասշտաբի տեղագրական քարտեզների թերթերի կամ դրանց պատճենների վրա: Եթե քարտեզի մասշտաբը հնարավորություն չի տալիս արտացոլելու տվյալ վայրի բոլոր աշխարհագրական անվանումները, ապա թույլատրվում է օգտագործել սույն կարգի 5-րդ կետի «ա/» ենթակետում նշված տեղագրական քարտեզները և հատակագծերը:

8. Գրանցման մատյանները վարվում են ըստ աշխարհագրական օբյեկտների տեսակների:

9. Գրանցման մատյանում գրանցվում են աշխարհագրական անվանումների մասին հետևյալ տվյալները`

ա/ աշխարհագրական օբյեկտի անվանումը,

բ/ աշխարհագրական օբյեկտի գտնվելու վայրը,

գ/ աշխարհագրական օբյեկտի անվանման ծածկագիրը,

դ/ աշխարհագրական օբյեկտի անվանման գրանցման թվականը /տարեթիվը, ամիսը, ամսաթիվը/,

ե/ աշխարհագրական օբյեկտի անվանակոչման և անվանափոխման համար հիմք հանդիսացող փաստաթղթի անվանումը,

զ/ աշխարհագրական օբյեկտի աշխարհագրական կոորդինատները,

է/ քարտեզի այն թերթի /թերթերի/ համարը /համարները/, որի /որոնց/ վրա պատկերված է տվյալ աշխարհագրական օբյեկտը,

ը/ այլ տվյալներ:

10. Աշխարհագրական անվանումների հաշվառման ու գրանցման աշխատանքները կատարվում են անընդհատ` հաշվառման և գրանցման տվյալների հիման վրա` կատարված փոփոխություններն արտացոլելով հաշվառման ձևաթղթերում, գրանցման մատյաններում և քարտեզներում /հատակագծերում/:

11. Աշխարհագրական օբյեկտների անվանումների հաշվառման և գրանցման տվյալները հավաքվում են կադաստրի պետական կոմիտեի տեղեկատվական բանկում:

12. Աշխարհագրական օբյեկտների անվանումների մասին տեղեկատվության տրամադրումը բաց է:

Աշխարհագրական օբյեկտների անվանումների մասին տեղեկատվությունից կարող են օգտվել ԼՂՀ օրենսդիր, գործադիր, դատական իշխանության, տեղական ինքնակառավարման մարմինները, իրավաբանական և ֆիզիկական անձինք, օտարերկրյա անձինք և քաղաքացիները:

13. ԼՂՀ աշխարհագրական անվանումների պետական քարտադարանը /այսուհետև` պետական քարտադարան/ բաղկացած է յուրաքանչյուր աշխարհագրական օբյեկտի վերաբերյալ հետևյալ փաստաթղթերից`

ա/ տեղագրական քարտեզի հատվածի պատճեն` տվյալ աշխարհագրական օբյեկտի սահմաններով,

բ/ աշխարհագրական օբյեկտի անվանումն սահմանող փաստաթղթեր,

գ/ հանձնաժողովի առաջարկություններ ու եզրակացություններ,

դ/ հաշվառման ձևաթղթեր:

Փաստաթղթերն ամփոփվում են ըստ համայնքների:

14. Հաշվառման ձևաթղթերում, գրանցման մատյաններում և պետական քարտադարանում պարունակող տվյալները պահպանվում, թարմացվում ու տրամադրվում են ավանդական /թղթային/ և էլեկտրոնային եղանակներով:

15. Պետական քարտադարանի ստեղծման և վարման համար անհրաժեշտ տեղեկատվության տիրապետող ֆիզիկական և իրավաբանական անձինք կադաստրի պետական կոմիտեին տրամադրում են անհրաժեշտ տվյալներ` համաձայն կնքված պայմանագրի:

16. Աշխարհագրական օբյեկտների անվանումների մասին պաշտոնական տեղեկատվությունը նախապատրաստվում է պետական քարտադրանի տվյալների հիման վրա և հրատարակվում ԼՂՀ աշխարհագրական օբյեկտների անվանումների պաշտոնական տեղեկատուի /գազետիր/, բառարանների և տեղեկատուների տեսքով: