ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ք. Ստեփանակերտ

«Իրավական ակտերի մասին» Լեռնային Ղարաբաղի Հանրապետության օրենքի 71-րդ հոդվածին համապատասխան` Լեռնային Ղարաբաղի Հանրապետության կառավարությունը ո ր ո շ ու մ է.

1. Լեռնային Ղարաբաղի Հանրապետության կառավարության 2007 թվականի նոյեմբերի 30-ի «Լեռնային Ղարաբաղի Հանրապետության ոստիկանության «Ճանապարհային ոստիկանություն» ծառայության կանոնադրությունը հաստատելու մասին» N 565 որոշման հավելվածում կատարել հետևյալ փոփոխությունները և լրացումը.

1) 15-րդ կետում՝

ա. «ա» ենթակետի «, ներկայացնում նրա շահերն ու կնքում է գործարքներ» բառերը փոխարինել «և ներկայացնում նրա շահերը» բառերով,

բ. «բ» ենթակետի «տնօրինում է ճանապարհային ոստիկանության գույքը, այդ թվում` ֆինանսական միջոցները» բառերը փոխարինել «օգտագործում է ճանապարհային ոստիկանությանը հանձնված գույքը» բառերով,

գ. «է» ենթակետի «տալիս է» բառերը փոխարինել «իր լիազորությունների սահմաններում ստորագրում է անհատական հրամաններ, տալիս» բառերով,

դ. «ը» ենթակետի «Լեռնային Ղարաբաղի Հանրապետության տարածքից դուրս գործուղելու» բառերը փոխարինել «գործուղելու, արձակուրդ տրամադրելու» բառերով,

ե. «ը» ենթակետից հետո լրացնել հետևյալ բովանդակությամբ նոր` «ը.1» ենթակետ.

«ը.1. ճանապարհային ոստիկանության ծառայողներին իր իրավասության սահմաններում խրախուսում կամ ենթարկում է կարգապահական տույժի.».

2) 17-րդ կետի «է» ենթակետը շարադրել հետևյալ խմբագրությամբ.

«է) առաջարկություններ են ներկայացնում ճանապարհային ոստիկանության պետին՝ ենթակա ծառայողներին խրախուսելու կամ կարգապահական տույժի ենթարկելու վերաբերյալ.».

3) 18-րդ կետում «,ինչպես նաև սույն կանոնադրության 19-րդ կետով նախատեսված» բառերը փոխարինել «և» բառով.

4) 19-րդ և 20-րդ կետերը շարադրել հետևյալ խմբագրությամբ.

«19. Ճանապարհային ոստիկանության արտաբյուջետային ֆոնդը կազմավորվում է «Ճանապարհային երթևեկության անվտանգության ապահովման մասին» Լեռնային Ղարաբաղի Հանրապետության օրենքի 38-րդ հոդվածի 2-րդ մասով նախատեսված դեպքերում արտաբյուջետային ֆոնդ մուտքագրվող գումարներից:

20. Ճանապարհային ոստիկանության արտաբյուջետային ֆոնդը ծախսվում է «Ճանապարհային երթևեկության անվտանգության ապահովման մասին» Լեռնային Ղարաբաղի Հանրապետության օրենքի 38-րդ հոդվածի 3-րդ մասի «ա»-«ե» կետերով նախատեսված ուղղություններով: Ճանապարհային ոստիկանության արտաբյուջետային ֆոնդը կարող է ծախսվել նաև հետևյալ ուղղություններով.

ա) ոստիկանության համար գույքի (ապրանքների), աշխատանքների և ծառայությունների ձեռքբերում,

բ) ոստիկանության ծառայողների սոցիալական վիճակի բարելավում և նյութական խրախուսում,

գ) ոստիկանության շենքերի, շինությունների, ծառայության պայմանների բարելավում:».

5) ուժը կորցրած ճանաչել 21-րդ, 22-րդ և 23-րդ կետերը:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը: